Mu Ayuweg e En Gimew Be Fil e Bible ni Nge Dugliy ni Nge Pigpig Ngak Jehovah

1-2. (a) Mang fan ni bay boch e girdi’ ni yibe fil e Bible ngorad ni be mo’maw’ ni ngar dugliyed ni ngar manged reb e Pi Mich Rok Jehovah? (b) Mang e gad ra weliy ko re article ney?

BAY boch ban’en ni i talegem nde yag ni ngam thilyeg boch ban’en u rarogom ya nge yag nim mang reb e Pi Mich Rok Jehovah, fa? Sana rayog ni um magar nri chey me togopuluw e piin gimed nga maruwel, ara pi fager rom, ara chon e tabinaw rom ngom. Fa reb e rayog ni um lemnag ndabiyog ni ngam fol ko pi motochiyel rok Got. Faanra ireray e n’en ni i buch rom, ma rayog ni ngam nang rogon laniyan’ e piin yibe fil e Bible ngorad ni be mo’maw’ ni ngar dugliyed ni ngar manged reb e Pi Mich Rok Jehovah.

² Manang Jesus ni mit ney e marus e ba mom ni nge taleg be’ ndabi mon’og ko tirok Got ban’en. (Matt. 13:​20-22) Machane de mulan’ u puluwon e piin ni i mo’maw’ ngorad ni ngar manged boch i gachalpen. Ya dag ngak pi gachalpen rogon ni ngar ayuweged e pi girdi’ nem ni (1) ngar nanged e n’en be talegrad ndarur mon’oggad, (2) ngari t’uf Jehovah rorad, (3) ngar m’oneged Jehovah u wan’rad, nge (4) ngar gelgad ko pi magawon ni yad be mada’nag. Uw rogon nrayog ni ngad folgad ko n’en ni yog Jesus ngak pi gachalpen u nap’an ni gad be fanay fare ke babyor ni Mu Par Ndariy N’umngin Nap’an ni Gab Felfelan’! ni ngad ayuweged be’ ni gad be fil e Bible ni nge dugliy ni nge mang reb e Pi Mich Rok Jehovah?

MU AYUWEG NI NGE NANG E N’EN BE TALEG NDER MON’OG

3. Mang e rayog ni i taleg Nikodemus nde mang reb i gachalpen Jesus?

³ Nikodemus nreb e tayugang’ ko pi Jew ni be’ nib ga’ fan e mo’maw’ ngak ni nge mang reb i gachalpen Jesus. Tomuren sogonap’an nel’ e pul ni machib Jesus, ma ke nang Nikodemus ni ir e en ke l’og Got ke yib. (John 3:​1, 2) Machane i mel’eg ni ngar mada’gow Jesus nde nang be’ ya be “tamdag ngak piyu Israel.” (John 7:13; 12:42) Sana rayog ni be magar nri mul e liw rok nge boch e flaab rok u pa’ ni faanra mang reb i gachalpen Jesus.a

4. Uw rogon ni ayuweg Jesus Nikodemus ni nge nang e n’en baadag Got ni nge rin’?

⁴ Manang Nikodemus e thin ni bay u lan fare Motochiyel, machane ba t’uf ni nge nang e n’en baadag Jehovah ni nge rin’. Ere uw rogon ni ayuweg Jesus? I m’agan’ Jesus ngay ni ngar mada’gow nnep’ ni nge weliy boch ban’en ngak. Ri tamilangnag ngak e n’en nib t’uf ni nge rin’ ya nge yag ni mang reb i gachalpen. Ba t’uf ni nge kalngan’ ko denen rok, min taufenag, me dag nib mich Fak Got u wan’.​—John 3:​5, 14-21.

