ÌWÉ KÌÍNÍ PÉTÉRÙ

1 Pétérù, àpọ́sítélì+ Jésù Kristi, sí ẹ̀yin olùgbé fún ìgbà díẹ̀* tí ẹ wà káàkiri Pọ́ńtù, Gálátíà, Kapadókíà,+ Éṣíà àti Bítíníà, sí ẹ̀yin àyànfẹ́ 2 gẹ́gẹ́ bí ohun tí Ọlọ́run tó jẹ́ Baba ti mọ̀ tẹ́lẹ̀,+ tí ẹ̀mí sọ di mímọ́,+ kí ẹ lè ṣègbọràn, kí a sì wọ́n ẹ̀jẹ̀ Jésù Kristi sí yín lára:+

Kí inú rere àìlẹ́tọ̀ọ́sí àti àlàáfíà yín máa pọ̀ sí i.

3 Ẹ yin Ọlọ́run àti Baba Olúwa wa Jésù Kristi, torí nínú àánú rẹ̀ tó pọ̀, ó fún wa ní ìbí tuntun+ ká lè ní ìrètí tó wà láàyè+ nípasẹ̀ àjíǹde Jésù Kristi kúrò nínú ikú,+ 4 ká lè ní ogún tí kì í bà jẹ́, tí kò lábààwọ́n, tí kò sì lè ṣá.+ A tọ́jú rẹ̀ sí ọ̀run de ẹ̀yin+ 5 tí agbára Ọlọ́run dáàbò bò nípasẹ̀ ìgbàgbọ́ fún ìgbàlà kan tí a ṣe tán láti ṣí payá ní àkókò ìkẹyìn. 6 Ẹ̀ ń yọ̀ gidigidi nítorí èyí, bó tiẹ̀ jẹ́ pé fún ìgbà díẹ̀, ó lè pọn dandan kí oríṣiríṣi àdánwò kó ìdààmú bá yín,+ 7 kí ìgbàgbọ́ yín tí a dán wò+ ní ti bó ṣe jẹ́ ojúlówó tó, èyí tó níye lórí gidigidi ju wúrà tó máa ń ṣègbé láìka pé a fi iná dá an wò* sí, lè jẹ́ orísun ìyìn àti ògo àti ọlá nígbà ìfihàn Jésù Kristi.+ 8 Bí ẹ ò tiẹ̀ rí i rí, ẹ nífẹ̀ẹ́ rẹ̀. Bí ẹ ò tiẹ̀ rí i báyìí, síbẹ̀ ẹ ní ìgbàgbọ́ nínú rẹ̀, inú yín sì ń dùn gan-an, ayọ̀ yín kọjá àfẹnusọ, ó sì jẹ́ ológo, 9 bí ọwọ́ yín ṣe ń tẹ èrè ìgbàgbọ́ yín, ìgbàlà yín.*+

10 Ní ti ìgbàlà yìí, àwọn wòlíì tí wọ́n sọ tẹ́lẹ̀ nípa inú rere àìlẹ́tọ̀ọ́sí tó jẹ́ tiyín, fara balẹ̀ wádìí, wọ́n sì fẹ̀sọ̀ wá a.+ 11 Wọn ò yéé wádìí àkókò náà gan-an tàbí ìgbà tí ẹ̀mí tó wà nínú wọn ń tọ́ka sí nípa Kristi,+ bó ṣe jẹ́rìí ṣáájú nípa àwọn ìyà tí Kristi máa jẹ+ àti ògo tó máa tẹ̀ lé e. 12 A ṣí i payá fún wọn pé wọ́n ń ṣe òjíṣẹ́, kì í ṣe fún ara wọn, àmọ́ fún yín, nípa àwọn ohun tí àwọn tó kéde ìhìn rere fún yín ti wá sọ fún yín nípasẹ̀ ẹ̀mí mímọ́ tó wá láti ọ̀run.+ Ó wu àwọn áńgẹ́lì gan-an pé kí wọ́n wo àwọn nǹkan yìí fínnífínní.

