Rogon ni Ngan Yarmiy Reb e M’agpa’ ni Yira Pining e Sorok Riy Ngak Jehovah

1-2. Uw rogon e rofen ni m’agpa’ rok l’agruw ni’ u wan’ Jehovah?

KAM m’agew be’ e mabgol, fa? Faanra arrogon, ma rib gel e felfelan’ ni ga be tay! Dabisiy ni boor ban’en ni ga be rin’ ni ga be yarmiy rogon e pi n’en yira rin’ u nap’an e rofen ni m’agpa’ rom. Baadag Jehovah ni ngam felfelan’ ko rofen ni m’agpa’a rom, mi gimew par e en mabgol rom u taabang ni gimew felfelan’.​—Prov. 5:18; Tang rok Sol. 3:11.

² Bay rogon ni ngan pining e sorok ngak Jehovah u nap’an e m’agpa’ rom. Mang fan nrayog ni nga dogned e re n’ey? Ma uw rogon nrayog ni ngam rin’ e re n’ey? Yugu aram rogon nre article ney e fan ngak e piin yad be fal’eg rogorad ni fan ko rofen ni m’agpa’ rorad, machane pi kenggin e motochiyel ni yira weliy riy e rayog ni nge ayuwegdad ni gad gubin ni ngad pininged e sorok ngak Jehovah ko ngiyal’ ni kad uned ko m’agpa’ rok l’agruw ni’, ara nap’an ni ke yog l’agruw ni’ ngodad ni ngad pied boch e fonow nra ayuwegrow ko tin yow be lemnag ni ngar rin’ew.

MANG FAN NI NGAN PINING E SOROK NGAK JEHOVAH?

3. Mang e susun ni nge lemnag l’agruw ni’ u nap’an ni yow be yarmiy rogon boch ban’en ni fan ko rofen ni m’agpa’ rorow, ma mang fan?

³ L’agruw ni’ ni yow be yarmiy rogon boch ban’en ni fan ko rofen ni m’agpa’ rorow e susun ni ngar rin’ew e pi n’ey nrogon nib puluw ko pi kenggin e motochiyel rok Jehovah ni bay u lan e Thin rok. Mang fan? Ya Jehovah e Ir e Sunmiy e mabgol. Ir e yarmiy rogon e bin som’on e m’agpa’ nni tay, ni aram e m’agpa’ rok Adam nge Efa. (Gen. 1:28; 2:24) Ere piin yad be yarmiy rogon e m’agpa’ rorad e susun ni nge m’on u wan’rad rogon laniyan’ Got.

4. Mang reb i fan ni nge pining l’agruw ni’ e sorok ngak Jehovah ko rofen ni m’agpa’ rorow?

⁴ Bay reb i fan nib ga’ fan ni ngam lemnag rogon laniyan’ Jehovah ko rofen ni m’agpa’ rom, ni aram e: Ir e Chitamam ni bay u tharmiy nge bin th’abi fel’ e Fager rom. (Heb. 12:9) Dariy e maruwar riy ni ga baadag ni nge ulul ni nga i par nib fel’ e tha’ u thilmew. Dabum ni nge buch ban’en ko rofen nem ara yugu reb e rran nra kirebnag laniyan’ e Fager rom. (Ps. 25:14) Nap’an ni ga ra lemnag urngin ban’en ni ke rin’ Jehovah ni fan ngom nge tin bayi rin’ ni fan ngom boch nga m’on, ma gathi ga be lemnag ni bay fan ni ngan pining e sorok ngak ko rofen ni m’agpa’ rom?​—Ps. 116:12.

UW ROGON NRAYOG NI NGAM PININGEW E SOROK NGAK JEHOVAH?

5. Uw rogon nrayog ni nge ayuweg e Bible l’agruw ni’ ni ngar yarmiyew rogon e m’agpa’ rorow?

⁵ Der pi’ e Bible boch e motochiyel ni murung’agen rogon e m’agpa’ ni nga i tay e piin Kristiano ara boch e madnom ni yira tay nga tomuren. Ere rayog ni nge yarmiy l’agruw ni’ rogon e m’agpa’ rorow ni be yan u rogon e par rorow, nge yalen ko nam rorow, nge n’en yow baadag. Tin riyul’ e Kristiano e ku yad ma tayfan e motochiyel ko am. (Matt. 22:21) Yugu aram rogon, ma faan yira yarmiy reb e m’agpa’ nrogon nib puluw ko pi kenggin e motochiyel u Bible ma ra n’uf Jehovah me felfelan’nag. Ere mang boch i kenggin e motochiyel nsusun e ngam lemnagew?

