Rayog ni Nge Ayuwegem Fare Babyor ni Job u Nap’an ni Ngam Fonownag Be’

1-2. Mang e ba mo’maw’ ni nge rin’ fa dalip i fager rok Job nge Elihu?

NAP’AN ni mul gubin e flaab rok Job u pa’, ma boor e girdi’ ko gin ma par riy nrung’aged murung’agen e n’en ke buch rok. Nap’an ni rung’ag dalip i fager rok ni ka nog Elifaz, nge Bildad, nge Zofar ngorad murung’agen e n’en ke buch rok, ma aram mar milekaggad nga Uz ni ngar fal’eged laniyan’. Machane ra gingad ko n’en nra guyed u nap’an nra tawgad ngaram.

² Am lemnag e n’en ni buch. Ke gafgow Job ni bochan e boor ban’en nib ga’ fan u wan’ ni ke mul u pa’. Dakuriy e saf rok, nge garbaw, nge kamel, nge donkey. Kan li’ pi fak nge yooren e pi tapigpig rok kar m’ad. Ma ke puth fare naun ni yim’ pi fak u langgin. Tomuren ni buch urngin e pi n’ey, me m’ar Job nrib ubchiya’. Ga’ngin yang i downgin ni ke sug e lot riy nrib amith. Kab palog fa dalip i pumoon mar guyed Job ni ke par nga fithik’ e awat ni kari kireban’. Ere mang e rrin’ed? Medlip e rran nra pared nda rogned ban’en ko re moon ney ni kari gafgow ko amith. (Job 2:​12, 13) Nap’an ni yad bay u rom, me taw be’ nib pumoon nib bitir ngorad ni ka nog Elihu ngak me yib i par nib chugur ngorad. Tomur riy, me tabab Job ko numon ni be yog ni kab fel’ ni faan gomanga dan gargeleg ma be athapeg ni manga yigi yim’. (Job 3:​1-3, 11) Ere ba tamilang nib t’uf ni ngan ayuweg Job! N’en nra yog e pi pumoon ney nge rogon nrogned e ra micheg ko riyul’ ni yad e tin riyul’ e fager rok Job fa danga’, maku be micheg ko riyul’ ni yad be lemnag rarogon Job fa danga’.

3. Mang e gad ra weliy ko re article ney?

³ I pow’iy Jehovah Moses ni nge yoloy e n’en ni yog fa dalip i fager rok Job nge Elihu nge n’en nrin’ed. Sana ra yib ngan’um ni Elihu e yog e n’en baadag Jehovah ni nge yog. Machane Elifaz e yog boch e thin nsana ke thagthagnag reb e kan nib kireb nga laniyan’ ni nge yog. (Job 4:​12-16; 33:​24, 25) Aram fan ni yugu aram rogon ni bay boch e fonow u lan fare babyor ni Job nrib manigil, machane ku bay boch e fonow riy nrib kireb. Reb e ban’en nib ga’ fan nrayog ni nge yib angin ngodad ko fare babyor ni Job e rogon nrayog ni nge ayuwegdad u nap’an nra t’uf ni ngad fonownaged be’. Som’on e gad ra weliy e n’en nib kireb ni rin’ fa dalip i fager rok Job. Ngemu’ ma gad weliy e n’en nib fel’ ni rin’ Elihu. Ku gad ra weliy rogon nsusun e ra yib angin fare babyor ni Job ngak piyu Israel nge rogon nrayog ni nge yib angin ngodad e ngiyal’ ney.