13 Nítorí náà, ẹ múra ọkàn yín sílẹ̀ láti ṣiṣẹ́;+ ẹ máa ronú bó ṣe tọ́ nígbà gbogbo;  + ẹ máa retí inú rere àìlẹ́tọ̀ọ́sí tí a máa fún yín nígbà ìfihàn Jésù Kristi. 14 Bí ọmọ tó ń ṣègbọràn, ẹ má ṣe jẹ́ kí àwọn ohun tí ẹ nífẹ̀ẹ́ sí tẹ́lẹ̀ torí àìmọ̀kan yín tún máa darí yín,* 15 àmọ́ bíi ti Ẹni Mímọ́ tó pè yín, kí ẹ̀yin náà di mímọ́ nínú gbogbo ìwà yín,+ 16 nítorí a ti kọ ọ́ pé: “Ẹ gbọ́dọ̀ jẹ́ mímọ́, torí èmi jẹ́ mímọ́.”+

17 Tí ẹ bá sì ń ké pe Baba tó ń fi iṣẹ́ ọwọ́ ẹnì kọ̀ọ̀kan ṣèdájọ́ láìṣe ojúsàájú,+ ẹ máa fi ìbẹ̀rù hùwà+ ní àkókò tí ẹ fi jẹ́ olùgbé fún ìgbà díẹ̀.* 18 Torí ẹ mọ̀ pé kì í ṣe àwọn ohun tó lè bà jẹ́, bíi fàdákà tàbí wúrà la fi tú yín sílẹ̀,*+ kúrò nínú ìgbésí ayé asán tí àwọn baba ńlá yín fi lé yín lọ́wọ́.* 19 Ẹ̀jẹ̀ iyebíye ni,+ bí ẹ̀jẹ̀ ọ̀dọ́ àgùntàn tí kò ní àbààwọ́n, tí kò sì ní èérí kankan,+ ìyẹn ẹ̀jẹ̀ Kristi.+ 20 Lóòótọ́, a ti mọ̀ ọ́n tẹ́lẹ̀, ká tó fi ìpìlẹ̀ ayé lélẹ̀,+ àmọ́ nítorí yín, a wá fi hàn kedere ní ìparí àwọn àkókò.+ 21 Nípasẹ̀ rẹ̀ lẹ gba Ọlọ́run gbọ́,+ ẹni tó jí i dìde nínú ikú,+ tó sì fún un ní ògo,+ kí ìgbàgbọ́ àti ìrètí yín lè wà nínú Ọlọ́run.

22 Ní báyìí tí ẹ ti fi ìgbọràn yín sí òtítọ́ wẹ ara yín* mọ́, tí èyí sì mú kí ẹ ní ìfẹ́ ará láìsí ẹ̀tàn,+ kí ẹ ní ìfẹ́ tó jinlẹ̀ sí ara yín látọkàn wá.+ 23 Torí a ti fún yín ní ìbí tuntun,+ kì í ṣe nípasẹ̀ irúgbìn* tó lè bà jẹ́, àmọ́ nípasẹ̀ irúgbìn tí kò lè bà jẹ́,+ nípasẹ̀ ọ̀rọ̀ Ọlọ́run alààyè, tó wà títí láé.+ 24 Torí “gbogbo ẹran ara* dà bíi koríko, gbogbo ògo rẹ̀ sì dà bí ìtànná àwọn ewéko; koríko máa ń gbẹ, òdòdó sì máa ń rẹ̀ dà nù, 25 àmọ́ ọ̀rọ̀* Jèhófà* wà títí láé.”+ “Ọ̀rọ̀”* yìí ni ìhìn rere tí a kéde rẹ̀ fún yín.+

2 Nítorí náà, ẹ jáwọ́ nínú gbogbo ìwà burúkú,+ ẹ̀tàn, àgàbàgebè àti owú, ẹ má sì sọ̀rọ̀ ẹnikẹ́ni láìdáa. 2 Bíi ti ìkókó,+ ẹ jẹ́ kí wàrà tí kò lábùlà* tó jẹ́ ti ọ̀rọ̀ náà máa wù yín gan-an, kí ẹ lè dàgbà dé ìgbàlà nípasẹ̀ rẹ̀,+ 3 tí ẹ bá ti tọ́ ọ wò* pé onínúure ni Olúwa.

