Ka Rayog ni Ngam Fil Ban’en ko Pi N’en Nsom’on Nim Fil u Bible, Fa?

1. Uw rogon ni ayuwegem e pi machib u Bible u nap’an nim fil e tin riyul’?

PI N’EN nda filed ko som’on u nap’an nda tababgad ko fol Bible e ke thilyeg e par rodad. Bod nnap’an nda filed ni Jehovah fithingan Got, ma aram me tabab ni nge chugur e tha’ u thildad. (Isa. 42:8) Nap’an nda filed e tin riyul’ u murung’agen e piin kar m’ad, ma aram e daki maruwar u wan’dad ko be gafgow e piin kar m’ad ni yad ba t’uf rodad fa danga’. (Ekl. 9:10) Ma nap’an nda filed ni ke micheg Got nra Paradis e fayleng, ma daki magafan’dad ko n’en nra buch rodad boch nga m’on. I pagan’dad ngay nrayog ni ngad pared ndariy n’umngin nap’an, ma gathi kemus nu lan 70 ara 80 e duw.​—Ps. 37:29; 90:10.

2. Uw rogon ni be tamilangnag e 2 Peter 1:​12, 13 ni mus ko pi Kristiano ni ke n’uw nap’rad ko tin nriyul’ nra yib angin ngorad e pi n’en nsom’on nra filed u Bible?

² Thingar dab da paged talin feni ga’ fan e pi n’en nsom’on nda filed u Bible. U lan e gin migid e babyor rok apostal Peter e yol ngak e pi Kristiano ni yad be ‘par ni yad mmudugil u fithik’ e tin ni ir e ba riyul’.’ (Mu beeg e 2 Peter 1:​12, 13.) Ngiyal’ nem e bay boch e magawon u lan e ulung nib muun ngay e pi tamachib ni googsur nge piin nib kireb e ngongol rorad nrayog ni nge magawonnagrad ko tirok Got ban’en. (2 Pet. 2:​1-3) Ere baadag Peter ni nge ayuwegrad ni ngar siyeged e pi n’em. Aram fan ni puguran ngorad boch e machib ni kar mu’gad i fil. Pi machib ney e ra ayuwegrad ni ngar pared ni yad ba yul’yul’.

3. Mu susunnag fan ni gubin e Kristiano nsusun e ngaur fal’eged i lemnag e pi n’en nsom’on nra filed u Bible.

³ Mus ni faanra ke n’uw nap’dad ko tin riyul’, ma ka bay boch ban’en nib beech nrayog ni ngad filed ko pi n’en nsom’on nda filed u Bible. Baaray rogon nrayog ni ngan susunnag: Be’ nib salap ko lum nge be’ ni fin be fil e lum e rayog ni ngar fanayew taab mit i ban’en ni ngar ngongliyew ba mit e ggan riy. Machane faen nib salap ko lum e ke fil rogon ni nge fanay fapi n’em ni nge ngongliy boch e ggan riy nib thilthil ma kub thil lamen. Ku arrogon e piin ke n’uw nap’an ni kar pigpiggad ngak Jehovah nge piin ka fin nra tababgad ko fol Bible nrayog nib thil rogon ni yad ra nang fan e pi kenggin e machib u Bible. Dabisiy ni ke thil boch ban’en ko par rodad ara n’en gad be rin’ ni fan ko pigpig rodad ngak Jehovah ko ngiyal’ ni baaram nda uned ko taufe. Nap’an ni gad ra lemnag e pi machib u Bible nda filed kafram, ma rayog ni ngad pirieged boch ban’en riy nib beech nrayog ni ngad filed boch ban’en riy. Ere ngad weliyed e n’en nrayog ni nge fil e pi Kristiano ni ke n’uw nap’rad u dalip i kenggin e machib u Bible nra filed nsom’on.

