Nge Bagadad Me Pi’ e Athamgil Ngak Bagadad

Nap’an ni gad ra rin’ e pi walag boch ban’en u taabang, ma aram e ra bagadad ma be pi’ e athamgil nga laniyan’ bagadad. Machane re n’ey e gathi kemus ni ma buch u nap’an ni gad bay u taabang. Be yog e Bible ni nge bagadad me pi’ e athamgil nga laniyan’ bagadad me bagadad me gelnag e michan’ rok bagadad. (Rom. 1:​11, 12) Ere uw rogon nrayog ni ngad rin’ed e re n’ey?

Mu pi’ e athamgil nga laniyan’ yugu boch e girdi’ u daken e thin rom. Bod nnap’an ni ga be pi’ e fulweg u nap’an e muulung, mag weliy murung’agen Jehovah, nge Thin rok, nge girdi’ rok ko bin ni kemus ni yigoo gur e ngam weliy murung’agem. Ma nap’an ni gad be sabethin e pi walag, ma rayog ni ngad mel’eged ni ngad weliyed murung’agen boch ban’en nrayog ni nge gelnag e michan’ rorad.

Mu pi’ e athamgil nga laniyan’ yugu boch e girdi’ u daken e tin ga ma dugliy nge ngongol rom. Bod ni bay boch e walag ni kar dugliyed ni ngar ululgad ko pigpig ni yad be tay u polo’ e tayim rorad ni yugu aram rogon ni yad be mada’nag e magawon. Ma bay boch i yad ni gubin ngiyal’ ni yad ma un ko muulung ni yima tay u lan e wik ni yugu aram rogon ni ke aw parowrad ni bochan e boor ban’en ni yad ma rin’ u tabon e maruwel rorad, ara bay ba mit e m’ar nib ubchiya’ rorad.

Ga ma pi’ e athamgil nga laniyan’ e pi walag u daken e thin nge ngongol rom, fa? Ma ga ma tay fanam i yan ko n’en ma yog e pi walag nge pi n’en yad ma rin’ ni ngar pied e athamgil nga lanin’um, fa?