Kam “Nang Rogon” ni Nge Fel’ u Wan’um e Tin Bay Rom, Fa?

1. Mang e be yip’ fan ni nge fel’ u wan’dad e tin bay rodad, ma mang e der yip’ fan?

GUR be’ nib fel’ u wan’um e tin bay rom, fa? Be’ nib fel’ u wan’ e tin bay rok e ba felfelan’ mab gapas laniyan’ ni bochan e ma lemnag e pi tow’ath ni bay rok e chiney. Der ma damumuw ni bochan e tin ndariy rok. Machane re n’ey ni nge fel’ u wan’dad e tin bay rodad e gathi be yip’ fan nde t’uf ni nge ga’ fan u wan’dad rogon e par rodad. Bod nde kireb ni nge adag reb e Kristiano ni nge yoornag e tin be rin’ ni fan ko pigpig rok. (Rom. 12:1; 1 Tim. 3:1) Yugu aram rogon, ma der ma war e felfelan’ rok ni faanra ndan pi’ reb e maruwel ngak u lan e ulung ko ngiyal’ ni lemnag.

2. Faanra dabi fel’ u wan’dad e tin bay rodad, ma mang fan nrayog ni nge yib wenegan ngodad?

² Ra dabi fel’ u wan’dad e tin bay rodad ma rayog ni nge yib wenegan ngodad. Girdi’ ni aray rogon e rayog ni ngaur maruwelgad u lan boor e awa ya ngar yognaged boch ban’en ni gathi rib t’uf rorad. Ba gel e kireban’ riy ni bochan e bay in e Kristiano ni kar iringed e salpiy nge boch ban’en ni yad baadag. Rayog ni ke lungurad u wan’rad, ‘Bay rogon ni nggu fek e re n’ey,’ ara ‘Kaygi pag nap’an ni kug sonnag e re n’ey,’ ara ‘Bay gu sulweg lon e re salpiy ney boch nga tomuren.’ Yugu aram rogon, ma yira moro’ro’ ma ban’en nde m’agan’ Jehovah ngay maku be darifannag. (Prov. 30:9) Bay boch e girdi’ ni kari kireban’rad ni bochan e dan pi’ reb e maruwel ngorad u lan e ulung ma kar talgad ko pigpig ngak Jehovah. (Gal. 6:9) Mang fan nrayog ni nge lemnag reb e tapigpig rok Jehovah ni nge rin’ ban’en ni aray rogon? Rayog ni bochan e dakir fel’ u wan’ e tin bay rok.

3. Mang e gad be fil ko fapi thin ni bay ko Filippi 4:​11, 12?

³ Gad gubin nrayog ni ngaud guyed rogon ni nge fel’ u wan’dad e tin bay rodad. I yoloy apostal Paul ni ke ‘fil rogon ni nge fel’ u wan’ e tin ni ba’ rok ban’en.’ (Mu beeg e Filippi 4:​11, 12.) I yoloy e pi thin ney u nap’an ni bay u kalbus. Yugu aram rogon ma de war e felfelan’ rok. Ya ‘ke nang rogon’ ni nge fel’ u wan’ e tin bay rok. Faanra be mo’maw’ ni nge fel’ u wan’dad e tin bay rodad, ma thin rok Paul nge n’en ni buch rok e rayog ni nge ayuwegdad ni nge pagan’dad ngay nrayog ni nge fel’ u wan’dad e tin bay rodad ban’en. Susun e dab da lemnaged nib mom ni ngad rin’ed e re n’ey, ya ban’en nthingar da filed rogon. Ni uw rogon? Ngad weliyed boch e fel’ngin nra ayuwegdad ni ngad nanged rogon ni nge fel’ u wan’dad e tin bay rodad.

UM PINING E MAGAR

4. Faanra ud pininged e magar, ma uw rogon nra ayuwegdad ni nge fel’ u wan’dad e tin bay rodad? (1 Thessalonika 5:18)

⁴ Be’ ni ma pining e magar e dabisiy nra fel’ u wan’ e tin bay rok. (Mu beeg e 1 Thessalonika 5:18.) Bod ni faanra gad be pining e magar ni bochan e bay e tin nib t’uf ko par rodad, ma aram e dabi magafan’dad nib pag rogon ni bochan e pi n’en ndariy rodad ni gad baadag ni nge yag ngodad. Faanra gad be pining e magar ni bochan e maruwel ni gad be rin’ u lan e ulung e chiney, ma aram e gad ra tedan’dad nga rogon ni ngad rin’ed e pi maruwel nem nib fel’ rogon ko bin ngaud lemnaged rogon ni ngkun pi’ yugu reb e maruwel ngodad. Aram fan ni be yog e Bible ni ngaud pininged e magar ngak Jehovah u lan e meybil rodad! Faanra ud pininged e magar, ma aram e gad ra thamiy e “gapas rok Got ndabi chuchugur ni nge nang e girdi’ fan.”​—Fil. 4:​6, 7.