ROGON E FONOW NI PI’ FA DALIP I PUMOON NI FAGER ROK JOB

4. Mang fan nde yag ni nge rin’ fa dalip i fager rok Job e n’en nra lemnaged ko som’on? (Kum guy e sasing.)

⁴ Be yog e Bible ni yan dalip i pumoon ni fager rok Job ra guyed ni “ngar fal’eged laniyan’” u tomuren nrung’aged murung’agen urngin e gafgow ni ke yib ngak. (Job 2:11) Machane de yag ni ngar rin’ed e re n’ey. Mang fan? Baaray dalip i fan. Som’on e ra gurgad ngar turguyed boch ban’en nde puluw u murung’agen Job. Bod nra lemnaged ni yibe gechignag Job ni bochan e ke denen.a (Job 4:7; 11:14) Bin migid e yooren e fonow nra pied e de yag ni nge ayuweg Job, maku dar pied u fithik’ e sumunguy, miki kirebnag laniyan’. Bod ni yad gubin nrogned boch e thin nib fel’ lingan, machane de riyul’. (Job 13:12) L’agruw yay ni yog Bildad ngak Job ni kaygi yoor ban’en ni be weliy. (Job 8:2; 18:2) Ma Zofar e yog nib “pinat” Job. (Job 11:​12, BT) Bin dalip e yugu aram rogon ni gathi yad be tolul ngak Job u nap’an ni yad be non ngak, machane n’en nrogned nge rogon nrogned e k’aring ni nge lemnag ni ke rin’ ban’en nib kireb ma danir t’ufeg, ma kub moning lingan, mu kur t’ared e thin nga daken. (Job 15:​7-11) Bin riyul’ riy e kab ga’ fan u wan’rad ni ngar micheged nib kireb e rok Job ko bin ngar fal’eged laniyan’ ara ra gelnaged e michan’ rok.

5. Mang wenegan e fonow ni pi’ fa dalip i fager rok Job?

⁵ De yib angin e fonow ni pi’ fa dalip i fager rok Job. Ya ri kireb laniyan’ Job ko thin nrogned. (Job 19:2) Ere rayog ni ngam nang fan ni lemnag nib t’uf ni nge micheg nib fel’ e rok. Re n’ey e k’aring ni nge dabki puluw rogon e lem ni be tay me yog boch ban’en susun e dabi yog. (Job 6:​3, 26) De puluw e lem ni i tay fa dalip i fager rok Job ko lem rok Jehovah, maku dar daged e runguy ngak Job. Bochan e re n’ey, ma aram me fanayrad Satan ni ngar muleged laniyan’ Job. (Job 2:​4, 6) Uw rogon nrayog ni nge yib angin e re n’ey ni buch ngak piyu Israel, ma uw rogon nrayog ni nge yib angin ngodad e ngiyal’ ney?

6. Mang e susun nrayog ni nge fil e pi pumoon ni yad ba piilal u Israel ko n’en nde fel’ ni rin’ fa dalip i fager rok Job?

⁶ Rogon nsusun e ra yib angin ngak piyu Israel. Nap’an ni pi’ Jehovah boch e motochiyel ngak piyu Israel, me mel’eg boch e pumoon ni yad ba piilal ni ngaur pufthinnaged e girdi’ rok, ma yad be ayuwegrad ni ngar folgad ko pi motochiyel rok. (Deut. 1:​15-18; 27:1) Pi pumoon nem e ba t’uf ni ngar fal’eged e motoyil u m’on ni ngar pied e fonow ara ra turguyed e n’en ngan rin’ ngak be’. (2 Kron. 19:6) Kub t’uf ni ngar fithed boch e deer ko bin ngar lemnaged ni yad manang gubin ban’en u murung’agen ban’en ni ke buch. (Deut. 19:18) Ba t’uf ndab rogned e thin nib gel ngak e piin kar bad ra ninged e ayuw ngorad. Mang fan? Ya faanra kankanan’rad ma rayog ni ngar k’aringed be’ ndab ki weliy laniyan’ ngorad. (Ex. 22:​22-24) Pi pumoon ni yad ba piilal u Israel nra filed murung’agen Job e susun e bay ban’en nrayog ni ngar filed rok.