JEHOVAH E IR E KE SUNMIY URNGIN BAN’EN

4. Mang angin ni ke yib ngodad ni bochan e kad nanged ni Jehovah e Ir e Ke Sunmiy urngin ban’en?

⁴ “Got e ir e ke sunumeg urngin ban’en.” (Heb. 3:4) Gad manang ni En Tasunmiy ni ir e th’abi gonop ma th’abi gel gelngin e ir e ke sunmiy e fayleng nge pi n’en nib fos ni bay riy. Ri manangdad nib fel’ rogon ni bochan e ir e ke sunmiydad. Maku reb e, ma lemnagdad. Manang e n’en th’abi fel’ ni fan ngodad. Re n’ey ni kad nanged ni Jehovah e Ir e Ke Sunmiy urngin ban’en e rib ga’ angin ni ke yib ngodad ni bochan e ke yibnag fan e yafos rodad.

5. Mang ban’en ni kad nanged nrayog ni nge ayuwegdad ni ngad maruweliyed e sobut’an’? (Isaiah 45:​9-12)

⁵ Re n’ey ni kad nanged ni Jehovah e Ir e Ke Sunmiy urngin ban’en e rayog ni nge fil ban’en ngodad u murung’agen e sobut’an’. Nap’an ni par Job ni yugu be lemnag ir nge yugu boch e girdi’, ma aram me puguran Jehovah ngak ni Ir e En Tasunmiy ni gubin ma rayog rok. (Job 38:​1-4) Re n’ey e ayuweg Job ni nge nang ni kab fel’ e tirok Got e kanawo’ ko tirok e girdi’. Ireray e n’en ni tamilangnag Isaiah ni profet u nap’an ni yoloy boch nga tomuren ni gaar: “Gur ra fith e re th’ib ni but’ nem e en ni ngongliy ko mang e be rin’ faanem?”​—Mu beeg e Isaiah 45:​9-12.

6. Mingiyal’ e rayog ni ngad fal’eged i lemnag feni ga’ e gonop rok Jehovah ni ir e En Ke Sunmiydad nge feni gel gelngin? (Kum guy e sasing.)

⁶ Nap’an nra n’uw nap’an reb e Kristiano ko tin riyul’, ma rayog ni nge tabab ni nga i taga’ ko tin be lemnag ko bin nge sap ngak Jehovah nge Thin Rok ni nge pow’iy. (Job 37:​23, 24) Machane uw rogon ni faanra par be’ nge fal’eg i lemnag feni ga’ e gonop rok e En Ke Sunmiy nge feni gel gelngin? (Isa. 40:22; 55:​8, 9) Re n’ey e ra ayuweg ni nge par nib sobut’an’ me nang ni kab puluw e lem rok Jehovah ko lem rok.

7. Mang e rin’ Rahela ya nge yag ni m’agan’ nga reb e ban’en ni ke thil u lan e ulung?

⁷ Rahela ni ma par u Slovenia e ke pirieg nre n’ey ni ma lemnag e En Ke Sunmiy e ma ayuweg ni nge m’agan’ nga reb e ban’en ni ke thil u lan e ulung. I yog ni gaar: “Bay yu ngiyal’ nde mom ni nge m’agan’ug nga boch ban’en ni ke dugliy e piin yad be yog e thin rodad. Bod nu tomuren ni kug yaliy fare 2023 Governing Body Update #8, mu kug gin ko yay nsom’on nug guy reb e walag ni pumoon ni be pi’ reb e welthin ni ke tay soroben ke n’uw. Ere gu meybil ngak Jehovah ni nge ayuwegeg ni nggu mecham ko re n’ey ni kan thilyeg.” I nang Rahela nrayog rok Jehovah ni nge pow’iy e ulung rok nib fel’ rogon ni bochan e Ir e Ke Sunmiy e tharmiy nge fayleng. Ere faanra ba mo’maw’ ni nge m’agan’um nga reb e machib rodad ni ke thil rogon ni yibe weliy ara ban’en ni ke thil u lan e ulung, ma mang ndab mu sobut’nag e lem rom ngam fal’eg i lemnag feni ga’ e gonop rok e En Ke Sunmiydad nge feni gel gelngin?​—Rom. 11:​33-36.

