Piin Pilibthir​—Ba Ga’ Famed u Lan e Ulung

Sana ku arrogom ni boor ban’en ndabkiyog ni ngam rin’ ni bochan e ga be pilibthir i yan. Rayog ni ngam lemnag boch ban’en nde puluw u rarogom ni bochan e bay boch ban’en ndabkiyog ni ngam rin’ e chiney, ni yugu aram rogon ni ke yoor e duw ni kam pigpig ngak Jehovah u fithik’ e yul’yul’. Bod nrayog ni ngaum taarebrogonnag e n’en ga be rin’ e chiney ko n’en um rin’ kafram. Faanra arrogon, ma mang e rayog ni ngam rin’ ya nge dab kum lem ni aray rogon?

N’EN BAADAG JEHOVAH NI NGAM RIN’

Mu fithem ni nge lungum, ‘Mang e baadag Jehovah ni nggu rin’?’ Rayog ni nge fal’eg fapi thin ni bay ko Deuteronomy 6:5 lanin’um ni be gaar: “Ngari t’uf romed Somol ni Got romed u polo’ i gum’ircha’med ngu polo’ i lanin’med, ngu polo’ i gelngimed.”

Be yog fare thin nu Bible ni baadag Jehovah ni ngam pigpig ngak u polo’ i gum’irchaem, ngu polo’ i lanin’um, ngu polo’ i gelngim. Re n’ey e rayog ni nge ayuwegem ni nge dab um taareb rogonnagem ngak yugu boch e girdi’, ara um taarebrogonnag e n’en nrayog ni ngaum rin’ e chiney ko n’en um rin’ kafram.

Am lemnag e re n’ey: Nap’an ni kab fel’ yangarem, ma mang e um pi’ ngak Jehovah? Yooren e girdi’ rok Jehovah e yad ra yog ni ur pied e tin th’abi fel’ rorad ngak. Rayog ni um pi’ e tin th’abi fel’ rom ngak Jehovah ni be yan u rogon e par rom e ngiyal’ nem. Mang e be yag ni ngam pi’ ngak Jehovah e chiney? Dabisiy ni ga be pi’ e tin th’abi fel’ rom ngak ni be yan u rogon e par rom e chiney ara tin be yag ni ngam rin’ e ngiyal’ ney. Faan ga ra lem ni aray rogon, ma rayog ni nge tamilang u wan’um ni taareb rogon e tin ga be pi’ ngak Jehovah e chiney ko kafram. Um pi’ e tin th’abi fel’ rom ngak kafram, maku arrogon e n’en ga be rin’ e chiney.

BA GA’ E AYUW NRAYOG NI NGAM PI’ NGAK YUGU BOCH E GIRDI’

Ku baaray ban’en nrayog ni ngam lemnag: Mu lemnag yugu boch e kanawo’ nrayog ni ngam ayuweg yugu boch e girdi’ riy ni bochan yangarem, ko bin kemus ni yigoo tin ndabkiyog ni ngam rin’ e ga be lemnag. Arrogon, chiney ni gur reb e Kristiano ni kam pilibthir e bay boch ban’en nrayog ni ngam rin’ nda i yag ni ngam rin’ u nap’an ni kab fel’ yangarem. Baaray ban’en nrayog ni ngam rin’:

Mu weliy e pi n’en ke buch rom ngak yugu boch e girdi’. Am lemnag e n’en ni yog e gali cha’ ni baaray ni kan yoloy nga lan e Bible:

David ni Pilung: “Chiney e kug pilibthir, ni gathi ku gub pagel, machane dawor gguy be’ nib fel’ ni gomanga ke pag Somol faanem, ara gguy pi fak ni yad be man ggan.”​—Ps. 37:25.

