Nge M’agan’um Ngay ni Bay Boch Ban’en Ndam Nang

1. Mang e ke sunmiydad Jehovah nrayog ni ngad rin’ed, ma mang fan?

I SUNMIYDAD Jehovah nrayog ni ngaud lemgad, ma gad fil ban’en, ma gad nang fan ban’en, mu kud daged ni bay e gonop rodad. Mang fan ni sunmiydad ni aray rogon? Baadag ni ngad ‘nanged murung’agen’ ma gad dugliy boch ban’en nib fel’ rogon nib puluw ko bin riyul’ e tamilangan’ ni ke yag ngodad u nap’an ni gad be pigpig ngak.​—Prov. 2:​1-5; Rom. 12:1.

2. (a) Mang ban’en ndabiyog rodad? (Roma 11:​33, 34) (Kum guy e sasing.) (b) Uw rogon nra yib angin ngodad ni faanra da nanged ni gathi gubin ban’en ni gad manang?

² Yugu aram rogon ni kan sunmiydad nrayog ni ngad filed boch ban’en, machane bay boch ban’en ndad nanged. (Mu beeg e Roma 11:​33, 34.) Am lemnag e n’en ni buch rok Job. Bay boch e deer nni fith ngak me yan i m’ug riy ni boor ban’en nde nang. Re n’em ni buch rok e ayuweg ni nge sobut’an’ me yal’uweg e lem rok. (Job 42:​3-6) Ku arrogodad nra yib angin ngodad ni faanra da nanged ni gathi gubin ban’en ni gad manang. Faanra aray rogon e lem rodad ma ra k’aringdad ni nge pagan’dad ngay nra tamilangnag Jehovah ngodad e n’en nrib t’uf ni ngad nanged ya nge yag nda mel’eged boch ban’en u fithik’ e gonop.​—Prov. 2:6.

3. Mang e gad ra weliy ko re article ney?

³ Gad ra weliy ko re article ney boch ban’en ndad nanged nge boch e magawon nrayog ni ngad mada’naged ni bochan e re n’ey. Ku gad ra weliy fan nib fel’ ni bay boch ban’en ndad nanged. Gad ra weliy e pi n’ey ma ra ayuwegdad ni ngari pagan’dad ni Jehovah ni “En ni manang gubin ban’en” e ra yog ngodad e n’en nrib t’uf ni ngad nanged.​—Job 37:​16, NW.

DAD NANGED E NGIYAL’ NRA YIB E TOMUR RIY

4. Mang reb e ban’en ndad nanged nrogon ni be yog e Matthew 24:36?

⁴ Mu beeg e Matthew 24:36. Dad nanged e ngiyal’ nra yib tungun e re m’ag ney. Mus ngak Jesus nnap’an ni immoy u fayleng ma de nang e “re rran nem nge re awa nem.”a Boch nga tomuren me yog ko pi apostal rok ni Jehovah e ir e en bay “mat’awun” ni nge dugliy e ngiyal’ ni nga i buch boch ban’en riy. (Acts 1:​6, 7) Ke dugliy Jehovah e ngiyal’ nra mus e re m’ag ney, machane gadad e dabiyog ni ngad nanged e ngiyal’ nra buch e re n’ey riy.

5. Mang e rayog ni nge buch rodad ni bochan e dad nanged e ngiyal’ nra yib e tomur riy?

⁵ Bochan e n’en ke yog Jesus, ma aram fan ndad nanged n’umngin nap’an ni ngad songad mfini yib e tomur. Ere rayog ni nge dab kud gum’an’gad ara mulan’dad, nib ga’ ni faanra ke n’uw nap’an ni gad be sonnag e rran rok Jehovah. Fa reb e rayog ni nge mo’maw’ ni ngad k’adedan’dad u nap’an ni be moningnagdad chon e tabinaw rodad ara yugu boch e girdi’. (2 Pet. 3:​3, 4) Ere rayog ni ngad lemnaged ni faanra gad manang e ngiyal’ nra yib e tomur riy, ma rayog ni ngad gum’an’naged gadad me mom boch ni ngaud k’adedan’dad u nap’an ni yibe moningnagdad.