FAN NI KE PAG GOT E GAFGOW

8. Bochan ni kad nanged fan ni ke pag Got e gafgow, ma uw rogon ni ke yib angin ngodad?

⁸ Mang fan ni ke pag Got e gafgow? Bay boch e girdi’ ndawori yag ni ngar pirieged e fulweg ko re deer ney ni kar damumuwgad ngak Got ara kar lemnaged ndariy e Got! (Prov. 19:3) Machane kam fil ni gad be gafgow ni bochan e denen ni ke af ngodad nge rarogodad ndawor da flontgad, ma gathi bochan Jehovah. Kum fil ni bochan ni be gum’an’ Jehovah u puluwon e girdi’, ma bokum milyon e girdi’ ni ke yag ni ngar nanged mar filed rogon nra chuweg e gafgow. (2 Pet. 3:​9, 15) Pi n’ey e ke fal’eg lanin’um ma kki chugurnagem ngak.

9. Mingiyal’ e rayog ni ngad lemnaged boch i fan ni ke pag Jehovah e gafgow?

⁹ Gad manang nib t’uf ni ngad gum’an’naged gadad u nap’an ni gad be sonnag Jehovah ni nge chuweg e gafgow. Yugu aram rogon, ma nap’an ni gad ra gafgow, ara ni rin’ ban’en nde mat’aw ngodad, ara yim’ be’ nib t’uf rodad, fa reb e be’ nib t’uf rodad e ke buch e pi n’ey rok, ma rayog ni ngad lemnaged ko mang fan nder rin’ Jehovah ban’en ngay nib papey. (Hab. 1:​2, 3) Nap’an ni gad ra lem ni aray rogon, mab fel’ ni ngad lemnaged fan ni be pag Jehovah e piin nib mat’aw ni ngaur mada’naged e magawon.a (Ps. 34:19) Ku rayog ni ngad lemnaged e n’en nib m’agan’ ngay ni aram e nge chuweg e gafgow ndariy n’umngin nap’an.

10. Mang e ke yag ni nge fal’eg laniyan’ Anne u tomuren ni ke yim’ e chitiningin?

¹⁰ Bochan ni kad nanged fan ni ke pag Got e gafgow, ma aram e n’en nrayog ni nge ayuwegdad ni ngad athamgilgad. Anne ni ma par u reb e donguch ni ka nog yu Mayotte ngay ni bay u lan e Indian Ocean e yog ni gaar: “Nap’an ni yim’ e chitinag in e duw ni ke yan, mi ri kireban’ug nib gel. Machane gubin ngiyal’ nug ma puguran ngog ni gathi Jehovah tapgin e gafgow ni gad be yan u fithik’. Ri baadag ni nge chuweg urngin mit e gafgow me faseg e piin kar m’ad ni yad ba t’uf rodad. Nap’an nug ra fal’eg i lemnag e pi n’ey ma ma gapas lanin’ug.”

11. Bochan ni kad nanged fan ni ke pag Jehovah e gafgow, ma uw rogon nrayog ni nge ayuwegdad ni ngad ululgad ko machib?

¹¹ Re n’ey ni kad nanged fan ni ke pag Got e gafgow e rayog ni nge k’aringdad ni ngad ululgad ko machib. Tomuren ni weliy Peter nre n’ey ni be gum’an’nag Jehovah ir e ra yognag e yafos ngak e piin yad ra kalngan’rad, me yoloy ni gaar: “Mit i mang girdi’ e susun e ngam boded? Pangimed e nge par nib thothup ma kam pied gimed nga pa’ Got.” (2 Pet. 3:11) Reb e kanawo’ ni ‘kad pied gadad riy nga pa’ Got’ e u daken e machib rodad. Ba t’uf e girdi’ rodad ni bod e Chitamangidad. Gad baadag ni ngar uned ko par u lan e bin nib beech e fayleng rok Got nib mat’aw. Be gum’an’ Jehovah u puluwon e girdi’ u lan e binaw rom ya nge yag ni mab e kanawo’ ngorad ni ngar liyorgad ngak. Gab tow’ath ni gimew be maruwel Got u taabang ma ga be un i ayuweg urngin e girdi’ nrayog ni ngam ayuwegrad ni ngar filed murung’agen u m’on ni nge yib e tomur!​—1 Kor. 3:9.

