Jehovah e Ir e “Ma Pi’ e Felfelan’” Ngodad

1-2. (a) Uw rogon laniyan’ boor e girdi’ e ngiyal’ ney? (b) Mang e gad ra weliy ko re article ney?

GIRDI’ ko re fayleng ney e ri yad baadag ni ngar pirieged e felfelan’. Machane yugu aram rogon ma ka der yag ni ngar felfelan’gad. Boor e girdi’ ni yad be lemnag ndab ki fel’ e par rorad mab gel e kireban’ ni yad be tay. Bay boch e girdi’ rok Jehovah ni ku yad ma lem ni aray rogon. Bochan ni gad be par ko “tin tomren e rran,” ma gad manang nra i buch boch ban’en rodad maku be yib boch e lem ngodad nib “mo’maw’” ni ngad athamgilgad u fithik’.​—2 Tim. 3:1.

² Gad ra weliy ko re article ney boch ban’en nrayog ni nge chuweg e felfelan’ rodad nge rogon nrayog ni ngkud felfelan’gad bayay. Machane som’on e ba t’uf ni ngad nanged e Gin ma yib e bin riyul’ e felfelan’ riy.

GIN MA YIB E BIN RIYUL’ E FELFELAN’ RIY

3. Mang e gad be fil u murung’agen Jehovah ko pi n’en ke sunmiy? (Kum guy e sasing.)

³ Gubin ngiyal’ ni ma par Jehovah nib felfelan’, ma baadag ni ngkud felfelan’gad. Aram fan ni ke sunmiy boor ban’en ni ma yibnag e felfelan’ ngodad. Bod e fayleng rodad nib fel’ yaan, nge pi n’en nib liyegdad nib thilthil ramaen, nge rogon ni ma fafel e gamanman u taabang, nge ggan ni boor mit nib fel’ lamen. Ri gad ba t’uf rok Got ma baadag ni ngad pared ni gad ba felfelan’!

Baby elephant: Image © Romi Gamit/Shutterstock; penguin chicks: Vladimir Seliverstov/500px via Getty Images; baby goats: Rita Kochmarjova/stock.adobe.com; two dolphins: georgeclerk/E+ via Getty Images

4. (a) Uw rogon nrayog ni nge par Jehovah nib felfelan’ ni yugu aram rogon ni be guy e gafgow ni be tay e girdi’ u fayleng? (b) Mang reb e tow’ath ni ke pi’ Jehovah ngodad? (Psalm 16:11)

⁴ Yugu aram rogon ni Jehovah e ir “fare Got nib felfelan’,” machane ri manang e kireban’ nge gafgow ni be tay e girdi’ u fayleng. (1 Tim. 1:​11, NW) Yugu aram rogon, ma der pag e re n’ey ni nge warnag e felfelan’ rok. Manang nra chuw gubin e gafgow ya ir e ke dugliy e ngiyal’ nra chuweg. Be gum’an’nag ir nge mada’ ko ngiyal’ nra chuweg urngin e kireban’ nge gafgow ndariy n’umngin nap’an. Machane chiney ndawori rin’ e re n’ey e manang e n’en gad be yan u fithik’ ma baadag ni nge ayuwegdad. Uw rogon ni ma ayuwegdad? Reb e kanawo’ ni ma rin’ e re n’ey riy e aram e ke pi’ reb e tow’ath ngodad ni aram e rayog ni ngaud felfelan’gad. (Mu beeg e Psalm 16:11.) Mu tay fanam i yan u rogon ni pi’ e re tow’ath ney ngak Jesus ni Fak.

5-6. Mang fan nib felfelan’ Jesus?

⁵ Jesus e ir e th’abi felfelan’ u fithik’ urngin ban’en ni ke sunmiy Jehovah. Mang fan? Am lemnag l’agruw i fan. (1) “Taareb rogon yaan ngak Got, ni Got ndanir guy” ma ir e rib fel’ rogon ni m’ug rarogon e Chitamangin rok. (Kol. 1:15; mu guy e study note ko fare thin ni “happy” ni bay ko 1 Timothy 6:15.) (2) Jesus e ir e th’abi n’uw nap’an ni kar parew e Chitamangin u taabang ni ir e En Ke Yib e bin riyul’ e felfelan’ rok.