6. Mang fan nib fel’ ndad nanged e ngiyal’ nra yib e tomur riy?

⁶ Bin riyul’ riy e re n’ey nde yog Jehovah ngodad e ngiyal’ nra yib e tomur e ke bing e kanawo’ ngodad ni ngad daged ni fan ni gad be pigpig ngak e bochan nib t’uf rodad ma be pagan’dad ngak. Gathi gad be pigpig ngak Jehovah ni bochan e gad be sonnag e tomur ara gowa bod ni michan’ rodad ngak e bay e ngiyal’ nra taw ngay me mus. Ba fel’ ni ngaud lemnaged e pi n’en nib fel’ nra buch u nap’an nra yib e re rran nem ko bin ngaud pared ma gad be lemnag e ngiyal’ nra yib e “Rran rok Got” riy. Faan gad ra rin’ e re n’ey, ma aram e gad be ulul ni ngad gelnaged e yul’yul’ rodad ngak Got ma gad be rin’ e tin nrayog rodad ni ngad felfelan’naged.​—2 Pet. 3:​11, 12.

7. Mang e gad manang?

⁷ Ba fel’ ni ngaud lemnaged e tin gad manang ni aram e ke tabab e tin tomuren e rran ko duw ni 1914. Gathi kemus ni ke pi’ Jehovah boch e yiiy u Bible ni be tamilangnag ni aram e re duw nra buch e re n’ey riy, ya ku be weliy murung’agen boch ban’en nra buch ni ka nap’an e re ngiyal’ i n’em. Aram fan nib mich u wan’dad ni “fare rran ni bayi par Somol nga tagil’ e pufthin e be chugur.” (Zef. 1:​14, BT) Ku gad manang e maruwel ni baadag Jehovah ni ngad rin’ed ni aram e ngad weliyed fare ‘Thin rok Got Nib Fel’ ni murung’agen e gagiyeg rok’ ngak urngin e girdi’ nrayog. (Matt. 24:14) Yibe machibnag e re thin ney u sogonap’an 240 e nam mab pag 1,000 mit e thin ni yibe machibnag riy. Ra ngad rin’ed e re maruwel ney nib ga’ fan u fithik’ e pasig, ma de t’uf ni ngad nanged e “re rran nem nge re awa nem.”

DAD NANGED ROGON NRA AYUWEGDAD JEHOVAH

8. Mang e be yip’ fan fare thin ni “pi n’en ni ma rin’” e bin riyul’ e Got? (Eklesiastes 11:5)

⁸ Gathi gubin ngiyal’ ni gad manang e “pi n’en ni ma rin’” e bin riyul’ e Got. (Mu beeg e Eklesiastes 11:5.) Re thin ney e be weliy murung’agen e n’en ma k’aring ara ma pag Jehovah ni nge buch ya nge yag ni lebguy e n’en nib m’agan’ ngay. Dabiyog ni ngar da nanged fan ni ke pag Jehovah ban’en ni nge buch ara rogon nra ayuwegdad. (Ps. 37:5) Ireray ban’en ndabiyog ni nge taw rogon e lem rodad ngay ni bod rogon ndabiyog ni nge tamilangan’uy u rogon bbitir ni be ga’ u yin be’ nib pin, ni aram ban’en ni ke mada’ ko chiney ma dawori tamilang u wan’ e piin llowan’.