6. Mang nib ga’ fan ni nge fol l’agruw ni’ ko motochiyel ko am ni fan ko mabgol?

⁶ Mu folgow ko motochiyel ko am. (Rom. 13:​1, 2) Yooren e nam e bay boch e motochiyel nib t’uf ni nge fol l’agruw ni’ riy u m’on ni ngar mabgolgow. Ere susun e nge guy l’agruw ni’ rogon ni ngar nangew rogon e motochiyel ko gin yow ma par riy. Faanra dawori tamilang u wan’mew rogon ni ngam rin’ew e re n’ey, ma rayog ni ngam ningew e ayuw ko piin piilal.b

7. Uw rogon nsusun e nge yan i aw reb e m’agpa’?

⁷ Mu guyew rogon ni nge yan i aw nga rogon ni kam lemnagew. (1 Kor. 10:​31, 32) Mu guyew rogon ni nge m’ug wom’engin gelngin Got nib thothup ko rofen ni m’agpa’ romew, ko bin nge m’ug riy rarogon e lem ko re fayleng ney. (Gal. 5:​19-26) Fare pumoon e ba milfan ngak ni nge guy rogon ni nge yan i aw fare m’agpa’ ni aram ba ngiyal’ ni yira felfelan’ riy min pining e sorok ngak Got nrogon nib puluw ko kenggin e motochiyel u Bible ni fan ko en ir lolugen e tabinaw. Ere mang e rayog ni nge ayuweg? Yira pi’ reb e welthin nib puluw e thin riy ko Bible ni fan ko rofen ni m’agpa’ u fithik’ e t’ufeg nge tayfan, ma aram e ra ayuweg e piin yad ra rung’ag ni nge ga’ fan u wan’rad rogon e yaram rok Got ni fan ko piin mabgol. Gubin e piin yad ra motoyil ko re welthin nem nra yib angin ngorad ni bochan e ra ayuwegrad ni ngar nanged feni ga’ fan e re madnom nem. Aram fan ni yooren e Kristiano ni yad ma mel’eg ni ngan tay e m’agpa’ rorad u reb e Tagil’ e Liyor ni faanra rayog. Faanra gimew baadag ni ngan tay e m’agpa’ romew u reb e Tagil’ e Liyor, ma susun e ngam yolgow ko piin piilal u m’on riy.

8. Faan yira tay reb e abich u tomuren e m’agpa’ romew, ma uw rogon ni nge yan i aw ni yira pining e sorok riy ngak Jehovah? (Roma 13:13)

⁸ Mu beeg e Roma 13:13. Faanra kam mel’egew ni ngan tay reb e abich u tomuren e m’agpa’ romew, ma uw rogon nrayog ni ngam yarmiyew u reb e kanawo’ ndabi m’ug riy rarogon e lem ko re fayleng ney? Fare bugithin ni Greek ni kan pilyeg ni “madnom ni bay e muun rrum riy” e be yip’ fan e abich ni yima tay nib muun ngay e unum nib pag rogon nge musik ni yibe tay nge n’uw e nep’. (Mu guy e study note ko “wild parties” ni bay ko Roma 13:13.) Faanra kam mel’egew ni yira pi’ e alkul ni ngan unum, mi gimew gonopiy rogon ni yira rin’ e re n’ey ya nge dabi unum be’ nib pag rogon.c Faanra yira chubeg e musik, mi gimew guy rogon ndabi pag ga’ngin lingan ya nge yag ni sabethin e piin kar bad ko re madnom nem nib fel’ rogon. Kum fal’egew i mel’eg e re miti musik ni yira motoyil ngay nge thin riy ya nge dabi magawonnag e nangan’ ku be’.

9. Mang e susun ndabi pagtalin l’agruw ni’ u murung’agen e pi n’en yira weliy ara yira rin’ u nap’an e abich ni yira tay u tomuren e m’agpa’ rorow?

