Mu Par ni Gab Felfelan’ ni Yugu Aram Rogon ni Kam Pilibthir

1-2. Uw rogon u wan’ Jehovah e piin kar pilibthirgad ni yad ba yul’yul’? (Psalm 92:​12-14; kum guy e sasing .)

BAY yu yang u fayleng ni ma lemnag e girdi’ riy ni yira pilibthir ma aram reb e tow’ath. Machane bay boch e nam ni ma athamgil e girdi’ riy u rogon nrayog rorad ya nge dabi m’ug ni kar pilibthirgad. Bod ni faanra kar guyed ba gaf e manna’ u lolugrad, ma yad ma buoy. Machane yugu demtrug e n’en yad ra rin’ ya nge dabi m’ug ni kar pilibthirgad, ma dabiyog ni ngar taleged e re n’ey ndabi buch.

² Machane ba thil rogon ni ma lemnag e Chitamangidad ni bay u tharmiy e pi tapigpig rok ni kar pilibthirgad. (Prov. 16:31) Ma taareb rogonnagrad ko gek’iy nrib fel’ yaan. (Mu beeg e Psalm 92:​12-14.) Mang e be yip’ fan e re n’ey? Gek’iy ni ke kakrom ken e ba ga’ nrib fel’ yaan ni bochan e boor yuwan ara boor e floras riy. Bod ni bay ba mit e gek’iy ni bay u Sapan nrayog ni nge par ni bokum e duw. Bay yu ken e pi gek’iy ney ni ke pag bokum biyu’ e duw ma rib fel’ yaan. Ere piin yad ba yul’yul’ ni kar pilibthirgad e yad bod e yu ke gek’iy ney ni yad ba fel’ u wan’ Got. Rib ga’ fan u wan’ Jehovah pi fel’ngirad nib manigil. Boor e duw ni kar pigpiggad ngak ma kar pared ni yad ba yul’yul’ ngak ko ngiyal’ nib fel’ gubin ban’en u puluwrad nge ngiyal’ ni yad be mada’nag e magawon.

3. Mu weliy reb e kanawo’ ni ke fanay Jehovah e piin pilibthir riy ni ngar lebguyed e n’en nib m’agan’ ngay.

³ Ra pilibthir be’ ma gathi aram e daki ga’ fan u wan’ Jehovah.a Bin riyul’ riy e ba ga’ ni ma fanay Jehovah e piin kar pilibthirgad ni ngar lebguyed e n’en nib m’agan’ ngay. Bod ni ke pilibthir Sarah u nap’an ni yog Jehovah ngak nra mang chitiningin reb e nam ni boor girdien nge reb e ga’ rok fare Messiah. (Gen. 17:​15-19) Ku arrogon Moses ni ki yog Jehovah ngak ni nge chuweg piyu Israel u Egypt u nap’an ni ke pilibthir. (Ex. 7:​6, 7) Me apostal John e ki pilibthir u nap’an ni thagthagnag Jehovah nga laniyan’ ni nge yoloy lal e babyor u Bible.

4. Mang e rayog ni nge ayuweg e piin pilibthir ni ngar athamgilgad u fithik’ e pi magawon ni yad be mada’nag nrogon ni be yog e Proverbs 15:15? (Kum guy e sasing.)

⁴ Boor e magawon ni ma mada’nag e piin kar pilibthirgad. I yog reb e walag nib pin ni gaar, “Ba t’uf ndab mu rus ni ngam pilibthir, ya de mom e par rok be’ ni ke pilibthir.” Machane faanra ba felfelan’b e piin pilibthir, ma rayog ni ngar athamgilgad u fithik’ e pi magawon ni ma mada’nag e piin pilibthir. (Mu beeg e Proverbs 15:15.) Gad ra weliy boch ban’en ko re article ney nrayog ni nge rin’ e piin kar pilibthirgad, ya nge yag nra pared ni yad ba felfelan’. Ku gad ra weliy rogon nrayog ni nge ayuweg yugu boch e walag e pi walag u lan e ulung rorad ni kar pilibthirgad. Machane som’on e ngad weliyed fan nrayog ni nge mo’maw’ ni ngad pared ni gad ba felfelan’ u nap’an ni gad be pilibthir i yan.

