Rayog ni Nge Ayuwegem Fare Babyor ni Job u Nap’an ni Ga Be Gafgow

1-2. Mang boch i fan nib fel’ ni ngan beeg fare babyor ni Job?

KE YAG ni ngam beeg fare babyor ni Job ndawori n’uw nap’an, fa? Yugu aram rogon ni ke yan sogonap’an 3,500 e duw ni kan yoloy e re ke babyor ney, machane ka boor e girdi’ ni ka yad ma lemnag ni aram ba ken e babyor nni yoloy kakrom nrib manigil. Ma n’uf e girdi’ e en ni yoloy e re ke babyor ney ni bochan e i fanay yu bugithin nib mom ni ngan nang fan, machane rib manigil ma ri kub manging’. Yugu aram rogon ni Moses e ir e yoloy e re ke babyor ney nrib manigil, machane Jehovah Got e ir e En Thin Rok e bay riy.​—2 Tim. 3:16.

² Fare babyor ni Job e aram ba ken e babyor u lan e Bible nrib ga’ fan. Mang fan? Reb riy e bochan ni be tamilangnag murung’agen e bin th’abi ga’ fan e deer ni sum nib t’uf ni nge gagiyelnag e pi engel nge girdi’ e fulweg riy. Re deer nem e ba l’ag nga rogon ni ngan thothupnag fithingan Jehovah. Ku be fil ngodad murung’agen pi fel’ngin Jehovah nrib manigil ni bod e t’ufeg rok, nge gonop rok, nge rogon feni mat’aw, nge gelngin. Bod ni boor yay ni ka nog u lan fare babyor ni Job ni Jehovah e ir e Gubin Ma Rayog Rok. Boor e deer ni yima fith u murung’agen e yafos rodad ni bay e fulweg riy u lan e re ke babyor ney ni kub muun ngay reb ni ka boor e girdi’ ni ma lemnag. Re deer nem e: Mang fan ni ke pag Got e gafgow?

3. Mang boch i angin nrayog ni nge yib ngodad ni faan gad ra fil e n’en bay ko fare babyor ni Job?

³ Ra ga be beeg fare babyor ni Job ma bod ni ga be yan nga daken bburey. Ra ga bay u p’ebugul bburey, ma gubin ban’en u toobem nrayog ni ngam guy. Ere nap’an ni gad ra beeg fare babyor ni Job, ma rayog ni ngari tamilang u wan’dad rogon laniyan’ Jehovah ko gafgow ni gad ma tay. Chiney e ngad guyed rogon nrayog ni nge ayuwegdad e re ke babyor ney u nap’an ni gad be gafgow. Ku gad ra weliy rogon nsusun e ra yib angin chepin Job ngak piyu Israel nge rogon nrayog ni nge yib angin ngodad e ngiyal’ ney. Ku gad ra weliy rogon nrayog ni ngad fanayed e n’en bay ko re ke babyor ney ni ngad ayuweged yugu boch e girdi’.

I PAG GOT JOB NI NGE GAFGOW

4. Uw rogon nib thil Job ngak piyu Israel ni ur moyed u Egypt?

⁴ Nap’an ni be gafgow piyu Israel u Egypt ni yad boch e sib, ma bay be’ nib pumoon ni ma par u Uz ni ka nog Job ngak. Re nam ney e sana immoy u bang nib chugur nga Arabia. Job e i pigpig ngak Jehovah u fithik’ e yul’yul’ nib thil ngak piyu Israel nra tababgad ko meybil ko liyos u Egypt. (Josh. 24:14; Ezek. 20:8) I weliy Jehovah murung’agen Job ni gaar: “Dariy be’ u fayleng . . . ni bod ir.”a (Job 1:8) Job e ir be’ nrib fel’ rogon ma ri yima tayfan ko gin ma par riy. (Job 1:3) Ba mudugil nri damumuw Satan u nap’an ni guy e re pumoon ney ni be’ nib gilbuguwan ma yima tayfan ni be pigpig ngak Got u fithik’ e yul’yul’!