⁹ Bay boch e girdi’ ni yad ra yog buchuuw e thin, ara bay e sasing ni yira yaliy, ara video ni yira pag, ara boch ban’en ni yira rin’ ni fan ko abich u tomuren e m’agpa’ romew, fa? Pi n’ey ni yima rin’ e ku ma n’igin ni nge par e binem e rran ndabin pagtalin. Machane ngam guyew rogon ni pi n’en yira rin’ riy e ra pi’ e athamgil nga lanin’uy. (Fil. 4:8) Mu fithem ni nge lungum: ‘Ra m’ug riy ni yibe tayfan yugu boch e girdi’, fa? Ra m’ug riy ni yibe tayfan e yaram ni fan ko mabgol, fa?’ Ma bin th’abi ga’ fan riy e ngam fithem ni nge lungum: ‘Yira pining e sorok riy ngak Jehovah, fa?’ Yugu aram rogon nde kireb ni nga nog boch ban’en ni ngan minmin ngay, machane dab nog ban’en nde puluw ni nga nog ni bod ni ngan weliy boch ban’en ni bay rogon ko par ko pumoon nge ppin. (Efe. 5:3) Mu guyew rogon ni nge tamilang e re n’ey u wan’ chon e tabinaw nge pi fager romew ni yad ra yog boch e thin e rofen nem, ma ngkur ted fan e n’en kam dugliyew.

10. Mang fan nsusun e nge nang l’agruw ni’ e gin ngar musgow riy u nap’an ni yow be yarmiy rogon ni ngan tay e m’agpa’ rorow? (1 John 2:​15-17)

¹⁰ Ngam nangew e gin ngam musgow riy. (Mu beeg e 1 John 2:​15-17.) Ma felfelan’ Jehovah u nap’an nra guy e pi tapigpig rok rogon ni ngar pininged e sorok ngak ko bin yad e ngan pining e sorok ngorad. Ere pi Kristiano ni yad manang e gin ngar musgad riy e yad ma siyeg ni ngar n’aged boor e salpiy rorad nga boch ban’en, maku darur ‘ufgad’ ko pi n’en bay rorad. Faan gimew ra guy rogon ndabi pag rogon e pi n’en yira rin’ u nap’an e madnom ko m’agpa’ romew, ma uw rogon nra yib angin ngomew? Am lemnag e n’en ni buch rok Mike nreb e walag ni pumoon u Norway. I yog ni gaar: “Dag awgow nga tabon e malfith, me yag ni nggu ululgow ko pioneer ni gamow be tay. Yugu aram rogon nde pag rogon e pi n’en nrin’ u nap’an e madnom ko m’agpa’ romow, machane yan i aw nrib manigil ma dag pagew talin e pi n’en nib fel’ ni un rin’ riy.” Tabitha nreb e walag nib pin nu India e yog ni gaar: “De magafan’mow nib pag rogon. Buchuuw ban’en nug yarmiyew rogon ni ngan rin’, maku de yoor ban’en nde taareban’uy ngay ni bochan e gguyew rogon ndabi pag rogon e pi n’en ngan rin’ u nap’an e m’agpa’ romow.”

11. Uw rogon ni nge dag l’agruw ni’ ni ngar mabgolgow ni yow manang e gin ngar musgow riy u rogon e munmad ni ngar tew nge rogon ni ngar fal’egew yaarow? (Kum guy e sasing.)

¹¹ Kam mel’egew e mad ni ngam chuwgow ngay, fa? Dariy e maruwar riy ni gimew baadag ni ngam chuwgow ko mad nib manigil. Kakrom e mus ngak be’ nib pin nge be’ nib pumoon ni ngar mabgolgow ni yow ma guy rogon ni ngar fal’egew yaarow ya nge yan i aw nib manigil. (Isa. 61:10) Mad ni gimew ra chuw ngay ko rofen ni m’agpa’ romew e ba thil ko mad ni gimew ma chuw ngay ko tin ka bay e rran, machane susun e nge yalen rogon e munmad romew. (1 Tim. 2:9) Dab mu pagew rogon e munmad romew ara rogon ni ngam fal’egew yaamew ni nge yan i par ni aram e n’en th’abi ga’ fan ko rofen ni m’agpa’ romew.​—1 Pet. 3:​3, 4.

12. Mang fan nsusun e nge siyeg l’agruw ni’ boch e yalen nde puluw ko Bible ni yima rin’ u nap’an e m’agpa’ ko gin yow ma par riy?

