T’ufeg Rok Got e Ba Manemus

1-2. Mang magawon e ma mada’nag boor e Kristiano?

MU SUSUNNAG bbowoch ni bay u maday u ba ngiyal’ nib meyko’. Der yag ni nge par e re bowoch nem nib dugil ni bochan e yugu be aw e n’ew nib gagang’ ngay. Ere faanra dabin yiluy e re bowoch nem, ma ra un ko day. Yiluy e ra tay fare bowoch nib dugil ndabi man’ u nap’an e gi lang nem.

² Nap’an ni ga be mada’nag e magawon nib mo’maw’, ma rayog ni ngam lemnag ni ga bod fare bowoch ndabiyog ni ngam par ni gab mudugil. Rayog ni nga i thilthil rogon e lem rom. Rayog ni borran e ba pagan’um ngay ni gab t’uf rok Jehovah ma be ayuwegem, ma borran e be maruwar u wan’um ko be guy e magawon rom fa danga’. (Ps. 10:1; 13:1) Rayog ni ke yog reb e fager rom ban’en ni nge pi’ e athamgil ngom, me fel’ lanin’um u lan ba ngiyal’. (Prov. 17:17; 25:11) Machane de n’uw nap’an miki maruwaran’um bayay. Ku rayog ni ngam lemnag ndaki ga’ fam u wan’ Jehovah. Ere uw rogon nrayog ni ngam par ni gab mudugil u nap’an ni be buch ban’en rom ni aray rogon? Fa reb e uw rogon ni ngari pagan’um ngay ni gab t’uf rok Jehovah ma ra ayuwegem?

3. Mang e be fil e Psalm 31:7 nge 136:1 ngodad u murung’agen e t’ufeg ni ma dag Jehovah u fithik’ e yul’yul’? Mang fan nrayog ni nga dogned ni Jehovah e ir e rib fel’ rogon ni ma dag e t’ufeg u fithik’ e yul’yul’? (Kum guy e sasing.)

³ Reb e kanawo’ nrayog ni ngam par ni gab mudugil u nap’an ni ga be mada’nag e magawon e aram e dab mu pagtalin e t’ufeg rok Jehovah u fithik’ e yul’yul’. (Mu beeg e Psalm 31:​7, BT; 136:1.) Fare bugithin ni Hebrew ni kan pilyeg u roy ni “t’ufeg rom” e be yip’ fan rogon ni ma dag be’ nrib t’uf be’ rok mab yul’yul’ ngak, ma dariy ba ngiyal’ nra pag. Jehovah e ir e rib fel’ rogon ni ma dag e t’ufeg u fithik’ e yul’yul’. Bin riyul’ riy e fapi thin ni Hebrew ni kan fanay ko Exodus 34:​6, 7 nge Psalm 86:5 e be yip’ fan ni Jehovah e ba sug ko t’ufeg u fithik’ e yul’yul’. Am lemnag e n’en be yip’ fan e re n’ey: Dariy ba ngiyal’ nra digey Jehovah e pi tapigpig rok ni yad ba yul’yul’! Faanra dab mu pagtalin nib yul’yul’ Jehovah, ma aram e n’en nra ayuwegem ni ngam par ni gab mudugil u nap’an ni ga be mada’nag reb e magawon nib mo’maw’.​—Ps. 23:4.