5. Mang fan ni pag Jehovah Job ni nge gafgow? (Job 1:​20-22; 2:​9, 10)

⁵ I yog Satan ni faanra gafgow Job ma ra digey e bin riyul’ e liyor. (Job 1:​7-11; 2:​2-5) Yugu aram rogon nrib t’uf Job rok Jehovah, machane boor e deer ni sum nib ga’ fan ni bochan e n’en ni yog Satan. Ere pag Jehovah Satan ni nge guy rogon ni nge micheg ko ba riyul’ e n’en ke yog fa danga’. (Job 1:​12-19; 2:​6-8) I n’igin Satan ni ngan iring e gamanman rok Job, min thang e fan rok fa ragag i bitir ni fak, me gagiyegnag ni nge yib i for e lot u downgin ni ga’ngin. Yugu aram rogon miki par Job nib yul’yul’. (Mu beeg e Job 1:​20-22; 2:​9, 10.) Tomur riy me golnag Jehovah ko m’ar rok, me sulweg e flaab rok ngak, miki fel’ thin bayay, miki ayuweg ni nge fakay ragag e bitir bayay. Ki par Job nib fos ni 140 e duw, me guy pi fak pi fak ni aningeg e mfen. (Job 42:​10-13, 16) Uw rogon nsusun e ra yib angin chepin Job ngak e pi tapigpig rok Got kakrom, ma uw rogon nrayog ni nge yib angin ngodad e ngiyal’ ney?

6. Uw rogon nrayog ni nge yib angin ngak piyu Israel ni bochan e yad manang fan ni ma pag Got e girdi’ ni ngar gafgowgad? (Kum guy e sasing.)

⁶ Rogon nsusun e ra yib angin ngak piyu Israel. De mom e par rok piyu Israel u Egypt. Bod ni Joshua nge Kaleb e ur moyew ni yow l’agruw e sib ni ka nap’an ni kab fel’ yangarrow. Ngemu’ mu kur unew ko yan u daken e ted u lan 40 e duw ni bochan e de fol piyu Israel. Ere chepin Job e rayog ni nge pi’ e athamgil nga laniyan’ piyu Israel nra bad nga tomuren, ya ra ayuwegrad ni ngar nanged ni Satan e ir e en be k’aring e gafgow ma gathi Got. Ku yad ra nang fan ni ma pag Got e girdi’ ni ngar gafgowgad, ma ma t’ufeg e piin yad ra par ni yad ba yul’yul’ ngak ni yugu aram rogon nib mo’maw’ ngorad, ma ra tow’athnagrad.

7-8. Uw rogon nrayog ni nge ayuweg fare babyor ni Job e piin yad be gafgow? Mu weliy ban’en ni ke buch.

⁷ Rogon nrayog ni nge yib angin ngodad. Ba gel e kireban’ riy, ya boor e girdi’ e ngiyal’ ney ndaki mich Got u wan’rad ni bochan e dabiyog ni ngar nanged fan ni ma buch boch ban’en nib kireb ko girdi’ nib manigil. Am lemnag e n’en ni buch rok Hazelb ni be’ nu Rwanda. Nap’an ni kab bitir, mab mich Got u wan’. Machane me thil boch ban’en u lan e yafos rok. I dar e gallabthir rok Hazel, me yan e chitiningin i leay yugu reb e pumoon me chel nga i gafgownag. Nap’an ni kab fel’ yangaren, me chel be’ nib pumoon nge kol u gelngin. Nap’an ni yan ko muulung ni ma tay e ba’ rok e teliw ni ngan fal’eg laniyan’, ma dan fal’eg laniyan’ u rom. Boch nga tomuren, me yoloy bangi babyor ngak Got me gaar: “Got kug meybil ngom, ma kug guy rogon ni nggu rin’ e tin nib fel’, machane kam pageg ni nggu gafgow. Ere chiney e aram e nggu digeyem nggu rin’ e tin nra yibnag e felfelan’ ngog.” Ri be kireban’dad ko girdi’ ni bod Hazel ni kan k’aringrad ni nge mich u wan’rad ni Got e ir tapgin e gafgow ni yad be tay!

