Rogon ni Nge Fel’ Boch Rogon e Meybil ni Ga Ma Tay

1-2. (a) Mang e rayog ni nge talegdad ndab da weliyed gubin ban’en ni bay u lanin’dad ngak Jehovah u nap’an ni gad be meybil? (b) Uw rogon ni kad nanged ni ma motoyil Jehovah nga urngin ban’en ni gad ma yog u lan e meybil rodad?

BAY yu ngiyal’ ni ga ma lemnag ni yig ga be sul u daken taa ban’en u lan e meybil rom ara damur meybil nrogon ni ke yib u gum’irchaem, fa? Faanra arrogon, ma gathi yigoo gur e ga ma lem ni aray rogon. Bochan ni boor pa’ u puluwdad, ma rayog ni bay yu ngiyal’ nder ma n’uw nap’an e meybil rodad. Fa reb e rayog ni be mo’maw’ ngodad ni ngad weliyed gubin ban’en ni bay u lanin’dad ngak Jehovah ni bochan e gad be lemnag ndariy rogon ni ngad nonad ngak.

² Be micheg e Bible ngodad ni n’en th’abi ga’ fan u wan’ Jehovah e aram e ngad meybilgad ngak u fithik’ e sobut’an’, ma gathi nga dogned boch e thin ni yugu ba pag feni manigil u lan e meybil rodad. Ma rung’ag e “meybil rok e piin ba sobut’.” (Ps. 10:​17, BT) Ma motoyil nga urngin ban’en ni gad ma yog ngak ya ri ma lemnagdad.​—Ps. 139:​1-3.

3. Mang boch e deer ni gad ra weliy e fulweg riy ko re article ney?

³ Ere rayog ni ngad fithed ni nge lungudad: Mang fan nrayog ni ngad meybilgad ngak Jehovah nib pagan’dad? Uw rogon nrayog ni ngad meybilgad ngak Jehovah u reb e kanawo’ nra chugurnagdad ngak? Faanra ud lemnaged boch e meybil ni kan yoloy nga lan e Bible, ma uw rogon nra ayuwegdad ni nge fel’ boch rogon e meybil ni gad ma tay? Ma mang e rayog ni ngad rin’ed ni faanra kaygi gel e mochuch ni gad be tay ndabkiyog ni ngad weliyed lanin’dad ngak Jehovah nib fel’ rogon? Ere ngad weliyed e fulweg ko pi deer ney.

MU WELIY URNGIN BAN’EN NI BAY U LANIN’UM NGAK JEHOVAH U DAKEN E MEYBIL

4. Mang e rayog ni nge ayuwegdad ni ngad weliyed urngin ban’en ni bay u lanin’dad ngak Jehovah u daken e meybil? (Psalm 119:145)

⁴ Nap’an nra tamilang u wan’dad ni Jehovah e ir reb e fager nib yul’yul’ ma baadag e tin th’abi fel’ ni fan ngodad, ma aram e gad ra nang nrayog ni ngad weliyed urngin ban’en ni bay u lanin’dad ngak u daken e meybil. En ni yoloy e Psalm 119 e guy rogon ni nge par e tha’ u thilrow Jehovah ni aram rogon. Yugu aram rogon ma i mada’nag e magawon. Ya immoy boch e girdi’ ni u rogned boch ban’en nde riyul’ u murung’agen. (Ps. 119:​23, 69, 78) Ku bay yu ngiyal’ ni i mulan’ ni bochan e pi oloboch rok. (Ps. 119:5) Yugu aram rogon ma de rus ni nge weliy urngin ban’en ni bay u laniyan’ ngak Jehovah.​—Mu beeg e Psalm 119:145.

5. Mang fan nsusun e dab da paged ban’en ni nge talegdad ndab da meybilgad? Mu susunnag.

⁵ Mus ko piin kar rin’ed boch e denen nib ubchiya’ ni baadag Jehovah ni ngar meybilgad ngak. (Isa. 55:​6, 7) Ere susun e dab da paged ban’en ni nge talegdad ndab da meybilgad. Baaray rogon nrayog ni ngan susunnag. Be’ ni ma kol e yap’ ko skoki e manang nrayog ni nge non ko piin yad be pow’iy e gin nge sor e skoki ngay ni faanra ke t’uf e ayuw rok. Gur, faanra ke malog ara ke oloboch ma ra magagawon ni nge non ngorad ni bochan e be tamra’, fa? Ba mudugil ni danga’! Ere ku arrogodad nrayog ni ngad weliyed urngin ban’en ni bay u lanin’dad ngak Jehovah u daken e meybil ni mus ni faanra da kud nanged e n’en ngad rin’ed ara kad denengad.​—Ps. 119:​25, 176.