NGAM LEMNAG NI T’UFEG ROK JEHOVAH E ARAM REB I KENGGIN E MACHIB U BIBLE

4. Mu weliy boch i kenggin e machib u Bible, nge fan nrib mich u wan’dad?

⁴ Ku reb e kanawo’ nrayog ni ngam par ni gab mudugil u nap’an ni ga be mada’nag e magawon e aram e ngam lemnag ni t’ufeg rok Jehovah e aram reb i kenggin e machib u Bible. Mang e ga ma lemnag u nap’an ni ga ra rung’ag fare thin ni “kenggin e machib u Bible”? Sana ga ra lemnag e pi machib ni kam fil u lan e Thin rok Got. Bod ni kam fil ni Jehovah fithingan Got, ma Jesus e Fak Got ni kari maagirag rok, ma piin kar m’ad e dariy ban’en ni yad manang, ma ra paradis e fayleng me par e girdi’ riy ni manemus. (Ps. 83:18; Ekl. 9:5; John 3:16; Rev. 21:​3, 4) Nap’an ni mich e pi machib ney u wan’um, mab mo’maw’ ni ngam pag be’ ni nge k’aringem ndab ki mich u wan’um. Mang fan? Ya kam nang ni be tor nga daken boch ban’en nib riyul’. Chiney e ngad weliyed rogon ni faanra um lemnag ni t’ufeg rok Jehovah e aram reb i kenggin e machib u Bible, ma rayog ni nge ayuwegem ni nge dab kum lemnag nder lemnag ara der guy e magawon ni ga be mada’nag.

5. Mu weliy rogon ni ma yag ni nge digey be’ boch e machib nde riyul’.

⁵ Mang e ayuwegem ni ngam digey e pi machib nde riyul’ u nap’an nim tabab ni ngam fil e Bible? Dabisiy ni um taarebrogonnag e n’en ni i fil e teliw rom ngom ko n’en be yog e Bible. Am lemnag reb ko pi n’ey: Sana rayog ni immoy ba ngiyal’ nib mich u wan’um ni Jesus e ir Got ni Gubin Ma Rayog Rok. Machane nap’an ni ga be fil e Bible, mag fithem ni nge lungum, ‘Rib riyul’ e re machib ney, fa?’ Tomuren nim fal’eg i yaliy e n’en be yog e Bible, ma aram mag nang nde riyul’. Ere n’en nim rin’ e tabab ni nge mich u wan’um e tin riyul’ ni be yog e Bible ni aram e Jesus e “ir e bin ni m’on i Fak [Got], ni ir e ba tolang ngak urngin ban’en ni sunumiy” ma ir “Fak Got ni kari maagirag rok.” (Kol. 1:15; John 3:18) Bin riyul’ riy e ba mo’maw’ ni ngan digey e machib ni googsur ni bochan e aram e “yungi n’en ni ke fal’eg e moonyan’ rogon ke par riy be cham ngodad.” (2 Kor. 10:​4, 5) Machane nap’an nim digey e pi machib nem, ma dakuriy ba ngiyal’ nim sul ngay.​—Fil. 3:13.

6. Mang fan nrayog ni nge pagan’um ngay ni t’ufeg rok Jehovah e “ba manemus”?

⁶ Ku rayog ni ngam rin’ e re n’ey u nap’an ni ga be lemnag e n’en be yog e Bible u murung’agen e t’ufeg rok Jehovah. Faanra be tabab ni nge maruwar u wan’um e t’ufeg rok Jehovah u nap’an ni ga be mada’nag reb e magawon, ma ngam fithem ni nge lungum, ‘Ba puluw rogon e lem nug be tay, fa?’ Mu taarebrogonnag e n’en be maruwar u wan’um ko n’en be yog e Psalm 136:1 (BT) ni aram kenggin e thin nu Bible ni fan ko re article ney. Fare bugithin ni Hebrew ni kan pilyeg ni “t’ufeg” e kub muun e yul’yul’ ngay. Ere mang fan ni thagthagnag Jehovah nga laniyan’ fare Psalmist ni nge weliy murung’agen e t’ufeg rok ni aray rogon? Mang fan ni 26 yay nnog fare thin ni “t’ufeg rok e ba manemus” u lan e re tang nem? Kad weliyed faram ni t’ufeg ni ma dag Jehovah ko girdi’ rok u fithik’ e yul’yul’ e aram reb i kenggin e machib u Bible, ni ku taareb rogon nga yugu boch e machib ni bay ko Thin rok Got ni ke mich u wan’um. Ere de riyul’ fare lem ndariy fam u wan’ Jehovah. Mu digey e binem e lem ni bod boch e machib nde riyul’ ni karim digey!