5. Uw rogon nrayog ni ngad ayuweged be’ ni gad be fil e Bible ni nge nang e n’en be taleg nder mon’og?

⁵ Mus ni faanra ke yoor e machib u Bible ni ke tamilang u wan’ be’ ni yibe fil e Bible ngak, ma rayog ni kab t’uf ni ngan ayuweg ni nge nang e n’en be taleg nder mon’og. Sana rayog nder yag ni nge rin’ e pi n’en be nameg ni fan ko tirok Got ban’en ni bochan e maruwel ni ma un ngay ni nge yag e salpiy ngak ara togopuluw u lan e tabinaw. Ere mu tay e tayim ni ngam ayuweg. Rayog ni ngam pining ngam unumew e coffee u taabang ara mu rin’ew boch ban’en u taabang. Gimew ra rin’ boch ban’en ni aray rogon u taabang, ma rayog ni ngam ayuweg ni nge mom ngak ni nge weliy e magawon rok ngom. Mu pi’ e athamgil nga laniyan’ ni nge thilyeg e tin nib t’uf ni nge thilyeg u rarogon ni gathi bochan e nge felfelan’nagem ya bochan e nge dag nib t’uf Jehovah rok.

6. Uw rogon nrayog ni ngam ayuweg be’ ni ga be fil e Bible ngak ni nge yib gelngin ni nge fol ko n’en be fil? (1 Korinth 16:13)

⁶ Nap’an nra pagan’ be’ ni yibe fil e Bible ngak nra ayuweg Jehovah ni nge fol ko pi motochiyel u Bible, ma aram e ra yib gelngin ni nge fol ko n’en be fil. (Mu beeg e 1 Korinth 16:13.) Rayog ni ngan taareb rogonnagem ngak reb e sensey u skul. Am sul ngam lemnag e ngiyal’ ni um un nga skul. Bin ngan e sensey rom e ri ga baadag? Dabisiy ni ga baadag e re sensey ni i gum’an’nag ir nge ayuwegem ni nge pagan’um ngay ni bay boch ban’en nrayog rom. Ku arrogon ni be’ nib salap i fil e Bible ko girdi’ e gathi kemus ni ma fil ngak be’ e n’en baadag Got ni ngad rin’ed, ya ku ma micheg nga laniyan’ nrayog ni nge ayuweg Jehovah ni nge thilyeg e tin nib t’uf ni nge thilyeg u lan e yafos rok. Ere uw rogon nrayog ni ngam rin’ e re n’ey?

MU AYUWEG NI NGARI T’UF JEHOVAH ROK

7. Uw rogon ni ayuweg Jesus e piin ur motoyilgad ngak ni nge gel feni t’uf Jehovah rorad?

⁷ Manang Jesus ni t’ufeg rok pi gachalpen ngak Got e ra k’aringrad ni ngar folgad ko tin kar filed. Ba ga’ ni i fil boch ban’en ngorad nra ayuwegrad ni nge gel e t’ufeg rorad ngak e Chitamangirad ni bay u tharmiy. Bod ni taarebrogonnag Jehovah ngak be’ nib pumoon ni ma pi’ e tin nib fel’ ngak pi fak. (Matt. 7:​9-11) Rayog ni immoy boch e piin ur motoyilgad ngak Jesus nda i t’ufegrad e chitamangirad. Ere am lemnag rogon lanin’rad u nap’an ni weliy fare fanathin ngorad ni murung’agen fare matam ni ma runguyey ni pag ba pagel ni fak ni nge sul nga tabinaw ni yugu aram rogon ni boor ban’en nib kireb ni ka i rin’. Re n’ey e ayuwegrad ni ngar nanged rogon ni ma runguy Jehovah pi fak u fayleng.​—Luke 15:​20-24.

8. Uw rogon nrayog ni ngam ayuweg e en gimew be fil e Bible ni ngari t’uf Jehovah rok?

⁸ Ku arrogom nrayog ni ngam ayuweg e en gimew be fil e Bible ni ngari t’uf Jehovah rok ni aram ngaum weliy murung’agen pi fel’ngin Got ngak. Gubin yay ni gimew ra fil e Bible, mag ayuweg ni nge nang rogon nib peth e tin be fil ko t’ufeg rok Jehovah. Nap’an ni gimew be weliy murung’agen fare biyul, mag tamilangnag rogon nra yib angin ngak. (Rom. 5:8; 1 John 4:10) Nap’an ni be fal’eg i lemnag be’ rogon nib t’uf rok Jehovah, ma dabisiy nra k’aring ni nge t’uf Jehovah rok.​—Gal. 2:20.

