Ayuw ni Fan ko Piin nib Pin ni Yima Gafgownagrad
“ BOKUM milyon e ppin nge buliyel u ga’ngin yang e fayleng ni kan gafgownagrad. Gur bagayad, fa? Mu guy fan ni ma lemnagem Got ma baadag ni ngam par ndabi buch ban’en rom, nge n’en nra rin’ ko piin yad ma gafgownag e piin nib pin.”
Ireray e thin ni bay u tabolngin fare article ni bay ko jw.org ni thin ni Meriken ni kenggin e “Women’s Safety—The Bible’s Perspective.” Bay ba link u tungun e re article ney nrayog ni ngam downloadnag bangi babyor riy nrayog ni ngam printnag mag t’et’ar nge yib bangi tract riy ni aningeg e page. I yog reb e walag nib pin ni ka nog Stacy ngak ni ma par u Meriken ni gaar, “Gu printnag yu yang e re tract ney, ma gamow fek reb e walag nib pin nga bangi ban’en ni yima ayuweg e piin nib pin riy ni yibe gafgownagrad ni bay ko gin ma machib e ulung rog riy.”
Bay be’ nib pin ni ma maruwel u rom ni fith ngomow ko rayog ni ngan pi’ yu yang e re tract ney ngak ni nge wereg ko piin yad ma par u rom fa dabiyog. Bochan e re n’ey, ma aram min pi’ 40 yang e pi tract ney ngak ni kub muun ngay 30 yang e jw.org contact card. Boch nga tomuren me yog e en nib ga’ ko gi n’em ni baadag ni nge dag e Pi Mich ngak e pi ppin ni yad ma par u rom rogon ni ngar filed e Bible.
Ki yan Stacy nge l’agruw e walag nib pin nga yugu bang ni ku yima ayuweg e piin nib pin riy ni yibe gafgownagrad, ma lal yang e pi tract nem nni fek u rom mu kun ning boch. Bay bagayad e piin ma maruwel u rom ni gaar, “Gi babyor ney e ra ayuweg e piin nib pin ni yad ma par u roy.” Ki gaar, “Ba t’uf e re n’ey romad.” Nap’an ni sul fapi walag nib pin bayay, ma bay boch e ppin u rom ni yad baadag ni ngar nanged rogon e fol Bible ni yima tay, ma bay l’agruw i yad nrognew ni yow baadag ni ngar unew ko bin migid e muulung ni yira tay ko Tagil’ e Liyor ko Sabado ara Madnom.
I gaar Stacy: “Ri gamad be ngat nga rogon feni ri baadag e girdi’ ni ngar beeged e re article ney nrib manigil. Yira printnag min t’et’ar, ma rayog ni ngan fanay ni ngan weliy murung’agen Gil’ilungun Got ngak e piin nib pin ni yima gafgownagrad. Rib manigil ni kug guyed nib felfelan’ e girdi’ ngay ni ngar beeged e pi thin nem. Ri gamad ba felfelan’ ngay ni ngguyed rogon nra ayuwegmad Jehovah u nap’an ni gamad be ulul ni nggu weliyed fare thin nib fel’ ngak e pi ppin ney.”