7. Mu weliy murung’agen boch e thin nu Bible ni be micheg ni gad ba t’uf rok Jehovah.

⁷ Ku boor e thin nu Bible ni be micheg ni gad ba t’uf rok Jehovah. Bod ni yog Jesus ngak pi gachalpen ni gaar: “Ka ba ga’ famed ngak fa nochi arche’ ni sparrow fithingan!” (Matt. 10:31) Ki yog Jehovah ko girdi’ rok ni gaar: “Bay gu gelnigem mu gu ayuwegem; bay gu yoror rom mu gu ayuwegem nga paag nib gel.” (Isa. 41:10) Am tay fanam i yan u rogon feni mudugil e pi thin ney. De gaar Jesus ‘Sana ba ga’ famed,’ maku de gaar Jehovah ‘Sana gu ra ayuwegem.’ Ya lungurow: “Ka ba ga’ famed” nge “Bay gu . . . ayuwegem.” Faanra bay ba ngiyal’ ni ke maruwar u wan’um ko gab t’uf rok Jehovah u nap’an ni ga be mada’nag e magawon, ma pi thin nu Bible ni bod e gal thin nu Bible ney e gathi kemus nra fal’eg lanin’um, ya ku ra ayuwegem ni ngam nang ni gab t’uf rok. Ba riyul’ e pi thin ney. Ga ra meybil mag fal’eg i lemnag e pi thin ney, ma ra k’aringem ni nga mog fapi thin ni bay ko 1 John 4:16 ni be gaar: “Gadad manang ma mmich u wun’dad ni gadad ba t’uf rok Got.”a

8. Mang e rayog ni ngam rin’ ni faanra ka bay yu ngiyal’ ni ma maruwar e t’ufeg rok Jehovah u wan’um?

⁸ Machane uw rogon ni faanra ka bay yu ngiyal’ ni ma maruwar e t’ufeg rok Jehovah u wan’um? Mu taarebrogonnag e n’en ga be lemnag ko n’en ga manang. N’en gad ma lemnag e de bod boch ban’en nib riyul’ ndabiyog ni nge thil, machane rogon ni gad ba t’uf rok Jehovah e aram ban’en nib riyul’ ni be fil e Bible. Faanra de mich u wan’dad e re n’ey, ma aram e kad paged talin e bin th’abi ga’ fan i fel’ngin Jehovah ni aram e t’ufeg.​—1 John 4:8.

MU LEMNAG ROGON NI ‘GAB T’UF ROK’ JEHOVAH

9-10. Mang e yog Jesus u m’on ni yog fapi thin ni bay ko John 16:​26, 27 ni gaar: “En ni Chitamangiy e gimed ba t’uf rok”? (Kum guy e sasing.)

⁹ Rayog ni ngkud filed boch ban’en u murung’agen e t’ufeg rok Jehovah ni faan gad ra lemnag fapi thin ni yog Jesus ngak pi gachalpen ni gaar: “En ni Chitamangiy e gimed ba t’uf rok.” (Mu beeg e John 16:​26, 27.) Gathi kemus ni yog Jesus e pi thin ney ni nge fal’eg laniyan’ pi gachalpen. Bin riyul’ riy e thin ni bay u m’on ko pi thin ney e be tamilangnag ni gathi be weliy murung’agen e n’en yad be lemnag e ngiyal’ nem. Ya be weliy murung’agen yugu ban’en, ni aram e meybil.

