Yaan U Fithik’ey Nib Gamog E Ra Par Ni Fel’ngin Nib N’uw Nap’an

“PIDORANG NGE PANGIY NIB FEL E KAN TAAREBROGONNAG NGAK REB E PUMOON NI KAB PAGAL’,” ARAM E N’EN NI YOG REB E KRISTIANO NIB YUL’YUL’ NI KE PILLIBTHIR.

Arrogon, ke n’uw nap’an ni ma yog e girdi’ e thin nib pag rogon u murung’agen yaan be’, ma bochan ni aray rogon ma ma oloboch e girdi’ u rogon i turguy fel’ngin fa cha’ u fithik’. Machane, en ni i Sunmiydad e be yaliy e n’en ni bay u fithik’dad, ndemtrug feni fel’ yaadad ni be m’ug. Ereray e kanawo’ ni be dag ngodad rogon ni ngan dugliy ban’en nib fel’ rogon. Rogon ni yog fare Bible, e yog Got ni gaar: “Girdi’ e de taabrogon ku Got u rogon ni ma guy ban’en, ya bochan ni girdi’ e yad ma guy be’ u wuru’ i downgin; machane Jehovah e ma guy e lem ko girdi’.”​—1 Samuel 16:7.

Yaan e girdi’ nib fel’ e i Yib Rok Got, ma Thin rok e be dag ni nap’an ni ngan thabthabelnag puluwon e girdi’, ma ra m’ug ni pangiy nib fel’ e ir e th’abi ga’ fan. Be weliy e Bible ni gaar: “Feni pidorang be’ ni ppin e rayog ni nge bannigey, ma pidorang e ma m’ay, machane be’ ni ppin ni be par ni ba’ madgun Somol u wan’ e susun e nga nog e sorok ngak.” (Proverbs 31:30) Riyul’, ni fel’ yaan u wuru’ i downgiy e rayog ni nge upunguy e ngongol nib kireb u fithik’ey. (Esther 1:10-12; Proverbs 11:22) Yugu aram rogon ma fare yaan nib gamog ni be m’ug e ba nap’an ma ra m’ay, ma pi fel’ngin u fithik’​—ni fare pangiy nib fel’—​e ra ilal iyan me par.

Ar fan, ni ngan gonop ni nganni maruweliy e pi fel’ngin ni bod e, t’ufeg, nge falfalan’, nge gapas laniyan’, nge gum’an’, nge gol, nge fel’ ngak e girdi’, nge yul’yul’, nge sobut’an, nge t’ar laniyan’! (Galatia 5:22, 23) I ir e kanawo’ nrayog ni nge yog ngodad fare yaan nib gamog u fithik’dad, ni ir e n’en ni riyul’ ni bay puluwon ndariy n’umngin nap’an.​—1 Peter 3:3, 4.

Ga Baadag ni Bay Be’ ni Nge Guyem?

Yugu demtrug feni wagey e fayleng e chiney, ma rayog ni nge yog ngom e falfalan’ ni bochan e tamilangan’ rok Got, nge Gil’ilungun, nge tin nib m’agan’ ngay ni fan ko girdi’. Faanra ga baadag ni ngam nang boch ban’en ara ga baadag ni bay be’ ni nge yib nga tabinaw rom nge guyem ni nge fil e Bible ngom, wenig ngom ngam yoloy e babyor ma ngam pi’ ko Watchtower, 143 Jehovah Street, Barrigada, Guam 96913, ara yugu boch e address ni kan yoloy ko page 2.