4 Bí ẹ ṣe wá sọ́dọ̀ rẹ̀, ẹni tó jẹ́ òkúta ààyè tí àwọn èèyàn kọ̀ sílẹ̀,+ àmọ́ tó jẹ́ àyànfẹ́, tó sì ṣeyebíye lójú Ọlọ́run,+ 5 bí àwọn òkúta ààyè, à ń fi ẹ̀yin pẹ̀lú kọ́ ilé tẹ̀mí+ kí ẹ lè di ẹgbẹ́ àlùfáà mímọ́, kí ẹ lè máa rú àwọn ẹbọ ẹ̀mí+ tí Ọlọ́run tẹ́wọ́ gbà nípasẹ̀ Jésù Kristi.+ 6 Torí Ìwé Mímọ́ sọ pé: “Wò ó! Màá fi òkúta àyànfẹ́ kan lélẹ̀ ní Síónì, òkúta ìpìlẹ̀ igun ilé tó ṣeyebíye, kò sì sí ẹni tó ní ìgbàgbọ́ nínú rẹ̀ tí a máa já kulẹ̀.”*+

7 Nítorí náà, ẹ̀yin ló ṣe iyebíye fún, torí ẹ jẹ́ onígbàgbọ́; àmọ́ fún àwọn tí kò gbà gbọ́, “òkúta tí àwọn kọ́lékọ́lé kọ̀ sílẹ̀,+ òun ló wá di olórí òkúta igun ilé”*+ 8 àti “òkúta ìkọ̀sẹ̀ kan àti àpáta agbéniṣubú.”+ Wọ́n ń kọsẹ̀ torí wọn ò ṣègbọràn sí ọ̀rọ̀ náà. Ìdí tí a fi yàn wọ́n nìyí. 9 Àmọ́ ẹ̀yin ni “àwọn èèyàn tí Ọlọ́run yàn, ẹgbẹ́ àlùfáà aládé, orílẹ̀-èdè mímọ́,+ àwùjọ àwọn èèyàn tó jẹ́ ohun ìní pàtàkì,+ kí ẹ lè kéde káàkiri àwọn ọlá ńlá”*+ Ẹni tó pè yín jáde kúrò nínú òkùnkùn wá sínú ìmọ́lẹ̀ àgbàyanu rẹ̀.+ 10 Torí ẹ kì í ṣe àwùjọ èèyàn nígbà kan, àmọ́ ní báyìí ẹ ti di àwùjọ èèyàn Ọlọ́run;+ a kò ṣàánú yín nígbà kan, àmọ́ ní báyìí, a ti ṣàánú yín.+

11 Ẹ̀yin ará mi ọ̀wọ́n, mò ń gbà yín níyànjú, ẹ̀yin tí ẹ jẹ́ àjèjì àti olùgbé fún ìgbà díẹ̀*+ pé kí ẹ máa sá fún ìfẹ́kúfẹ̀ẹ́ ara+ tó ń bá yín* jà.+ 12 Ẹ jẹ́ oníwà rere láàárín àwọn orílẹ̀-èdè,+ kó lè jẹ́ pé tí wọ́n bá fẹ̀sùn ìwà ibi kàn yín, wọ́n á lè fojú ara wọn rí àwọn iṣẹ́ àtàtà yín,+ kí wọ́n sì torí ẹ̀ yin Ọlọ́run lógo lọ́jọ́ àbẹ̀wò rẹ̀.

