Dab Mu Pagtalin ni Ngaum Yibilay Yugu Boch e Girdi’

1. Uw rogon ni kad nanged nib ga’ fan e meybil rodad u wan’ Jehovah?

MEYBIL e aram reb e tow’ath nrib manigil. Am lemnag e re n’ey: Boor e maruwel nib ga’ fan ni ke pi’ Jehovah ngak e pi engel ni ngar rin’ed. (Ps. 91:11) Ku boor e maruwel nrib ga’ fan ni ke pi’ ngak Fak ni nge rin’. (Matt. 28:18) Machane gur, bay be’ ni ke tay ni nga i motoyil ko meybil rodad, fa? Danga’, ya ireray reb e maruwel ni ke tay ni yigoo ir e nge rin’. Jehovah ni ir e “En Ma Rung’ag e meybil” rodad e ma motoyil ngodad.​—Ps. 65:​2, NW.

2. Uw rogon ni dag apostal Paul e kanawo’ nrayog ni ngan folwok riy u rogon ni i yibilay yugu boch e girdi’?

² Yugu aram rogon nrayog ni ngad weliyed ngak Jehovah urngin ban’en ni be magafan’dad ngay, machane susun e ngkud yibilayed yugu boch e girdi’. Aram e n’en ni rin’ apostal Paul. Bod ni yol ngak e ulung nu Efesus ni gaar: “Dagur ma pag telimed ko meybil ni gu ma tay.” (Efe. 1:16) Ki yibilay Paul yugu boch e girdi’. Bod ni yog ngak Timothy ni gaar: “Gu ma pining e magar ngak Got. . . . Gu be yibiliyem ngak Got ma gu be pining e magar ngak ni bocham nnep’ nge rran.” (2 Tim. 1:3) Bay boch ban’en ni i magafan’ Paul ngay nib t’uf ni nge yibilay murung’agen. (2 Kor. 11:23; 12:​7, 8) Yugu aram rogon, miki tay e tayim ni nge yibilay yugu boch e girdi’.

3. Mang fan ni bay yu ngiyal’ nrayog ni ngad paged talin ni ngad uneged yugu boch e girdi’ u lan e meybil rodad?

³ Bay yu ngiyal’ nrayog ni ngad paged talin ni ngad uneged yugu boch e girdi’ u lan e meybil rodad. Mang fan? Bay reb e walag nib pin ni ka nog Sabrinaa ngak ni weliy reb i fan ni ma buch e re n’ey. I yog ni gaar: “Boor pa’ u puluwdad u lan e biney e m’ag. Rayog ni ngaud pared ni yigoo magawon rodad e gad be lemnag, me yan i aw ni yigoo tin nib t’uf rodad e gad be yibilay murung’agen.” Bay yu ngiyal’ ni ma buch e re n’ey rom, fa? Faanra arrogon, ma rayog ni nge ayuwegem e re article ney. Yira weliy riy (1) fan nib ga’ fan ni ngad yibilayed yugu boch e girdi’, nge (2) rogon nrayog ni ngad rin’ed e re n’ey.

MANG FAN NI NGAUD YIBILAYED YUGU BOCH E GIRDI’?

4-5. Uw rogon ni “ba ga’” angin e meybil ni gad ma tay ni fan ngak yugu boch e girdi’? (James 5:16)

⁴ Gad ra yibilay yugu boch e girdi’, ma “ba’ angin ni ba ga’.” (Mu beeg e James 5:16.) Gur, rayog ni nge thil e n’en nra buch rok yugu boch e girdi’ ni faanra ud pied e meybil ni fan ngorad, fa? Arrogon, rayog. Manang Jesus ndabi n’uw nap’an nga tomuren ma ra yog apostal Peter nde nang, ere yog ni gaar: “Kug yibiliyem ngak Got, i gur Simon, ni rogon nib michan’um ngak Got e dabi mul.” (Luke 22:32) Ku manang Paul ni meybil e rayog ni nge thilyeg e n’en nra buch rok be’. Nap’an nni kalbusnag u Roma ni yugu aram rogon ndariy ban’en ni ke bucheg, me yol ngak Filemon ni gaar: “Gu be finey ni bayi fulweg Got taban e meybil romed ni gimed gubin nge fulwegeg ngomed.” (Filem. 22; mu guy e study note ko fare thin ni “for I am hoping that through your prayers.”) Ma aram e n’en ni buch, ya de n’uw nap’an nga tomuren min pag Paul me yag ni ngki machib bayay.