Joshua: “Chiney e ke taw ko ngiyal’ ni nggum’ riy. Gimed gubin nra bigimed ma manang u lan gum’irchaen ngu fithik’ i laniyan’ ni Somol ni Got romed e ke pi’ urngin e tin nib manigil ngomed ni micheg nra pi’. Urngin e tin ni micheg e goo ke rin’ nrogon; dariy reb ni pag.”​—Josh. 23:​14, BT.

Sana rayog ni ka mog boch ban’en ni aray rogon. David nge Joshua e ra bagayow ma be weliy e n’en ke buch rok. Bochan ni weliy e gal tapigpig rok Jehovah ney ni yow ba yul’yul’ e n’en kar guyew nge n’en kar rung’agew u lan boor e duw, ma aram fan ni thin ni ka rognew e rayog ni nge pagan’uy ngay mab ga’ fan.

Faanra ke yoor e duw ni kam pigpig ngak Jehovah, maku rayog ni ngam weliy murung’agen e n’en kam guy ni ke rin’ Jehovah ni fan ngom ara yugu boch e girdi’. Ka be yib ngan’um ba ngiyal’ ni kam guy rogon ni ke ayuweg Jehovah e pi tapigpig rok u reb e kanawo’ ni yugu ba thil, fa? Faanra arrogon, mag weliy murung’agen e re n’ey ngak yugu boch e girdi’! Re n’ey e rayog ni nge yib angin ngorad ni bod rogon ni yib angin ngom. Ere faanra um weliy murung’agen e pi n’en ni i buch rom ngak e pi walag, ma aram e rayog ni ngarim pi’ e athamgil nga lanin’rad.​—Rom. 1:​11, 12.

Ku reb e kanawo’ nrayog ni ngam pi’ e athamgil riy nga laniyan’ yugu boch e girdi’ e aram e ngam man mu un ko muulung u Tagil’ e Liyor ko ngiyal’ nrayog rom. Aram e gin nrayog ni ngam pi’ e athamgil riy nga laniyan’ e pi walag, mu kun pi’ e athamgil nga lanin’um. Connie ni faan kan weliy murung’agen e yog ni gaar: “Muulung ni gu ma un ngay e ma ayuwegeg ni nge dabi mulan’ug. Dabiyog ni nge kireban’ug ni bochan gelngin e t’ufeg ni yima dag ngog u nap’an nug ra yan nga Tagil’ e Liyor rodad. Gu ma guy rogon ni nggu dag nib ga’ fan yugu boch e girdi’ u wan’ug ni aram e gu ma pi’ nochi tow’ath ngorad. Ma gu ma guy rogon ni nggu ulul ni nggu un ko pi walag i rin’ boch ban’en ni bay rogon ko tirok Got ban’en.”

BA GA’ FAN U WAN’ JEHOVAH E PIGPIG NI GA BE TAY U FITHIK’ E YUL’YUL’

Boor e girdi’ ni bay murung’agrad u Bible ni bay boch ban’en ndabkiyog ni ngar rin’ed ni bochan rarogon e par rorad, machane ku ma t’ufegrad Jehovah. Am lemnag Simeon ni be’ nu Israel ni ke pilibthir ni immoy ko ngiyal’ nni gargeleg Jesus riy. Nap’an nra yan nga tempel ma dabisiy ni ma guy boch e pumoon ni yad bbitir ngak ni yad be rin’ boch e maruwel nib ga’ fan. Ma ir e uw rogon? Sana rayog ni lemnag ndaki ga’ fan u wan’ Jehovah ni bochan e dabkiyog ni nge pigpig ngak ni bod rogon ni be rin’ fapi pumoon ni yad bbitir ngak. Machane gathi aram rogon ni be lemnag Jehovah Simeon. Ya rogon u wan’ e “ir be’ nib fel’ ni bay madgun Got u wan’,” miki tow’athnag Simeon ni aram e yag ni nge guy Jesus ni kab madway. Ki fanay Jehovah ni nge yiiynag ni Jesus e ir e ra mang fare Messiah! (Luke 2:​25-35) Ba tamilang ni gathi pi n’en nrayog ni nge rin’ Simeon u gelngin e i lemnag Jehovah, ya i sap nga gelngin e michan’ rok “ma bay fare Kan ni Thothup [“gelngin Got nib thothup,” NW] rok.”