GA RA PILIBTHIR MA RAYOG NI NGE MO’MAW’ NI NGAM PAR NI GAB FELFELAN’

5. Mang e rayog ni nge k’aring boch e pilibthir ni nge mulan’rad?

⁵ Mang e rayog ni nge k’aringem ni nge mulan’um? Sana rayog ni be mulan’um ni bochan e dabkiyog ni ngam rin’ e n’en ni um rin’ kafram. Rayog ni ngaum athapeg ni ngam sul ko ngiyal’ ni baaram ni kab fel’ yangarem ma kab fel’ fithik’ i dowam. (Ekl. 7:10) Bod ni bay reb e walag nib pin ni ka nog Ruby ngak ni yog ni gaar: “Ba mo’maw’ ni nggu chuw ko mad rog ni bochan e ma amith fithik’ i dowag ma dabkiyog ni nggu mithmith ni bod kafram. Mus ni nggu chuweg e stukin nga eg mab mo’maw’. Gubin ngiyal’ ni ma par rifrifen paag nib gamig ma be amith e ulul riy, ere mus nga nochi maruwel nib achig mab mo’maw’ ni nggu rin’.” Ma Harold ni i pigpig u Bethel e yog ni gaar: “Bay yu ngiyal’ nug ma damumuw ni bochan e dabkiyog ni nggu rin’ e pi n’en nug baadag nug ma rin’ kafram. Ug moy ni gag be’ ni gub salap ko gosgos. Gu baadag nug ma un ko baseball. Bay boch e girdi’ ni ma lungurad, ‘Mon’ e bat’ ngak Harold ya ra ayuwegdad ni ngad gelgad.’ Machane chiney e dakugur lemnag nrayog ni nggon’ e bat’.”

6. (a) Mang boch i fan nrayog ni nge mulan’ boch e pilibthir? (b) Mang e rayog ni nge ayuweg e piin pilibthir ni ngar nanged e ngiyal’ ni ngar talgad ko yan u karrow? (Mu guy fare article ni kenggin e “Ba Fel’ ni Nggu Tal ko Yan u Karrow, Fa?” ni bay ko re ke babyor ney.)

⁶ Sana rayog ni nge mulan’um ni bochan e bay boch ban’en ndabkiyog ni ngam rin’ rom ni yigoo gur. Ba ga’ nrayog ni nge buch e re n’ey ni faanra ba t’uf ni nge ayuwegem be’ ara nge yib i par reb i fakam ngom. Fa reb e sana rayog ni kari kireban’um ni bochan e ke meewar fithik’ i dowam ara ke bu’gol e changar rom ndabkiyog ni ngam man nga bang ni yigoo gur ara mman u karrow. Rib gel e kireban’ nrayog ni ngam tay ko re n’ey! Sana rayog ndabkiyog ni ngam rin’ boor ban’en ni um rin’ kafram. Machane dab mu pagtalin nrib ga’ fam u wan’ Jehovah nge yugu boch e girdi’. Ma rayog ni nge pagan’dad ngay ni manang Jehovah rogon lanin’dad. N’en bay u gum’ircha’dad e aram e n’en nib ga’ fan u wan’. Manang nib t’uf rodad mab ga’ fan u wan’dad maku arrogon pi walagdad ni yad ba t’uf rodad mab ga’ farad u wan’dad.​—1 Sam. 16:7.

7. Mang e rayog ni nge ayuweg e piin be kireban’rad ni bochan e sana dabi yib tungun e re m’ag ney u nap’an ni ka yad ba fos?