⁵ Machane re n’ey e der yip’ fan ni faan gad ra meybil, ma rayog ni ngad k’aringed Jehovah ni nge rin’ e n’en gad be yibilay. Manang e n’en ma magafan’ e pi tapigpig rok ngay, ma bay yu ngiyal’ ni ma mel’eg ni nge rin’ e n’en yad be wenignag ngak. Bochan ni kad nanged e re n’ey, ma rayog ni nge ayuwegdad ni ngaud yibilayed e magawon rodad ngak Jehovah, me pagan’dad ngay nra yal’uweg ko bin th’abi fel’ e kanawo’.​—Ps. 37:5; mu guy e 2 Korinth 1:11 nge study note.

6. Faanra ud yibilayed yugu boch e girdi’, ma uw rogon nra thilyeg rogon ni gad ma lemnagrad? (1 Peter 3:8)

⁶ Gad ra yibilay yugu boch e girdi’, ma ra ayuwegdad ni ‘ngaud runguyed’ yad. (Mu beeg e 1 Peter 3:8.) Faanra gad be runguy be’, ma aram e gad be guy e gafgow ni be tay ma gad baadag ni ngad ayuweged. (Mark 1:​40, 41) I yog reb e piilal ni ka nog Michael ngak ni gaar: “Nap’an nug ra yibilay e n’en nib t’uf rok yugu boch e girdi’, ma ma ayuwegeg ni nge tamilang boch u wan’ug rogon e magawon ni yad be mada’nag miki gel farad t’uf rog. Gu ma thamiy ni ke chugur boch thilmad ni yugu aram rogon nrayog ndar nanged e re n’ey.” Ku bay reb i angin e re n’ey ni weliy reb e piilal ni ka nog Richard ngak murung’agen. I yog ni gaar: “Nap’an ni gad ra yibilay be’, ma aram e ra k’aringdad ni ngad ayuweged.” Ki yog ni gaar: “Nap’an ni gad ra ognag e ayuw ngak faen gad be yibilay, maku bod ni gad be un i pi’ e fulweg ko meybil ni kad ted ni fan ngak.”

7. Faanra ud yibilayed yugu boch e girdi’, ma uw rogon nra ayuwegdad ndab ud pared ni yigoo magawon rodad e gad be lemnag? (Filippi 2:​3, 4) (Kum guy e sasing.)

⁷ Gad ra yibilay yugu boch e girdi’, ma ra ayuwegdad ni nge puluw rogon ni ngaud lemnaged e magawon rodad. (Mu beeg e Filippi 2:​3, 4.) Bochan ni gad be par u ba fayleng ni Moonyan’ e be gagiyegnag, ma aram fan ni gad gubin ni gad be mada’nag e magawon. (1 John 5:19; Rev. 12:12) Nap’an ni gad ra mechameg ngodad ni ngaud yibilayed yugu boch e girdi’, ma aram e dab da paged talin ni “piin ni yad be par u roy u fayleng ni polo’ ni Kristus e ke michan’rad ngak e gafgow ni be yib [ngodad] e ku ir e be yib ngorad.” (1 Pet. 5:9) Bay reb e pioneer ni ka nog Katherine ngak ni yog ni gaar: “Meybil nug ma tay ni fan ngak yugu boch e girdi’ e ma puguran ngog ni ku arrogorad ni ku yad be mada’nag boch e magawon. Re n’ey e ma ayuwegeg ndab gu par ni yigoo magawon rog e gu be lemnag.”