9. Mang e ayuweg be’ nib pumoon ni ka nog Michael ngak ni nge thilyeg e ngongol rok?

⁹ Am lemnag e n’en ni buch rok Michael ni be’ nu Indonesia. Kab bitir ma manang e tin riyul’, machane de un ko taufe. Nap’an ni gaman 18 e duw rok me yan i par nga yugu reb e nam nga i maruwel ni ir be’ ni ma yan u boch e karrow nib gagang’ ni ma fek e chugum. Boch nga tomuren me un ko mabgol, machane miki digey e tabinaw rok nge yan i par nga yugu reb e nam nga i maruwel. Nap’an e ngiyal’ nem me tabab leengin nge bochi pin ni fakrow ko fol Bible mar mon’oggow. Tomuren ni yim’ e chitiningin me dugliy ni nge sul nga tafen ni nge ayuweg e chitamangin, ma aram me m’agan’ ngay ni nge fil e Bible. Nap’an ni be fil e n’en bay u tan fare thin ni “Kum Fil Boch Ban’en u Murung’agen” ko guruy ni 27 ko fare ke babyor ni Mu Par Ndariy N’umngin Nap’an ni Gab Felfelan’!, ma aram mi ri taw e thin riy nga gum’irchaen. Nap’an ni be lemnag rogon laniyan’ Jehovah u nap’an ni be guy Fak ni be gafgow, ma aram me tabab ni nge yor. Ri ga’ fan fare biyul u wan’, me k’aring ni nge thilyeg e ngongol rok, me un ko taufe.

MU AYUWEG NI NGE M’ONEG JEHOVAH U WAN’

10. Uw rogon ni ayuweg Jesus pi gachalpen ni ngar m’oneged Jehovah u wan’rad? (Luke 5:​5-11) (Kum guy e sasing.)

¹⁰ Ba papey ni nang pi gachalpen Jesus ni ir fare Messiah ni kan micheg, machane ba t’uf ni ngan ayuwegrad ni ngar m’oneged fare maruwel ni machib u wan’rad. Nap’an ni pining Jesus Peter nge Andrew ni ngar unew ngak u polo’ e tayim rorow, ma ke n’uw nap’an ni kar mangew l’agruw i gachalpen. (Matt. 4:​18, 19) Yow ma fita’ ni ngar piew ni chuway’ ni yad James nge John, mab fel’ rogon e siyobay rorad. (Mark 1:​16-20) Nap’an ni dugliy Peter nge Andrew ni ngar ‘digeyew e nug rorow,’ ma dabisiy nra yarmiyew rogon ni ngar piew e tin nib t’uf ko tabinaw rorow u nap’an ni yow be un ngak Jesus. Ere mang e k’aringrow ni ngar m’onegew Jehovah u wan’row? Be yog e babyor rok Luke ni ngongliy Jesus ba maang’ang ni nge ayuwegrow ni ngari pagan’row ngay nrayog rok Jehovah ni nge pi’ e tin nib t’uf rorow.​—Mu beeg e Luke 5:​5-11.

11. Uw rogon nrayog ni ngad weliyed boch ban’en ni ke buch rodad ngak e en gad be fil e Bible ya nge yag ni gel e michan’ rok?

¹¹ Dabiyog ni ngad ngongliyed e maang’ang ni bod Jesus, machane rayog ni ngad weliyed ko girdi’ rogon ni ma ayuweg Jehovah e piin yad ma m’oneg u lan e yafos rorad. Ka be yib ngan’um rogon ni ayuwegem Jehovah u nap’an nim tabab ni ngaum un ko muulung, fa? Sana rayog ni t’uf ni ngam mada’gow e en nib ga’ u tabon e maruwel rom ni ngam weliy ngak fan ndabkiyog ni ngaum maruwel nge pag e tayim ni faanra be magawon ko ngiyal’ ni ga ma un riy ko muulung. Nap’an ni ga be weliy e pi n’ey ko en gimew ma fil e Bible, mag weliy ngak rogon ni gel e michan’ rom u nap’an nim guy rogon ni ayuwegem Jehovah u nap’an nim m’oneg u wan’um e liyor ni ga be tay ngak.

