Mu Folwok u Rogon ni Ma Dag Jehovah e Sobut’an’

1. Mang fan ni yira ngat nga rogon ni ma dag Jehovah e sobut’an’?

NAP’AN ni ga ra guy e pi tayugang’ ko am e ngiyal’ ney, ma ga ra yog nib sobut’an’rad, fa? Dabisiy ni danga’. Yugu aram rogon ma Jehovah ni ir e gubin ma rayog rok e ba sobut’an’. (Ps. 113:​5-8) Dariy be’ nib sobut’an’ ni bod Jehovah. Dariy ba ngiyal’ ni ma tolangan’. Ba ga’ angin nra yib ngodad ni faan gad ra fil murung’agen aningeg ban’en u rarogon Jehovah nrib manigil, ma gad guy rogon ni be dag reb nge reb e pi n’ey ni ir be’ nrib sobut’an’. Ku gad ra weliy rogon ni folwok Jesus rok e Chitamangin ni ir be’ nib sobut’an’. Gad ra fil murung’agen e pi n’ey, ma ra ayuwegdad ni nge gel boch e chugur ko tha’ u thildad Jehovah ma gad mon’og u rogon ni gad ma dag e sobut’an’ ni bod ir.

BA MOM NI NGAN NON NGAK JEHOVAH

2. Mang e be tamilangnag e Psalm 62:8 u murung’agen Jehovah? (Kum guy e sasing .)

² Girdi’ nib tolangan’rad e de mom ni ngan non ngorad. Tolangan’ rorad e ma k’aringrad ni ngar ngongolgad u boch e kanawo’ ni ma k’aring yugu boch e girdi’ ni ngar magagawongad ni ngar nonad ngorad, fa reb e dab ranod ko gin yad bay riy. Machane Jehovah e rib thil! Bochan nib sobut’an’ e Chitamangidad ni bay u tharmiy, ma aram fan ni ma yog ngodad ni ngad meybilgad ngak ngad weliyed urngin ban’en ni bay u lanin’dad nge gum’ircha’dad. (Mu beeg e Psalm 62:8.) Baadag Jehovah ni nga i meybil e pi tapigpig rok ngak, ma ma motoyil ngorad ni bod ba matam ni baadag ni nge motoyil ngak pi fak ni ngar weliyed lanin’rad ngak. Bin riyul’ riy e boor e pi meybil ney ni ke tay murung’agen nga Bible. Re n’ey e be dag rogon feni mom ni ngan non ngak. (Josh. 10:​12-14; 1 Sam. 1:​10-18) Machane uw rogon ni faanra bay yu ngiyal’ ni gad ma lemnag ndariy rogodad ni ngad meybilgad ngak Jehovah?

3. Mang fan nrayog ni nge pagan’um ngay ni baadag Jehovah ni ngaum meybil ngak ni gubin ngiyal’?

³ Rayog ni ngad meybilgad ngak Jehovah ni yugu aram rogon ni gad be lemnag ndariy rogon ni nge t’ufegdad. Mang fan nrayog ni nga dogned e re n’ey? Nap’an ni weliy Jesus fare fanathin rok ni murung’agen fare pagel ni malog, me taarebrogonnag Jehovah ngak ba matam nib munguy laniyan’ ni bay ba pagel ni fak ni boor ban’en nib kireb ni rin’, me lemnag ndab ki m’agan’ e chitamangin ngay ni nge pag nge sul nga tabinaw. Mang e rin’ fare matam u nap’an ni sul fare pagel ni fak nga tabinaw? I yog Jesus nnap’an ni yigi guy fare pagel ni fak me “yan ni be mil, me yan i gumuchmuch ngak e chi cha’nem ni fak, nge faray owchen.” (Luke 15:​17-20) Jehovah e bod e re matam nem. Nap’an ni yugu ra rung’ag e meybil rok e piin kari kireban’rad ni bochan e kireb ni kar rin’ed ara piin be magafan’rad nga boch ban’en, ma rogon feni sobut’an’ e ma k’aring ni nge motoyil ngorad. (Lam. 3:​19, 20) Bochan e runguy rok ngorad, ma gowa bod ni ma mil i yan ko gin yad bay riy ni nge fal’eg lanin’rad me micheg ngorad ni yad ba t’uf rok. (Isa. 57:15) Uw rogon ni ma “mil” Jehovah i yib ko gin gad bay riy e ngiyal’ ney? Ba ga’ ni ma rin’ e re n’ey u daken e piin piilal, nge chon e tabinaw rodad ni yad bay ko tin riyul’, nge piin taareb e michan’ rodad. (Jas. 5:​14, 15) Ma pi’ Jehovah e re ayuw ney ni bochan e baadag ni ngad chugurgad ngak.