5. Mang boch i fan nsusun e nge pining piyu Israel e magar? (Kum guy e sasing.)

⁵ Am lemnag e n’en ni buch rok piyu Israel. Boor yay ni ur gun’gun’gad ngak Jehovah ni bochan e darur ked e ggan ni ur ked u Egypt. (Num. 11:​4-6) Riyul’ nde mom e par rorad u daken e ted. Ere mang e ra ayuwegrad ni nge fel’ u wan’rad e tin bay rorad? Susun e ngar lemnaged urngin ban’en ni ke rin’ Jehovah ni fan ngorad mar pininged e magar riy ngak. Nap’an ni ur moyed u Egypt ko gin un gafgownagrad riy min tayrad ni ngar manged sib, ma aram me k’aring Jehovah ragag e gafgow ni nge yib nga daken yu Egypt. Tomuren nni pagrad nga ranod, mar ‘feked e machaf rok piyu Egypt’ ni aram e silber, nge gol, nge mad. (Ex. 12:​35, 36) Ma nap’an nni lol’ograd nga ranod ra tawgad nga marichlen fare Red Sea, ma aram me ngongliy Jehovah ba maang’ang nge ruw raba’nag fare Red Sea. Ma nap’an ni ur milekaggad u daken e ted, ma gubin e rran ni i pi’ e manna ngaur ked. Ere mang e magawon rorad? Yugu aram rogon nib gaman e ggan ni i pi’ Jehovah ni ngar ked, machane da ur pininged e magar ngak ko tin ni i pi’ ngorad.

6. Mang e rayog ni nge ayuwegdad ni ngaud pininged e magar?

⁶ Ere mang e rayog ni nge ayuwegem ni ngaum pining e magar? Som’on e ngaum tay e tayim ni gubin e rran ni ngam lemnag e pi n’en nib manigil ni bay rom ni ga be felfelan’ ngay. Rayog ni ngam yoloy l’agruw ara dalip ban’en nga but’ ni ga be pining e magar riy. (Lam. 3:​22, 23) Bin migid e ngaum pining e magar. Um pining e magar ngak yugu boch e girdi’ ko n’en kar rin’ed ni fan ngom. Ma bin th’abi ga’ fan riy e ngaum pining e magar ngak Jehovah ni gubin e rran. (Ps. 75:1) Bin dalip e ngam m’ag fager ngak e piin yad ma pining e magar. Faanra piin gad ma chag ngorad e yad ma pining e magar, ma aram e ku ra ud pininged e magar. Machane faanra de fel’ u wan’rad e tin bay rorad, maku rayog ni ngad folwokgad rorad. (Deut. 1:​26-28; 2 Tim. 3:​1, 2, 5) Ere faanra ud gayed boch e kanawo’ ni ngad pininged e magar riy, ma aram e rayog ni nge dab kud pared ma gad be lemnag e tin ndariy rodad.

7. Mang e ayuweg Aci ni nge fel’ u wan’ e tin bay rok?

⁷ Am lemnag e n’en ni buch rok Aci ni ma par u Indonesia. I yog ni gaar: “Nap’an fare m’ar ni COVID-19 mug tabab ni ngaug taarebrogonnag e par rog ko par rok e pi walag u lan e ulung. Bochan e re n’ey, ma aram e daki fel’ u wan’ug e tin bay rog.” (Gal. 6:4) Ere mang e ayuweg ni nge thilyeg rogon e lem rok? Ki yog ni gaar: “Gu tabab ni nggu lemnag e pi tow’ath ni ma yag ngog u reb e rran ngu reb, nge pi n’en nib manigil ni ke yag ngog ni bochan e gag bang ko ulung rok Got. Ngemu’ mug pining e magar riy ngak Jehovah. Bochan e re n’ey, me fel’ u wan’ug e tin bay rog.” Faanra der fel’ u wan’um rogon e par rom, ma gur, rayog ni ngam folwok rok Aci ya nge yag ni ngaum pining e magar, fa?