⁷ Sana rayog ni be kireban’um ni bochan e sana dabi yib tungun e re m’ag ney u nap’an ni ka gab fos. Faanra aray rogon e lem rom, ma mang e rayog ni nge ayuwegem? Mu guy rogon ndab mu pagtalin ni be gum’an’nag Jehovah ir be sonnag e ngiyal’ ni nge thang e re fayleng nib kireb ney. (Isa. 30:18) Machane bay fan ni be gum’an’nag ir. Gum’an’ ni be tay e be pi’ e tayim ngak bokum milyon e girdi’ ni ngar nanged mar pigpiggad ngak. (2 Pet. 3:9) Ere nap’an nra mulan’um, mag guy rogon ni ngam lemnag urngin e girdi’ nra yib angin e gum’an’ rok Jehovah ngorad u m’on ni nge yib e tomur. Gathi rayog ni bay boch i yad ni girdien e tabinaw rom?

8. Nap’an nra m’ar e piin pilibthir ara yad be par u fithik’ e amith, ma mang e rayog ni ngar rin’ed?

⁸ Nap’an ni gad ra m’ar ara gad be par u fithik’ e amith, ma dabisiy nra u dogned ara da rin’ed boch ban’en ni gad ra kalngan’dad riy ni yugu demtrug yangardad. (Ekl. 7:7; Jas. 3:2) Bod nnap’an ni be gafgow Job ni ir be’ nib yul’yul’, ma i yog boch ban’en nde puluw. (Job 6:​1-3) Maku reb e nap’an nra m’ar e piin pilibthir ma rayog ni ngar rin’ed ara rogned boch ban’en ni faan gomanga dar m’argad ma dab rrin’ed. Machane mus ni faanra kad pilibthirgad ara kad m’argad, ma de fel’ ni nge dab kud daged e sumunguy ara ud pared ma gad be lemnag ni nga i rin’ yugu boch e girdi’ boch ban’en ni fan ngodad. Ma faanra kad nanged ni ka dogned ban’en nde fel’ ngak be’, ma susun e ngad gurgad ngad weniggad ngak.​—Matt. 5:​23, 24.

ROGON NI NGAM PAR NI GAB FELFELAN’

9. Mang fan nsusun e ngam pag yugu boch e girdi’ ni ngar ayuweged gur? (Kum guy e sasing.)

⁹ Mu pag yugu boch e girdi’ ni ngar ayuweged gur. (Gal. 6:2) Som’on e sana rayog ni nge mo’maw’ e re n’ey ngom. I yog reb e walag nib pin ni ka nog Gretl ngak ni gaar: “Bay yu ngiyal’ nib mo’maw’ ni nggu pag yugu boch e girdi’ ni ngar ayuweged gag ni bochan e gu be lemnag nug ra magawonnagrad. Ba n’uw nap’an ma ka fini yag ni nggu thilyeg e lem rog mug sobut’nag lanin’ug nggog nib t’uf e ayuw rog.” Nap’an ni ga ra pag yugu boch e girdi’ ni ngar ayuweged gur, ma aram e ga be pagrad ni nge yag e felfelan’ ngorad ni ma yib ko ngan pi’ ban’en ngak be’. (Acts 20:35) Ma dariy e maruwar riy ni ga ra felfelan’ ni ngam guy gelngin ni gab t’uf rorad ma yad baadag ni ngar ayuweged gur.