⁶ Ma felfelan’ Jesus ni bochan e gubin ngiyal’ ni ma rin’ e tin baadag e Chitamangin. (Prov. 8:​30, 31; John 8:29) Ba fel’ u wan’ Jehovah ni bochan e i par nib yul’yul’ ngak.​—Matt. 3:17.

7. Uw rogon nrayog ni ngad pirieged e bin riyul’ e felfelan’?

⁷ Faan gad ra chugur ngak Jehovah ni ir e En Ke Yib e bin riyul’ e felfelan’ rok, maku rayog ni ngad pirieged e bin riyul’ e felfelan’. Ra yoor e tayim nda filed murung’agen Jehovah riy ma gad be folwok rok, ma aram e ra gel e felfelan’ rodad. Ku gad ra felfelan’ ni faanra gad be rin’ e n’en nib m’agan’ Got ngay, ma gad manang ni gad ba fel’ u wan’.a (Ps. 33:12) Machane uw rogon ni faanra bay yu ngiyal’ nder yag ni ngad felfelan’gad, fa reb e gubin ngiyal’ ni be buch e re n’ey rodad? Gur, re n’ey e be yip’ fan nda kud fel’gad u wan’ Got? Danga’! Dawor da flontgad ma yu ngiyal’ e gad ma gafgow ni bochan e amith nge kireban’. Manang Jehovah e re n’ey. (Ps. 103:14) Ere chiney e ngad weliyed murung’agen boch ban’en nrayog ni nge chuweg e felfelan’ rodad nge rogon nrayog ni ngkud felfelan’gad bayay.

DAB MU PAG BAN’EN NI NGE CHUWEG E FELFELAN’ ROM

8. Mang e rayog ni nge buch rodad u nap’an ni gad be mada’nag e magawon?

⁸ Bin #1: Magawon. Ga be gafgow ni bochan e togopuluw ni yibe tay ngom, ara ban’en ni ke buch ni yibe gafgow riy, ara ga be gafgow ko par, ara kam m’ar, ara kam pilibthir, fa? Nap’an ni gad ra mada’nag boch e magawon ni aray rogon nib ga’ ni tin baaray e magawon ndariy ban’en nrayog ni ngad rin’ed ngay, mab mom ni nge chuw e felfelan’ rodad. Be yog e Bible nrayog ni ngari kireban’dad ma gad lemnag ndakuriy ba ngiyal’ ni gad ra felfelan’ bayay. (Prov. 15:13) Bay reb e piilal ni ka nog Babis ngak ni yim’ be’ nib pumoon ni walagen nge gallabthir rok u lan aningeg e duw. I yog ni gaar: “Gu lemnag ni yigoo gag ma dariy be’ nrayog ni nge ayuwegeg. Ku bay yu ngiyal’ nri ma kireban’ug ni bochan e de yoor e tayim nug rin’ed e gallabthir rog nge re pumoon ni walageg nem boch ban’en u taabang u m’on ni ngar m’ad, ya boor pa’ u puluwog.” Arrogon, pi magawon ni gad ma mada’nag e rayog ni nge k’aringdad ni ngari aw parowdad miki muleg lanin’dad.

9. Mang e rayog ni nge ayuwegdad ni ngkud felfelan’gad bayay? (Jeremiah 29:​4-7, 10)

⁹ Mang e rayog ni nge ayuwegdad ni ngkud felfelan’gad bayay? Rayog ni ngkud felfelan’gad bayay ni faanra dabki magafan’dad nga boch ban’en ndariy ban’en nrayog ni ngad rin’ed ngay, mu ud pininged e magar. Re fayleng ney e ma k’aring e girdi’ ni ngar lemnaged nra ngad felfelan’gad ma thingari fel’ gubin ban’en ko par rodad. Machane de riyul’ e re n’ey. Bod ni yog Jehovah ko pi Jew ni yad ba kalbus u Babylon ni nge m’agan’rad ngay ni yad boch e kalbus u reb e nam ni gathi nam rorad, ma ngar rin’ed e tin nrayog rorad ni ngar felfelan’gad ko par rorad u rom. (Mu beeg e Jeremiah 29:​4-7, 10.) Mang e gad be fil ko re n’ey? Mu guy rogon ni nge m’agan’um nga rogon e par rom me fel’ u wan’um e tin nib fel’ ni bay rom. Dab mu pagtalin nra ayuwegem Jehovah. (Ps. 63:7; 146:5) Effie ni maad’ad nib gel ma daki yag ni nge un ko yan e yog ni gaar: “Ba ga’ e ayuw ni pi’ Jehovah, nge chon e tabinaw rog, nge ulung ngog. Ere gu lemnag ni faanra gu pageg ma ra yan i aw nda gur pining e magar ko n’en kan rin’ ni fan ngog. Gu baadag ni nggu pining e magar ngak Jehovah nge pi fager rog nga gelngin e ayuw ni kar pied ngog.”