12. (a) Mang fan nsusun e ngad pininged boch e walag nib thilthil ni ngar uned ngodad u nap’an ni ngad filed be’ e Bible? (b) Uw rogon nrayog ni ngam fanay boch e video ni ngam fil ban’en ngak e en gimew be fil e Bible nra yib angin? Mu weliy reb e kanawo’.

¹² Ku ra yib angin ngak ni faanra rung’ag rogon ni ke m’oneg yugu boch e Kristiano Jehovah u wan’rad. Ere mu pining yugu boch e walag nib thilthil e n’en ni i buch rorad kafram ni ngar uned ngomew ko fol Bible. Mog ngorad ni ngar weliyed rogon nra bad ko tin riyul’ nge n’en nrin’ed ya nge yag nra m’oneged u wan’rad e pigpig rorad ngak Jehovah. Kum tew e tayim ni ngam yaliyew e pi video ni bay u tan fare thin ni “Kum Fil Boch Ban’en u Murung’agen” ara “Mu Gay Murung’agen” ni bay u lan fare ke babyor ni Mu Par Ndariy N’umngin Nap’an ni Gab Felfelan’! Bod nnap’an ni gimew be fil e guruy ni 37, ma rayog ni ngam tamilangnag boch ban’en ngak ni bay ko fare video ni Jehovah Will Care for Our Needs.

MU AYUWEG NI NGE GEL KO PI MAGAWON NI BE MADA’NAG

13. Uw rogon ni fal’eg Jesus rogon pi gachalpen ni fan ko togopuluw ni yad ra mada’nag?

¹³ Boor yay ni i yog Jesus ngak pi gachalpen ni yad ra mada’nag e togopuluw ni kub muun ngay e togopuluw nra i tay e girdi’ rorad ngorad. (Matt. 5:11; 10:​22, 36) Nap’an ni chugur ni nge mus nap’an e machib ni i tay Jesus, me yog ngak pi gachalpen ni ku rayog ni ngan thang e fan rorad. (Matt. 24:9; John 15:20; 16:2) I yog ngorad ni ngar kol ayuwgad u nap’an ni yad be machib. I yog ngorad ndab ra luaged e piin yad be togopuluw e thin ma ngar gonopgad ya nge yag nra ululgad ko machib.

14. Uw rogon nrayog ni ngad ayuweged e en gad ma fil e Bible ni nge fal’eg rogon ni fan ko togopuluw nra mada’nag? (2 Timothy 3:12)

¹⁴ Rayog ni ngad ayuweged e en gad ma fil e Bible ni nge fal’eg rogon ni fan ko togopuluw nra mada’nag ni aram e ngad weliyed ngak e n’en nrayog ni nga i yog e piin yad nga maruwel, nge pi fager rok, nge girdi’ rok ngak. (Mu beeg e 2 Timothy 3:12.) Ku bay boch e piin yad nga maruwel nrayog ni ngaur k’ak’aringed ni bochan e be guy rogon ni nge fol ko thin nu Bible. Ku bay boch e girdi’ ni kub muun ngay e girdi’ rok ni yad ba chugur nrayog ni nga u rogned thibngin e pi n’en ke mich u wan’ ni bay u Bible. Feni papey ni gad ra ayuweg e piin gad ma fil e Bible ngorad ni ngar fal’eged rogorad ni fan ko togopuluw ni yad ra mada’nag, ma aram e ra bung rogorad ni ngar athamgilgad u nap’an ni yad ra mada’nag e togopuluw.

15. Mang e rayog ni nge ayuweg e en gad ma fil e Bible ngak ni nge athamgil u nap’an ni be mada’nag e togopuluw u lan e tabinaw?