GAD BE PAR KO “TIN TOMREN E RRAN”

12. Mang angin ni ke yib ngodad ni bochan e kad nanged ni gad be par ko “tin tomren e rran”?

¹² Ba puluw rogon ni be weliy e Bible rarogon e girdi’ ko “tin tomren e rran.” (2 Tim. 3:​1-5) Kemus ni ngad sapgad u toobdad ma gad guy rogon ni be lebug e re yiiy ney. Bochan ni gad be guy ni be gel e kireb ko lem nge ngongol ko girdi’, ma aram fan nri be mich u wan’dad nrayog ni nge pagan’dad ko Thin rok Got.​—2 Tim. 3:​13-15.

13. Mang e rayog ni ngad fithed gadad riy nrogon nib puluw ko fare fanathin ni yog Jesus ni bay ko Luke 12:​15-21?

¹³ Bochan ni kad nanged ni gad be par ko tin tomuren e rran, ma aram fan ni gad be tedan’dad ko tin nib ga’ fan. Rayog ni ngad filed feni ga’ fan ni ngad rin’ed e re n’ey ko fare fanathin ni yog Jesus ni bay ko Luke 12:​15-21. (Mu beeg.) Mang fan nnog nib “balyang” fare moon ni boor ban’en rok? Gathi bochan e ir be’ nib fel’ rogon, ya bochan e be m’oneg boch ban’en nde ga’ fan. I kunuy e chugum ni boor, ‘machane de yoor ban’en rok u p’eowchen Got.’ Rib oloboch nde maruwel ko tayim rok nib fel’ rogon, ya bin riyul’ riy e dabki n’uw nap’an me yim’. I gaar Got ngak: “Nep’ ney e ra aw e fan rom.” Ere chiney ni gad be chugur nga tungun e re m’ag ney e rayog ni ngad fithed gadad ni nge lungudad: ‘Be m’ug ko pi n’en nug be nameg nug be tiyan’ug ko tin nib ga’ fan, fa? Ma uw rogon e pi n’en nug be guy rogon ni nge nameg pi fakag? Gu ma fanay gelngig, nge tayim rog, nge salpiy rog ni nggu ulunguy e flaab rog u roy u fayleng ara tharmiy?’

14. Mang nib ga’ fan ni ngad fal’eged i lemnag e mich riy ni gad be par ko tin tomuren e rran nrogon ni ke m’ug ko n’en ni buch rok Miki?

¹⁴ Nap’an ni gad ra lemnag e mich riy ni gad be par ko tin tomuren e rran, ma rayog ni nge thil rogon ni ngad lemnaged rogon e par rodad. Aram e n’en ni buch rok reb e walag nib pin ni ka nog Miki ngak. I yog ni gaar: “Nap’an nug chuw u skul, ma gu baadag ni nggu un nga reb e maruwel nrayog ni nggu fil murung’agen e gamanman riy. Kug baadag ni nggu un ko regular pioneer mug wan gu pigpig ko gin nib t’uf e ayuw ko machib riy. Machane i yog e pi fager rog ni kar ilalgad ko tirok Got ban’en ni nggu fal’eg i lemnag ko rayog ni nggu un ko re miti maruwel nug baadag ma kug be rin’ e n’en nug be nameg ni fan ko tirok Got ban’en fa dabiyog. Ra pugeduran ngog ndab ki n’uw nap’an min thang e re m’ag ney. Maku reb e nap’an ni yira yan nga lan e bin nib beech e fayleng, ma rayog ni nggu fil murung’agen urngin mit e gamanman nug baadag ndariy n’umngin nap’an. Ere gu dugliy ni nggu fek boch e class ndabi n’uw nap’an, ma rayog ni nggu fil boch e salap riy nra ayuwegeg. Re n’ey e ayuwegeg ni nggu pirieg reb e maruwel nrayog ni nggu un ngay nra ayuwegeg ko pioneer nug be un ngay, me boch nga tomuren mug wan gu par nga Ecuador ko gin nib t’uf e ayuw ko machib riy.” Chiney e ma lekag Miki nge figirngin boch e ulung ko re nam nem.