¹² Mu siyegew boch e yalen nde puluw ko Bible. (Rev. 18:4) Ke kirebnag e m’ag rok Satan rogon e m’agpa’ ni yima tay e ngiyal’ ney ni bochan e ba ga’ ni pi n’en yima rin’ riy e bay rogon ko liyor ko got ni googsur, nge pig, nge boch ban’en ni ke mich u wan’uy nde riyul’. Be ginangdad Jehovah ni ngad paloggad ko pi n’ey ni yima rin’ nib alit. (2 Kor. 6:​14-17) Faanra bay boch e yalen nde puluw ko gin gimew ma par riy nde mich u wan’mew ko ba m’agan’ Jehovah ngay fa danga’, mi gimew gay boch ban’en u murung’agen nge boch i kenggin e motochiyel u Bible nrayog ni nge ayuwegmew ni ngam dugliyew e n’en nib fel’ ni ngam unegew ko tin ngan rin’ u nap’an e m’agpa’ romew.

13. Uw rogon nrayog ni nge folwok l’agruw ni’ u rogon ni ma lemnag Jehovah e tow’ath ni yima pi’?

¹³ Ka bang ko yalen ko gin gimew ma par riy ni ngan pi’ e tow’ath ngak l’agruw ni’ ni ngar mabgolgow, fa? Rayog ni tow’ath nra pi’ e piin kar bad ni ngar uned ko m’agpa’ rok l’agruw ni’ e be yan u rogon urngin e salpiy ni bay rorad. Bin riyul’ riy e piin Kristiano e yima pi’ e athamgil nga lanin’rad ni ngaur pied ban’en, ma yad ba felfelan’ ngay ni ngar rin’ed e re n’ey. (Prov. 11:25; Acts 20:35) Machane dubdad ni ngad k’aringed e piin kar bad ni ngar uned ko m’agpa’ rodad ni ngar lemnaged nthingar ra pied ban’en, ara da k’aringed yad ni nge kireban’rad ni bochan e dabiyog ni ngar pied reb e tow’ath nib tolang puluwon. Gad ma folwok rok Jehovah ni aram e demtrug ban’en nra pi’ be’ ngodad mab ga’ fan u wan’dad, ni bochan e ke yib u gum’irchaen ma gathi bochan e ban’en nthingari rin’.​—2 Kor. 9:7.

NGAN SIYEG MIN GEL NGA BOCH E MAGAWON

14. Mang boch e magawon nrayog ni nge mada’nag l’agruw ni’ ni ngar mabgolgow?

¹⁴ Rayog ni ngam mada’nagew e magawon u nap’an ni gimew be guy rogon ni ngam yarmiyew e n’en ngan rin’ ko rofen ni m’agpa’ romew ni yira pining e sorok riy ngak Jehovah. Bod nsana rayog nib mo’maw’ ni ngam lichnagew e tin ngan rin’ riy ya nge dabi pag rogon. Charlie ni be’ nu Solomon Islands e yog ni gaar: “Rib mo’maw’ ni nggu dugliyew e piin nggu piningew ni ngar uned ko abich u tomuren e m’agpa’ romow. Boor e fager romow, ma rogon ko yalen romow e susun ni gubin e girdi’ ni ngan pining ko re abich ney!” Tabitha ni faan kan weliy murung’agen e yog ni gaar: “Ba ga’ ni boor e girdi’ ni yima piningrad ko abich u tomuren e m’agpa’ ko gin gu ma par riy. Ba n’uw nap’an nug guyew rogon ni nge m’agan’ e gallabthir romow ko n’en kug dugliyew ni aram e kemus nsogonap’an 100 e girdi’ ni nggu piningew ko abich u tomuren e m’agpa’ romow.” Sarah ni be’ nu India e yog ni gaar: “Bay boch e girdi’ nib ga’ fan u wan’rad urngin e salpiy ni bay rorad nge n’en be lemnag e girdi’ u murung’agrad. Pi fak walagen e chitamag e boor e salpiy nra fanayed ko m’agpa’ rorad, ere kug lemnag nib t’uf ni ngkug yoornag e salpiy ni nggu fanay ko m’agpa’ rog.” Ere mang e rayog ni nge ayuwegmew ni ngam gelgow ko pi magawon ney nge ku yugu boch e magawon?