10. Mang fan nsusun e dab mu pagtalin ni ngaum pining e magar? (Kum guy e sasing.)

¹⁰ Um pining e magar. (Kol. 3:15; 1 Thess. 5:18) Nap’an ni yira rin’ boch ban’en nib fel’ ni fan ngodad, ma gad ma pining e magar u lanin’dad machane rayog ni ngad paged talin ni nga dogned e magar. Machane faan gad ra siminmin ma gad yog e magar ko pi fager rodad, ma yad ra nang nib ga’ farad u wan’dad. Leah ni ir be’ ni ma ayuweg e piin pilibthir u Bethel e yog ni gaar: “Bay reb e walag nib pin nug ma ayuweg ni ma yoloy noch yang i babyor nge pi’ ngog ni be pining e magar ngog. De yoor ban’en ni ma yoloy, machane rib manigil e thin ni ma yog ngog. Rug baadag nug ma beeg e noch yang i babyor nem, ma gu ma felfelan’ ngay ni kug nang nib ga’ fan u wan’ e ayuw nug ma pi’ ngak.”

11. Uw rogon nrayog ni ngam ayuweg yugu boch e girdi’? (Kum guy e sasing.)

¹¹ Mu guy rogon ni ngam ayuweg yugu boch e girdi’. Nap’an ni ga ra fanay e tayim rom nge gelngim ni fan ngak yugu boch e girdi’, ma dabisiy nra ayuwegem ni nge dab kum par ni ga be lemnag e magawon rom. Rayog ni ngad taareb rogonnaged e piin pilibthir nga yu ke babyor nrayog ni ngad filed boch ban’en riy nib ga’ fan. Machane faanra dabi beeg e girdi’ e yu ke babyor nem, ma aram e dabiyog ni ngar filed ban’en riy. Ere ku arrogon ndabiyog ni nge fil e piin yad bbitir ngom boch ban’en rom nib ga’ fan ni faanra dab um non ngorad ma ga be weliy ngorad boch ban’en ni ga manang. Ere mu fith boch e deer ngorad, ngemu’ mag motoyil. Mu fil ngorad fan ni gubin ngiyal’ nib fel’ ni ngan fol ko pi motochiyel rok Jehovah, maku ra yibnag e felfelan’ ngorad. Dariy e maruwar riy ni ga ra felfelan’ u nap’an ni ga ra fal’eg laniyan’ e pi fager rom ni yad bbitir ngom mag pi’ e athamgil nga lanin’rad.​—Ps. 71:18.

12. Mang e ke micheg Jehovah nra rin’ ni fan ko piin pilibthir nrogon ni be yog e Isaiah 46:4? (Kum guy e sasing.)

¹² Mmeybil ngak Jehovah ni nge pi’ gelngim. Yugu aram rogon nrayog ni ngam thamiy ni ke m’ay gelngim ara be meewar lanin’um, machane Jehovah e “der ma yib e magar ngak ma der m’ay gelngin.” (Isa. 40:28) Uw rogon ni ma fanay Jehovah gelngin ndariy e gin nra mus riy? Reb e kanawo’ e aram e ma pi’ gelngin e piin kar pilibthirgad ni yad ba yul’yul’. (Isa. 40:​29-31) Bin riyul’ riy e ke micheg nra ayuwegrad. (Mu beeg e Isaiah 46:4.) Ma Jehovah e gubin ngiyal’ ni ma tay u gil’ e tin ke micheg. (Josh. 23:14; Isa. 55:​10, 11) Ere nap’an ni ga ra meybil mag guy rogon ni be t’ufegem Jehovah ma be ayuwegem, mab mudugil ni ga ra felfelan’.

13. Mang e susun ndab da paged talin nrogon ni be yog e 2 Korinth 4:​16-18? (Kum guy e sasing.)

¹³ Um puguran ngom ni gathi gubin ngiyal’ nra um par ni gab pilibthir. Faanra dab da paged talin ni magawon ni gad be yan u fithik’ e bay ba ngiyal’ nra taw ngay me chuw, ma rayog ni nge mom boch ni ngad athamgilgad u fithik’. Ma be micheg e Bible ngodad nra taw nga ba ngiyal’ ma dab kun pilibthir ma dab kun m’ar. (Job 33:25; Isa. 33:24) Ere rayog ni ngam felfelan’ ni kam nang nra boch nga m’on ma ra fel’ boch fithik’ i dowam, miki yib gelngim, miki fel’ rarogom ko kafram. (Mu beeg e 2 Korinth 4:​16-18.) Machane mang e rayog ni nge rin’ yugu boch e girdi’ ya nge yag nra pied e ayuw?