13 Nítorí Olúwa, ẹ fi ara yín sábẹ́ gbogbo ohun tí èèyàn dá sílẹ̀,*+ ì báà jẹ́ ọba+ torí pé ó jẹ́ aláṣẹ 14 tàbí àwọn gómìnà tó rán níṣẹ́ pé kí wọ́n fìyà jẹ àwọn aṣebi, kí wọ́n sì yin àwọn tó ń ṣe rere.+ 15 Torí ìfẹ́ Ọlọ́run ni pé kí ẹ fi ìwà rere yín pa àwọn aláìnírònú tó ń fi àìmọ̀kan sọ̀rọ̀ lẹ́nu mọ́.*+ 16 Ẹ wà lómìnira,+ kí ẹ má sì fi òmìnira yín bojú* láti máa hùwà burúkú,+ àmọ́ kí ẹ lò ó bí ẹrú Ọlọ́run.+ 17 Ẹ máa bọlá fún onírúurú èèyàn,+ ẹ máa nífẹ̀ẹ́ gbogbo àwọn ará,*+ ẹ máa bẹ̀rù Ọlọ́run,+ ẹ bọlá fún ọba.+

18 Kí àwọn ìránṣẹ́ máa tẹrí ba fún àwọn ọ̀gá wọn pẹ̀lú ìbẹ̀rù tó yẹ,+ kì í ṣe fún àwọn tó jẹ́ ẹni rere, tó sì ń gba tẹni rò nìkan, àmọ́ fún àwọn tó ṣòroó tẹ́ lọ́rùn pẹ̀lú. 19 Torí ó dáa tí ẹnì kan bá fara da ìnira,* tó sì jìyà tí kò tọ́ sí i nítorí kó lè ní ẹ̀rí ọkàn rere lójú Ọlọ́run.+ 20 Àbí àǹfààní wo ló wà níbẹ̀ tí wọ́n bá lù yín torí pé ẹ dẹ́ṣẹ̀ tí ẹ sì fara dà á?+ Àmọ́ tí ẹ bá fara da ìyà torí pé ẹ̀ ń ṣe rere, èyí dáa lójú Ọlọ́run.+

21 Kódà, ọ̀nà yìí la pè yín sí, torí Kristi pàápàá jìyà torí yín,+ ó fi àpẹẹrẹ lélẹ̀ fún yín kí ẹ lè máa tọ ipasẹ̀ rẹ̀ pẹ́kípẹ́kí.+ 22 Kò dá ẹ̀ṣẹ̀ kankan,+ kò sì sí ẹ̀tàn ní ẹnu rẹ̀.+ 23 Nígbà tí wọ́n sọ̀rọ̀ àbùkù sí i,*+ kò sọ̀rọ̀ àbùkù sí wọn* pa dà.+ Nígbà tó ń jìyà,+ kò bẹ̀rẹ̀ sí í halẹ̀, àmọ́ ó fi ara rẹ̀ sí ìkáwọ́ Ẹni tó ń dájọ́+ òdodo. 24 Ó fi ara rẹ̀ ru àwọn ẹ̀ṣẹ̀ wa+ lórí òpó igi,*+ ká lè di òkú sí ẹ̀ṣẹ̀,* ká sì wà láàyè sí òdodo. Ẹ “sì rí ìwòsàn nítorí àwọn ọgbẹ́ rẹ̀.”+ 25 Torí ẹ dà bí àwọn àgùntàn tó sọnù,+ àmọ́ ẹ ti wá pa dà sọ́dọ̀ olùṣọ́ àgùntàn+ àti alábòójútó ọkàn* yín.