BA T’UF NI NGAUD YIBILAYED YAD

8. Mog boch e girdi’ nrayog ni ngad uneged yad u lan e meybil rodad.

⁸ Mini’ e piin nrayog ni ngad uneged u lan e meybil rodad? Rayog ni ngaud yibilayed yu ulung i girdi’ ni bod e piin kar m’argad, ara piin fel’ yangaren ni yad be mada’nag e moning nge towasar u skul, ara piin yad be gafgow ni bochan e kar pilibthirgad. Boor e walag ni yad be athamgil u fithik’ e togopuluw ni be tay chon e tabinaw rorad ngorad ara am. (Matt. 10:​18, 36; Acts 12:5) Bay boch i walagdad ni kar milgad u taferad ni bochan e cham ni yibe tay ko gin yad ma par riy. Ku bay boch e walag ni kar gafgowgad ni bochan boch ban’en ni ke buch ni kan gafgow riy. Sana rayog ndad nanged owchen e pi walag ney. Machane nap’an ni gad ra yibilayrad, ma aram e gad be dag ni gad be fol ko n’en ni tay Jesus chilen ni aram e ‘ngaud pired nra bagadad ma ba t’uf rok bagadad.’​—John 13:34.

9. Mang fan nsusun e ngaud yibilayed e piin yad ma yog e thin ko ulung rok Jehovah nge pi leengirad?

⁹ Ku rayog ni ngam yibilay e piin yad ma yog e thin ko ulung rok Jehovah. Pi cha’ney e ba muun ngay fare Ulung ni Ma Pow’iyey nge pi walag ni pumoon ni yad ma ayuwegrad, nge pi Branch Committee, nge pi walag ni pumoon ni yad ma yarmiy rogon e maruwel ni yima rin’ ko pi branch ofis, nge pi walag ni pumoon ni yad ma lekag e ulung, nge piin piilal u lan e ulung, nge pi ministerial servant. Boor ko pi walag ni pumoon ney e ku bay e magawon rorad, machane ba gel e maruwel ni yad be tay ni fan ngodad. (2 Kor. 12:15) Bod ni bay reb e walag ni pumoon ni ma lekag e ulung ni ka nog Mark ngak ni yog ni gaar: “Reb e ban’en nrib mo’maw’ ngog e aram e gub palog ko gin bay e gallabthir rog riy ni kar pilibthirgow. Yow l’agruw ni yow ba m’ar. Yugu aram rogon ni ma ayuwegrow walageg nib pin nge figirngin ko tin nib t’uf rorow, machane ma kireban’ug ni bochan e buchuuw ban’en nrayog ni nggu rin’ ni fan ngorow.” Demtrug ko gad manang e n’en be magafan’ e pi walag ni pumoon ney ngay fa danga’, machane ba fel’ ni ngaud pied e meybil ni fan ngorad. (1 Thess. 5:​12, 13) Ku rayog ni ngad yibilayed leengin e pi walag ni pumoon ney ni bochan ni ayuw ni yad ma pi’ ngak pi figirngirad e ma ayuwegrad ni ngar ululgad ko maruwel ni yad be rin’.

10-11. Ba m’agan’ Jehovah ko meybil ni gad ma pi’ ni fan ngak pi walagdad ni yad gubin, fa? Mu weliy rogon.

¹⁰ Kad weliyed faram nib ga’ ni gad ma yibilay yu ulung i walagdad. Mus ni faanra dariy be’ ni gad be lemnag ni ngad pied e meybil rok, machane rayog ni nga dogned ngak Jehovah ni nge ayuweg e piin yad bay u kalbus ara fal’eg laniyan’ e piin ke yim’ be’ nib t’uf rorad. Bay reb e piilal ni ka nog Donald ngak ni yog ni gaar, “Ri boor e walag ni yad be mada’nag e magawon, ere bay yu ngiyal’ nrayog ni ngad pied e meybil ni fan ngak urngin e piin yad be gafgow.”