15. Mang nib ga’ fan e meybil u nap’an ni yibe yarmiy rogon e pi n’en ni ngan rin’ ko rofen ni m’agpa’?

¹⁵ Mu yibilayew murung’agen e pi n’en gimew be yarmiy ni ngan rin’ ko rofen ni m’agpa’ romew. Rayog ni ngam weliyew ngak Jehovah u daken e meybil urngin e magawon ni gimew be mada’nag ara rogon lanin’mew. (Fil. 4:​6, 7 nge study note ko “in everything”) Rayog ni ngam weniggow ngak ni nge ayuwegmew ni ngam dugliyew boch ban’en nib fel’ rogon, mi gimew par nib gapas lanin’mew u nap’an ni be magafan’mew nib pag rogon, mi gimew par ndab mu rusgow ni faanra ba thil e n’en kam dugliyew ni ngan rin’ ko n’en be lemnag yugu boch e girdi’. (1 Pet. 5:7) Ra gel e pagan’ romew ngak Jehovah u nap’an ni gimew ra guy rogon ni be fulweg taban e meybil romew. Tabitha ni faan kan weliy murung’agen e yog ni gaar: “I magafan’mow e en kug dugliyew ni nggu mabgolgow nri de taareban’mow ara taareban’mad chon e tabinaw romow nga boch ban’en. Ere gubin yay ni gamow ra puruy’nag rogon ni ngan yarmiy e pi n’en ngan rin’ ko rofen ni m’agpa’ romow, ma som’on e gamow ma meybil. Rug guyew rogon ni be ayuwegmow Jehovah, ma bay e gapas u thilmow nge chon e tabinaw romow.”

16-17. Faanra fel’ e numon u thiliy, ma uw rogon nra yib angin u nap’an ni yibe yarmiy rogon e pi n’en ngan rin’ u nap’an e rofen ni m’agpa’?

¹⁶ Nge fel’ rogon e numon u thiliy mu kun gonopiy rogon ni ngan weliy boch ban’en. (Prov. 15:22) Boor ban’en nib t’uf ni ngam dugliyew u murung’agen e m’agpa’ romew. Re n’ey e ba muun ngay ni ngam dugliyew e rofen ni ngam m’agpa’gow, nge urngin e salpiy ni ngam fanayew ni fan ko re madnom nem, nge piin ngar uned ngay, nge ku boch ban’en. U m’on ni ngam dugliyew e n’en ngam rin’ew, mi gimew weliy u taabang e pi n’en bay nrayog ni ngam rin’ew nge pi kenggin e motochiyel ni bay rogon ngay nge pi fonow ni ke pi’ boch e walag ngomew ni kar ilalgad ko tirok Got ban’en. Nap’an ni gimew be weliy romew e tin gimew baadag ni ngan rin’ ngu nap’an ni gimew be weliy ngak chon e tabinaw romew, ma ngam dagew e sumunguy, nge gonop, me bigimew me m’agan’ ngay ni nge thilyeg rogon laniyan’. Faanra bay boch i girdien e tabinaw romew nib chugur ngomew ni bod e gallabthir romew ni bay boch ban’en ni yad baadag ni ngan rin’ ni gimew be lemnag nib puluw ni ngan rin’, mi gimew guy rogon ni ngam rin’ew e pi n’em. Ya ku ireray reb e madnom ni yira tay ni kub ga’ fan u wan’rad. Faanra bay boch ban’en ni yad baadag ni ngan rin’ ndabiyog, mi gimew gonopiy rogon ni ngam weliyew ngorad. (Kol. 4:6) Mu tamilangnagew ngak chon e tabinaw romew ni n’en ni gimew be nameg e ngam tew reb e madnom ni yira pining e sorok riy ngak Jehovah.

¹⁷ Ba ga’ nrayog ni nge mo’maw’ ni ngam weliyew ko gallabthir romew e n’en gimew baadag ni ngan rin’ ni faanra darur uned ko tin riyul’, machane rayog ni ngam rin’ew e re n’ey. Santhosh nreb e walag ni pumoon u India e yog ni gaar: “Baadag chon e tabinaw romow ni nggu unegew boch ban’en ni ma rin’ e teliw ni Hindu ko m’agpa’ romow. Ere ba n’uw nap’an nug weliyew e n’en kug dugliyew ngorad. Tin baaray ban’en ni yad baadag ni ngan rin’ ni gamow be lemnag ndabi kirebnag laniyan’ Jehovah e m’agan’mow ngay ni ngan rin’. Bod nug thilyegew e re miti ggan ni yira kay u nap’an e abich ni yira tay u tomuren e m’agpa’ romow nge mang ggan ni yad baadag e ngan pi’ u nap’an e re abich nem, mu kug dugliyew ndabin tang ara ni churu’ ni bochan e de mecham ngorad.”