7. Ku mini’ e rayog ni ngar pied e fonow u Israel, ma uw rogon nrayog ni nge yib angin chepin Job ngorad? (Proverbs 27:9)

⁷ Riyul’ ni gathi kemus ni pi pumoon ni yad ba piilal u Israel e rayog ni ngar pied e fonow. Ya demtrug be’ u Israel ni kab fel’ yangaren, ara ke pilibthir, ara ir be’ nib pumoon, ara be’ nib pin nrayog ni nge fonownag reb e fager rok nib t’uf ni ngan ayuweg ni nge mon’og ko liyor ni be tay ara nge yal’uweg e ngongol rok. (Ps. 141:5) Fonow ni aray rogon ni kan pi’ u fithik’ e yul’yul’ e aram e pow ko bin riyul’ e fager. (Mu beeg e Proverbs 27:9.b) N’en nib kireb ni rin’ fa dalip i fager rok Job e susun e nge dag e kanawo’ nib manigil nrayog ni nge folwok piyu Israel riy u rogon e n’en ndab rogned ma dab rrin’ed u nap’an ni yad be fonownag be’.

8. Mang e susun ni ngad siyeged u nap’an ni gad be pi’ e fonow? (Kum guy e sasing.)

⁸ Rogon nrayog ni nge yib angin ngodad. Gadad e piin Kristiano e gad baadag ni ngad ayuweged pi walagdad u nap’an ni yad be mada’nag e magawon. Machane ra ngad rin’ed e re n’ey, ma thingar dab da rin’ed e n’en ni rin’ fa dalip i fager rok Job. Som’on e ba t’uf ni ngad nanged gubin ban’en u murung’agen e n’en ke buch u m’on ni ngad pied e fonow. Bin migid e ba t’uf ni nge puluw e fonow rodad ko tin riyul’ ni bay ko Thin rok Got, ko bin ngad weliyed e n’en gad be lemnag ni bod e n’en ni rin’ Elifaz ni boor yay. (Job 4:8; 5:​3, 27) Bin dalip e thingar dab dogned e thin nib gel ara thin nib kireb. Dab mu pagtalin ni yog Elifaz nge fa gal pumoon ni yow ba muun ngak boch ban’en nib riyul’; ya bay boch e thin nrogned ni ki sul be’ u daken ni yoloy boch e babyor u Bible. (Mu taarebrogonnag e Job 5:13 ko 1 Korinth 3:19.) Yugu aram rogon ma yooren e n’en nrogned u murung’agen Got e de riyul’ miki kirebnag laniyan’ Job, ere aram fan ni yog Jehovah nde riyul’ e n’en rogned. (Job 42:​7, 8) Fonow nib manigil ni yima pi’ e dariy ba ngiyal’ nra m’ug riy ni Jehovah e ir be’ nib kireb ara k’aring e pi tapigpig rok ni ngar lemnaged ndabiyog ni ngan t’ufegrad. Ere chiney e ngad weliyed e n’en nrayog ni ngad filed rok Elihu.

ROGON NI FONOWNAG ELIHU JOB

9. Mu weliy fan nib t’uf ni ngan ayuweg Job u nap’an ni tal fa dalip i fager rok nda kur nonad nge rogon ni ayuweg Jehovah.

⁹ Ba n’uw nap’an ni luag Job nge fa dalip i pumoon ni fager rok e thin. Boor ban’en nra weliyed ya 28 e guruy u lan e Bible ni bay e thin rorad riy. Ma yooren e n’en nrogned e be m’ug riy ni ke kankanan’rad ma kur damumuwgad. Dariy e maruwar riy ni aram fan nde fel’ laniyan’ Job! Kab t’uf ni ngan fal’eg laniyan’ min yal’uweg. Ere uw rogon ni ayuweg Jehovah? I fanay Elihu ni nge fonownag. Machane mang fan nde gurnag Elihu ir nge non? I yog ni gaar: “Gub bitir, me gimed ba piilal, ere ug rus ni nggog ngomed e n’en ni gu be lemnag.” (Job 32:​6, 7, BT) I tamilang u wan’ Elihu e n’en ke tamilang u wan’ boor e girdi’ e ngiyal’ ney ni aram e: Piin pilibthir e yad ba gonop ni bochan e ba n’uw nap’an ni kar pared, ma ka boor ban’en ni ke buch rorad ko piin ka yad bitir ngorad. Machane tomuren ni gum’an’nag ir nge motoyil ngak Job nge fa dalip i fager rok, ma daki yag ni nge par ndabi yog ban’en. I yog ni gaar: “Gathi ra yoor e duw rok be’ ma aram e ke gonop ara ayuwegdad ngad nanged e n’en nib manigil.” (Job 32:​9, BT) Ere mang e migid ni yog Elihu, ma uw rogon ni yog?