⁸ Machane gadad e kad filed u lan fare babyor ni Job ni gathi Got tapgin e gafgow ni gad be tay, ya Satan! Kud filed nnap’an nra gafgow yugu boch e girdi’, ma dab da lemnaged nib mudugil ni bay ban’en nib kireb ni kar rin’ed. Be yog e Bible ni ‘mus ko n’en ni bay yib ngodad gabul ma dad nanged.’ Ere demtrug be’ nrayog ni nge buch boch ban’en nib kireb rok, maku demtrug e ngiyal’ nrayog ni nge buch riy. (Jas. 4:​13, 14; Job 4:​1, 8) Maku reb e kud filed ni faan gad ra par ni gad ba yul’yul’ u fithik’ e pi magawon ni gad be mada’nag, ma bay e fulweg nra pi’ Jehovah ko moning ni be tay Satan ngak. Re n’ey e ra fal’eg thin Jehovah. (Job 2:3; Prov. 27:11) Rib ga’ fan u wan’dad e pi n’ey ni kad filed ya be ayuwegdad ni ngad nanged fan ni gad ma gafgow e piin yad ba t’uf rodad. Boch nga tomuren me un Hazel ngak e Pi Mich Rok Jehovah ko fol Bible, me yan i nang ni gathi Got tapgin e gafgow ni i tay. I yog ni gaar: “Gu meybil ngak Got bayay ni ke yib u gum’irchaeg. Gog ngak Jehovah nnap’an ni gog ni nggu digey, ma gathi riyul’ ni kug lemnag ni nggu digey. Bin riyul’ riy e ngiyal’ nem e dawor gu nang ko ri ir mini’. Chiney e kug nang ni gub t’uf rok Jehovah. Fin aray e ngiyal’ ni kug pirieg e bin riyul’ e felfelan’.” Ri gad ba felfelan’ ni kad nanged fan ni be pag Got e gafgow! Ere chiney e ngad weliyed rogon nrayog ni nge ayuwegdad e n’en ni buch rok Job u nap’an ni gad be mada’nag e magawon.

ROGON NI MA AYUWEGDAD CHEPIN JOB NI NGAD ATHAMGILGAD

9. Uw rogon ni ga ra weliy rarogon Job u nap’an ni bay u fithik’ e awat? (James 5:11)

⁹ Mu susunnag yaan Job ni bay u fithik’ e awat ni yigoo ir, ma ke for e lot u downgin ni ga’ngin, ma rib gel e amith ni be tay. Ke talumor e biyach u downgin ko malad, ma ke fathiyath, ma ke mayilyil. Dakuriy gelngin ni nge rin’ ban’en. Ma par nga but’ me fek bochi yang u ba th’ib ni but’ ni ke pil ngi i ker downgin ngay. Ba ga’ ni yugu ma gel’gel’ ko amith. Gathi kemus ni be guy rogon ni nge par nib fos, ya ku be guy rogon ni nge par nib yul’yul’. (Mu beeg e James 5:11.) Mang e ayuweg ni nge par nib yul’yul’?

10. Uw rogon e tha’ u thilin Job nge Jehovah? Mu tamilangnag.

¹⁰ I weliy Job rogon laniyan’ ngak Jehovah. (Job 10:​1, 2; 16:20) Bod ni be weliy e guruy ni 3 ngodad ni i weliy gelngin e kireban’ ni i tay ni bochan e gafgow ni be yan u fithik’, me lemnag ni Jehovah e ir e ke k’aring. Ku bay dalip e fager rok ni boor yay nrogned ni be gechignag Got ni bochan e ke denen. Machane gubin ngiyal’ ni i yog Job ni be par nib yul’yul’. Ku bay ba ngiyal’ ni m’ug ko thin rok ni be lemnag ni kab gel e fel’ rok ngak Got. (Job 10:​1-3; 32:​1, 2; 35:​1, 2) Ki yog ni bay yu ngiyal’ ni i yog boch ban’en nde puluw ni bochan e ri be guy rogon ni nge micheg ni be par nib yul’yul’. (Job 6:​3, 26) I yog ko guruy ni 31 ni baadag ni nge pi’ Got e fulweg ko tin be yog me yog ndariy tapgin ni ngan gechignag. (Job 31:35) Machane susun e dabi yog ngak Got ni nge weliy ngak fan e gafgow ni be tay.