ROGON NI NGAD MEYBILGAD U REB E KANAWO’ NRA CHUGURNAGDAD NGAK JEHOVAH

6-7. Faanra ud pared ni gad be lemnag pi fel’ngin Jehovah, ma uw rogon nra mom boch ngodad ni ngad weliyed lanin’dad ngak? Mu weliy murung’agen be’. (Kum guy e footnote.)

⁶ Nap’an ni gad ra weliy urngin ban’en ni bay u lanin’dad ngak Jehovah u daken e meybil, ma gad ra chugur ngak. Ere mang e rayog ni nge ayuwegdad ni ngad meybilgad ni aray rogon?

⁷ Mu lemnag pi fel’ngin Jehovah.a Faanra ud pared ni gad be lemnag pi fel’ngin Jehovah, ma aram e ra mom boch ngodad ni ngad weliyed lanin’dad ngak. (Ps. 145:​8, 9, 18) Am lemnag e n’en ni buch rok Kristine nreb e walag nib pin ni chitamangin e ba ta cham. I yog ni gaar: “De mom ni nggu non ngak Jehovah ni bod nug be non ngak be’ ni Chitamag. Gu lemnag nra digeyeg ni bochan e dawor gu flont.” Ere mang reb i fel’ngin Jehovah ni ayuweg? I yog ni gaar: “T’ufeg ni ma dag Jehovah u fithik’ e yul’yul’ e ma ayuwegeg ni nge pagan’ug. Gu manang ndabi pag paag. Mus ni faanra kug dol’, ma ra ayuwegeg ni ngkug sak’iy nga lang. Re n’ey e ma ayuwegeg ni nggu weliy ngak e pi n’en nri ma yibnag e felfelan’ ngog nge pi n’en nri ma kirebnag lanin’ug.”

8-9. Mang boch i angin nra yib riy ni faanra mu lemnag e n’en nga mog u m’on ni ngam meybil? Mu weliy ban’en ni ke buch.

⁸ Mu lemnag e n’en nga mog. U m’on ni ngam meybil ma bay in e deer nrayog ni ngam fithem riy. Bod nrayog ni ngam fithem ni nge lungum: ‘Mang boch e magawon nug be mada’nag e chiney? Bay be’ nib t’uf ni nggu n’ag fan e kireb rok, fa? Bay reb e magawon nug be mada’nag e chiney nib t’uf ni nge ayuwegeg Jehovah riy, fa?’ (2 Ki. 19:​15-19) Ku rayog ni ngad folwokgad ko n’en ni rin’ Jesus ni aram e ngad lemnaged e n’en nrayog ni nga dogned ngak Jehovah ni bay rogon nga fithingan, nge Gil’ilungun, nge n’en nib m’agan’ ngay.​—Matt. 6:​9, 10.

⁹ Nap’an ni nang reb e walag nib pin ni ka nog Aliska ngak ni ke cancer e man’ey ko pumoon rok nrib ubchiya’, ma rib mo’maw’ ngak ni nge meybil. I yog ni gaar: “Ri kireban’ug nib gel nnap’an nug ra tabab ni nggu meybil ma da kug nang e n’en ni nggog.” Ere mang e ke ayuweg? I yog ni gaar: “U m’on ni nggu meybil ma gu ma fal’eg i lemnag e n’en ni nggog, ma re n’ey e ke ayuwegeg ni ngguy rogon ni gathi kemus ni yigoo gag e nggu weliy murung’ageg u nap’an nug be meybil. Gu ra rin’ e re n’ey ma ma gapas boch lanin’ug, me yag ni nggu weliy ngak Jehovah yugu boch ban’en u lan e meybil rog.”