3 Bákan náà, kí ẹ̀yin aya máa tẹrí ba fún àwọn ọkọ yín,+ kó lè jẹ́ pé, tí a bá rí ẹnikẹ́ni tí kò ṣègbọràn sí ọ̀rọ̀ náà, a máa lè jèrè wọn nípasẹ̀ ìwà àwọn aya wọn+ láìsọ ohunkóhun, 2 torí pé wọ́n fojú rí ìwà mímọ́ yín+ pẹ̀lú ọ̀wọ̀ tó jinlẹ̀. 3 Kí ẹwà yín má ṣe jẹ́ ti òde ara, bí irun dídì, wíwọ àwọn ohun ọ̀ṣọ́ wúrà+ tàbí wíwọ àwọn aṣọ olówó ńlá, 4 àmọ́ kó jẹ́ ti ẹni ìkọ̀kọ̀ ti ọkàn, kí ẹ fi ìwà jẹ́jẹ́ àti ìwà tútù ṣe ọ̀ṣọ́ tí kò lè bà jẹ́,+ èyí tó níye lórí gan-an lójú Ọlọ́run. 5 Torí pé báyìí ni àwọn obìnrin mímọ́ tó gbẹ́kẹ̀ lé Ọlọ́run nígbà àtijọ́ ṣe máa ń ṣe ara wọn lọ́ṣọ̀ọ́, tí wọ́n sì ń fi ara wọn sábẹ́ àwọn ọkọ wọn, 6 bí Sérà ṣe ń ṣègbọràn sí Ábúráhámù, tó ń pè é ní olúwa.+ Ẹ sì ti di ọmọ rẹ̀, tí ẹ bá ń ṣe ohun tó dáa, tí ẹ ò sì bẹ̀rù.+

7 Bákan náà, kí ẹ̀yin ọkọ máa fi òye bá wọn gbé.* Ẹ máa bọlá fún wọn+ bí ohun èlò ẹlẹgẹ́, tó jẹ́ abo, torí ẹ jọ jẹ́ ajogún+ ojúure ìyè tí a kò lẹ́tọ̀ọ́ sí, kí àdúrà yín má bàa ní ìdènà.

8 Lákòótán, kí èrò gbogbo yín ṣọ̀kan,*+ kí ẹ máa bára yín kẹ́dùn, kí ẹ máa ní ìfẹ́ ará, kí ẹ lójú àánú,+ kí ẹ sì jẹ́ onírẹ̀lẹ̀.+ 9 Ẹ má ṣe fi búburú san búburú,+ ẹ má sì fi ọ̀rọ̀ àbùkù san ọ̀rọ̀ àbùkù.+ Kàkà bẹ́ẹ̀, kí ẹ máa súre,+ torí ọ̀nà yìí la pè yín sí, kí ẹ lè jogún ìbùkún.

10 Torí “ẹnikẹ́ni tó bá fẹ́ràn ìgbésí ayé rẹ̀, tó sì fẹ́ ẹ̀mí gígùn gbọ́dọ̀ ṣọ́ ahọ́n rẹ̀ kó má bàa sọ ohun búburú,+ kó má sì fi ètè rẹ̀ ṣẹ̀tàn. 11 Kí ó jáwọ́ nínú ohun búburú,+ kó sì máa ṣe rere;+ kó máa wá àlàáfíà, kó sì máa lépa rẹ̀.+ 12 Nítorí ojú Jèhófà* wà lára àwọn olódodo, etí rẹ̀ sì ṣí sí ìrawọ́ ẹ̀bẹ̀ wọn;+ àmọ́ Jèhófà* kọjú ìjà sí àwọn tó ń ṣe ohun búburú.”+

13 Lóòótọ́, ta ló máa ṣe yín léṣe tí ẹ bá ń fi ìtara ṣe ohun rere?+ 14 Síbẹ̀, tí ẹ bá tiẹ̀ jìyà nítorí òdodo, inú yín máa dùn.+ Àmọ́ ẹ má bẹ̀rù ohun tí wọ́n ń bẹ̀rù,* ẹ má sì jáyà.+ 15 Ṣùgbọ́n ẹ gbà nínú ọkàn yín pé Kristi jẹ́ mímọ́, òun ni Olúwa, kí ẹ ṣe tán nígbà gbogbo láti gbèjà ara yín níwájú gbogbo ẹni tó bá béèrè ìdí tí ẹ fi ní ìrètí yìí, àmọ́ kí ẹ máa fi ìwà tútù+ àti ọ̀wọ̀ tó jinlẹ̀ ṣe bẹ́ẹ̀.+