4. Uw rogon ni dag Jesus ni ir be’ nib mom ni nge yan e girdi’ i non ngak?

⁴ Ma folwok Jesus ko Chitamangin. Ba sobut’an’ Jesus ni bod e Chitamangin. Bochan e re n’ey, ma nap’an ni immoy u fayleng ma der magagawon e girdi’ ni nga ranod ra nonad ngak. Da ur rusgad ni ngar fithed boch ban’en ngak. (Mark 4:​10, 11) Ere nap’an nra fith rogon lanin’rad u ban’en, ma yad ma weliy urngin ban’en ni bay u lanin’rad. (Matt. 16:​13-16) Ma nap’an ni yad ra oloboch ma darur rusgad nra damumuw Jesus ngorad ni bochan e ir be’ nib sumunguy, ma ma runguyey, mab gum’an’. (Matt. 17:​24-27) Bochan nrib fel’ rogon ni i folwok Jesus ko Chitamangin, ma aram fan ni yag ni nge nang pi gachalpen Jehovah nib fel’ rogon. (John 14:9) Ra nanged nib thil Jehovah ko pi tayugang’ ko teliw e ngiyal’ nem ni yad ba kireb, mab tolangan’rad, ma dabun e girdi’ ni ngar nonad ngorad. Ya ir be’ nib sobut’an’ mab mom ni ngan non ngak.

5. Faanra ba sobut’an’dad, ma uw rogon nra momnag ko girdi’ ni ngaur nonad ngodad?

⁵ Uw rogon nrayog ni ngad folwokgad rok Jehovah? Faanra ud maruweliyed e sobut’an’, ma aram e ra mom ko girdi’ ni ngaur nonad ngodad. Sobut’an’ e ra ayuwegdad ndabi awan’dad ngak yugu boch e girdi’, ma dab ud ufgad, ara ud pared ndab ud n’aged fan e kireb ni kan rin’ ngodad. Ireray boch ban’en ni ma palognag thildad yugu boch e girdi’. Machane sobut’an’ e ra ayuwegdad ni ngaud daged e sumunguy, nge gum’an’, mu ud n’aged fan e kireb ni kan rin’ ngodad ni aram boch e fel’ngin nra chugurnag yugu boch e girdi’ ngodad. (Kol. 3:​12-14) Ba ga’ ni piin piilal e thingar ra guyed rogon ni nge mom ko girdi’ ni nga ranod ra nonad ngorad. Machane faanra nge mom ni ngan non ngorad, mab t’uf ni ngar bad ko gin bay e pi walag riy. Re n’ey e be yip’ fan nib t’uf ni ngar guyed rogon ni ngaur uned ko muulung u Tagil’ e Liyor ko bin ngaur uned u online ni yugu aram rogon nrayog ni ngar bad nga Tagil’ e Liyor. Kub t’uf ni nga u ranod e pi walag ko machib u mit e tabinaw u taabang ko ngiyal’ nrayog rorad. Nap’an nra nang e pi walag rarogon e piin piilal nib fel’ rogon, ma aram e dab ra magagawongad ni ngar ninged e ayuw ngorad ko ngiyal’ ni ke t’uf.