¹⁵ Faanra be mada’nag e togopuluw u lan e tabinaw, mag pi’ e athamgil nga laniyan’ ni nge lemnag fan ni be damumuw e girdi’ rok. Sana rayog ni yad be lemnag ni kan bannag fa reb e kemus ni bochan e yad ma lemnag ni Pi Mich Rok Jehovah e yad boch e girdi’ ni yad ba kireb. Mus ngak Jesus ni ku bay boch e girdi’ rok ndubrad e n’en ni i rin’. (Mark 3:21; John 7:5) Mu fil ngak rogon ni nge gum’an’nag ir me kol ayuw u rogon ni ma non ko girdi’ nib muun chon e tabinaw rok ngay.

16. Uw rogon nrayog ni ngad ayuweged e en gad be fil e Bible ni nge kol ayuw u rogon ni be weliy e michan’ rok?

¹⁶ Mus ni faanra be m’ug ni baadag e girdi’ rok e tin riyul’, mab fel’ ndabi weliy gubin ban’en ngorad ni taab yay. Ya faanra danga’ ma rayog ni nga yigi pag urngin ban’en ni nge weliy ma dab kur adaged ni nge weliy ngorad murung’agen e michan’ rok bayay. Ere mu pi’ e athamgil nga laniyan’ ni nge weliy e michan’ rok u reb e kanawo’ nra k’aringrad ni ngar adaged ni ngkur motoyilgad boch nga tomuren. (Kol. 4:6) Sana rayog ni nge yog ko girdi’ rok ni nga ranod ko fare website ni jw.org. Re n’ey e ra ayuwegrad ni ngkur filed boch ban’en u murung’agen e Pi Mich Rok Jehovah.

17. Uw rogon nrayog ni ngam fil ngak e en gimew be fil e Bible rogon ni nge pi’ e fulweg u boch e deer ni yima fith u murung’agen e Pi Mich Rok Jehovah? (Kum guy e sasing.)

¹⁷ Rayog ni ngam fanay e n’en bay ko fare thin ni “Frequently Asked Questions” ni bay ko jw.org ni ngam ayuweg ni nge lemnag boch e fulweg nib mom nrayog ni nge pi’ ko pi deer nrayog ni nge fith e girdi’ rok ara piin yad nga maruwel. (2 Tim. 2:​24, 25) Nap’an ni gimew ra taw nga tungun reb e guruy ko fare ke babyor ni Mu Par Ndariy N’umngin Nap’an ni Gab Felfelan’!, mi gimew weliy e n’en bay ko fare thin ni “Ma Gaar Boch e Girdi’.” Mu pi’ e athamgil nga laniyan’ ni nge weliy rogon nra weliy ko girdi’ e n’en ke mich u wan’. Dab mu magagawon ni ngam weliy ngak rogon nrayog ni nge mon’og u rogon ni be rin’ e re n’ey. Pi n’ey ni gimew ra rin’ e ra ayuweg ni nge pagan’ ni nge weliy e michan’ rok.

18. Uw rogon nrayog ni ngam pi’ e athamgil nga laniyan’ e en gimew be fil e Bible ni nge mang reb e publisher? (Matthew 10:27)

¹⁸ I pi’ Jesus e athamgil nga laniyan’ pi gachalpen ni ngar machibnaged fare thin nib fel’ ngak e girdi’ ni yoor. (Mu beeg e Matthew 10:27.) Feni papey nra tabab be’ ni be fil e Bible ni nge weliy e michan’ rok e aram feni papey nra nang rogon ni nga i taga’ ngak Jehovah. Uw rogon nrayog ni ngam ayuweg e en gimew be fil e Bible ni nge nameg e re n’ey? Nap’an ni yira yog ko ulung ni bay reb e campaign ni ngan tay ni fan ko machib, mag ayuweg ni nge lemnag e n’en nib t’uf ni nge rin’ ya nge yag ni mang reb e publisher. Mu weliy ngak fan ni boor e walag ni kar guyed ni aram e ngiyal’ nib mom ngorad ni ngar tababgad ni ngar uned ko machib. Ku reb e ban’en nrayog ni nge nameg e aram e nge un i pi’ e welthin u nap’an e muulung ni yima tay u lan e wik. Nap’an nra nameg e re n’ey, ma aram e ra nang rogon ni nge weliy e michan’ rok nib fel’ rogon.

