Piin Nriyul’ ni “Yad Be Gayiy Got” e Yad Ra Adag Fare Thin nib Fel’

1. Mang e rayog ni nge rin’ e girdi’ u nap’an ni gad ra machibnagrad? (Acts 16:​14, 15; Hebrews 11:6)

BOOR e girdi’ ko bin som’on e chibog e nap’an ni yugu rrung’aged e tin riyul’ me m’agan’rad ngay. (Mu beeg e Acts 16:​14, 15; Hebrews 11:6.) Ku arrogon e ngiyal’ ney ni bay boch e girdi’ ni yad ma felfelan’ u nap’an ni yad ra rung’ag fare thin nib fel’ ko yay nsom’on. Mus ko piin nde m’agan’rad ngay ko som’on e rayog ni nge boch nga tomuren mar adaged ni ngar motoyilgad ngay. Ere mang e susun ni ngad rin’ed u nap’an ni kad pirieged e piin nriyul’ ni “yad be gayiy Got” u nap’an e machib?

2. Uw rogon nrayog ni ngan taarebrogonnag e maruwel ni gad ma rin’ ni ngan ayuweg be’ ni nge mang reb i gachalpen Jesus ko maruwel ni ma rin’ reb e tamilay’?

² Am lemnag e re fanathin ney. Fare maruwel ni gad ma rin’ ni ngan ayuweg be’ ni nge mang reb i gachalpen Jesus e rayog ni ngan taarebrogonnag ko maruwel ni ma rin’ reb e tamilay’. Faanra ke el wom’engin reb e woldug u milay’ rok, ma dabisiy nra t’ar ni yugu aram rogon ni ka bay yu yang ko fare milay’ ni be gi’ e but’ riy ara ka be yung. Ere ku arrogon nnap’an ni gad ra pirieg be’ ni baadag ni nge motoyil, ma gad baadag ni ngad ayuweged ni nge mang reb i gachalpen Kristus u payngin nrayog. Machane nap’an ni gad be rin’ e re n’ey, ma ka gad be ulul i ayuweg yugu boch e girdi’ ni kab t’uf e tayim ni ngar guyed fel’ngin e n’en yibe weliy ngorad. (John 4:​35, 36) Tamilangan’ e ra ayuwegdad ni ngad mel’eged e bin th’abi fel’ e kanawo’ ni ngad ayuweged yad riy. Ere chiney e ngad weliyed e n’en nrayog ni ngad rin’ed u nap’an e yay nsom’on ni kad nonad be’ ya nge yag nda ayuweged e piin yad baadag fare thin nib fel’. Ku gad ra weliy rogon nrayog ni ngad ayuweged yad ni ngaur mon’oggad i yan.

FAANRA BAADAG E GIRDI’ FARE THIN NIB FEL’

3. Mang e susun ni ngad rin’ed u nap’an ni gad ra pirieg e girdi’ ni yad baadag e machib? (1 Korinth 9:26)

³ Nap’an ni gad ra pirieg e girdi’ ni yad baadag e machib, ma gad baadag ni ngad ayuweged yad ni ngar tababgad i lek fare pa’ i kanawo’ ni be sor ko yafos ni ka chingiyal’ nem. Ere susun e ngad ognaged e fol Bible ngorad ni ka chingiyal’ nem, mad pininged yad ko muulung u nap’an e yay nsom’on ni kad nonad ngorad.​—Mu beeg e 1 Korinth 9:26.

4. Mu weliy murung’agen be’ ni m’agan’ ngay ni nge fil e Bible ni ka chingiyal’ nem.

⁴ Ngan ognag e fol Bible ku be’. Bay boch e girdi’ ni gad ma non ngorad nib m’agan’rad ngay ni ngar filed e Bible ni ka chingiyal’ nem. Bod ni bay reb e Aningeg Fen e Maruwel ni yan reb e rugod u Canada ko gin bay reb e cart rodad riy ni yibe pi’ boch e babyor riy, me yan i fek ba ken fare brochure ni Mu Par Ndariy N’umngin Nap’an ni Gab Felfelan’! Fare walag nib pin ni bay u tooben e re cart nem e yog ngak nra fek ba ken e re brochure nem ma rayog ni nge un ko fol Bible ndariy puluwon. Baadag fare rugod e re n’ey, ma aram e ra bagayow me pi’ e namba ko telefon rok ngak bagayow. Faani taaboch riy me textnag fare rugod fare walag ni be weliy ngak murung’agen fare fol Bible. Nap’an ni yog fare walag nrayog ni nge yan i guy ko Sabado, ma aram me gaar fare rugod: “Ma uw rogon e gabul? Ya dariy ban’en ni nggu rin’.” Ere ra tababgow ko fol Bible ko re Biyernes nem. I un fare rugod ko muulung nni tay ko re Madnom nem, me ulul ni nge mon’og nib papey.