10. Mang fan nrayog ni ngad pared ni gad ba felfelan’ u nap’an ni gad be mada’nag e magawon?

¹⁰ Mus ni faanra gad be mada’nag e magawon ara be buch boch ban’en nib kireb rodad ara chon e tabinaw rodad, ma rayog ni ngad pared ni gad ba felfelan’.b (Ps. 126:5) Mang fan? Ya felfelan’ rodad e der yan u rogon e n’en be buch rodad. Maria nreb e pioneer e yog ni gaar: “Ga ra par ni gab felfelan’ u nap’an ni ga be mada’nag e magawon ma gathi aram e be yip’ fan nder kireban’um. Ya be yip’ fan ndawor mu pagtalin e pi n’en ke micheg Jehovah. Ra ayuwegdad e Chitamangidad ni ngad pared ni gad ba felfelan’.” Dab mu pagtalin ndemtrug feni mo’maw’ e par rodad e chiney, ma gubin e magawon rodad nra chuw ni bod lon ey u dap’eyan’ nra aw e day ngay me mathmath.

11. Uw rogon ni be pi’ e n’en ni buch rok apostal Paul e athamgil nga lanin’um?

¹¹ Machane uw rogon ni faanra da tababgad ni ngad lemnaged ni gad be mada’nag e magawon ni bochan e da kud fel’gad u wan’ Jehovah? Rayog ni ngad lemnaged boch e tapigpig rok Jehovah ni ur mada’naged boch e magawon nrib mo’maw’. Am lemnag e n’en ni buch rok apostal Paul. I mel’eg Jesus ni nge machibnag e tin riyul’ “ngak e piin ni gathi yad piyu Israel nge piin ni pilung, nge ngak e girdi’ nu Israel.” (Acts 9:15) Reb e tow’ath e ray nib manigil! Yugu aram rogon maku boor e magawon ni mada’nag Paul. (2 Kor. 11:​23-27) Ere gur, re n’ey e be yip’ fan ndaki fel’ u wan’ Jehovah? Danga’! Ya rogon e athamgil ni i tay e be m’ug riy ni be tow’athnag Jehovah. (Rom. 5:​3-5) Ere chiney e ngam lemnag e n’en be buch rom. Ga be athamgil u fithik’ e yul’yul’ ni yugu aram rogon urngin e magawon ni ga be mada’nag. Ere ku rayog ni nge pagan’um ngay ni gab fel’ u wan’ Jehovah.

12. Uw rogon nrayog ni nge chuw e felfelan’ rodad ni faanra der yag ni ngad rin’ed e n’en gad baadag?

¹² Bin #2: Der yag ni ngad rin’ed e n’en gad baadag. (Prov. 13:12) Bochan nib t’uf Jehovah rodad ma gad be pining e magar ngak, ma aram e n’en ma k’aringdad ni ngad nameged boch ban’en ni fan ko pigpig rodad ngak. Machane faanra dabiyog ni ngad rin’ed e n’en gad be nameg ni bochan rarogon e par rodad, ma rayog ni nge mulan’dad. (Prov. 17:22) Bay reb e pioneer ni ka nog Holly ngak ni gaar: “Gu baadag ni nggu un ko fare School for Kingdom Evangelizers, ara gu pigpig u yugu reb e nam, ara nggu un ko fare maruwel u Ramapo. Machane me thil rogon e par rog ma dakiyog ni nggu nameg e pi n’em. Ri kireban’ug. Rib gel e kankanan’ ni ga ra tay ni faanra ga baadag ni ngam rin’ boch ban’en machane dabiyog.” Boor e walag ni aray rogon e lem rorad.