MM’ONEG E N’EN NIB GA’ FAN MAG DAG E SOBUT’AN’

8. Mang e buch rok Baruk?

⁸ Baruk ni tayol rok Jeremiah ni profet e bay ba ngiyal’ ndaki fel’ u wan’ e par rok. Rib mo’maw’ e maruwel nni pi’ ngak, ya nge ayuweg Jeremiah ni nge yog ngak piyu Israel e n’en bayi buch rorad ni bochan e darur folgad rok Jehovah. Machane bay ba ngiyal’ ndaki m’oneg e n’en nib ga’ fan. Ba tamilang ni i par ni be lemnag ir nge n’en baadag ni nge rin’ ko bin nge lemnag e n’en baadag Jehovah ni nge rin’. Ere yog Jehovah ngak u daken Jeremiah ni gaar: “Ga be nameg boch ban’en nib fel’ ni gur e fan ngom. Mu tal i nameg e pi n’ir.” (Jer. 45:​3-5, NW) Ere gowa be gaar ngak: “Nge fel’ u wan’um rogon e par rom e chiney.” I m’agan’ Baruk ko fonow nni pi’ ngak me yag ni nga i par nib fel’ u wan’ Jehovah.

9. Mang e ra k’aringdad e sobut’an’ ni ngad nanged nrogon nib puluw ko 1 Korinth 4:​6, 7? (Kum guy e sasing.)

⁹ Yu ngiyal’ e rayog ni nge lemnag reb e Kristiano ni bay rogon ni ngan pi’ reb e maruwel ngak u lan e ulung. Rayog ni ir be’ nrib salap u ban’en, ara ba gel e maruwel ni ma tay, ara ke n’uw nap’an ko tin nriyul’. Machane rayog ni ngan pi’ fare maruwel ni baadag ngak yugu boch e girdi’. Ere mang e rayog ni nge ayuweg ni nge dabi kireban’ ko re n’ey? Rayog ni nge fal’eg i lemnag e n’en ni yoloy apostal Paul ni bay ko 1 Korinth 4:6, 7. (Mu beeg.) Gubin e maruwel ni yima pi’ ngodad nge gubin e salap ni bay rodad ma Jehovah e ke yib rok. Pi tow’ath ney e gathi bogi ban’en ni kad maruweliyed ke yag ngodad ara bay rogon ni ngan pi’ ngodad. Ya gubin ni ke yag ngodad ni bochan e runguy rok Jehovah.​—Rom. 12:​3, 6; Efe. 2:​8, 9.

10. Uw rogon nrayog ni ngad maruweliyed e sobut’an’?

¹⁰ Rayog ni ngad maruweliyed e sobut’an’ ni faan gad ra fal’eg i lemnag e kanawo’ nib manigil ni dag Jesus. Am lemnag e n’en ni buch ko fare nep’ i n’em ni maluknag rifrifen ay e pi apostal rok. I yoloy apostal John ni gaar: “Manang Jesus [1] ni en ni Chitamangiy e ke pag fan urngin ban’en ngak; ma manang [2] ni yib rok Got ma [3] bay sul ngak Got. . . . Me tabab i maluknag e rifrif u ay pi gachalpen.” (John 13:​3-5) Rayog ni nge lemnag Jesus ni ir e bay rogon ni ngan maluknag rifrifen ay. Machane nap’an ni immoy u fayleng, ma dariy ba ngiyal’ ni lemnag ni bay rogon ni nge yoor ban’en rok ara fel’ rogon e par rok. (Luke 9:58) Ba sobut’an’, mab fel’ u wan’ e tin bay rok. Rib manigil e kanawo’ ni dag nrayog ni ngad folwokgad riy.​—John 13:15.

11. Uw rogon ni ke ayuweg e sobut’an’ Dennis ni nge fel’ u wan’ e tin bay rok?

¹¹ Dennis ni be’ nu Netherlands e guy rogon ni nge folwok u rogon ni dag Jesus e sobut’an’, machane gathi gubin ngiyal’ nib mom e re n’ey ngak. I yog ni gaar: “Bay yu ngiyal’ nug ma guy ni ke tabab ni nge tolangan’ug ara dakir fel’ u wan’ug e tin bay rog, nib ga’ nu nap’an ni kan pi’ reb e maruwel ngak be’ u lan e ulung. Nap’an nra buch e re n’ey, ma gu ma fil murung’agen e sobut’an’. Bay boch e thin nu Bible ni murung’agen e sobut’an’ ni kug tay e pow ngay ko fare JW Library^® app, ya nge yag ni nggu pirieg nib papey mug beeg bayay. Ku bay boch e welthin ni murung’agen e sobut’an’ ni kug downloadnag ko phone rog, mab ga’ nug ma motoyil ngay.a Kug fil ni gubin e maruwel ni gad ma rin’ ni bochan e ngad pininged e sorok riy ngak Jehovah ma gathi gadad. Ra bagadad ma boch yang e be rin’ ko maruwel rok Jehovah.” Ere faanra ke tabab ni nge dabki fel’ u wan’um e maruwel ni ga be rin’, mag maruweliy e sobut’an’. Re n’ey e ra chugurnag e tha’ u thilmew Jehovah, me ayuwegem ni nge fel’ u wan’um e tin bay rom.​—Jas. 4:​6, 8. 