5. Mang e ra ayuwegdad ni ngad nanged e bin th’abi fel’ e kanawo’ ni ngad ognaged e fol Bible riy ngak be’? (Kum guy e sasing.)

⁵ Riyul’ ni gathi gubin e girdi’ ni yad ra adag ni ngar filed e Bible ni ka chingiyal’ nem ni bod fare rugod. Rayog ni bay boch e girdi’ nib t’uf e tayim rorad. Ere sana rayog nsom’on e ba t’uf ni ngad weliyed murung’agen ban’en ni baadag facha’ ni ngan weliy. Machane faanra ud lemnaged fel’ngin facha’ ma gad be dag ngak ni gad be lemnag, ma dabi n’uw nap’an ma sana rayog ni ngad tababgad ko fol Bible. Mang e rayog ni nga dogned u nap’an ni gad be ognag e fol Bible ngak? Ireray e re deer nni fith ngak boch e walag ni yad ba salap i tababnag e fol Bible ko girdi’.

6. Mang e rayog ni nga dogned ni nge ayuweg facha’ ni nge nang nib fel’ ni nge fil e Bible?

⁶ Pi walag nni fith ngorad rogon ni yad ma tababnag e fol Bible ko girdi’ e ra weliyed ni bay boch e nam nib fel’ ndab nog fa gal thin riy ni “fol Bible” ara “ngan fil ban’en ngom” u nap’an ni yibe weliy murung’agen e fol Bible ngak be’. Rogned nib fel’ ni ngan fanay fapi thin ni “sabethin,” nge “ngan weliy ban’en u taabang,” nge “ngan nang e n’en bay u Bible.” Ra ngam ayuweg be’ ni nge adag ni ngkum nonow bayay, ma rayog ni nge lungum ngak, “Yira ngat nga rogon ni be pi’ e Bible e fulweg u boch e deer nib ga’ fan ni yima fith u murung’agen e yafos rodad,” ara “Bible e gathi kemus ni ba ke babyor ko teliw, ya ku boor e kanawo’ ni ma ayuwegdad riy.” Ku rayog ni ngam ulul ngay ni nge lungum: “Dabi n’uw nap’an, ya rayog ni ngam fil ban’en nib ga’ fan u lan 10 i yan ko 15 e minit.” De t’uf ni ngam fanay fapi thin ni “ba ngiyal’ ni nga nib ni guyem” ara “gubin e wik,” ya rayog ni nge k’aring ni nge lemnag ni ban’en nthingari rin’ ni gubin ngiyal’.

7. Mingiyal’ e ke nang boch e girdi’ ko yay nsom’on nib riyul’ e pi n’en yad be fil? (1 Korinth 14:​23-25)

⁷ Mu piningrad nga reb e muulung. Be m’ug riy ni immoy boch e girdi’ u nap’an apostal Paul nnap’an nra uned ko muulung ko yay nsom’on mar nanged ni yad be fil e tin riyul’. (Mu beeg e 1 Korinth 14:​23-25.) Ba ga’ ni ku ireray e n’en ma buch e ngiyal’ ney. Yooren e girdi’ e nap’an ni yad ra tabab ni ngar uned ko pi muulung rodad, mab papey ni yad ma mon’og. Ere mingiyal’ e susun ni ngam piningrad ko muulung? Guruy ni 10 ko fare ke babyor ni Mu Par Ndariy N’umngin Nap’an ni Gab Felfelan’! e be pi’ e athamgil ko girdi’ ni ngar uned ko muulung, machane de t’uf ni ngam son nge mada’ ko re guruy nem mfin mu piningrad ko muulung. Rayog ni ngam pining be’ ko muulung ni yima tay u tungun e wik ko yay nsom’on ni kam nonow. Sana rayog ni nga mog ngak kenggin e welthin ni yira pi’ ni fan ko yoor, ara murung’agen ban’en ni yira fil u nap’an e Fol Wulyang ko Damit ko re wik nem.