13. Mang boch ban’en nrayog ni ngad nameged ni faanra bay boch ban’en ndabiyog ni ngad rin’ed?

¹³ Mang e rayog ni nge ayuwegdad ni ngkud felfelan’gad bayay? Dab mu pagtalin nder ma yog Jehovah ni ngad rin’ed boch ban’en ndabiyog rodad. Ba ga’ fadad u wan’ ni yugu aram rogon ndabiyog ni ngad rin’ed e n’en be rin’ yugu boch e girdi’. Baadag ni ngad nanged e gin ngad musgad riy ma gad par ni gad ba yul’yul’. (Mik. 6:8; 1 Kor. 4:2) Kab ga’ fan u wan’ e pi n’en gad ma lemnag nge pi fel’ngidad ko n’en gad ma rin’. Ere gur, ba puluw ni ngad lemnaged ni ngad rin’ed boch ban’en nder lemnag Jehovah ni ngad rin’ed, fa?c Danga’! Ere faanra bay boch ban’en ndabiyog ni ngam rin’ ni fan ko pigpig rom ngak Jehovah ni bochan rarogom, mag guy rogon ni ngam lemnag e tin nrayog rom. Rayog ni ngam fil ban’en ngak e piin yad bbitir ngom ara mu pi’ e athamgil nga laniyan’ e piin kar pilibthirgad, fa? Rayog ni ngam nameg ni ngam man mu guy be’, ara mu callnag, ara mu textnag ni ngam pi’ e athamgil nga laniyan’, fa? Ga ra nameg ni ngam rin’ boch ban’en nrayog rom, ma aram e ra ayuwegem Jehovah ni ngam felfelan’! Ku dab mu pagtalin ndab ki n’uw nap’an u lan e bin nib beech e fayleng, ma rayog ni ngad pigpiggad ngak Jehovah u boch e kanawo’ ndad lemnaged ni gad ra rin’ riy! Holly ni faan kan weliy murung’agen e yog ni gaar: “Ma lungug u wan’ug, ‘Gu ra par ni manemus.’ Rayog ni nge ayuwegeg Jehovah ni nggu rin’ boch ban’en nug be nameg u lan e bin nib beech e fayleng.”

14. Mang e ku rayog ni nge chuweg e felfelan’ rodad?

¹⁴ Bin #3: Gad be taga’ ko salpiy nge boch ban’en ni nge yibnag e felfelan’ ngodad. Bay boch e girdi’ ni yad ma fanay e yungi n’en bay ko Internet ni yima non riy ko girdi’ ni ngar k’aringed e girdi’ ni ngar lemnaged ni faan gad ra rin’ e tin gad baadag, ma rayog ni ngad pirieged e bin riyul’ e felfelan’ me fel’ u wan’dad e par rodad. Yima k’aring e girdi’ ni ngar m’oneged u wan’rad e pi n’en yad baadag ni yad ma rin’, mar chuw’iyed e tin yad baadag, mar milekaggad nga yu yang nib thilthil. De kireb ni ngad rin’ed boch ban’en ni ma yibnag e felfelan’ ngodad. Ke sunmiydad Jehovah u reb e kanawo’ nrayog ni ngad felfelan’gad ko pi n’en ke sunmiy nib fel’ yaan. Machane boor e girdi’ ni kar pirieged ni pi n’en ur lemnaged nra yibnag e felfelan’ ngorad e aram e pi n’en be chuweg e felfelan’ rorad. Eva nreb e pioneer e yog ni gaar, “Faanra gubin ngiyal’ ni ga ma rin’ e tin ga baadag, ma dariy ba ngiyal’ nra fel’ u wan’um e tin bay rom.” Faanra gad ma taga’ ko salpiy nge boch ban’en ni nge yibnag e felfelan’ ngodad, ma ra tomur riy ma ra kireban’dad.