11. Mang e rin’ Jehovah ko n’en ni yog Job u murung’agen e yul’yul’ rok?

¹¹ Chiney e kad nanged ni fan ni non Job ngak Jehovah ni aram rogon e bochan nib chugur e tha’ u thilrow, ma rib pagan’ ngay nib mat’aw rogon nra pufthinnag Jehovah. Nap’an ni fulweg Jehovah lungun u fithik’ ba nanyor, ma de tamilangnag ngak fan ni be gafgow. Ku de gechignag ni bochan e ke weliy laniyan’ ara bochan ni be yog ndariy ban’en nib kireb ni ke rin’. Ya fonownag ni bod ba matam ni be fonownag ba pagel ni fak. Ma aram e bin th’abi fel’ e kanawo’ ni ngan ayuweg riy. Bochan e re n’ey, me yog u fithik’ e sobut’an’ nde yoor ban’en ni manang, ma ke kalngan’ ko thin ni yog nde lem u m’on riy. (Job 31:6; 40:​4, 5; 42:​1-6) Uw rogon nrayog ni nge yib angin e re n’ey ngak e pi tapigpig rok Got kakrom, ma uw rogon nrayog ni nge yib angin ngodad e ngiyal’ ney?

12. Uw rogon nsusun e rayog ni nge yib angin chepin Job ngak piyu Israel?

¹² Rogon nsusun e ra yib angin ngak piyu Israel. Susun e rayog ni nge fil piyu Israel ban’en rok Job. Am lemnag e n’en ni buch rok Moses. De mom ngak Moses ni nge pow’iy fare nam nu Israel, ya boor yay ndar folgad rok Jehovah mu ur kirebnaged laniyan’ Moses. Piyu Israel e ba ga’ ni yad ma gun’gun’ nib togopuluw ngak Jehovah ni yad ba thil ngak Moses ni ma weliy e pi magafan’ rok ngak Jehovah. (Ex. 16:​6-8; Num. 11:​10-14; 14:​1-4, 11; 16:​41, 49; 17:5) Kub t’uf ni nge athamgil Moses u nap’an nni yal’uweg. Bod nde n’uw nap’an u m’on ni nge yan piyu Israel nga lan fare Nam ni Kan Micheg, me damumuw Moses ngorad me non “ndakiyog ni tal nge lem.” De pining e sorok ngak Jehovah ni ban’en ni bay rogon ni nge rin’. (Ps. 106:​32, 33, BT) Bochan e re n’ey, ma de pag Jehovah Moses ni nge yan nga lan fare Nam ni Kan Micheg. (Deut. 32:​50-52) Ba mudugil nri kireban’ Moses ko re n’ey, machane me sobut’nag laniyan’ nge m’agan’ ngay. Susun e rayog ni nge ayuweg chepin Job e tin migid e mfen u Israel nra bad nga tomuren ni ngar athamgilgad u fithik’ e pi skeng nra mada’naged. Susun e rayog ni ngar lemnaged chepin Job mar weliyed rogon lanin’rad ngak Jehovah. Kub t’uf ndab ra paged talin ni gathi ka yad ba fel’ ngak Jehovah. Susun e ku rayog ni ngar filed rogon ni ngar sobut’naged lanin’rad nge m’agan’rad ko fonow rok Jehovah.