8. Mang e rayog ni nga dogned ngak be’ u nap’an ni gad be pining ni nge un ko muulung? (Isaiah 54:13)

⁸ Nap’an ni ga be pining be’ ni nge un ko muulung, mag weliy ngak rogon nib thil e muulung ni gad ma tay ko n’en nrayog ni yima rin’ ko teliw ni ma un ngay. Nap’an ni motoyil be’ ni ma fil e Bible ko Fol Wulyang ko Damit ni yibe tay ko yay nsom’on me fith ngak e en yow ma fil e Bible ni gaar, “Manang e en be yarmiy e muulung fithingan urngin e girdi’?” Ere weliy fare walag nib pin ngak ni gad gubin ni gad ma guy rogon ni ngad nanged fithingan urngin e girdi’ u lan e ulung ni bod ni gad manang fithingan chon e tabinaw rodad. I nang facha’ ni ma fil e Bible nib thil e re n’ey ko n’en ma buch ko teliw rok. Maku reb e boor e girdi’ ndar nanged fan e muulung ni gad ma tay. (Mu beeg e Isaiah 54:13.) Gad ma muulung ni ngad liyorgad ngak Jehovah, ma gad fil murung’agen, me bagadad me pi’ e athamgil nga laniyan’ bagadad. (Heb. 2:12; 10:​24, 25) Aram fan ni kan yarmiy e muulung rodad ni nge ayuwegdad ni ngad filed boch ban’en, ma danir rin’ boch ban’en riy ni bay rogon ko yalen ko teliw. (1 Kor. 14:40) Kub ga’ raen e magal u Tagil’ e Liyor rodad ni bochan e gad ma yan e ngaram ni ngad filed ban’en. Ku darud weliyed murung’agen boch ban’en ni bay rogon ko am ni bochan e gad ma par u mathilin ngongolen e am. Ku darud luaged e thin u murung’agen boch ban’en. Sana rayog nib fel’ ni ngam dag fare video ni Mang e Yima Rin’ ko Pi Tagil’ e Liyor Romad? ngak faen ga be fil e Bible ngak u m’on riy, ya nge yag ni nang e n’en yima rin’ u rom.

9-10. Nap’an ni gad be pining be’ ni nge un ko muulung, ma uw rogon ni ngad micheged nga laniyan’ ndarud towasariyed ni nge un ko teliw rodad ara n’en yima rin’ riy? (Kum guy e sasing.)

⁹ Bay boch e girdi’ ndubrad ni ngar uned ko muulung ni bochan e yad be magar nri dogned ngorad ni ngar uned ko teliw rodad. Mmicheg nga laniyan’ faen ga be pining ko muulung ni gad ba felfelan’ ni ma yib e girdi’ ko muulung rodad, ma darud towasariyed be’ ni nge un ko teliw rodad ara n’en yima rin’ riy. Ba puf mat’awun e tabinaw ni ngar bad nib muun ngay e piin bay pi fakrad ni kab achig. Danir fek e bitir ngan yan ni tayrad nga bang ni yad ba dar ko gallabthir rorad ni ngan fil ban’en ngorad u nap’an e pi muulung rodad. Ya ma par e piin gallabthir nge piin bitir u taabang mu kur filed boch ban’en u taabang. Aray rogon nra nang e gallabthir e gin bay pi fakrad riy nge n’en yibe fil ngorad. (Deut. 31:12) Daru dogned ko girdi’ ni ngar pied e salpiy u nap’an e pi muulung rodad. Ya gad ma fol ko n’en ni tay Jesus chilen ni gaar: “Ke yog ngomed nda mpied puluwon, ere mpied ndab ni pi’ puluwon ngomed.” (Matt. 10:8) Ku rayog ni nga mog ngak nde t’uf ni nge chuw ko mad nib tolang puluwon u nap’an ni nge yib ko muulung. Ya Got e ma yaliy gum’irchaen e girdi’ ma gathi yaarad.​—1 Sam. 16:7.

¹⁰ Faanra ke un facha’ ko muulung, mag guy rogon ni nge nang ni yib felfelan’ ngay ni ke un ko muulung. Mu guy rogon ni ngar mada’gad e piin piilal nge boch e walag. Faanra guy ni yib gol ngak, ma dabisiy nra adag ni ngki un bayay. Ma faanra dariy e Bible rok, mi gimew yaliy e ke rom mag ayuweg ni nge nang fan e n’en be weliy e en be pi’ e welthin ara n’en yibe fil.

