Ka Ga Manang?

Kam beeg e pi Wulyang ko Damit ni fan ko re duw ney nib fel’ rogon, fa? Mu guy ko rayog ni ngam pi’ e fulweg ko pi deer ni baaray fa dabiyog:

Mang e ma k’aringdad ni ngad pininged e sorok ngak Jehovah?

Gad ma rin’ ni bochan e ri gad ma tayfan Jehovah, ma rib t’uf rodad, ma gad baadag ni nge nang yugu boch e girdi’ rarogon.​—w25.01, p. 3.

Nap’an nra kirebnag be’ lanin’dad, ma uw rogon nrayog ni ngad n’aged fan e kireb rok?

Dab da paged e n’en kad dabuyed ni nge par ndab da rin’ed ban’en ngay; ya nap’an ni gad ra tal ndab kud damumuwgad, ma ra ayuwegdad ndab da paged e damumuw ni nge rin’ ban’en nga rogon e ngongol rodad ngak yugu boch e girdi’.​—w25.02, pp. 15-16.

Mang fan nib fel’ e kanawo’ ni ke dag Mark ni ir reb i gachalpen Jesus nrayog ni nge folwok e pi walag ni ka yad ba pagel riy?

I m’agan’ Mark ngay ni nge yoornag e tin be rin’ ni fan ngak Jehovah nge pi walag. Yugu aram rogon ndabisiy ni kireban’ nga ban’en ni buch rok, machane de mulan’. I guy rogon ni nge par e tha’ u thilrad Paul nge yugu boch e Kristiano ni kar ilalgad ko tirok Got ban’en nib chugur.​—w25.04, p. 27.

Mang e yip’ Jesus fan u nap’an ni meybil ni gaar: “Kug weliy fithingam ngorad kar nanged”? (John 17:​26, NW)

Pi gachalpen Jesus e yad manang fithingan Got. Ke ayuwegrad Jesus ni ngar nanged Jehovah nib fel’ rogon, nib muun ngay e n’en nib m’agan’ ngay ni fan ko fayleng nge girdi’, nge n’en ke rin’, nge n’en bayi rin’, nge pi fel’ngin.​—w25.05, pp. 20-21.

Faanra gad manang e gin ngad musgad riy, ma mang e gad manang?

Gad manang ni bay boch ban’en ndad nanged murung’agen. Bod ndad nanged e ngiyal’ nra yib e tomur riy ara rogon nra ayuwegdad Jehovah e ngiyal’ nem. Ku dad nanged e n’en nra buch gabul ara rogon nri manangdad Jehovah.​—w25.06, pp. 15-18.

Mang e rayog ni nge ayuwegdad ni nge yib angin reb e article ara reb e welthin ni fan ko yoor ngodad?

Rayog ni ngad fithed gadad ni nge lungudad: ‘Mang boch ban’en ni bay e mich riy ni yibe fanay ni ngan micheg e pi n’ey nga laniyan’ e piin yibe weliy ni fan ngorad? Bay reb e fanathin nrayog ni nggu fanay u nap’an nug be weliy e re machib ney ngak be’, fa? Mini’ e rayog nra adag ni nge motoyil ko re n’ey?’​—w25.07, p. 19.

Mang e rayog ni ngad filed u rogon ni ma n’ag Got fan e denen u rogon ni n’ag fan e denen rok David?

Yugu aram nrib gel e ubchiya’ ko denen ni rin’ David, machane nap’an nri kalngan’, ma aram me n’ag Jehovah fan rok. (1 Ki. 9:​4, 5) Nap’an nra n’ag Got fan e denen rok be’, ma dabki lemnag ara puguran ngak boch nga m’on.​—w25.08, p. 17.

Faanra be mo’maw’ ni nge tamilang ban’en u wan’ be’ ni ga be fil e Bible ngak, ma mang e rayog ni ngam rin’?

Faanra tomuren ni kam guy rogon ni ngam tamilangnag ngak u lan e Bible nib fel’ rogon maku be mo’maw’ ni nge nang fan, mi gimew digey nga fin kum sulow ngam weliyew boch nga tomuren.​—w25.09, p. 24.

Be yog e Bible ni ma ‘bannagey’ e denen. (Heb. 3:13) Ni uw rogon?

Denen e rayog ni nge k’aringdad ni ngad rin’ed boch e ngongol nib kireb. Ku rayog ni nge k’aringdad ni nga i maruwar boch ban’en u wan’dad, ni bod ni nge maruwar u wan’dad ko riyul’ ni gad ba t’uf rok Got fa danga’.​—w25.10, p. 16.

Mang dalip ban’en nrayog ni nge ayuwegdad ni ngad meybilgad ngak Got u reb e kanawo’ nra chugurnagdad ngak?

(1) Rayog ni ngad lemnaged pi fel’ngin Jehovah. (2) Rayog ni ngad lemnaged murung’agen reb e magawon ni gad be mada’nag, ma gad weliy murung’agen ngak, ni bod ni faanra bay be’ nib t’uf ni ngad n’aged fan e kireb rok. (3) Rayog ni nge n’uw boch nap’an e meybil rodad. Gad ra rin’ e re n’ey, ma dabisiy ni gad ra weliy lanin’dad nib fel’ rogon.​—w25.10, pp. 19-20.

Uw rogon nrayog ni ngad ayuweged e piin kar pilibthirgad?

Rayog ni nga darod da guyed e piin kar pilibthirgad ara da callnaged yad. Sana ku rayog ni ngad uned ngorad u nap’an ni nga ranod ko tafalay. Fa reb e rayog ni ngad machibgad u taabang u yugu boch e kanawo’ nib thilthil.​—w25.11, pp. 6-7.

Mang boch ban’en u rarogon e mabgol ko piin Kristiano ni yira pining e sorok riy ngak Got?

Ngan fol ko motochiyel ko am. Ngan guy rogon ni nge m’ug wom’engin gelngin Got nib thothup ko m’agpa’ rok l’agruw ni’ nge abich ni yira tay nga tomuren. Nge yalen rogon e munmad, min siyeg boch e yalen nde puluw ko Bible. Nge fel’ e numon u thiliy u nap’an ni yibe yarmiy rogon e n’en ngan rin’ ko rofen ni m’agpa’.​—w25.12, pp. 21-25.