¹¹ Ba m’agan’ Jehovah ko pi meybil ney, fa? Arrogon! Ya bin riyul’ riy e ri dad nanged e n’en nrib t’uf rok pi walagdad ni be’ nge be’. Ere ba puluw ni ngad pied e meybil ni fan ngak pi walagdad ni yad gubin. (John 17:20; Efe. 6:18) Meybil ni aray rogon e be micheg nib ‘t’uf rodad e pi cha’ ni gadad ni ke mich Got u wun’rad.’​—1 Pet. 2:17.

NAP’AN NI GAD BE YIBILAY BE’ NGE BE’

12. Faanra ud lemnaged rarogon pi walagdad, ma uw rogon nra ayuwegdad ni ngaud yibilayed yad ni be’ nge be’?

¹² Um lemnag rarogon pi walagem. Gathi kemus nib puluw ni ngad yibilayed pi walagdad ni yad gubin, ya kub puluw ni ngad yibilayed bagayad nge bagayad ni gad be yog fithingrad. Bay be’ u lan e ulung rom ni ke yib ba mit e m’ar ngak nib mo’maw’ ni nge chuw, fa? Bay reb e fel’ yangaren ni ke mulan’ nsana bochan e towasar ni be yib ngak u skul, fa? Bay be’ ni yigoo ir ni be chuguliy fak ni be mo’maw’ ngak ni nge ‘llowan’nag nrogon, me fonownag nrogon girdien Kristus,’ fa? (Efe. 6:4) Faanra um lemnag rarogon pi walagem, ma ra gel e t’ufeg rom ngorad mag nang rogon lanin’rad, ma re n’ey e ra k’aringem ni ngaum yibilayrad.b​—Rom. 12:15.

13. Uw rogon nrayog ni ngad yibilayed e piin ndawor da mada’naged yad?

¹³ Mu yibilay yugu boch e girdi’ ni ga be yog fithingrad. Mus ngak e piin ndawor da mada’naged yad nrayog ni ngad rin’ed e re n’ey ni fan ngorad. Am lemnag boch i walagdad ni kan kalbusnagrad u boch e nam ni bod yu Crimea, nge Eritrea, nge Russia, nge Singapore. Rayog ni ngam pirieg fithingan e pi cha’ney ko jw.org.c Bay reb e walag ni pumoon ni ma lekag e ulung ni ka nog Brian ngak ni yog ni gaar: “Kug nang ni faan gu ra yoloy fithingan reb e walag nga but’ ni kan kalbusnag mu gog nib ga’ lamag, ma ma ayuwegeg ndab gu pagtalin mug uneg fithingan u lan e meybil rog.”

14-15. Uw rogon nrayog ni ngad tamilangnaged e n’en gad be ning ni fan ngak pi walagdad?

¹⁴ Mu tamilangnag e n’en ga be ning ni fan ngorad. Michael ni faan kan weliy murung’agen e yog ni gaar: “Nap’an nug be beeg murung’agen e pi walag ni kan kalbusnagrad ni bay ko jw.org, ma gu ma guy rogon ni nggu lemnag rogon lanin’ug ni faan gomanga gag bagayad. Gu manang nra i magafan’ug ngak leengig, ma gu baadag ni ngaun ayuweg ko tin nib t’uf rok. Ere re n’ey e ma ayuwegeg ni nggu nang boch ban’en nrayog ni nggu weliy u lan e meybil rog ni fan ko pi walag ni kan kalbusnagrad ni yad ba mabgol.”​—Heb. 13:​3, NW, ftn.

¹⁵ Faan gad ra guy rogon ni ngad lemnaged rogon e par ko pi walagdad ni yad bay u kalbus, ma ku rayog ni ngad pirieged boch ban’en nrayog ni ngad uneged u lan e meybil rodad ni fan ngorad. Bod nrayog ni ngad meybilgad ni nge dag e pi matanag ko kalbus e sumunguy ngorad me pagrad e piin yad bay u boch e liw nib tolang ni yad ma yog e thin ni ngar liyorgad nib puf rogorad. (1 Tim. 2:​1, 2) Rayog ni ngad meybilgad ni nge yib e athamgil nga laniyan’ e pi walag ko ulung rodad ni bochan e ngongol nib manigil ni be dag e pi walag ni kan kalbusnagrad ni yad ba yul’yul’, ara nge guy e piin gathi yad boch e Pi Mich e ngongol rorad nib manigil mar adaged ni ngar motoyilgad ko thin ni gad be machibnag. (1 Pet. 2:12) Ku rayog ni ngad rin’ed e re n’ey u nap’an ni gad be yibilay pi walagdad ni yad be mada’nag yugu boch e magawon. Faanra ud lemnaged rarogon pi walagdad, ma gad be yibilayrad ni gad be yog fithingrad, ma gad tamilangnag e n’en gad be ning ni fan ngorad, ma aram e rayog ni ngad daged ni ‘rogon ni be t’uf bagadad rok bagadad’ e be gel i yan.​—1 Thess. 3:12.