10. Mang fan nsusun e ngad guyed rogon ni nge n’uw boch nap’an e meybil rodad? (Kum guy e sasing.)

¹⁰ Nge n’uw boch nap’an e meybil rom. Yugu aram rogon ni ku rayog ni ngad chugurgad ngak Jehovah ni faanra ud meybilgad nib ngoch nap’an, machane faanra ba n’uw boch nap’an e meybil rodad ma dabisiy ni gad ra weliy lanin’dad nib fel’ rogon.b I yog Elijah ni figirngin Aliska ni gaar: “Boor yay nug ma guy rogon ni nggu meybil u lan reb e rran, ma bochan nug ma tay e tayim ni nggu meybil nib n’uw nap’an ma ke chugur e tha’ u thilmow Jehovah. Der sonnageg Jehovah ni nggu mu’nag e meybil rog, ere rayog ni nggu meybil nib n’uw nap’an.” Baaray ban’en nrayog ni ngam rin’: Mu gay ba ngiyal’ nge bang nrayog ni ngam meybil riy, nsana ku rayog ni ngam non nib ga’ lamam ndariy ban’en nra magawonnagem, mag guy rogon ni nge mecham ngom ni ngaum meybil nib n’uw nap’an.

MU LEMNAG BOCH E MEYBIL NI BAY U BIBLE

11. Uw rogon nra yib angin ngodad ni faan gad ra lemnag boch e meybil nge tang ni bay murung’agen u Bible? (Kum guy fare kahol ni kenggin e “Rayog ni Ngam Nang Rogon Lanin’rad, Fa?”)

¹¹ Sana ra yib angin ngom ni faan ga ra lemnag boch e meybil nge tang ni bay murung’agen u Bible. Nap’an ni ga be lemnag rogon ni i weliy e pi tapigpig rok Got e pi n’en bay u lanin’rad ngak, ma ra k’aringem ni ngam weliy urngin ban’en ni bay u lanin’um ngak Jehovah. Sana ku rayog ni ngam pirieg boch e thin nib beech nrayog ni ngam uneg u lan e meybil rom. Ku dabisiy ni ga ra pirieg boch e meybil ni un tay nib puluw ko n’en be buch rom.

12. Mang boch e deer nrayog ni ngad fithed gadad riy u nap’an ni gad be lemnag reb e meybil ni kan yoloy murung’agen nga Bible?

¹² Nap’an ni ga be lemnag reb e meybil ni kan yoloy murung’agen nga Bible, mag fithem ni nge lungum: ‘Mini’ e ke yog e pi thin ney, ma mang e be buch rok? Taareb rogon e n’en be buch rog ko n’en nni weliy murung’agen ko re meybil ney, fa? Mang boch ban’en nrayog ni nggu fil riy?’ Sana rayog nib t’uf ni ngam gay murung’agen boch ban’en ni ngam nang e fulweg ko re deer ney, machane athamgil ni ga ra tay e dabi yan i aw nib m’ay fan. Ngad weliyed murung’agen aningeg e meybil.

13. Mang reb e ban’en nrayog ni ngad filed rok Hannah u murung’agen e meybil? (1 Samuel 1:​10, 11) (Kum guy e sasing.)

¹³ Mu beeg e 1 Samuel 1:​10, 11. L’agruw e magawon nib ga’ ni be mada’nag Hannah u nap’an ni yog e pi thin ney u lan e meybil rok. Bin som’on e der yag ni nge diyen, ma bin baaram e ppin ni leengin figirngin e be gelnag e mo’maw’ ko par rok. (1 Sam. 1:​4-7) Mang e rayog ni ngam fil ko meybil rok Hannah ni faanra ga be mada’nag reb e magawon nder chuw? I tay e tayim ni nge weliy ngak Jehovah urngin ban’en ni be magafan’ ngay, ma tomuren me baud boch laniyan’. (1 Sam. 1:​12, 18) Ku arrogodad nrayog ni nge baud lanin’dad ni faan gad ra ‘pi’ e gilab rodad ngak’ Jehovah ni aram e ngad weliyed ngak rogon lanin’dad ko magawon ni gad be mada’nag.​—Ps. 55:22.

14. (a) Mang e ku gad ra fil ko n’en ni rin’ Hannah? (b) Faanra ud fal’eged i lemnag boch e thin nu Bible, ma uw rogon nra fel’ boch rogon e meybil ni gad ma tay? (Mu guy e footnote.)