9. Mang boch e magawon nrayog ni ngad mada’naged ni bochan e dad nanged rogon nra ayuwegdad Jehovah?

⁹ Bochan ndad nanged rogon nra ayuwegdad Jehovah, ma rayog ni nge k’aringdad e re n’ey ni nge dab ddugliyed boch ban’en. Rayog ndab da paged fan boch ban’en ya nge yag nda yoornaged e tin gad be rin’ ni fan ko machib, ni bod ni ngad momnaged rogon e par rodad ara darod da pared nga bang nib t’uf boch e tamachib riy. Fa reb e faanra de yag ni ngad rin’ed boch ban’en ni gad be nameg ni fan ko pigpig rodad, ara darud guyed angin e maruwel nib gel ni gad be tay u nap’an e machib, ara kad mada’naged e magawon u nap’an ni gad be rin’ reb e maruwel ni fan ko ulung rodad, ma rayog ni nge maruwar u wan’dad ko gad ba fel’ u wan’ Got fa danga’.

10. Mang l’agruw e fel’ngin nrayog ni ngad maruweliyed ni faanra dad nanged rogon nra ayuwegdad Jehovah?

¹⁰ Re n’ey ndad nanged e ngiyal’ nra ayuwegdad Jehovah riy e be ayuwegdad ni ngad maruweliyed boch e fel’ngin nib ga’ fan ni bod e sobut’an’ ma gad nang e gin ngad musgad riy. Re n’ey e be ayuwegdad ni ngad nanged ni lem rok Jehovah nge tirok e kanawo’ e kab thil ko tirodad. (Isa. 55:​8, 9) Ku gad be fil rogon ni nge gel boch e pagan’ rodad ngak Jehovah ma gad taga’ ngak ni nge ayuwegdad u gubin ban’en. Nap’an nra yib angin e machib ni gad be tay ara reb e maruwel ni gad be rin’ ni fan ko ulung rodad, ma Jehovah e ir e gad ra pining e sorok riy ngak. (Ps. 127:1; 1 Kor. 3:7) Faanra de buch boch ban’en ni bod rogon ni kad lemnaged, mab t’uf ndab da paged talin ni be guy Jehovah gubin ban’en. (Isa. 26:12) Gad ra rin’ e n’en nib milfan ngodad, mab pagan’dad nra rin’ Jehovah e n’en nib milfan ngak. Ba pagan’dad nra pow’iydad ni yugu aram rogon ndabi rin’ u daken e maang’ang ni bod ni i rin’ kakrom.​—Acts 16:​6-10.

11. Mang e gad manang nrayog ni nge ayuwegdad?

¹¹ Gad manang ni Jehovah e gubin ngiyal’ ni ma dag e t’ufeg, mab mat’aw e ngongol rok, mab gonop. Gad manang nrib ga’ fan u wan’ e tin gad ma rin’ ni fan ngak nge pi walagdad. Ku gad manang ni gubin ngiyal’ nra tow’athnag e piin yad ba yul’yul’.​—Heb. 11:6.

DAD NANGED E N’EN NRA BUCH GABUL

12. Mang e dad nanged nrogon ni be yog e James 4:​13, 14?

¹² Mu beeg e James 4:​13, 14. Reb e ban’en nib riyul’ e aram e dad nanged e n’en nra buch rodad gabul. Ma buch boch ban’en rodad u lan e re m’ag ney “ndan lemnag.” (Ekl. 9:​11, NW) Aram fan ndabiyog ni ngad nanged ko ra buch e n’en gad be lemnag ni ngad rin’ed fa danga’, fa reb e ngad guyed ni ke buch e n’en gad be lemnag ni ngad rin’ed u nap’an ni ka gad ba fos.

13. Faanra dad nanged e n’en nra buch rodad boch nga m’on, ma uw rogon nrayog ni nge magawonnagdad?

¹³ Rayog ni nge mo’maw’ ni ngad athamgilgad ni bochan e dad nanged e pi n’en nra buch rodad boch nga m’on. Ni uw rogon? Sana rayog ni nga i magafan’dad ko n’en nrayog ni nge buch, ma dab kud felfelan’gad. Rayog ni nge buch boch ban’en nib kireb rodad nib tomgin ndad lemnaged me k’aring e kireban’ nge kankanan’ ngodad. Ma faanra de buch e n’en gad be lemnag, ma rayog ni nge kireban’dad me mulan’dad.​—Prov. 13:12.