BA PULUW ROGON NI MA LEMNAG JEHOVAH BOCH BAN’EN

6-7. Mu weliy e n’en ni buch rok l’agruw ni’ ni be dag rogon ni m’agan’ Jehovah ni nge motoyil ko n’en ni wenignag e pi tapigpig rok.

⁶ Boor e girdi’ nib tolangan’rad ni yad ma lemnag ni yad e yad manang e n’en nib fel’ ni ngan rin’, ma de m’agan’rad ngay ni ngar thilyeged e lem rorad. Machane Jehovah ni ir e gubin ngiyal’ ni manang e n’en nib fel’ ni ngan rin’ e gathi aram rogon! Bochan nib sobut’an’ ma aram fan nib m’agan’ ngay ni nge motoyil ngak yugu boch e girdi’, miki thilyeg e n’en ke dugliy ya nge yag ni yan nga lanin’rad. Am lemnag e n’en ni rin’ ngak Miriam ni be’ nib pin ni walagen Moses. Ur gun’gun’nagew Aron Moses ni ir e be yog e thin rok Jehovah ko girdi’. Ere gowa bod ni be darifannag Miriam Jehovah. Bochan e re n’ey, mi ri damumuw Jehovah ngak Miriam me k’aring ni nge yib e daraw ngak. Machane me wenig Aron ngak Moses ni nge ayuweg, ma aram me wenig Moses ngak Jehovah ni nge golnag walagen. Ere mang e rin’ Jehovah? De tolangnag laniyan’ nge par nde thilyeg e n’en ke rin’. Bochan nib sobut’an’ Jehovah, ma aram me motoyil ngak Moses me golnag Miriam.​—Num. 12:​1-15.

⁷ Ki dag Jehovah nib sobut’an’ u rogon e ngongol rok ngak Hezekiah ni Pilung. I fanay Jehovah reb e profet rok ni nge yog ngak e re pilung ney ni bayi yim’. Ere yor e re pilung ney, me wenig ngak Jehovah ni nge golnag e m’ar rok. Ma aram me runguy Jehovah me puthuy 15 e duw ko yafos rok. (2 Ki. 20:​1, 5, 6) Arrogon, sobut’an’ e ir e ma k’aring Jehovah ni nge dag e runguy me motoyil ko girdi’.

8. Mang boch e kanawo’ ni ke dag Jesus riy nib puluw rogon ni ma lemnag boch ban’en? (Mark 3:​1-6)

⁸ Ma folwok Jesus ko Chitamangin. Nap’an ni immoy Jesus u fayleng, ma i rin’ boch ban’en nib fel’ ni fan ko girdi’ ko ngiyal’ nrayog ni nge rin’ riy. Bod ni i golnag e girdi’ u nap’an e Sabbath ni yugu aram rogon ni i yog e piin ur togopuluwgad ngak ndabiyog ni ngan rin’ e re n’ey. (Mu beeg e Mark 3:​1-6.) Ka be ulul Jesus ni ir lolugen e ulung ni Kristiano ni nge dag nib puluw rogon ni ma lemnag boch ban’en. Bod nnap’an nra rin’ be’ u lan e ulung reb e denen nib ubchiya’, ma ma gum’an’ u puluwon me pi’ e tayim ngak ni nge yal’uweg e ngongol rok.​—Rev. 2:​2-5.