NAP’AN NI KAM TABABNAGEW BE’ E FOL BIBLE

11. Uw rogon nrayog ni ngam dag ni ga manang ni boor pa’ u puluwon facha’ mab mudugil n’umngin nap’an nrayog ni ngam nonow riy?

¹¹ Mang e susun ndab da paged talin u nap’an ni gad be fil be’ e Bible? Mu dag ni ga manang ni boor pa’ u puluwon mab mudugil n’umngin nap’an nrayog ni ngam nonow riy. Bod ni faanra ka mog borran ni ngam man mu guy mag yan nib tayim, ni mus ni faanra girdi’ ko gin ga ma par riy e daru ranod nga bang nib tayim. Maku reb e rayog nib fel’ ndab mu filew e Bible nib n’uw nap’an u nap’an e yay nsom’on ni ngam tababgow ko fol Bible. Bay boch e walag ni boor e girdi’ ni kar filed e Bible ngorad ni ka rogned nib fel’ ndab mu filew e Bible nib n’uw nap’an ni yugu aram rogon ni ka baadag facha’ ni ngam weliyew boch ban’en. Ku dab mu non nib pag rogon. Mu pag facha’ ni nge weliy laniyan’.​—Prov. 10:19.

12. Nap’an ni gad ra tabab be’ ko fol Bible, ma mang e susun ni ngad nameged?

¹² Nap’an ni gimew ra tabab be’ ko fol Bible, ma susun e ngam nameg ni ngam ayuweg ni nge nang Jehovah nge Jesus ma kur t’ufgow rok. Rogon ni ngam rin’ e re n’ey e aram e ngam dag ngak e n’en be yog e Thin rok Got ma gathi kemus ni ngam weliy ngak e n’en ga manang. (Acts 10:​25, 26) Ba ga’ ni ma weliy apostal Paul murung’agen Jesus Kristus ni ir e en ke l’og Jehovah ni nge ayuwegdad ni ngad nanged murung’agen me t’uf rodad u nap’an ni be fil ban’en ko girdi’. (1 Kor. 2:​1, 2) Ki tamilangnag Paul feni ga’ fan ni ngan ayuweg e piin ka fin nra manged boch i gachalpen Jesus ni ngar nanged nib t’uf ni ngar maruweliyed boch e fel’ngin nib manigil nrayog ni ngan taarebrogonnag ko gol, nge silber, nge malang nib tolang puluwon. (1 Kor. 3:​11-15) Pi fel’ngin ney e ba muun ngay e michan’, nge gonop, nge tamilangan’, nge madgun Jehovah. (Ps. 19:​9, 10; Prov. 3:​13-15; 1 Pet. 1:7) Ere mu folwok u rogon ni i fil Paul ban’en ko girdi’ ni aram e ngam ayuweg e piin ga be fil e Bible ngorad ni nge gel e michan’ rorad me chugur e tha’ u thilrad e Chitamangidad ni bay u tharmiy.​—2 Kor. 1:24.

13. Uw rogon nrayog ni ngad gum’an’naged gadad ma gad nang rogon laniyan’ e piin gad be fil ban’en ngorad? (2 Korinth 10:​4, 5) (Kum guy e sasing.)

¹³ Mu folwok rok Jesus u rogon ni i fil ban’en ko girdi’ ni aram e ngam gum’an’nagem mag nang rogon laniyan’ e piin ga be fil ban’en ngorad. Dab mu fith e deer nra k’aring e tamra’ ngak faen ga be non ngak. Ma faanra ba t’uf mag digey e tin baaray ban’en nib mo’maw’ ni nge nang fan mfin kum sulow ngam weliyew boch nga tomuren. Mu pi’ e tayim ngak ni nge taw e tin riyul’ nga gum’irchaen ko bin ngam guy rogon ni ngam towasariy ni nge m’agan’ nga reb e machib. (John 16:12; Kol. 2:​6, 7) Be yog e Bible ni pi machib nde riyul’ e bod “yungi n’en ni ke fal’eg e moonyan’ rogon ke par riy be cham ngodad” nib t’uf ni ngan ‘buthug.’ Nap’an nni yoloy e re thin ney ko thin ni Greek, min fanay bbugithin ni be yip’ fan ba wulyang nib t’uf ni ngan buthug nga but’. (Mu beeg e 2 Korinth 10:​4, 5) Ere u m’on ni ngam buthug fare wulyang ni ir e be taga’ facha’ ngay ni ga be fil e Bible ngak, mag ayuweg ni nge Naf nga tan pa’ Jehovah.​—Ps. 91:9.