10. Mang e rin’ Elihu u m’on ni nge fonownag Job? (Job 33:​6, 7)

¹⁰ U m’on ni fonownag Elihu Job, me guy rogon ni nge gapas laniyan’ me m’agan’ ngay ni nge motoyil ko n’en nge yog. Ni uw rogon? Som’on e ir e guy rogon ni nge war e damumuw rok. Kad nanged e re n’ey ni bochan e be yog e Bible nsom’on e damumuw Elihu. (Job 32:​2-5) Yugu aram rogon ma dariy bayay ni yog e thin nib gel ngak Job. Ya ba sobut’an’ me non ngak Job ni bod reb e fager nib riyul’. Bod ni gaar ngak Job: “I gag e taareb rogodow u owchen Got.” (Mu beeg e Job 33:​6, 7, BT.) Ngemu’ me tamilangnag ni ka i fal’eg e motoyil ko n’en be yog Job. Bin riyul’ riy e sul u daken boch ban’en nib ga’ fan ni ke weliy Job. (Job 32:11; 33:​8-11) Ku bay yu ngiyal’ ni ki rin’ ban’en ni aray rogon u nap’an ni be fonownag Job.​—Job 34:​5, 6, 9; 35:​1-4.

11. Uw rogon ni fonownag Elihu Job? (Job 33:1)

¹¹ Nap’an ni fonownag Elihu Job, me rin’ u reb e kanawo’ nra m’ug riy ni be tayfan. Bod ni yog Elihu fithingan Job ni ban’en nde rin’ fa dalip ni baaram e pumoon ni fager rok. (Mu beeg e Job 33:1.) Dabisiy nde pagtalin Elihu gelngin nri baadag ni nge yog ban’en u nap’an ni be luag Job nge fapi fager rok e thin. Ere pag Job ni nge non u nap’an ni be fonownag. (Job 32:4; 33:32) Ki ginang Job u riy’en boch ban’en ni be lemnag miki puguran ngak murung’agen e gonop rok Jehovah, nge gelngin, nge rogon nib mat’aw, nge t’ufeg ni ma dag u fithik’ e yul’yul’. (Job 36:​18, 21-26; 37:​23, 24) Dariy e maruwar riy ni fonow nib manigil ni pi’ Elihu e ayuweg Job ni ngki motoyil nga boch e fonow ni pi’ Jehovah ngak. (Job 38:​1-3) Uw rogon nrayog ni nge yib angin e n’en ni rin’ Elihu ngak piyu Israel, ma uw rogon nrayog ni nge yib angin ngodad e ngiyal’ ney?

12. Uw rogon ni i fanay Jehovah e pi profet ni ngar ayuweged e girdi’ rok? Uw rogon nrayog ni nge yib angin ngak piyu Israel e n’en nib manigil ni rin’ Elihu?

¹² Rogon nsusun e ra yib angin ngak piyu Israel. Ba ga’ ni i fanay Jehovah e pi profet ni ngar filed ban’en ngak piyu Israel ma yad be yal’uwegrad. Bod nnap’an e pi Judge, me fanay Jehovah Deborah nreb e profet nib pin ni nge pow’iy e girdi’ rok. Ki fanay Samuel u nap’an ni kab bitir ni nge fonownag piyu Israel. (Judg. 4:​4-7; 5:7; 1 Sam. 3:​19, 20) Maku nap’an ni i gagiyeg e pi pilung, miki fanay e pi profet ni ngar gelnaged e michan’ ko girdi’ rok, mar fonownaged e piin kar talgad ko bin riyul’ e liyor. (2 Sam. 12:​1-4; Acts 3:24) N’en ni rin’ Elihu ni bay ko fare babyor ni Job e rayog ni nge ayuweg e pi pumoon nge ppin ni yad ba yul’yul’ ni ngar nanged e n’en nga rogned nge rogon ni nga rogned u nap’an ni yad be fonownag be’.