16 Ẹ ní ẹ̀rí ọkàn rere,+ kó lè jẹ́ pé nínú ohunkóhun tí wọ́n bá ti sọ̀rọ̀ yín láìdáa, ìwà rere tí ẹ̀ ń hù torí ẹ jẹ́ ọmọlẹ́yìn Kristi+ máa jẹ́ kí ojú ti àwọn tó ń sọ̀rọ̀ yín láìdáa.+ 17 Tó bá wu Ọlọ́run pé kó fàyè gbà á, ó sàn kí ẹ jìyà torí pé ẹ̀ ń ṣe rere,+ ju kó jẹ́ torí pé ẹ̀ ń ṣe ohun tó burú.+ 18 Nítorí àwọn ẹ̀ṣẹ̀, Kristi kú lẹ́ẹ̀kan ṣoṣo láìtún kú mọ́ láé,+ ó jẹ́ olódodo tó kú nítorí àwọn aláìṣòdodo,+ kó lè mú yín wá sọ́dọ̀ Ọlọ́run.+ Wọ́n pa á nínú ẹran ara,+ àmọ́ a sọ ọ́ di ààyè nínú ẹ̀mí.+ 19 Bẹ́ẹ̀ ló ṣe lọ wàásù fún àwọn ẹ̀mí tó wà lẹ́wọ̀n,+ 20 àwọn tó ṣàìgbọràn nígbà tí Ọlọ́run ń fi sùúrù dúró* ní àwọn ọjọ́ Nóà,+ lákòókò tí wọ́n ń kan ọkọ̀ áàkì,+ tí a fi gba àwọn èèyàn díẹ̀ là nígbà ìkún omi, ìyẹn ọkàn* mẹ́jọ.+

21 Ìrìbọmi tó tún ń gbà yín là báyìí fara jọ èyí, (kì í ṣe pé ó ń wẹ èérí ara kúrò, àmọ́ ó ń bẹ̀bẹ̀ fún ẹ̀rí ọkàn rere lọ́dọ̀ Ọlọ́run),+ nípasẹ̀ àjíǹde Jésù Kristi. 22 Ó wà ní ọwọ́ ọ̀tún Ọlọ́run,+ torí ó lọ sí ọ̀run; a sì fi àwọn áńgẹ́lì, àwọn aláṣẹ àti àwọn agbára sí ìkáwọ́ rẹ̀.+

4 Níwọ̀n bí Kristi ti jìyà nínú ẹran ara,+ kí ẹ̀yin náà fi irú èrò kan náà gbára dì;* torí ẹni tó ti jìyà nínú ẹran ara ti jáwọ́ nínú ẹ̀ṣẹ̀,+ 2 kó lè fi àkókò tó ṣẹ́ kù fún un láti gbé nínú ẹran ara ṣe ìfẹ́ Ọlọ́run,+ kó má fi ṣe ìfẹ́kúfẹ̀ẹ́ èèyàn mọ́.+ 3 Torí àkókò tó ti kọjá tí ẹ fi ṣe ìfẹ́ àwọn orílẹ̀-èdè ti tó yín,+ nígbà tí ẹ̀ ń hu ìwà àìnítìjú,* tí ẹ̀ ń ṣe ìfẹ́kúfẹ̀ẹ́, tí ẹ̀ ń mu ọtí àmujù, ṣe àríyá aláriwo, ṣe ìdíje ọtí mímu àti àwọn ìbọ̀rìṣà tó jẹ́ ohun ìríra.+ 4 Ó ń yà wọ́n lẹ́nu pé ẹ ò tún bá wọn lọ́wọ́ sí irú ìwà pálapàla tó ń buni kù bẹ́ẹ̀ mọ́, torí náà, wọ́n ń sọ̀rọ̀ yín láìdáa.+ 5 Ṣùgbọ́n àwọn èèyàn yìí máa jíhìn fún ẹni tó ti ṣe tán láti ṣèdájọ́ àwọn tó wà láàyè àtàwọn tó ti kú.+ 6 Kódà, ìdí nìyẹn tí a fi kéde ìhìn rere fún àwọn òkú pẹ̀lú,+ kó lè jẹ́ pé bí a tiẹ̀ ṣèdájọ́ wọn nínú ẹran ara lójú àwọn èèyàn, wọ́n á lè wà láàyè nípa tẹ̀mí lójú Ọlọ́run.