UM FAL’EG I LEMNAG E ATHAP ROM

12. Mang boch ban’en ni gad be athapeg boch nga m’on nra ayuwegdad ni nge fel’ u wan’dad e tin bay rodad? (Isaiah 65:​21-25)

¹² Faanra ud fal’eged i lemnag e athap rodad boch nga m’on, ma ra fel’ boch u wan’dad e tin bay rodad. Thin rok Jehovah ni yoloy Isaiah ni profet e be tamilangnag rogon feni mo’maw’ e par e ngiyal’ ney, maku be micheg nra chuweg Jehovah e pi magawon rodad. (Mu beeg e Isaiah 65:​21-25.) Gad ra par u lan boch e naun nib manigil ma dariy ban’en nra buch rodad riy. Gad ra rin’ boch e maruwel nib manigil, ma gad kay boch e ggan nib fel’ nga fithik’ i dowdad mab fel’ lamen. Dakuriy ba ngiyal’ nra magafan’dad nri chey me buch ban’en nib kireb rodad ara pi fakdad. (Isa. 32:​17, 18; Ezek. 34:25) Rib manigil e athap rodad boch nga m’on ma rra riyul’.

13. Mingiyal’ e rayog nrib t’uf ni ngad lemnaged e athap rodad?

¹³ Ireray e ngiyal’ nrib t’uf ni ngaud lemnaged e athap rodad. Mang fan? Ya gad be par ko “tin tomren e rran” ma gad gubin ni gad be mada’nag boch e magawon nib “mo’maw’.” (2 Tim. 3:1) Gubin e rran ni ma ayuwegdad Jehovah ni ngad athamgilgad ni aram e ma pow’iydad, me pi’ gelngidad, me ayuwegdad. (Ps. 145:14) Maku reb e athap rodad e rayog ni nge ayuwegdad u nap’an ni kad mada’naged boch e magawon nib mo’maw’. Rayog ni be mo’maw’ ngom ni ngam pi’ e tin nib t’uf ko par rok chon e tabinaw rom. Machane gur, re n’ey e be yip’ fan ni gubin ngiyal’ nra um par ni gab gafgow? Danga’! Ke micheg Jehovah nra pi’ e tin nib t’uf rom u Paradis ni kub muun boor ban’en ngay. (Ps. 9:18; 72:​12-14) Sana rayog ni ga ma par u fithik’ e amith, ara be kireban’um nib pag rogon, ara bay ba mit e m’ar rom nib ubchiya’. Ere gur, kemus e n’en nga i buch rom ndakuriy e athap rom nga bang? Danga’. Ra chuw e m’ar nge yam’ u lan e bin nib beech e fayleng rok Got. (Rev. 21:​3, 4) Re athap ney e ma ayuwegdad ni nge fel’ u wan’dad rogon e par rodad e chiney ma dab kud damumuwgad ko n’en be buch rodad. Ku rayog ni ngad pared ni gad felfelan’ mab gapas lanin’dad ni yugu aram rogon ni ke rin’ be’ ban’en ngodad nde mat’aw, ara ke yim’ be’ nib t’uf rodad, ara be buch yugu boch ban’en nib kireb rodad. Mang fan? Ya demtrug gelngin feni mo’maw’ e magawon ni gad be mada’nag e ngiyal’ ney, ma gad manang ni ‘gafgow ni gadad be tay e dabi n’uw nap’an me m’ay,’ ma dab kud gafgowgad u nap’an ni gad ra yan nga lan e bin nib beech e fayleng.​—2 Kor. 4:​17, 18.