¹⁰ Ka fini yog Jesus ngorad nsusun e ngar meybilgad u daken fithingan, ma gathi ngar meybilgad ngak. (John 16:​23, 24) Ba ga’ fan ni ngar nanged e re n’ey. Ya tomuren ni yira faseg ko yam’, ma rayog ni yad ra adag ni ngar meybilgad ngak. Bin riyul’ riy e ke mang Jesus reb e fager rorad. Rayog ni ngar lemnaged ni t’ufeg rok ngorad e ra k’aring ni nge rung’ag e n’en yad be ning me yog ngak e Chitamangin ni nge ayuwegrad. Machane i yog Jesus ngorad nsusun e dab ra lemgad ni aray rogon. Mang fan? Ya gaar ngorad: “En ni Chitamangiy e gimed ba t’uf rok.” Re n’ey e aram bang ko pi kenggin e machib ni bay u Bible u murung’agen e meybil. Am lemnag rogon angin e re thin ney ngom: Pi n’en kam fil u Bible e ke ayuwegem ni ngam nang Jesus me t’uf rom. (John 14:21) Rayog ni ngam meybil ngak Got nib pagan’um, ya ga manang ni ‘gab t’uf rok’ ni bod pi gachalpen Jesus ko bin som’on e chibog. Gubin yay ni ga ra meybil ngak Jehovah, ma aram e ga be dag nib mich e pi thin ney u wan’um.​—1 John 5:14.

NGAM NANG E N’EN MA K’ARINGDAD NI NGE MARUWAR BOCH BAN’EN U WAN’DAD

11. Mang fan nra felfelan’ Satan ni faanra maruwar e t’ufeg rok Jehovah u wan’dad?

¹¹ Mang e ma k’aringdad ni nge maruwar u wan’dad ni gad ba t’uf rok Jehovah? Sana ga ra yog ni Satan e ir e ma k’aringdad ni ngad lemgad ni aray rogon, ma re n’ey e bang riy e ba puluw ma bang riy e danga’. Be gaydad Moonyan’ ni ‘nge longuydad,’ ma ra felfelan’ ni faanra maruwar e t’ufeg rok Jehovah u wan’dad. (1 Pet. 5:8) Ya bin riyul’ riy e t’ufeg rok Jehovah e aram e n’en ni k’aring ni nge pi’ fare biyul, ni aram ban’en ni baadag Satan ni ngad lemnaged ndariy rogon ni nge yib angin ngodad. (Heb. 2:9) Machane faanra maruwar e t’ufeg rok Jehovah u wan’dad, ma mini’ e ra yib angin ngak? Satan. Ma mini’ e ra felfelan’ ni faanra mulan’dad u nap’an ni gad ra mada’nag e magawon? Satan. Baadag Satan ni ngad lemnaged ndad t’ufgad rok Jehovah. Machane de riyul’ e re n’ey, ya ir e en nde t’uf rok Jehovah. Yugu aram rogon, ma reb e “ban” ni ma fanay e aram e ma guy rogon ni nge k’aringdad ni ngad lemnaged ni gadad e dad t’ufgad rok Jehovah ma ke digeydad. (Efe. 6:11) Nap’an ni gad ra nang e n’en be guy e toogor rodad rogon ni nge rin’, ma aram e gad ra dugliy u wan’dad ni ngad ‘togopluwgad ngak fare moonyan’.’​—Jas. 4:7.

12-13. Uw rogon nrayog ni nga i maruwar e t’ufeg rok Jehovah u wan’dad ni bochan e denen ni ke af ngodad?

¹² Ku bay ban’en ni ma k’aringdad ni nge maruwar u wan’dad ni gad ba t’uf rok Jehovah. Mang e re n’em? Denen ni ke af ngodad. (Ps. 51:5; Rom. 5:12) Aram e n’en ke kirebnag e tha’ u thilin e girdi’ nge Got. Ku aram e n’en ke kirebnag rogon ni yad ma lem, nge n’en bay u gum’ircha’rad, nge fithik’ i dowrad.