14. Mang e be tor e felfelan’ rodad ngay? (Kum guy e sasing.)

¹⁴ Nap’an ni gad ra athamgil u fithik’ e pi magawon ni gad be mada’nag, ma aram e rayog ni ngad micheged ni yugu demtrug e n’en nra buch ma gad be pigpig ngak e Chitamangidad ni bay u tharmiy ni bochan e ba t’uf rodad ma gathi bochan e pi n’en gad be lemnag ni nge yag riy ngodad. Be dag e Bible nsusun e dab da lemnaged nra yororiydad Jehovah u gubin e magawon, maku der ma dugliy u m’on riy e n’en nra buch rodad. Manang ni felfelan’ rodad e der tor ko n’en gad manang nra buch rodad boch nga m’on. Ya be yan u rogon ni gad be pag ni nge pow’iydad nge rogon ni gad be fol rok. (Jer. 10:23) Faanra ud sapgad ngak ni nge ayuwegdad u nap’an ni ngad dugliyed ban’en, ma aram e bod ni be lungudad: “Faanra mm’agan’ Somol ngay, ma bay da pired nguud rin’ed e tiney nge tinem.”​—Jas. 4:15.

15. Mang e gad manang u murung’agen e n’en bay nga m’on?

¹⁵ Yugu aram rogon ndad nanged e n’en nra buch rodad u reb e rran ngu reb, machane gad manang ni ke micheg Jehovah nra pi’ e yafos ni manemus ngodad ndemtrug ko yafos u tharmiy ara fayleng. Gad manang ndabiyog ni nge ban ma dariy ban’en nrayog ni nge taleg ndabi lebguy urngin e tin ke micheg. (Titus 1:2) Yigoo ir e rayog ni nge yog e ‘tin ni bay ko tungun; kab kakrom me yog e tin ni bay yib.’ Aray rogon ni i buch kakrom, maku arrogon nra buch boch nga m’on. (Isa. 46:10) Gad manang ndariy ban’en nrayog ni nge taleg Jehovah ndab ki t’ufegdad. (Rom. 8:​35-39) Ra pi’ e gonop ngodad, me fal’eg lanin’dad, miki pi’ gelngidad ya nge yag nda athamgilgad u fithik’ e pi magawon ni gad ra mada’nag. Rayog ni nge pagan’dad ngay nra ayuwegdad Jehovah me tow’athnagdad.​—Jer. 17:​7, 8.

DABIYOG NI NGARI TAMILANG U WAN’DAD ROGON NRI MANANGDAD JEHOVAH

16. Mang e manang Jehovah u rarogodad ndabiyog ni nge taw rogon e lem rodad ngay nrogon ni be yog e Psalm 139:​1-6?

¹⁶ Mu beeg e Psalm 139:​1-6. En Ke Sunmiydad e manang gubin ban’en u rarogodad. Manang fan ni gad ma lemnag boch ban’en. Manang gubin ban’en ni gad ma yog nge n’en bay u gum’ircha’dad. Ku manang gubin ban’en ni gad ma rin’ nge fan ni gad ma rin’ e pi n’em. I yog David ni Pilung ni Jehovah e gubin ngiyal’ ni ke fal’eg rogon ni nge ayuwegdad maku rayog rok ni nge rin’ e re n’ey. Rib manigil e re n’ey ni En Th’abi Tolang u ga’ngin e palpalth’ib, ma Ir e Ke Sunmiy e tharmiy nge fayleng ni gubin ma rayog rok e ma lemnagdad ni aray rogon! I yog David ni gaar: “Rogon nib tamilangan’um rog e dabiyog ni nge taw lanin’ug ngay; kayigi toar u puluwog ndabiyog ni nge tamilangan’ug riy.”​—Ps. 139:6.