14. Mang e rayog ni nge ayuwegdad ni ngari mich u wan’dad nra riyul’ e tin ke micheg Jehovah?

¹⁴ Athap rodad e ma ayuwegdad ni nge fel’ u wan’dad e tin bay rodad. Ere mang e rayog ni nge ayuwegdad ni ngari mich u wan’dad nra riyul’ e tin ke micheg Jehovah? Reb e ban’en nra ayuwegdad e aram e ngad susunnaged gadad ni gad bay u Paradis, ni bod be’ nib t’uf ni nge tay e tiligiy ya nge yag ni tamilang e sap rok nga palog. Faanra yugu be magafan’dad nga rogon ni ngad yognaged e salpiy, ma rayog ni ngad lemnaged rogon e par rodad ko ngiyal’ ndaki t’uf e salpiy rodad, ma dakuriy e malfith rodad, ma dakuriy be’ nib gafgow. Faanra be magafan’dad ni bochan e bay boch e maruwel u lan e ulung ni gad baadag machane dawor ni pi’ ngodad, ma rayog ni ngad lemnaged e ngiyal’ ni kad flontgad ma kad pigpiggad ngak Jehovah u lan bokum biyu’ e duw ma dakuriy rogon ni nge magafan’dad nga boch ban’en ni aray rogon. (1 Tim. 6:19) Som’on e rayog ni nge mo’maw’ ngodad ni ngad fal’eged i lemnag e tin nra yag ngodad boch nga m’on, ma dabki magafan’dad nga rogon e par rodad e chiney. Machane faanra ud pared ma gad be lemnag e pi n’ey, ma aram e ra mom ni ngaud lemnaged.

15. Mang e ga be fil ko n’en ni yog Christa?

¹⁵ Rayog ni ngad filed ban’en ko n’en ni buch rok Christa ni leengin Dennis ni faan kan weliy murung’agen. I yog ni gaar: “Bay ba mit e m’ar ni ke yib ngog ni kari warnageg. Ere dabkiyog ni nggu un ko yan, mab t’uf ni nggu fanay e wheelchair, maku yooren e ngiyal’ e gu ma par u bet. Gubin e rran nug ma par u fithik’ e amith. Ka fini yog e togta rog ngog ndab kug gol. Machane nap’an ni yog e re n’ey, me lungug u wan’ug, ‘Ba thil rogon ni be lemnag e pi n’en bay nga m’on.’ Gubin ngiyal’ nug ma lemnag e athap rog, ma aram e n’en ma pi’ e gapas nga lanin’ug. Sana rayog nib t’uf ni nggu athamgiliy e par u lan e biney e fayleng e chiney, machane ra boch nga m’on ma rug ra felfelan’ ko par u lan e bin nib beech e fayleng!”

“PIIN NI BA’ MADGUN U WUN’RAD E BA’ RORAD URNGIN E TIN NI NGE YOG NGORAD”

16. Mang fan nrayog ni nge yoloy David ni Pilung ni piin bay madgun Jehovah u wan’rad e “ba’ rorad urngin e tin ni nge yog ngorad”?

¹⁶ Reb e tapigpig rok Jehovah nib fel’ u wan’ e tin bay rok e ku ra i mada’nag e magawon. Am lemnag David ni Pilung. Sana rayog ni dalip e bitir ni fak ni yim’. Nni t’ar e thin nga daken, ma daki yul’yul’ e pi fager rok ngak, ma thingari milnag e pogofan rok u lan boor e duw. Yugu aram gelngin e gafgow ni i yan u fithik’, me weliy murung’agen Jehovah ni gaar: “Piin ni ba’ madgun u wun’rad e ba’ rorad urngin e tin ni nge yog ngorad.” (Ps. 34:​9, 10) Mang fan nrayog ni nge yog e re n’ey? Ya yugu aram rogon ni gadad e girdi’ rok Jehovah e gad manang nra ud mada’naged e magawon, machane ba pagan’dad ngay ni gubin ngiyal’ nra i yag ngodad e tin nrib t’uf rodad. (Ps. 145:16) Ma rayog ni nge pagan’dad ngak Jehovah nra ayuwegdad u fithik’ urngin e magawon rodad. Ere rayog ni nge fel’ u wan’dad e tin bay rodad.

17. Mang fan ni kam dugliy u wan’um ni ngam athamgil u rogon nrayog rom ni ngam nang rogon ni nge fel’ u wan’um e tin bay rom?

¹⁷ Baadag Jehovah ni nge fel’ u wan’um e tin bay rom. (Ps. 131:​1, 2) Ere mu athamgil u rogon nrayog rom ni ngam nang rogon ni nge fel’ u wan’um e tin bay rom. Faan ga ra athamgil u rogon nrayog rom ni ngaum pining e magar, ma ga be m’oneg e n’en nib ga’ fan mag dag e sobut’an’, mi ri mich u wan’um nra riyul’ e tin ke micheg Jehovah, ma aram e rayog ni nge lungum: “Arrogon, ba fel’ u wan’ug e tin bay rog.”​—Ps. 16:​5, 6, NW.