9. Uw rogon nrayog ni nge puluw rogon ni gad ma lemnag ma gad ma rin’ boch ban’en? (Kum guy e sasing.)

⁹ Uw rogon nrayog ni ngad folwokgad rok Jehovah? Thingari sobut’an’dad ma gad fil rogon ni ngaud folwokgad rok Jehovah nib puluw rogon ni ma lemnag ma ma rin’ boch ban’en. (Jas. 3:17) Bod ni piin gallabthir ni yad ma folwok rok Jehovah e darur lemnaged ni nge rin’ pi fakrad boch ban’en ndabiyog rorad. Ireray e n’en ni rin’ Jakob ni bay murung’agen ko Genesis 33:​12-14. Piin gallabthir nib sobut’an’rad mab puluw rogon ni yad ma lemnag boch ban’en e susun ni ngkur guyed rogon ndab ur taareb rogonnaged reb i fakrad nga reb. Ku arrogon e piin piilal nthingar ki puluw rogon ni ngaur lemnaged boch ban’en. Reb e kanawo’ nrayog ni ngar rin’ed e re n’ey riy e aram e ngar t’ared lanin’rad nge m’agan’rad ko n’en ke dugliy yooren e piilal ni faanra der togopuluw ko pi kenggin e motochiyel u Bible. (1 Tim. 3:​2, 3) Ma gad gubin nrayog ni nge bagadad me guy rogon ni nge nang rogon laniyan’ yugu boch e girdi’ ni yugu aram rogon nib thil e n’en gad be lemnag. (Rom. 14:1) Arrogon, gubin e girdi’ u lan e ulung nsusun e ngar guyed rogon ni ngar “daged ngak urngin e girdi’ nib puluw rogon ni yad ma lemnag boch ban’en.”​—Fil. 4:​5, NW.

BA GUM’AN’ JEHOVAH

10. Mang boch e kanawo’ ni ke dag Jehovah e gum’an’ riy?

¹⁰ Sana rayog ni kam guy ni girdi’ nib tolangan’rad e dubrad ni yad ma sonnag ban’en. Dar nanged rogon ni ngar gum’an’naged yad. Ri yad ba thil ngak Jehovah ni ir e en nth’abi gum’an’ ni bay! Bod nnap’an Noah, me yog Jehovah nra son u lan 120 e duw u m’on ni nge thang e piin nib kireb. (Gen. 6:3) Ere bay e tayim rok Noah ni nge chuguliy pi fak ngar ilalgad mar ayuweged ni nge ngongliy fare arke. Boch nga tomuren me gum’an’nag reb e engel rok Jehovah ir nge motoyil ngak Abraham u nap’an ni be fith boch ban’en u murung’agen yu Sodom nge Gomorrah ni ngan gothey. Be’ nib tolangan’ e rayog ni nge gaar, ‘Gur mini’ ni ngaum fith e tinir e deer ngog?’ Machane i folwok fare engel rok Jehovah nge gum’an’nag ir u puluwon Abraham.​—Gen. 18:​20-33.

11. Mang fan ni be gum’an’nag Jehovah ir e ngiyal’ ney ni bod ni be yog e 2 Peter 3:9?

¹¹ Ku arrogon e ngiyal’ ney ni be sobut’nag Jehovah laniyan’ be gum’an’nag ir u puluwdad. Be sonnag e ngiyal’ ni ke dugliy ni nge taw ngay me thang e re m’ag ney. Mang fan ni be gum’an’nag ir? “Fan e dabun ni nge n’ag be’, ya ba adag ni nge urngin e girdi’ mi yad pi’ keru’rad ko urngin e denen ni yad be rin’.” (Mu beeg e 2 Peter 3:9.) Gur, ba m’ay fan e gum’an’ ni ke tay Jehovah ke mada’ ko chiney, fa? Danga’! Ya bokum milyon e girdi’ nriyul’ ni yad baadag ni ngar nanged e tin riyul’ ni ke yag ni ngar chugurgad ngak. Maku gad be athapeg ni aray e n’en nra rin’ e tin ka bay e girdi’. Machane bay e gin nra mus e gum’an’ rok Jehovah riy. Ba t’uf e girdi’ rok, machane dabi pagrad ni ngaur rin’ed e tin yad baadag. Dabi pag e kireb ni nge ulul ndariy n’umngin nap’an.​—Hab. 2:3.