ROGON NRAYOG NI NGE PI’ YUGU BOCH E GIRDI’ E AYUW

14. Mang nib ga’ fan ni ngam man mu guy e pi walag ni kar pilibthirgad ma ga be callnagrad?

¹⁴ Mman mu guy e pi walag ni kar pilibthirgad ma ga be callnagrad ni gubin ngiyal’. (Heb. 13:16) Rayog ni nga i kireban’ e piin pilibthir ni bochan e ba ga’ ni yigoo yad ni yad ma par. Bay reb e walag ni pumoon ni ka nog Camille ngak ni ma par u tafen ndakir ma un nga bang ni yog ni gaar: “Ba polo’ reb e rran nug ma par u lan e naun rog. Ere ri ma kankanan’ug. Bay yu ngiyal’ nug ma lemnag nug bod ba layon ni ke pilibthir ni ka non’ nga lan ba sum. Gu ma rus maku ma kankanan’ug.” Ere nap’an ni gad ra yan nda guyed e piin kar pilibthirgad, ma aram e gad be micheg nga lanin’rad nib ga’ farad u wan’dad ma yad ba t’uf rodad. Dabisiy ni gad gubin nrayog ni nge yib ngan’dad ba ngiyal’ nda lemnaged ni ngad callnaged ara darod da guyed be’ u lan e ulung rodad ni ke pilibthir, machane dad rin’ed. Gad gubin ni boor pa’ u puluwdad. Ere mang e rayog ni nge ayuwegdad ni ngad “mel’eged e tin ir e th’abi ga’ fan” nib muun ngay ni nga darod da guyed e piin kar pilibthirgad? (Fil. 1:​10, NW) Sana rayog nib fel’ ni ngam yoloy ban’en ko calendar rom ni nge puguran ngom ni ngam textnag ara mu callnag e piin pilibthir u lan e ulung rom. Ku rayog ni ngam dugliy e rofen ni ngam man mu guyrad; dab mu tay ni nga fini yib ngan’um mag rin’.

15. Mang e rayog ni nge rin’ e piin pilibthir nge piin yad bbitir ngorad u taabang?

¹⁵ Faanra ka gab bitir, ma sana rayog ni nge magafan’um ni bochan e dam nang e n’en ngam weliyed ara mu rin’ed e piin pilibthir u taabang. Machane yugu dabi pag rogon ni ngam lemnag e re n’ey, ya kemus ni ngam guy rogon ni ngam mang reb e fager nib manigil. (Prov. 17:17) Mu non ko piin pilibthir u m’on ara tomuren e muulung. Sana rayog ni nga mog ngorad ni nga rogned ngom reb e thin nu Bible nri yad baadag ara ra weliyed ban’en ni buch rorad u nap’an ni kab fel’ yangarrad nib mak’ak’ar u wan’rad. Ku rayog ni nga mog ngorad ni ngam yaliyed reb e program ko JW Broadcasting^® u taabang. Ku rayog ni ngam ayuwegrad u boch ban’en ndabiyog ni ngar rin’ed rorad. Bod nrayog ni ngam ayuwegrad ko cell phone ara tablet rorad ara mu downloadnag e tin nib beech e babyor ngam tay ngay. I yog reb e walag nib pin ni ka nog Carol ngak ni gaar: “Mog ngak e piin pilibthir ni ngam rin’ed boch ban’en u taabang ni ga baadag ni ga ma rin’. Yugu aram rogon ni kug pilibthir, machane kug baadag nug ma rin’ boch ban’en ni nggu felfelan’ ngay. Gu baadag nug ma yan ko chuway’, mug un ko abich ko yungi n’en yima abich riy, mu ug wan gu yaliy e pi n’en kan sunmiy.” Ma reb e walag nib pin ni ka nog Maira ngak e yog ni gaar: “Bay reb e fager rog ni ke gaman 90 e duw rok. Wugem nge medlip e duw ni bay u thilmow. Machane ba ga’ nug ma pagtalin e re n’ey ni bochan e gamow ma minmin ma gamow ma kachido u taabang. Ma nap’an ni gamow ra mada’nag e magawon, ma gamow ma ayuwegew gamow.”