13. Uw rogon nrayog ni nge ayuwegdad chepin Job ni ngad athamgilgad? (Hebrews 10:36)

¹³ Rogon nrayog ni nge yib angin ngodad. Gadad e piin Kristiano e kub t’uf ni ngad athamgilgad. (Mu beeg e Hebrews 10:36.) Bod ni bay boch i gadad ni be athamgil u fithik’ ba mit e m’ar ni ke yib ngak, ara kireban’, ara magafan’ nib pag rogon, ara magawon u lan e tabinaw, ara ke yim’ be’ nib t’uf rok, ara yugu boch e magawon nib mo’maw’. Yu ngiyal’ e rayog ni nge mo’maw’ ni ngad athamgilgad u fithik’ e magawon rodad ni bochan rogon e thin nge ngongol rok yugu boch e girdi’. (Prov. 12:18) Machane be fil fare babyor ni Job ngodad nrayog ni ngad weliyed lanin’dad ngak Jehovah nib pagan’dad ngay nra motoyil ngodad. (1 John 5:14) Faan gad ra weliy lanin’dad ngak ni mus ni faanra bay yu ngiyal’ nde puluw e pi n’en gad be yog, ma dabi damumuw ngodad. Ya ra pi’ gelngidad miki pi’ e gonop nib t’uf ni nge yag ngodad ni ngad athamgilgad. (2 Kron. 16:9; Jas. 1:5) Ku rayog ni nge yal’uwegdad ni bod rogon ni rin’ ngak Job. Ku be fil fare babyor ni Job ngodad rogon ni ngad athamgilgad ni faanra kan fonownagdad ara kan yal’uwegdad u daken e Thin rok Jehovah, ara ulung rok, ara pi fager rodad ni kar ilalgad ko tirok Got ban’en. (Heb. 12:​5-7) Nap’an ni gad ra pag ni ngan yal’uwegdad ma ra yib angin ngodad, ni bod Job nnap’an ni sobut’nag laniyan’ nge m’agan’ nga rogon ni kan yal’uweg me yib angin ngak. (2 Kor. 13:11) Boor ban’en ni kad filed rok Job nrayog ni nge yib angin ngodad! Ere chiney e ngad weliyed rogon nrayog ni ngad fanayed chepin Job ni ngad ayuweged yugu boch e girdi’.

MU FANAY FARE BABYOR NI JOB NI NGAM AYUWEG YUGU BOCH E GIRDI’

14. Mang reb e kanawo’ nrayog ni ngad tamilangnaged fan ni yima gafgow?

¹⁴ Bay be’ ni kam mada’nag u nap’an e machib ni ke fith ngom ko mang fan ni yima gafgow, fa? Uw rogon nim pi’ e fulweg ko deer rok? Sana rayog nim dag ngak e n’en be yog e Bible ni buch u lan fare milay’ nu Eden. Sana som’on e mu weliy murung’agen Satan nreb e kan nib kireb ni bannag e gal nsom’on e girdi’ ni ngar togopuluwgow ngak Got. (Gen. 3:​1-6) Ngemu’ ma gog ngak ni bochan nde fol Adam nge Efa rok Got, ma aram fan ni ma gafgow e girdi’ ngaur m’ad. (Rom. 5:12) Tomuren ma rayog ni kam tamilangnag ngak ni be pag Got ba ngiyal’ ni nge yan ya nge yag ni m’ug nde riyul’ e n’en ni yog Satan, maku be fanay e ngiyal’ nem ni nge ayuweg e girdi’ ni ngar nanged nra chuweg urngin e gafgow, ma rayog ni ngar pared ndariy n’umngin nap’an ni yad ba felfelan’. (Rev. 21:​3, 4) Ireray reb e kanawo’ nib manigil ni ngan tamilangnag e fulweg ko re deer ney riy, ma rayog ni nge yib angin.

15. Uw rogon nrayog ni ngad fanayed fare babyor ni Job ni ngad ayuweged be’ ni be fith ko mang fan ni yima gafgow? (Kum guy e sasing.)