13. Uw rogon nrayog ni nge pi’ e piin Kristiano e ngiyal’ ney e athamgil nga laniyan’ pi walagrad?

¹³ Rogon nrayog ni nge yib angin ngodad. Gadad e piin Kristiano e gad be ayuweg e girdi’ ni ngar nanged e n’en nib m’agan’ Got ngay ni aram e gad be weliy ngorad e n’en bay ko Thin rok u Bible. Reb e kanawo’ ni gad ma rin’ e re n’ey riy e aram e gad ma yog boch e thin nra fal’eg laniyan’ pi walagdad me pi’ e athamgil ngorad. (1 Kor. 14:3) Thingari guy e piin piilal rogon ni ngar nonad u fithik’ e sumunguy nge t’ufeg ngki mada’ ko ngiyal’ ni kari kireban’ be’ ara be yog boch ban’en nsusun e dabi yog.​—1 Thess. 5:14; Job 6:3.

14-15. Mu weliy rogon nrayog ni nge folwok reb e piilal rok Elihu u nap’an ni be fonownag be’.

¹⁴ Am lemnag e re n’ey. Bay reb e piilal ni ke nang ni bay reb e walag nib pin ko ulung rok ni ke mulan’. Ere ka ranow yugu reb e walag ni pumoon ra guyew fare walag ni ngar piew e athamgil nga laniyan’. Nap’an ni yad be non fare walag me yog ni yugu aram rogon ni be un ko machib nge muulung, machane der yag ni nge felfelan’. Ere mang e ra rin’ fare piilal?

¹⁵ Som’on e dabisiy nra guy rogon ni nge nang fan ni be mulan’ fare walag. Ere ra gum’an’nag ir nge motoyil ya nge yag ni nang fan ni be buch e re n’ey. Gur, be lemnag fare walag ndariy rogon ni nge t’ufeg Got? Fa gur, ke pag rogon ni be lemnag e “pi n’en ni ma magafan’uy ngay ko biney e tamilang”? (Luke 21:34) Bin migid e ra gay fare piilal boch e kanawo’ ni nge yog fel’ngin e tin nib fel’ ni be rin’ fare walag. Ya bin riyul’ riy e ka be ulul ni nge un ko muulung nge machib ni yugu aram rogon ni ke mulan’. Ma bin dalip e nap’an nra tamilang u wan’ fare piilal rarogon e magawon ko fare walag nge n’en be k’aring ni nge mulan’, ma aram e ra fanay e Bible ni nge ayuweg ni nge pagan’ ngay nib t’uf rok Got.​—Gal. 2:20.

MU ULUL NI NGAM FIL BOCH BAN’EN KO FARE BABYOR NI JOB

16. Uw rogon nrayog ni nge ulul ni nge yib angin ngodad fare babyor ni Job?

¹⁶ Gad ra fil e n’en bay ko fare babyor ni Job, mab ga’ angin nra yib ngodad! Kad filed ko fa binem e article nre ke babyor ney e gathi kemus ni be weliy fan ni be pag Got e gafgow, ya ku be weliy rogon nrayog ni ngad athamgilgad u fithik’. Kud filed ko re article ney ni gad gubin nrayog ni ngad nanged rogon ni ngad pied e fonow nib manigil, ni aram e dab da folgad ko n’en ni rin’ fa dalip i pumoon ni fager rok Job ma gad fol ko n’en nib manigil ni rin’ Elihu. Ere mang ndab mu sul u daken e pi n’en kam fil ko fare babyor ni Job u m’on ni ngam fonownag be’ boch nga m’on? Ma faanra ke n’uw nap’an ndawor mu beeg e re ke babyor ney, mag nameg ni ngkum beeg bayay. Ya ga ra guy nri kab ga’ angin nra yib ngodad e ngiyal’ ney ni bod ko ngiyal’ ni baaram nni yoloy riy.