15. Mang e rayog ni ngad filed ko n’en ni buch rok Solomon ni Pilung?

¹⁵ Rayog ni ngad filed ban’en ko n’en ni buch rok Solomon ni Pilung ni bay rogon nga wenegan ni yib ngak ni bochan e taga’ ko salpiy nge boch ban’en ni ma yibnag e felfelan’ ngak. I rin’ e pi n’en baadag ni bod ni i kay boor mit e ggan nib fel’ lamen, ma be motoyil ko musik nib fel’ lingan, ma be felfelan’ nga urngin e tin th’abi fel’ ban’en nrayog ni ngan chuw’iy ko salpiy ko ngiyal’ ni immoy riy ni bochan e be guy rogon ni nge pirieg e felfelan’. Machane de yag ni nge fel’ u wan’ e tin bay rok. I yog ni gaar: “Lan owchedad e ri dabi gaman ko tin be guy; teldad e ri dabi gaman ko tin be rung’ag.” (Ekl. 1:​8, BT; 2:​1-11) N’en ma lemnag e girdi’ nu fayleng nra yibnag e bin riyul’ e felfelan’ e bod e salpiy nde riyul’. Yira guy min lemnag nriyul’ nrayog ni nge ayuwegdad, machane pi n’ey e dabiyog ni nge yibnag e bin riyul’ e felfelan’ ngodad.

16. Faanra ud rin’ed boch ban’en ni fan ngak yugu boch e girdi’, ma uw rogon nrayog ni nge ayuwegdad ni ngkud felfelan’gad bayay? (Kum guy e sasing.)

¹⁶ Mang e rayog ni nge ayuwegdad ni ngkud felfelan’gad bayay? I fil Jesus ngodad ni “ba gel e felfelan’ ni ma yib ko pi’ ban’en ngak be’ ko bin ni be’ e nge pi’ ban’en ngom.” (Acts 20:35) Bay reb e piilal ni ka nog Alekos ngak ni yog ni gaar: “Gu ma guy rogon ni nggu rin’ nochi ban’en nib achig ni fan ngak yugu boch e girdi’. Ra be yoor e ayuw nug be pi’, ma aram e be lich e tayim nug be lemnag e tin gu baadag ni nggu rin’, ma aram e n’en ma yibnag e felfelan’ ngog.” Mang e rayog ni ngam rin’ ni fan ngak yugu boch e girdi’? Faanra kam guy be’ ni ke kireban’, mag guy rogon ni ngam pi’ e athamgil nga laniyan’. Sana dabiyog ni ngam pithig e magawon rok, machane rayog ni ngam fal’eg laniyan’ ni aram e ngam motoyil ngak ni ga be guy rogon ni ngam nang rogon laniyan’, mag dag e runguy ngak, mag puguran ngak ni nge pag fan e magawon rok ngak Jehovah. (Ps. 55:22; 68:19) Ku rayog ni ngam ayuweg ni nge nang ndawori digey Jehovah. (Ps. 37:28; Isa. 59:1) Ku rayog ni ngam ognag e ayuw ngak ni bod ni ngam lith boch e ggan nge kay, ara mu un ngak ngam marow nga bang ni ke lemnag ni nge yan ngay. Mu pining ni nge un ngom ko machib, ya aram e n’en nra yibnag e felfelan’ ngak. Mu pagem ni nge fanayem Jehovah ni ngam ayuweg yugu boch e girdi’. Ra ud rin’ed boch ban’en ni fan ngak yugu boch e girdi’ ko bin ngad rin’ed e tin gad baadag, ma ra yibnag e bin riyul’ e felfelan’ ngodad!​—Prov. 11:25.

17. Faanra gad baadag ni nge yag e bin riyul’ e felfelan’ ngodad, ma mang e thingar da rin’ed? (Psalm 43:4)

¹⁷ Faanra ud ululgad ni ngad chugurgad ngak e Chitamangidad ni bay u tharmiy, ma rayog ni nge yag e bin riyul’ e felfelan’ ngodad. Be micheg e Bible ngodad ni Jehovah e ir e ‘ma pi’ e felfelan’ ngodad ma ma taydad ni gad ba felfelan’.’ (Mu beeg e Psalm 43:4.) Ere demtrug e n’en be buch u lan e yafos rodad, ma rayog ni ngad pared nib pagan’dad. Manga yugu da m’oneged Jehovah u wan’dad ni Ir e Ma Pi’ e felfelan’ ngodad!​—Ps. 144:15.