Deer ko Piin Ma Beeg
Mang e tin be “finey” Jehovah ni bayi tay nga lan gum’irchaen e pi nam ndab ki n’uw nap’an?
Be weliy e Revelation 17:16, 17 murung’agen e ngiyal’ nra tabab fare gafgow nib ga’ ni gaar: “Fa ragag i gagey ni kam guy nge fare gamanman e bay ra fanenikayed fare pin ni ma chuway’ ngak; bay ra feked urngin ban’en rok mi yad pag ndakuriy e mad u daken; ma bay ra longuyed e ufin u downgin mi yad li’ ko nifiy ngem’. Ya ke ta’ Got nga lan gum’ircha’rad ni ngar ngongliyed e tin ni be finey, ni nge taareban’rad ngar pied gelngirad ngak fare gamanman ni nge yib gelngin nge gagiyeg.” Kafram e u dogned ko pi babyor rodad ni tin be “finey” Jehovah nra tay nga lan gum’irchaen e pi nam e aram e ngar thanged e pi yurba’ i teliw ni googsur.
Machane ba t’uf ni ngad thilyeged rogon ni gad be weliy e re n’ey. Tin be “finey” Jehovah nra tay nga lan gum’irchaen e pi nam e aram e ngar pied “gelngirad ngak fare gamanman.” Ere ngad weliyed e fulweg ko pi deer ni baaray ya nge yag nda nanged rogon nra lebug e re n’ey.
Mini’ e piin kan weliy murung’agrad ko re yiiy ney? “Fare pin ni ma chuway’ ngak” e ku yima yog “Babylon nib Gilbuguwan” ngak. Be yip’ fan e pi yurba’ i teliw ni googsur u fayleng. Fare “gamanman nib row” e be yip’ fan fare ulung nni sunmiy ni nge awnag e gapas ni tabab ko duw ni 1919, mu unog ni League of Nations ma chiney e yima yog ni United Nations. (Rev. 17:3-5) Fa ‘ragag i gagey’ e be yip’ fan urngin e am ni be ayuweg fare gamanman.
Mang rogon fare pin ni ma chuway’ ngak ko fare gamanman nib row ramaen? Kab kafram i yib ni “ke par” e re ppin ney nga daken e re gamanman ney ni be ayuweg, ma be guy rogon ni nge suruy laniyan’, miki gagiyegnag e pi n’en be rin’.
Mang e ra buch ko fare pin ni ma chuway’ ngak? Fare gamanman nge fa ragag i gagey ni yad ma ayuweg e “bay ra fanenikayed fare pin ni ma chuway’ ngak.” Yad ra dag gelngin nri yad be fanenikay ni aram e yad ra chuweg e flaab rok mar gagiyelnaged gelngin feni kireb. Ku yad ra rin’ e n’en ke dugliy Jehovah nra buch rok ni aram e yad ra thang ndariy n’umngin nap’an. (Rev. 17:1; 18:8) Aram e ngiyal’ nra mus e pi yurba’ i teliw ni googsur. Machane u m’on nra buch e re n’ey, ma ra k’aring Jehovah e pi nam ni ngar rin’ed ban’en ndawori buch bayay.
Mang e ra k’aring Jehovah e pi nam ni ngar rin’ed? Ra tay e “tin ni be finey” nga lan gum’irchaen fa ragag i gagey ni aram e ngar “pied gelngirad nge mat’awrad ngak fare gamanman [nib row ramaen]” ni aram fare United Nations. (Rev. 17:13) Am lemnag e n’en be yip’ fan e re n’ey. Ra dugliy e pi am ko girdi’ ni ngar pied gelngirad nge mat’awrad ko fare gamanman ni yad rorad, fa? Danga’! Be tamilangnag fare yiiy ni Got e ra k’aringrad ni ngar rin’ed e re n’ey. (Prov. 21:1; mu taarebrogonnag ko Isaiah 44:28.) Ere gur, re n’ey e ra buch ni buchuuw ma buchuuw? Danga’! Ya ba tamilang ni ban’en nra buch nib tomgin. Nap’an ni yira pi’ gelngin fare gamanman, ma aram e ra rin’ e n’en ke dugliy Jehovah ni nge buch ko pi yurba’ i teliw ni googsur ni aram e nge thang urngin raba’ e teliw ni googsur ni bay.
Ere mang e gad manang nra buch? Susun e dab da lemnaged ni yira yog ko news ni be tabab e am ni buchuuw ma buchuuw ni ngar yoornaged e ayuw ni yad be pi’ ko fare United Nations. Ya baaray e n’en ni gad manang nra buch: Ba tomgin nra tay Jehovah nga lan gum’irchaen e pi nam ni ngar pied gelngirad ngak fare gamanman. Nap’an nra buch e re n’ey, ma aram e kad nanged ni be n’en ni nge tabab fare gafgow nib ga’. Machane chiney ndawori buch e re n’ey e “nguud pired ni gadad be od ma ba tamilangan’dad,” ya dabki n’uw nap’an ma bayi thil boch ban’en nib tomgin!—1 Thess. 5:6.