12. Uw rogon ni be folwok Jesus u rogon ni be gum’an’nag Jehovah ir?

¹² Ma folwok Jesus ko Chitamangin. Ke yan bokum biyu’ e duw ni be folwok Jesus u rogon ni be gum’an’nag Jehovah ir. Ke guy rogon ni t’ar Satan e thin nga daken Jehovah nge girdi’ ni yad ba yul’yul’. (Gen. 3:​4, 5; Job 1:11; Rev. 12:10) Ku boor e girdi’ ni ke guyrad Jesus nib gel e gafgow ni kar ted. Am lemnag gelngin nri baadag ni ‘nge kirebnag e maruwel rok moonyan’’! (1 John 3:8) Ere mang e be ayuweg Jesus ni nge gum’an’nag ir nge sonnag e ngiyal’ nra yog Jehovah ngak ni nge kirebnag urngin e maruwel rok Moonyan’? Reb riy e bochan nib sobut’an’. Manang ni Jehovah e ir e en nra dugliy e ngiyal’ ni nge thang e re m’ag ney.​—Acts 1:7.

13. Uw rogon ni i gum’an’nag Jesus ir u puluwon e pi apostal rok, ma mang fan?

¹³ Nap’an ni immoy Jesus u fayleng, miki gum’an’nag ir u puluwon e pi apostal rok. Bod nnap’an ni i luag e pi apostal rok e thin u murung’agen e en ir e th’abi tolang u fithik’rad, ma de mulan’ Jesus u puluwrad. Ya ulul ni nge gum’an’nag ir. (Luke 9:46; 22:​24-27) Ba pagan’ ngay nra munmun ma yad ra thil. Bay reb e oloboch ni boor yay ni kam rin’, fa? Faanra bay, ma dabisiy ni gab felfelan’ ngay nib sobut’an’ e Pilung rom ma ma gum’an’nag ir!

14. Uw rogon nrayog ni ngad filed rogon ni ngaud gum’an’naged gadad?

¹⁴ Uw rogon nrayog ni ngad folwokgad rok Jehovah? Nap’an ni gad ra guy rogon ni nge yag “laniyan’ Kristus” ngodad, ma aram e rayog ni ngaud lemgad ma gad be ngongol ni bod Jehovah. (1 Kor. 2:16) Uw rogon nrayog ni ngad mon’oggad u rogon ni ngaud lemgad ni bod Kristus? Reb e kanawo’ nrib ga’ fan ni ngad rin’ed e re n’ey riy e aram e ngaud beeged e pi Gospel. Ngemu’ ma gad tay e tayim ni ngad fal’eged i lemnag e n’en ni i rin’ Jesus, nge fan ni i rin’ e pi n’em. Thingar da weniggad ngak Jehovah ni nge ayuwegdad ni ngaud lemgad ni bod Jesus. Nap’an nra yag laniyan’ Kristus ngodad, ma gad ra bod Got ni bochan e ra ud gum’an’gad u puluwdad ngu puluwon pi walagdad.​—Matt. 18:​26-30, 35.

MA TAY JEHOVAH FAN E PIIN YAD BA SOBUT’AN’

15. Uw rogon ni ke rin’ Jehovah e n’en bay ko Psalm 138:6?

¹⁵ Mu beeg e Psalm 138:6. Ba tow’ath e piin nib sobut’an’rad ni bochan e manangrad e En Th’abi Tolang u ga’ngin e palpalth’ib! Am lemnag in e girdi’ nib sobut’an’rad ni ke tay Jehovah farad ni kab kafram i yib. Sana bay boch i yad ndabi yib ngan’dad, machane bay murung’agrad u Bible. Bod ni Deborah e ir reb e tapigpig nib yul’yul’ ni i ayuweg e tabinaw rok Isak nge Jakob u lan sogonap’an 125 e duw. Yugu aram rogon ni gathi ri boor ban’en ni yimanang u murung’agen e re ppin ney nib yul’yul’, machane i n’igin Jehovah ni nge yoloy Moses ban’en nga but’ ni be dag nrib t’uf ko gal tabinaw ney. (Gen. 24:59; 35:8.) Boch e chibog nga tomuren, me mel’eg Jehovah David nreb e pagel ni ma gafaliy e saf ni nge mang pilung u Israel. (2 Sam. 22:​1, 36) De n’uw nap’an nga tomuren nni gargeleg Jesus, me l’og Got e pi engel ni nga ranod ra guyed bogi girdi’ ni yad ma gafaliy e gamanman ni nga rogned ngorad ni kan gargeleg fare Messiah u Bethlehem u m’on ni nge nang gubin e girdi’. (Luke 2:​8-11) Ma nap’an ni fek Josef nge Maria Jesus nga tempel, me dag Jehovah ni be tayfan l’agruw e pilibthir u rom ni ka nog Simeon nge Anna ngorow ni aram e pagrow ni ngar guyew Fak. (Luke 2:​25-30, 36-38) Arrogon, ‘yugu aram rogon nrib tolang Jehovah, ma ma runguy e piin yad ba sobut’’!

