“Nguum Pired ni Gimed Taab Girdi’” ni Gelngin Got nib Thothup e Ke Pi’ Ngomed

“Taab girdi’” ara taareban’ ni kad ted e ke yag u daken “gelngin Got nib thothup.” Re n’ey e be yip’ fan nre taareban’ ney e aram bang u wom’engin gelngin Got nib thothup. Machane i yog Paul nib t’uf ni ngan maruweliy ni nga i par ni bay e taareban’ u thiliy. Mini’ e ba t’uf ni nge rin’ e re n’ey? Ra reb e Kristiano ma thingari rin’ e n’en nib milfan ngak ya nge yag ni ‘nguud pired ni gadad taab girdi’ ni fare Kan ni Thothup [“gelngin Got nib thothup,” NW] e ke pi’ ngodad.’

Ra ngan susunnag ma bod ni ke pi’ be’ reb e karrow nib beech ni ngam fanay. Ere mini’ e ba milfan ngak ni nga i ayuweg e re karrow nem? Ba tamilang e fulweg riy. Faanra kireb fare karrow ni bochan e da um ayuweg, ma dabiyog ni nga mog ni kireb rok faen ni pi’ ngom.

Ku arrogon ni yugu aram rogon ni taareban’ ni bay u thildad e ba tow’ath ni ke pi’ Got ngodad, machane ra bagadad mab milfan ngak ni nge ayuweg e re taareban’ nem ni nga i par u thildad. Faanra de gapas thildad reb e walag, mab t’uf ni ngad fithed gadad ni nge lungudad, ‘Gu be rin’ e n’en nib milfan ngog ya nge yag ni ngaud pared ni gad taab girdi’ ni gelngin Got nib thothup e ke pi’ ngodad ni aram e nggu pithig e magawon ni bay u thilmow, fa?’

‘MU ATHAMGILIY’ NI NGA I PAR NI BAY E TAAREBAN’

I yog Paul ni bay yu ngiyal’ nrayog nib t’uf ni ngad maruwelgad nib gel ya nge yag ni ngad pared ni gad taab girdi’ ni gelngin Got nib thothup e ke pi’ ngodad. Rayog ni nge buch e re n’ey u nap’an ke kirebnag reb e walag lanin’dad. Machane gur, faanra ngad pared ni bay e taareban’ u thildad, ma aram e be yip’ fan ni gubin ngiyal’ nib t’uf ni nga darod da guyed facha’ ngad weliyed fare magawon u taabang, fa? Danga’. Mu fithem ni nge lungum, ‘Faan gu ra rin’ e re n’ey, ma ra puf e re magawon nem fa ra gel boch e ubchiya’ riy?’ Bay yu ngiyal’ ni kab fel’ ndab kud lemnaged fa reb e ngad n’aged fan.​—Prov. 19:11; Mark 11:25.

Ere ‘nge bagadad mi i ayuweg bagadad ko meewar rok u fithik’ e runguy’ ni bod ni yoloy apostal Paul. (Efe. 4:2) Bay ba ken e babyor ni yog nre thin ney e rayog ni ngan pilyeg ni “nge m’agan’um nga rarogorad.” Re n’ey e be yip’ fan ni nge m’agan’dad ngay ni pi walagdad e yad bogi tadenen, maku arrogodad. Riyul’ ni gad be guy rogon ni nga don’ed nga dakendad e ‘bin nib beech i gadad.’ (Efe. 4:​23, 24) Machane dariy bagadad nrayog ni nge rin’ e re n’ey nrib fel’ rogon. (Rom. 3:23) Faanra m’agan’dad ko re n’ey, ma aram e ra mom ni nge bagadad ma i gum’an’ u puluwon bagadad, ma be n’ag fan e kireb rok ma aram e rayog ni ‘nguud pired ni gadad taab girdi’ ni fare Kan ni Thothup [“gelngin Got nib thothup,” NW] e ke pi’ ngodad.’

Faan gad ra n’ag fan ma dab kud lemnaged e pi n’en ke rin’ yugu boch e girdi’ ndubdad, ma aram e ra par e ulung ni bay ‘fare gapas riy ni ir e ke m’agdad nga taabang.’ Fare bugithin ni Greek ni kan pilyeg ni “ke m’agmed nga taabang” ko Efesus 4:3 e kan pilyeg ni “m’agan e ul’ul” ko Kolose 2:19. Pi m’agan e ul’ul ni bay u dowey e aram e n’en ma puthuy reb e yil nga reb. Ku arrogon ni gapas nge t’ufeg ni gad ma dag ngak pi walagdad e aram e n’en ma taydad ni gad ba chugur ngorad ni yugu aram rogon nrayog ni nge sum e magawon u thildad.

Ere nap’an nra rin’ reb e walag ban’en ndabum ara ke k’aring e damumuw ara kankanan’ ngom, mag guy rogon ni ngam dag e runguy ngak ko bin yigoo thibngin e ngaum lemnag. (Kol. 3:12) Dabisiy ni mus ngom ni ku bay ba ngiyal’ ni kam rin’ ban’en ndabun be’ ni bochan e gubin e girdi’ ndawor ra flontgad. Faanra dab mu pagtalin e re n’ey, ma ra ayuwegem ni ngam rin’ e n’en nib milfan ngom ya nge yag ni ‘nguud pired ni gadad taab girdi’ ni fare Kan ni Thothup [“gelngin Got nib thothup,” NW] e ke pi’ ngodad.’