¹⁴ In e duw nga tomuren ni gargeleg Hannah Samuel, me fek i yan ngak Eli ni Prist nib Tolang. (1 Sam. 1:​24-28) I meybil Hannah ngak Jehovah ni ke yib u gum’irchaen ni be yog ni ke mich u wan’ ni ma yororiy ma ma ayuweg e pi tapigpig rok ni yad ba yul’yul’.c (1 Sam. 2:​1, 8, 9) Sana dawori tal e magawon ni be mada’nag u tabinaw, machane i lemnag rogon ni be tow’athnag Jehovah. Mang e gad be fil ko re n’ey? Faan gad ra lemnag rogon ni ke ayuwegdad Jehovah ke mada’ ko chiney, ma rayog ni ngad athamgilgad u fithik’ e pi magawon ni gad be mada’nag.

15. Nap’an nra buch boch ban’en nde mat’aw rodad, ma mang e rayog ni ngad filed ko meybil ni tay Jeremiah ni profet? (Jeremiah 12:1)

¹⁵ Mu beeg e Jeremiah 12:1. Bay ba ngiyal’ ni magawon laniyan’ Jeremiah ni profet u nap’an ni guy ni piin yad ba kireb e ba fel’ rogon e par rorad. Ki mulan’ ni bochan rogon e ngongol ni be dag piyu Israel ngak. (Jer. 20:​7, 8) Rayog ni ngad lemgad ni bod Jeremiah u nap’an ni gad ra guy e girdi’ nib sasalap nib fel’ rogon e par rorad ara u nap’an ni yibe moningnagdad. Yugu aram rogon ni i weliy Jeremiah e pi n’en ke dabuy, machane de yog nde mat’aw e n’en be rin’ Got. Ba mudugil nri gel e pagan’ rok nga rogon feni mat’aw e pi n’en ma rin’ Jehovah u nap’an ni guy rogon ni yal’uweg Jehovah e girdi’ rok. (Jer. 32:19) Ku arrogodad nrayog ni ngad weliyed ngak Jehovah urngin ban’en ni kad dabuyed u daken e meybil, ya ba pagan’dad ngay nra taw ko ngiyal’ ni ke dugliy ma ra yal’uweg urngin ban’en nde mat’aw ni be buch rodad e chiney.

16. Faanra bay boch ban’en ndabiyog ni ngad rin’ed ni bochan rarogodad, ma mang e rayog ni ngad filed ko meybil ni tay reb e Levite? (Psalm 42:​1-4) (Kum guy e sasing.)

¹⁶ Mu beeg e Psalm 42:​1-4. Re tang ney e yoloy reb e Levite ndabiyog ni nge un ngak piyu Israel ko liyor u tempel. Re tang ney e be weliy rogon laniyan’. Faanra gad be par u tafedad ndabkiyog ni nga darod nga bang ara kan kalbusnagdad ni bochan e michan’ rodad, ma sana rayog ni ngad nanged rogon laniyan’ e re Levite ney. Rayog ni nga i thilthil rogon lanin’dad, machane ba fel’ ni ngad weliyed u lan e meybil rodad. Sana rayog ni nge ayuwegdad e re n’ey ni ngad fal’eged i yaliy rogon e lem rodad ma gad guy rogon ni ngad thilyeged rogon ni gad be lemnag e magawon rodad. Bod ni nang fare Levite nrayog ni nge pining e sorok ngak Jehovah u yugu boch e kanawo’. (Ps. 42:5) Ki lemnag rogon ni be ayuweg Jehovah. (Ps. 42:8) Gad ra meybil ngak Got ni ke yib u gum’ircha’dad, ma rayog ni nge ayuwegdad ni ngad fal’eged i yaliy rogon e lem rodad, me gapas lanin’dad bayay, miki yib gelngidad ni ngad athamgilgad.

17. (a) Mang e rayog ni ngad filed ko meybil ni tay Jonah ni profet? (Jonah 2:​1, 2) (b) Uw rogon nrayog ni nge ayuwegdad boch e thin ni bay ko Psalms u nap’an ni gad be mada’nag e magawon? (Mu guy e footnote.)