15. Uw rogon ni be ayuwegdad e n’en ni buch rok James ni ngad nanged fan nsusun e dabi mulan’dad u puluwon e piin ndarur motoyilgad ko fare thin nib fel’ e chiney? (Kum guy e sasing.)

¹⁵ Susun e dabi mulan’dad u nap’an nra siyeg e girdi’ ni ngar motoyilgad ko fare thin nib fel’ ko som’on. Rayog ni nge thil e girdi’. Am lemnag e n’en ni buch rok James ni walagen Jesus. I guy Jesus ni ilal, me mang fare Messiah, miki fil ban’en ko girdi’ u reb e kanawo’ ndawori rin’ be’ riy bayay. Machane boor e duw nde mang reb i gachalpen Jesus. Fin u tomuren nni faseg Jesus ko yam’ e mang reb i gachalpen nib pasig!b (John 7:5; Gal. 2:9) Dab mu lemnag ndabi yib angin ni ga be guy rogon ni ngam ayuweg e girdi’ rom ndubrad e tin riyul’ e chiney ara ngkum sul bayay ko piin nde m’agan’rad ko fare thin ni murung’agen Gil’ilungun Got kafram. Dab mu pagtalin ni gad be par ko tin tomuren e rran, ere rib ga’ fan fare maruwel ni machib ni gad be rin’. N’en ga ra yog ko pi girdi’ ney e ngiyal’ ney e rayog ni nge ayuwegrad boch nga m’on ngki mada’ nga nap’an ni ke tabab fare gafgow nib ga’.c

UM PINING E MAGAR KO PI N’EN MA PUGURAN JEHOVAH NGODAD

16. Uw rogon ni ke yib angin ngom e pi n’en ma puguran Jehovah ngodad? (Kum guy fare kahol ni kenggin e “Mu Fanay ni Ngam Ayuweg e Girdi’.”)

¹⁶ Bay boch ban’en ni ma ngongliy e ulung rodad nib puluw e thin riy ko Bible ni fan ko piin ndar nanged e pi kenggin e machib u Bible. Bod ni welthin ni fan ko yoor ni yima pi’ u gubin e wik, nge boch e article nge video ko jw.org, nge pi magazine ni fan ko girdi’ ni yoor e kan ngongliy ni fan ko piin gathi yad e Pi Mich. Yugu aram rogon, maku ma yib angin e thin riy ngodad. Ma gelnag e t’ufeg rodad ngak Jehovah, miki ayuwegdad ni ngari mich e Thin rok u wan’dad, ma gad mon’og u rogon ni gad be fil e tin riyul’ u Bible ko girdi’.​—Ps. 19:7.

17. Mingiyal’ e rayog nib t’uf ni ngam lemnag e pi n’en nsom’on nim fil u Bible?

¹⁷ Gadad e Pi Mich Rok Jehovah e ri gad ma felfelan’ u nap’an ni yira thilyeg rogon ni ke tamilang reb e machib u Bible u wan’dad. Yugu aram rogon ma ri ku gad be pining e magar ko pi machib u Bible ni ayuwegdad ni ngad bad ko tin riyul’ ko som’on. Faanra yan i taw nga ba ngiyal’ ma gad adag ni ngad rin’ed e n’en gad be lemnag ko bin ngad folgad u rogon ni be pow’iydad e ulung rok Jehovah, ma rayog ni ngad sobut’naged lanin’dad ngad lemnaged e en be pow’iy e re ulung ney ni aram Jehovah ni Ir e Ke Sunmiydad ni gubin ma rayog rok ma ir e th’abi gonop. Nap’an ni gad be mada’nag reb e magawon ara be’ nib t’uf rodad e be buch e re n’ey rok, ma rayog ni ngad gum’an’naged gadad ma gad lemnag fan ni ke pag Jehovah e gafgow. Maku nap’an nra t’uf ni ngad dugliyed rogon ni ngad fanayed e tayim nge chugum rodad, ma dab da paged talin ni gad be par ko tin tomuren e rran ma dabki n’uw nap’an me yib e tomur. Ere manga yigi pi’ e thin rok Jehovah gelngidad, me ayuwegdad ni ngad gonopgad, ma gad ulul ko pigpig ni gad be tay ngak u fithik’ e yul’yul’.