¹⁵ Reb e kanawo’ nrayog ni ngad tamilangnaged ko girdi’ fan ni gad ma gafgow e aram e ngad weliyed murung’agen Job ngorad. Som’on e rayog ni nga dogned ngorad nib manigil e deer ni kar fithed. Ngemu’ ma dogned ni bay be’ nib pumoon nib yul’yul’ ni ka nog Job ngak ni ki fith ko mang fan ni be gafgow. I lemnag ni Got tapgin e gafgow ni be tay. (Job 7:​17-21) Sana rayog ni nge gin facha’ ngay ni mus ko girdi’ ni ur moyed kakrom ni yad baadag ni ngar nanged fan ni gad ma gafgow. Ngemu’ ma rayog ni ngad weliyed ngak u fithik’ e gonop ni Moonyan’ e ir tapgin e gafgow ni i tay Job ma gathi Got. I rin’ Moonyan’ e re n’ey, ya be guy rogon ni nge micheg ni girdi’ e kemus ni yad be pigpig ngak Got ni bochan e tin nge yag riy ngorad. Ku rayog ni ngad tamilangnaged ni yugu aram rogon ni gathi Got tapgin e gafgow ni i tay Job, machane i pag e re n’ey ni nge buch ni nge dag ni be pagan’ ko girdi’ ni yad ba yul’yul’ nrayog ni ngar micheged nde riyul’ e n’en ni yog Satan. Tomuren ma rayog ni ngad weliyed ni munmun me tow’athnag Got Job ni bochan e par nib yul’yul’. Ere rayog ni ngad fal’eged laniyan’ yugu boch e girdi’ ni aram e ngad micheged nga lanin’rad ni gathi Jehovah e be k’aring e gafgow.

16. Mu weliy ban’en ni ke buch ni be dag rogon nrayog ni nge ayuweg fare babyor ni Job be’ ni be gafgow.

¹⁶ Am lemnag rogon ni ayuweg fare babyor ni Job Mario. Bay borran u nap’an e duw ni 2021 ni i machib reb e walag nib pin u telefon. Mario e ir e callnag ko som’on, ma aram me beeg reb e thin nu Bible ngak me tamilangnag ni gathi kemus ni ma motoyil Got ko meybil rodad, ya ku be yog ngodad ni bay e athap rodad boch nga m’on. Nap’an ni fith fare walag ngak Mario ko uw rogon fare thin nu Bible u wan’, me yog nnap’an ni call ma be yoloy bangi babyor ni be yog ngak chon e tabinaw rok ni yad ba t’uf rok ma aram e nge li’ ir nge yim’. I yog Mario ni gaar, “Ba mich Got u wan’ug, machane daba’ ni kadbul e ka ug lemnag ko ke digeyeg fa dawor.” Yay ni migid nra nonow e ra weliyew murung’agen e gafgow ni i tay Job. I dugliy Mario nib t’uf ni nge beeg fare babyor ni Job ni ga’ngin. Ere pi’ fare walag nib pin e link ngak ko fare New World Translation of the Holy Scriptures. Mang angin ni yib riy? I m’agan’ Mario ngay ni nge fil e Bible, ma ke felfelan’ ngay ni ngki fil boch ban’en u murung’agen fare Got ni ma t’ufegey ni ke dag be lemnag.

17. Mang fan ni gab felfelan’ ngay ni ke uneg Jehovah fare babyor ni Job nga lan e Thin rok ni kan thagthagnag? (Job 34:12)

¹⁷ Ba tamilang ni bay gelngin e Thin rok Got ni nge ayuweg e girdi’ nib muun ngay e piin yad be gafgow. (Heb. 4:12) Ri gad ba felfelan’ ngay ni ke uneg Jehovah chepin Job nga lan e Thin rok ni kan thagthagnag! (Job 19:​23, 24) Fare babyor ni Job e be micheg nga lanin’dad ni “Got, ni Gubin ma Rayog rok e der ma rin’ e kireb.” (Mu beeg e Job 34:​12, BT.) Ku be fil ngodad fan ni be pag Got e gafgow nge rogon nrayog ni ngad athamgilgad u fithik’. Ku be ayuwegdad ni ngad fal’eged laniyan’ e piin yad be gafgow. Bin migid e article e gad ra weliy riy rogon nrayog ni nge ayuwegdad fare babyor ni Job u nap’an ni gad be fonownag be’.