18. Mang e rayog ni nge ayuwegmew ni ngam guyew rogon ni nge yan gubin ban’en ni yira rin’ ko rofen ni m’agpa’ romew nib fel’ rogon? (1 Korinth 14:40) (Kum guy e sasing.)

¹⁸ Mu fal’egew i yarmiy e pi n’en yira rin’. Faan gimew ra yarmiy gubin ban’en nib fel’ rogon, ma aram e ra war e mochuch romew ko rofen ni m’agpa’ romew. (Mu beeg e 1 Korinth 14:40.) Wayne ni be’ nu Taiwan e yog ni gaar: “In e rran u m’on ko rofen ni m’agpa’ romow, ma gamad muulung e piin kar ognaged yad ni ngar pied e ayuw ngomow ko re madnom nem. Gu weliyed e n’en kug dugliyew ni ngan rin’ e rofen nem ma gamad yan u daken boch ban’en ni yira rin’ e rofen nem ya nge yag ni yan gubin ban’en nib fel’ rogon.” Mu athamgil u rogon nrayog rom ni ngam guy rogon ni ngan rin’ gubin ban’en nib tayim ya nge yag ni m’ug ni ga be tayfan e piin yad ra un ko re madnom nem.

19. Mang e rayog ni ngam rin’ew ya nge dabin rin’ boch ban’en u nap’an e abich ni yira tay u tomuren e m’agpa’ romew ndan mu lemnagew ni ngan rin’?

¹⁹ Faan gimew ra lemnag boch ban’en u m’on riy, ma boor e magawon nrayog ni ngam siyegew. (Prov. 22:3) Bod ni faanra gimew ma par u bang nib ga’ ni ma yib e girdi’ riy ra uned ko abich ni yima tay u tomuren e m’agpa’ ndawor ni piningrad, mi gimew lemnag e n’en nrayog ni ngam rin’ew ya nge dabi buch e re n’ey. Mu guyew rogon ni ngam tamilangnagew ngak e girdi’ romew ndar nanged e tin riyul’ e n’en yira rin’ nge rogon u wan’mew boch e yalen ni yima fol riy u nap’an e madnom ko m’agpa’. Rayog ni ngam dagew ngorad fare article ni kenggin e “What Happens at a Wedding of Jehovah’s Witnesses?” ni thin ni Meriken ni bay ko jw.org. Rayog ni nga mogew ngak reb e walag ni pumoon ni be pagan’mew ngak ni nge mang e en nra ‘gagiyegnag e re madnom nem,’ ya nge dabin rin’ boch ban’en u nap’an e abich ni yira tay u tomuren e m’agpa’ romew ndan mu lemnagew ni ngan rin’. (John 2:8) Faan gimew ra tamilangnag ngak e n’en kam dugliyew ni ngan rin’, ma aram e rayog ni nge guy rogon ni ngan tay e m’agpa’ romew u reb e kanawo’ ni yira pining e sorok riy ngak Got miki yan gubin ban’en riy ni bod rogon ni kam lemnagew ni ngan rin’.

20. Mang e susun ndabi pagtalin l’agruw ni’ u murung’agen e rofen ni m’agpa’ rorow?

²⁰ Sana rayog ni nge magafan’mew u nap’an ni gimew be lemnag urngin ban’en nib t’uf ni ngan rin’ u nap’an ni gimew be yarmiy rogon e pi n’en yira rin’ ko rofen ni m’agpa’ romew. Machane dab mu pagew talin ni m’agpa’ romew e kemus ni taareb e rran. Aram tabolngin e pigpig ni ngam tew ngak Jehovah u taabang. Ere mu athamgilgow u rogon nrayog romew ndabi pag rogon e pi n’en yira rin’ u nap’an e madnom ko m’agpa’ romew, mu kun pining e sorok riy ngak Got. Nge pagan’mew ngak Jehovah. Faanra pow’iymew, ma aram e gimew ra yarmiy rogon e m’agpa’ romew u reb e kanawo’ nnap’an e gimew ra sul ngam lemnagew boch nga m’on ma gimew ra felfelan’ ngay, ma dariy ban’en riy nram kolgow ngan’mew riy.​—Ps. 37:​3, 4.