¹³ Denen e ma k’aringdad ni ngad lemnaged boch ban’en nde puluw, ya ma k’aringdad ni ngad lemnaged nib kireb e rodad, me magafan’dad, ma dabki pagan’dad, mad tamra’gad. Rayog ni ngad lemgad ni aray rogon u nap’an ni kad denengad. Machane ku rayog ni ngaud lemgad ni aray rogon ni bochan e gubin ngiyal’ ni gad manang ndawor da flontgad, ni gathi aram rogon ni sunmiy Got e girdi’ ko som’on. (Rom. 8:​20, 21) Bochan ndawor da flontgad, ma dabiyog ni ngad rin’ed gubin ban’en nrib fel’ rogon ni bod rogon nni sunmiydad ni ngad rin’ed, ni bod e tayya u ba karrow ni ke m’ay e nifeng riy ndabiyog ni nge maruwel nib fel’ rogon. Ere aram fan ndab da gingad ngay ni bay yu ngiyal’ ni ma maruwar e t’ufeg rok Jehovah u wan’dad. Faanra ke buch e re n’ey, ma susun e dab da paged talin ni Jehovah e ‘ir Got nib th’abi tolang ma ba sorok, ma gad be par ni bay madgun u wan’dad. Ir e ba yul’yul’ . . . ko piin nib t’uf rorad ma yad be fol ko thin rok.’​—Neh. 1:5.

14. Faanra ud lemnaged fare biyul, ma uw rogon nra ayuwegdad ni nge dabki maruwar e t’ufeg rok Jehovah u wan’dad? (Roma 5:8) (Kum guy fare kahol ni kenggin e “Mu Kol Ayuw Ndabi ‘Bannagem’ e Denen.”)

¹⁴ Riyul’ ni bay yu ngiyal’ nrayog ni ngaud lemnaged ndariy rogon ni nge t’ufegdad Jehovah. Machane re n’ey ndariy rogon ni nge t’ufegdad e aram e n’en be dag nrib manigil e t’ufeg ni ma dag ngodad. Der t’ufegdad Jehovah ni bochan ban’en ni kad rin’ed. Yugu aram rogon, ma ke pi’ fare biyul ya nge yag ni n’ag fan e denen rodad ni bochan e gad ba t’uf rok. (1 John 4:10) Ku dab mu pagtalin ni yib Jesus ni nge thapeg e pi tadenen, ma gathi girdi’ ni yad ba flont. (Mu beeg e Roma 5:8.) Dariy bagadad nrayog ni nge rin’ gubin ban’en nib fel’ rogon, maku der lemnag Jehovah ni ngad rin’ed e re n’ey. Nap’an nra tamilang u wan’dad ni denen ni ke af ngodad e rayog ni nge k’aringdad ni nge maruwar e t’ufeg rok Jehovah u wan’dad, ma aram e n’en nrayog ni nge k’aringdad ni ngad dugliyed u wan’dad ndab da paged e re n’ey ni nge buch.​—Rom. 7:​24, 25.

MMEL’EG NI NGAM PAR NI GAB YUL’YUL’

15-16. Faan gad ra par ni gad ba yul’yul’ ngak Jehovah, ma mang e rayog ni nge pagan’dad ngay, ma mang fan? (2 Samuel 22:26)

¹⁵ Baadag Jehovah ni ngad mel’eged e n’en nib fel’ ni ngad rin’ed ni aram e ngad ‘pared ni gad ba yul’yul’ ngak.’ (Deut. 30:​19, 20) Faan gad ra rin’ e re n’ey, ma rayog ni nge pagan’dad ngay nra par nib yul’yul’ ngodad. (Mu beeg e 2 Samuel 22:26.) N’umngin nap’an ni gad ra par ni gad ba yul’yul’ ngak Jehovah, ma rayog ni nge pagan’dad ngay nra ayuwegdad ni ngad athamgilgad u fithik’ urngin mit e magawon nra yib ngodad.

¹⁶ Kad weliyed faram ni boor fan ni ngad pared ni gad ba mudugil u nap’an ni gad be mada’nag e magawon. Gad manang ni gad ba t’uf rok Jehovah ma ra ayuwegdad. Aram e n’en be yog e Bible. Faanra bay ba ngiyal’ ni ke maruwar e t’ufeg rok Jehovah u wan’dad, ma rayog ni ngad lemnaged e n’en gad manang u murung’agen e t’ufeg rok ko bin ngad lemnaged e n’en gad be lemnag e ngiyal’ nem. Ere nge pagan’dad ko n’en be yog e Bible ni aram e t’ufeg rok Jehovah e ra par ni manemus.