Rogon Nra Tal e Mahl nge Cham

RA THANG GOT E PI AM KO GIRDI’

Ra thang Got e pi am ko girdi’ u daken fare mahl ni Armageddon ni be weliy e Bible murung’agen.a (Revelation 16:16) Ra taw ko ngiyal’ nem, ma ra mokun e “pi pilung u fayleng ni polo’” nga taabang ni fan ko fare “mahl ni fan ko fare rran ni ba ga’ fan, ni Rran rok Got ni Gubin ma Rayog Rok.” (Revelation 16:14) Armageddon e aram e re mahl nra fek Got i yib ni nge taleg gubin e mahl.

Ra chuweg Got e pi am ko girdi’, me mang Gil’ilungun ara am rok e par u tharmiy nge gagiyegnag e fayleng me par ndariy n’umngin nap’an. (Daniel 2:44) Ke mel’eg Jesus Kristus ni Fak ni nge mang Pilung riy. (Isaiah 9:​6, 7; Matthew 28:18) Aram e re Amb ni yog Jesus ngak pi gachalpen ni ngaur yibilayed. (Matthew 6:​9, 10) Gubin e girdi’ ni yad ra par u tan taareb e am ni Jesus e Pilung riy ni ke taareban’rad.

Dabi fanay Jesus mat’awun ni nge rin’ boch ban’en ni ir e nge fel’ ngak ni bod e n’en ma rin’ e girdi’ ni yad ma gagiyeg. Bochan nib mat’aw e ngongol rok ma de laniyan’, ma dariy be’ nra magafan’ nri chey ma dabin ayuweg ni bochan ramaen dow, ara nam rok, ara gin ke yib riy. (Isaiah 11:​3, 4) Ma dakuriy rogon ni nga i cham e girdi’ ni bochan e yibe laniyan’ ngorad. Mang fan? Ya ra pi’ Jesus e tin nib t’uf ko girdi’ ni be’ nge be’. “Ma ayuweg e piin gafgow ni yad ma pining, nge piin ke t’uf e ayuw rorad ma kan n’agrad. . . . Ma chuwegrad u fithik’ e gafgow nge cham.”​—Psalm 72:​12-14, BT.

Ra chuweg Gil’ilungun Got urngin e pi talin e cham u fayleng. (Mikah 4:3) Ku ra chuweg e girdi’ nib kireb ndubrad ni ngar talgad ko cham ara yad be magawonnag e gapas ko girdi’. (Psalm 37:​9, 10) Gubin e pumoon, nge ppin, nge bitir ni yad ra par u fithik’ e pagan’ ndemtrug e gin yad bay riy u fayleng.​—Ezekiel 34:28.

Ra fel’ e par ko girdi’ u tan e am rok Got. Ra chuweg e pi magawon ni be k’aring e girdi’ ni ngaur chamgad ni bod e gafgow ko par, ma yibe yim’ ko bilig, ma der gaman e naun ni ngaun par riy. Gubin e girdi’ ni bay e ggan ni ngar ked nib fel’ nga fithik’ i dowrad, maku bay bang ni ngar pared riy nib fel’.​—Psalm 72:16; Isaiah 65:​21-23.

Ra chuweg Gil’ilungun Got wenegan e mahl. Re n’ey e gathi kemus nib muun ngay ni nge faseg e maad’ad u dowey, ya kub muun ngay ni nge chuweg urngin ban’en nib kireb ni ke buch ni ke par u laniyan’ e girdi’ ni bochan e mahl. Mus ngak e piin kar m’ad ni yira fasegrad mar pared u fayleng. (Isaiah 25:8; 26:19; 35:​5, 6) Ra sul girdien e tabinaw nga taabang, ma urngin ban’en nib kireb ni ke buch ni bochan e mahl ni ke par u lanin’uy e aram bang ko “tin kakrom ban’en . . . [ni] ke chuw.”​—Revelation 21:4.

RA CHUWEG GOT E DENEN

Nap’an nra gagiyegnag Gil’ilungun Got e fayleng, ma gubin e girdi’ ni yad ra liyor ngak Jehovahc ni ir e bin riyul’ e Got “ni gadad ba t’uf rok me ir e ma pi’ e gapas.” (2 Korinth 13:11) Ra fil e girdi’ rogon ni ngar pared u taabang u fithik’ e gapas. (Isaiah 2:​3, 4; 11:9) Piin yad ra fol ko n’en yad ra fil e yad ra chuw u tan gelngin e denen.​—Roma 8:​20, 21.

RA CHUWEG GOT SATAN NGE PI MOONYAN’ ROK

Ra thang Gil’ilungun Got e piin yad be k’aring e girdi’ ni ngaur mahlgad, ni aram Satan nge pi moonyan’ rok. (Revelation 20:​1-3, 10) Nap’an ni yira chuwegrad ma ra “gapas gubin yang.”​—Psalm 72:​7, NW.

Rayog ni nge pagan’um ngay nra riyul’ e n’en ke micheg Got ni aram e nge taleg e mahl nge cham. Rayog rok maku baadag ni nge taleg e mahl.

• Bay e gonop rok Got nge gelngin ni nge taleg e mahl nge cham. (Job 9:4) Dariy ban’en ndabiyog rok.​—Job 42:2.

• Dabun Got ni ma guy e girdi’ ni be gafgow. (Isaiah 63:9) Kub fanenikan e “paef ni ma thang e pogofan rok e girdi’.”​—Proverbs 6:​16-19.

• Got e gubin ngiyal’ ni ma tay e thin rok u gil’; dabiyog ni nge ban.​—Isaiah 55:​10, 11; Titus 1:2.