MU DAG NI BE PAGAN’UM NGAK

19. Uw rogon ni dag Jesus ni be pagan’ ngak pi gachalpen, ma uw rogon nrayog ni ngad folwokgad rok?

¹⁹ U m’on ni nge sul Jesus nga tharmiy me yog ngak pi gachalpen ni ku yad ra mada’ bayay. Dar nanged ni be weliy Jesus murung’agen e yan ni ngar ted nga tharmiy. Yugu aram rogon mi i lemnag rogon e yul’yul’ ni ur ted ma gathi pi n’en ni i maruwar u wan’rad. (John 14:​1-5, 8) Manang nib t’uf ba ngiyal’ ni nge tamilang boch ban’en u wan’rad ni bod murung’agen e athap rorad ni nga ranod nga tharmiy. (John 16:12) Ku arrogodad nrayog ni ngad daged ko en gad be fil e Bible ngak nib pagan’dad ni baadag ni nge rin’ e n’en nib m’agan’ Jehovah ngay.

20. Uw rogon ni dag reb e walag nib pin u Malawi ni be pagan’ ko en yow be fil e Bible?

²⁰ Nge pagan’um ngay ni baadag e en ga be fil e Bible ngak ni nge rin’ e tin nib fel’. Am lemnag e n’en ni buch rok reb e walag nib pin u Malawi ni ka nog Chifundo ngak. I tabab i fil e Bible ngak reb e rugod nib Katolik ni ka nog Alinafe ngak ni yow be fanay fare ke babyor ni Mu Par Ndariy N’umngin Nap’an ni Gab Felfelan’! Nap’an nra mu’gow i fil e guruy ni 14, me fith Chifundo ngak e n’en be lemnag u murung’agen e meybil ko liyos. Ri damumuw Alinafe me gaar ngak, “Gag rog e nggu dugliy ko ngaug meybil ko liyos fa danga’!” Ere lemnag Chifundo nsana bayi tal Alinafe ko fol Bible. Yugu aram rogon me gum’an’nag ir ngar ululgow ko fol Bible ni be athapeg nra munmun me nang nib kireb e meybil ko liyos. In e pul nga tomuren me fith Chifundo fare deer ngak ni bay ko guruy ni 34 ni be gaar: “Ka nap’an nim tabab i fil e Bible kam nang Jehovah, ma mang boch i angin ni kam guy ni ke yib ngom?” I yog Chifundo e n’en ni rin’ Alinafe ni gaar, “Boor ban’en nib manigil ni yog ni ke fil nreb riy e aram e Pi Mich e darur rin’ed boch ban’en ni be yog e Bible nib kireb.” De n’uw nap’an nga tomuren me tal Alinafe ko meybil ko liyos me un ko taufe.

21. Uw rogon nrayog ni ngad ayuweged e en gad be fil e Bible ni nge dugliy ni nge pigpig ngak Jehovah?

²¹ Yugu aram rogon ni Jehovah e ir e “be pi’ gelngin e woldug be ga’,” machane rayog ni ngad ayuweged e en gad be fil e Bible ni nge mon’og. (1 Kor. 3:7) Gathi kemus ni ngad filed ngak e n’en baadag Got ni nge rin’, ya ngkud ayuweged ni ngari t’uf Jehovah rok. Ku gad ma pi’ e athamgil nga laniyan’ ni nge dag nib t’uf Jehovah rok ni aram e nge m’oneg u wan’. Ku gad ma fil ngak rogon ni nge taga’ ngak Jehovah u nap’an nra mada’nag e magawon. Faan gad ra dag ni be pagan’dad ngak, ma aram e gad be ayuweg ni nge pagan’ ngay nrayog rok ni nge fol ko pi motochiyel rok Jehovah me dugliy ni nge pigpig ngak.