ROGON NI NGAN AYUWEG E PIIN KA FIN NRA UNED KO MUULUNG

14. Uw rogon nsusun e ngad ngongolgad ngak e piin ka fin nra uned ko muulung rodad?

¹⁴ Baadag Jehovah ndab da laniyan’gad ngak e piin ka yad bbeech ni yugu demtrug e yalen rorad, ara urngin e salpiy rorad, ara gin kar bad riy. (Jas. 2:​1-4, 9) Ere uw rogon nrayog ni ngad daged e t’ufeg ngak e piin ka fin nra uned ko muulung rodad?

15-16. Uw rogon nrayog ni ngad ayuweged e piin ka fin nra uned ko muulung ndab kur magagawongad?

¹⁵ Bay boch e girdi’ ni yad ma un ko muulung rodad ni bochan e yad baadag ni ngar nanged e n’en gad ma rin’ u rom, ara bay be’ ni ma par u yugu reb e binaw ni ke yog ngorad ni ngar uned ko muulung. Ere susun e dab da magagawongad ni ngad nonad ngorad. Mu dag ni kam felfelan’ ni kar bad, machane dab mu k’aring e tamra’ ngorad. Mu piningrad ni ngar pared nga toobem. Mu fanayed e ke rom e Bible nge babyor ni yibe fil ara mu pi’ ba ken ngorad. Maku reb e ngam lemnag rogon lanin’rad. Bay be’ nib pumoon ni un nga reb e muulung ni yog ngak reb e walag ni pumoon ni ke yib i non ngak ni be magagawon ni bochan e ba thil rogon e munmad ni ke tay ko girdi’ u rom. Machane me ayuweg fare walag ni nge dabki magagawon, me weliy ngak ni Pi Mich Rok Jehovah e taareb rogorad ko tin ka bay e girdi’. Boch nga tomuren me un fare pumoon ko taufe, machane de pagtalin rogon e ngongol ni dag fare walag ngak. Machane nap’an ni gad be non ko piin ka fin nra uned ko muulung ma ngad kol ayuwgad ndab da fithed boch e deer nrayog ni nge k’aring e tamra’ ngorad, ara da fithed boch ban’en u murung’agrad nde t’uf ni ngad nanged.​—1 Pet. 4:15.

¹⁶ Ku bay reb e kanawo’ nrayog ni ngad ayuweged e piin ka fin nra uned ko muulung ndab kur magagawongad. Bod ni faanra gad be non ngorad, ara gad be pi’ e fulweg, ara welthin u nap’an e muulung ma kad weliyed murung’agen e piin gathi yad e Pi Mich ara michan’ rorad mab t’uf ni ngad daged e tayfan ngorad. Dab u dogned boch ban’en nrayog ni nge magawonnag lanin’rad ara ra dabuyed. (Titus 2:8; 3:2) Bod ndab da weliyed murung’agen e michan’ rorad u reb e kanawo’ ni be m’ug riy ni gad be darifannagrad. (2 Kor. 6:3) Ireray ban’en nsusun e nge kol ayuw e pi walag ni pumoon riy ni yad ma pi’ e welthin ni fan ko yoor. Ku yad ma dag ni yad be lemnag e piin kar uned ko muulung ni gathi yad boch e Pi Mich ni aram e yad ma weliy fan boch e thin ara boch ban’en ni ka rogned ko welthin rorad ndab ra nanged fan.

17. Mang e gad be nameg u nap’an ni gad ra pirieg e piin nriyul’ ni “yad be gayiy Got” u nap’an e machib?

¹⁷ Gubin e rran ni be gel e ga’ fan ko fare maruwel ni gad ma rin’ ni ngad ayuweged e girdi’ ni ngar manged pi gachalpen Jesus, ma gad be ulul ni ngad pirieged e piin nriyul’ ni “yad be gayiy Got.” (Heb. 11:6) Nap’an ni gad ra piriegrad, ma susun e dab da magagawongad ni ngad ognaged e fol Bible ngorad ara da pininged yad ko muulung. Faan gad ra rin’ e re n’ey, ma aram e rayog ni ngad ayuweged yad ni ngar tababgad i lek fare pa’ i “kanawo’ ni yan” ko yafos.​—Matt. 7:14.