17. Mang fan nrayog ni nge mo’maw’ ni nge m’agan’dad ngay nri manangdad Jehovah nib fel’ rogon?

¹⁷ Sana rayog nib mo’maw’ ni ngaud ted Jehovah ni ir reb e Matam ni gad ba t’uf rok ma ma lemnagdad ni bochan rogon e tabinaw nda ilalgad riy, ara yalen rodad, ara pi n’en nib mich u wan’dad kafram. Fa reb e rayog ni ngad lemnaged ni kaygi gel e kireb ni ud rin’ed kafram ndabi adag Jehovah ni nge nangdad mab palog rodad. Mus ngak David ni immoy yu ngiyal’ ni i lem ni aray rogon. (Ps. 38:​18, 21) Fa reb e bay be’ nri be guy rogon ni nge thilyeg e ngongol rok me fol ko pi motochiyel rok Got nrayog ni nge gaar u wan’, ‘Faanra riyul’ ni manang Got rarogog, me ere mang fan ni baadag ni nggu tal i rin’ ba mit e ngongol nrib mo’maw’ ngog ni nggu siyeg?’

18. Mang angin nra yib ngodad ni faanra m’agan’dad ngay ni Jehovah e kab fel’ rogon ni manang rarogodad nga rogon ni gad manang? (Kum guy e sasing.)

¹⁸ Rayog ni ngad filed rogon ni nge m’agan’dad ngay ni Jehovah e kab fel’ rogon ni manang rarogodad nga rogon ni gad manang, ma rayog ni nge guy boch ban’en nib fel’ rodad ndabiyog ni ngad guyed. Yugu aram rogon ni ma guy thibngidad ma manang fan ni gad ma lemnag ma gad ma rin’ boch ban’en, machane ka gad ba t’uf rok. (Rom. 7:15) Nap’an ni gad ra nang ni manang Jehovah nrayog ni ngad manged boch e girdi’ nib manigil, ma ra pi’ gelngidad ni ngad pigpiggad ngak u fithik’ e yul’yul’ nge felfelan’.

19. Mang e ri gad manang u murung’agen Jehovah?

¹⁹ Ri gad manang ni Jehovah e t’ufeg. (1 John 4:16) Gad manang ni pi motochiyel rok e be m’ug riy e t’ufeg rok ngodad ma gubin ngiyal’ ni baadag e tin nib fel’ ni fan ngodad. Gad manang ni baadag ni nge yag e yafos ni manemus ngodad. I pi’ fare biyul ya nge yag e yafos ngodad. Re biyul nem ni kan pi’ nib tow’ath e be micheg nga lanin’dad nrayog ni ngad rin’ed e tin nib m’agan’ ngay ni yugu aram rogon ndawor da flontgad. (Rom. 7:​24, 25) Ma gad manang ni “Got e ka ba ga’ nga lanin’dad, ni gubin ban’en ma manang.” (1 John 3:​19, 20) Ma guy Jehovah gubin ban’en u rarogodad, mab pagan’ ngay nrayog ni ngad rin’ed e tin nib m’agan’ ngay.

20. Mang e ra ayuwegdad ndab ki magafan’dad nga boch ban’en ndad nanged?

²⁰ Gubin ban’en nib t’uf ni ngad nanged ni ke tamilangnag Jehovah ngodad. Faanra m’agan’dad ko re n’ey, ma aram e dabki magafan’dad nga boch ban’en ndariy ban’en nrayog ni ngad rin’ed ngay mad tedan’dad ko tin ir e ba ga’ fan. Faan gad ra rin’ e re n’ey, ma aram e gad be dag nrib pagan’dad ngak Jehovah ni ir e “En ni manang gubin ban’en.” (Job 36:​4, NW) Yugu aram rogon ni bay boch ban’en ndawori tamilang u wan’dad e chiney, machane gad be sap nga m’on ko ngiyal’ nra fil e Got rodad nrib manigil boch ban’en nib beech ngodad mu kud filed murung’agen ndariy n’umngin nap’an.