16. Uw rogon ni folwok Jesus u rogon ni ma ngongol e Chitamangin ko girdi’?

¹⁶ Ma folwok Jesus ko Chitamangin. Jesus e ma tayfan e piin yad ba sobut’an’ ni bod e Chitamangin. I fil e tin riyul’ u murung’agen Gil’ilungun Got ko girdi’ ‘ndariy e sukul rorad.’ (Acts 4:13; Matt. 11:25) Ki golnag e piin yad ba m’ar u reb e kanawo’ ni ayuwegrad ni ngar nanged ni yibe t’ufegrad ma yibe tay farad. (Luke 5:13) Fare nep’ u m’on ni nge yim’, me rin’ e maruwel ni ma rin’ reb e tapigpig ni aram e maluknag rifrifen ay e pi apostal rok. (John 13:5) U m’on ni nge sul nga tharmiy, me tayfan urngin i gachalpen ni yad ba sobut’an’ ni gad ba muun ngay e ngiyal’ ney ni aram e pi’ e bin th’abi ga’ fan e maruwel ni ngar rin’ed ni aram e ngar ayuweged e girdi’ ni nge yag e yafos ni manemus ngorad.​—Matt. 28:​19, 20.

17. Uw rogon nrayog ni ngad ted fan yugu boch e girdi’? (Kum guy e sasing.)

¹⁷ Uw rogon nrayog ni ngad folwokgad rok Jehovah? Nap’an ni gad ra weliy fare thin nib fel’ ngak urngin e piin yad ra motoyil ni yugu demtrug rarogon e gin kar bad riy, ara ramaen dowrad, ara tolngin e skul rorad, ma aram e be m’ug riy ni gad be tayfan e girdi’. Ku ra m’ug ni gad be tayfan pi walagdad ni faanra ud lemnaged ni ka yad ba fel’ ngodad ni yugu demtrug e tin rayog rodad ara re miti maruwel ni gad ma rin’ u lan e ulung. (Fil. 2:3) Ma felfelan’ Jehovah ngay u nap’an ni gad ra sobut’naged lanin’dad ‘nge pasigan’dad ngay’ ni nge bagadad me tayfan bagadad ko pi kanawo’ ney nge yugu boch e kanawo’.​—Rom. 12:10; Zef. 3:12.

18. Mang fan ni ga baadag ni ngam folwok u rogon ni ma dag Jehovah e sobut’an’?

¹⁸ Nap’an ni gad ra athamgil u rogon nrayog rodad ni ngad folwokgad u rogon ni ma dag e Chitamangidad e sobut’an’, ma aram e ra mom boch ko girdi’ ni ngaur nonad ngodad, mi i puluw rogon ni ngaud lemnaged boch ban’en, mu ud gum’an’gad. Ku gad ra tayfan yugu boch e girdi’ ni bod ni ma rin’ Jehovah. Dab mu pagtalin nnap’an ni gad ra rin’ urngin e tin nrayog rodad ni ngad boded e Got rodad nib sobut’an’, ma ra ga’ fadad u wan’ ni be’ nge be’!​—Isa. 43:4.