NGE PULUW E LEM RODAD U MURUNG’AGEN E MEYBIL NI GAD MA TAY

16. Uw rogon nrayog ni nge puluw rogon e lem ni ngaud ted u murung’agen e meybil ni gad ma tay? (Matthew 6:8)

¹⁶ Kad weliyed ni faan gad ra uneg be’ u lan e meybil rodad, ma sana rayog ni nge thil e n’en nra buch rok. Machane ba t’uf ni nge puluw e lem rodad u murung’agen e re n’ey. Nap’an ni gad ra meybil, ma gathi gad be yog ban’en ngak Jehovah nde nang; ara gad be yog ngak e n’en th’abi fel’ ni nge rin’ ni fan nga reb e ban’en ni be buch. Manang Jehovah e n’en nib t’uf ko pi tapigpig rok u m’on ni ngar nanged. (Mu beeg e Matthew 6:8.) Ere mang fan nsusun e ngad yibilayed pi walagdad? Bochan e pi n’en kad weliy ko re article ney, nge ku bochan e aram reb e kanawo’ ni gad ma dag riy ni gad be lemnag yugu boch e girdi’. T’ufeg e ma k’aringdad ni nge bagadad me pi’ e meybil rok bagadad. Ma ma felfelan’ Jehovah u nap’an nra guy e pi tapigpig rok ni yad be folwok u rogon ni ma dag e t’ufeg.

17-18. Uw rogon nrayog ni ngan susunnag rogon e meybil ni gad ma tay ni fan ngak pi walagdad?

¹⁷ Mus ni faanra gad be meybil ma dariy ban’en ni be thil ko n’en gad be yibilay murung’agen, machane meybil rodad e be m’ug riy nib t’uf pi walagdad rodad, ma ma guy Jehovah e re n’ey. Baaray rogon nrayog ni ngad susunnaged: Am lemnag reb e tabinaw ni bay l’agruw wochi tir riy ni bagayow e bochi pagel ma bagayow e bochi pin. Bay fachi pagel u bet nib m’ar. Ere wenig fachi pin ni walagen ngak e chitamangin ni gaar: “Wenig ngom mu ayuweg walageg, ya kari m’ar!” Bay ban’en ni be rin’ fare matam ko re magawon nem; mab t’uf fare pagel ni fak rok ma be ayuweg nib fel’ rogon. Machane ba mudugil nra felfelan’ ni ke guy fachi pin ni fak nri be lemnag fachi pagel ni walagen ma be wenig ngak ni nge ayuweg.

¹⁸ Ireray e n’en be pi’ Jehovah e athamgil nga lanin’dad ni ngad rin’ed, ni aram e nge bagadad mi i lemnag bagadad ma be pi’ e meybil ni fan ngak. Nap’an ni gad ra rin’ e re n’ey, ma aram e gad be dag ni gathi kemus ni yigoo gadad e gad be lemnagdad ma rriyul’ nib t’uf pi walagdad rodad, ma ma motoyil Jehovah ko re n’ey. (2 Thess. 1:3; Heb. 6:10) Kud weliyed ni bay yu ngiyal’ nrayog ni nge thil e n’en be buch rok be’ ni bochan e meybil ni gad be tay. Ere ngad athamgilgad u rogon nrayog rodad ni nge bagadad mi i pi’ e meybil ni fan ngak bagadad.