Ku arrogom nrayog ni nge pagan’um ngay nib ga’ fan u wan’ Jehovah e pigpig ni ga be tay ngak u fithik’ e yul’yul’ ni yugu aram rogon ni bay boch ban’en ndabkiyog ni ngam rin’. Ba m’agan’ Jehovah ko maligach ni kam pi’ ‘nrogon e tin nrayog ni ngam pi’, ma gathi tin ndariy rom.’​—2 Kor. 8:12.

Ere mu lemnag e tin nrayog ni ngam rin’. Bod nrayog ni ngam lemnag yugu boch e kanawo’ nrayog ni ngam machib riy, ni mus ni faanra dabi n’uw nap’an ni ngam machib. Ku rayog ni ngam callnag e pi walag ara mu yoloy bang e card ngam pi’ ngorad ni ngam pi’ e athamgil nga lanin’rad. Faanra um rin’ boch ban’en u fithik’ e t’ufeg ni yugu aram rogon nib achig, ma rib ga’ angin nra yib ngak e pi walag nib ga’ ni faanra gur be’ ni ke n’uw nap’an ni kam pigpig ngak Jehovah.

Bay boch e girdi’ ndabkiyog ni ngar rin’ed boch ban’en u gelngirad. Mu tay fanam i yan ko n’en ni buch rok be’ u East Africa ni bay murung’agen ko fare kahol ni kenggin e “Kan Fanay e Bible ni Ngan Ayuweg e Yafos rok Be’.”

Dab mu pagtalin ni michan’ rom nge rogon ni ga be par ni gab yul’yul’ e rayog ni nge pi’ e athamgil nga laniyan’ yugu boch e girdi’. Kam dag e kanawo’ nrayog ni ngan folwok riy u rogon ni ngaun athamgil, ma rayog ni nge pagan’um ngay ni ‘Got e gathi ba laniyan’. Gathi bayi pag talin e maruwel ni kam ngongliy, ara rogon nib t’uf rom ni kam dag ni bochan e ayuw ni kam pi’ ma ka ga be pi’ ngak e piin ni gimed ni girdien Kristus.’​—Heb. 6:10.

MU PAR NI GAB PASIG NI GA BE RIN’ E TIN NRAYOG ROM

Kan pirieg ni boor e pumoon nge ppin ni kar pilibthirgad ni yad ma ayuweg yugu boch e girdi’ ni yad ma par nib fel’ fithik’ i dowrad, mab tamilangan’rad, mab n’uw nap’an e yafos rorad.

Bin riyul’ riy e yugu aram rogon ni ga be rin’ boch ban’en ni fan ngak yugu boch e girdi’, ma dabi chuw urngin e magawon ni ga be mada’nag ni bochan e ga be pilibthir i yan. Kemus ni yigoo Gil’ilungun Got e rayog ni nge rin’ e re n’ey ni aram e nge chuweg e denen ni ke af ngodad ni aram e n’en ma k’aringey ni ngaun pilibthir mi nim’.​—Rom. 5:12.

Yugu aram rogon ma pigpig ni ga be tay ngak Jehovah e ba muun ngay ni ngam ayuweg yugu boch e girdi’ ni ngar nanged murung’agen, ma re n’ey e ra gelnag e l’agan’ rom, ma sana ku ra yib angin nga fithik’ i dowam. Gimed e piin pilibthir e ngam nanged nib ga’ fan u wan’ Jehovah e tin ni gimed be rin’ ni fan ngak, ma kub ga’ fan u wan’ e pi walag u lan e ulung rogon ni kam pared nib gel e michan’ romed.