¹⁷ Mu beeg e Jonah 2:​1, 2. I yog Jonah ni profet e pi thin ney u lan e meybil rok u nap’an ni bay u lan yin fare nig nib ga’. Yugu aram rogon nde fol rok Jehovah, machane ba pagan’ ngay nra rung’ag e meybil rok. Boor e thin ni yog Jonah u lan e meybil rok ni bay ko Psalms.d Dabisiy ni manang e pi thin ney nib fel’ rogon. Nap’an ni fal’eg i lemnag, ma aram me pagan’ ngay nra ayuweg Jehovah. Ku arrogon ni faan gad ra guy rogon ni nge mit boch e thin nu Bible ngodad, ma rayog ni nge yib ngan’dad miki fal’eg lanin’dad u nap’an ni gad ra meybil ngak Jehovah ko ngiyal’ ni gad be mada’nag e magawon.

UM CHUGUR NGAK JEHOVAH U DAKEN E MEYBIL

18-19. Faanra bay yu ngiyal’ nda kud nanged rogon ni ngad weliyed lanin’dad u nap’an ni gad be meybil, ma mang e be micheg e Roma 8:​26, 27 ngodad? Mu weliy murung’agen be’.

¹⁸ Mu beeg e Roma 8:​26, 27. Bay yu ngiyal’ nrayog ni ngari magafan’dad nib pag rogon nda kud nanged rogon ni ngad weliyed lanin’dad ngak Jehovah. Machane bay ban’en nrayog ni nge ayuwegdad. Aram e ngiyal’ ni ma “weliy” gelngin Got nib thothup ngak Got e n’en gad be wenignag. Ni uw rogon? I fanay Jehovah gelngin nib thothup ni nge k’aring e piin nra yoloyed e Bible ni ngar yoloyed boor e meybil nga but’. Ngiyal’ ndabiyog ni ngad weliyed lanin’dad nib fel’ rogon, ma rayog ni nge tay Jehovah e thin ni unog u lan e pi meybil nem ni gowa aram e n’en gad baadag ni ngad ninged, ma rayog ni nge fulweg tabon.

¹⁹ Re n’ey e ayuweg reb e walag nib pin ni ka nog Yelena ngak ni be’ nu Russia. Ni kol nga non’ nga kalbus ni bochan e be meybil ma be beeg e Bible. Bochan nib gel e mochuch ni i tay, ma aram me mo’maw’ ngak ni nga i meybil. I yog ni gaar: “Aram e ngiyal’ ni yib ngan’ug nnap’an nug ra mochuch nib gel nda kug nang e n’en ni nggu yibilay ma ra tay Jehovah e n’en ni i yog e pi tapigpig rok kakrom u lan e meybil rorad . . . ni aram e n’en nug baadag ni nggu ning u lan e meybil rog. . . . Re n’ey e ri fal’eg lanin’ug u nap’an nug be mada’nag e magawon nrib gel.”

20. Mang e rayog ni nge momnag ngodad ni ngad meybilgad u nap’an ni gad be mochuch?

²⁰ Ra gad be mochuch, ma rayog ni nge mo’maw’ ni nge meyuluy e lem rodad u nap’an ni gad be meybil. Ere rayog ni ngad beeged boch e thin ni bay ko Psalms nib ga’ lamdad. Ku rayog ni ngad yoloyed e n’en bay u lanin’dad nga but’ ni bod e n’en ni rin’ David ni Pilung. (Kenggin e Ps. 18, 34, 142) Bin riyul’ riy e dariy e motochiyel ni kan ngongliy ni be weliy rogon nsusun e ngad fal’eged rogodad u m’on ni ngad meybilgad. (Ps. 141:2) Mu rin’ e bin nib fel’ ngom.

21. Mang fan nrayog ni ngad meybilgad u polo’ i gum’ircha’dad?

²¹ Ri ma fel’ lanin’dad ni kad nanged nra dawor dogned ban’en ma manang Jehovah rogon lanin’dad. (Ps. 139:4) Yugu aram rogon ma baadag ni nge rung’ag ni gad be weliy e n’en bay u lanin’dad nge rogon ni be pagan’dad ngak. Ere dab mu magagawon ni ngam meybil ngak e Chitamam ni bay u tharmiy. Mog e thin ni bay u lan e pi meybil ni kan yoloy nga lan e Thin rok. Mmeybil u polo’ i gum’irchaem. Mu weliy e felfelan’ nge kireban’ rom ngak. Gubin ngiyal’ nra ayuwegem Jehovah ni ir e bin riyul’ e Fager rom!