16. Mang fan nrayog nib fel’ ni ngam un ko piin pilibthir u nap’an ni nga ranod ko tafalay?

¹⁶ Mu un ngorad u nap’an ni nga ranod ko tafalay. Gathi kemus ni ngam fekrad ni nga ranod ra guyed e togta, ya ku rayog ni ngam par rorad ni ngam guy ko ba fel’ rogon e tafalay ni yibe tay ngorad maku yibe ayuwegrad ko tin nib t’uf rorad fa danga’. (Isa. 1:17) Ku rayog ni ngam ayuwegrad ni aram e ngam yoloy nga but’ e n’en be yog e togta. Bay reb e walag nib pin ni ke pilibthir ni ka nog Ruth ngak ni yog ni gaar: “Ba ga’ ni faan gu ra yan gguy e togta ni yigoo gag, ma der ma mich u wan’rad e n’en nug ma yog ngorad. Bod nrayog ni nge lungurad, ‘Gathi riyul’ ni gab m’ar, goo gur e ga be lemnag e re n’ir.’ Machane nap’an nra un be’ ngog, mab thil rogon e ngongol ni ma dag e togta ngog. Gu be pining e magar ko pi walag ni yad ma tay e tayim ni ngar uned ngog u nap’an ni nggu wan ko tafalay.”

17. Mang boch e kanawo’ nrayog ni ngam machibgad e piin pilibthir riy?

¹⁷ Mmachibgad u taabang. Bay boch e pilibthir nsana dabkiyog ni ngar uned ko machib u mit e tabinaw. Ere gur, rayog ni ngam pining reb e walag nib pin ni ke pilibthir ni nge un ngom ko machib ni yibe fanay e cart, fa? Sana rayog ni ngam fek reb e chiya ni nge par nga daken u tooben e cart. Fa reb e gur, rayog ni ngam fek reb e walag ni pumoon ni ke pilibthir ni nge un ngom u nap’an ni ngam fil e Bible ku be’, fa reb e ni fil e Bible ngak be’ u tafen? Rayog ni nge lemnag e piin piilal ko rayog ni ngan tay e muulung ni fan ko machib u tafen e piin kar pilibthirgad ya nge yag ni mom boch ngorad ni ngar uned ko machib fa dabiyog. Dabi yan i aw nib m’ay fan urngin ban’en ni gad ra rin’ ni ngad ted fan e piin kar pilibthirgad.​—Prov. 3:27; Rom. 12:10.

18. Mang e gad ra weliy ko bin migid e article?

¹⁸ Ke puguran e re article ney ngodad nib t’uf e piin pilibthir rok Jehovah mab ga’ farad u wan’. Ku arrogodad e pi walag u lan e ulung ni ku yad ba t’uf rodad! Yugu aram rogon ni boor e magawon ni ga be mada’nag, machane ra ayuwegem Jehovah ni ngam par ni gab felfelan’. (Ps. 37:25) Ma rayog ni ngam athapeg e ngiyal’ nra gel e felfelan’ rom ko chiney! Ma uw rogon e piin yad be taliliynag reb e girdi’ rorad ni ke pilibthir, ara reb e bitir, ara fager rorad ni ke m’ar? Uw rogon nrayog ni ngar pared ni yad ba felfelan’? Gad ra weliy e fulweg riy ko bin migid e article.