7 Àmọ́ òpin ohun gbogbo ti sún mọ́lé. Torí náà, kí ẹ máa ronú jinlẹ̀,+ kí ẹ sì wà lójúfò,* kí ẹ lè máa gbàdúrà.+ 8 Ju gbogbo rẹ̀ lọ, ẹ ní ìfẹ́ tó jinlẹ̀ fún ara yín,+ torí ìfẹ́ máa ń bo ọ̀pọ̀lọpọ̀ ẹ̀ṣẹ̀ mọ́lẹ̀.+ 9 Ẹ máa ṣe ara yín lálejò láìráhùn.+ 10 Bí kálukú bá ṣe ń rí ẹ̀bùn gbà, ẹ máa fi ṣe ìránṣẹ́ fún ara yín bí ìríjú àtàtà tó ń rí inú rere àìlẹ́tọ̀ọ́sí Ọlọ́run gbà lóríṣiríṣi ọ̀nà.+ 11 Tí ẹnikẹ́ni bá ń sọ̀rọ̀, kó sọ ọ́ bíi pé ó ń kéde ọ̀rọ̀ Ọlọ́run; tí ẹnikẹ́ni bá ń ṣe ìránṣẹ́, kó ṣe é bí ẹni tó gbára lé okun tí Ọlọ́run ń fúnni;+ ká lè yin Ọlọ́run lógo nínú ohun gbogbo+ nípasẹ̀ Jésù Kristi. Ògo àti agbára jẹ́ tirẹ̀ títí láé àti láéláé. Àmín.

12 Ẹ̀yin ará mi ọ̀wọ́n, ẹ má ṣe jẹ́ kí àwọn àdánwò gbígbóná tó ń bá yín yà yín lẹ́nu,+ bíi pé nǹkan àjèjì ló ń ṣẹlẹ̀ sí yín. 13 Kàkà bẹ́ẹ̀, ẹ máa yọ̀+ torí ibi tí ẹ lè bá Kristi jìyà dé,+ kí ẹ̀yin pẹ̀lú lè yọ̀, kí ayọ̀ yín sì kún nígbà ìfihàn ògo rẹ̀.+ 14 Inú yín máa dùn tí wọ́n bá ń gàn yín* nítorí orúkọ Kristi,+ torí pé ẹ̀mí ògo, àní ẹ̀mí Ọlọ́run, ti bà lé yín.

15 Àmọ́ ká má ṣe rí ẹnikẹ́ni nínú yín tó ń jìyà torí pé ó jẹ́ apààyàn tàbí olè tàbí aṣebi tàbí torí ó ń tojú bọ ọ̀rọ̀ ọlọ́rọ̀.+ 16 Àmọ́ tí ẹnikẹ́ni bá jìyà torí pé ó jẹ́ Kristẹni, kó má ṣe tijú,+ àmọ́ kó túbọ̀ máa yin Ọlọ́run lógo bó ṣe ń jẹ́ orúkọ yìí. 17 Torí àkókò tí ìdájọ́ máa bẹ̀rẹ̀ ní ilé Ọlọ́run ti tó.+ Tó bá wá bẹ̀rẹ̀ lọ́dọ̀ wa,+ kí ló máa wá ṣẹlẹ̀ sí àwọn tí kò ṣègbọràn sí ìhìn rere Ọlọ́run?+ 18 “Tí kò bá ní rọrùn láti gba olódodo là, kí ló máa wá ṣẹlẹ̀ sí aláìṣèfẹ́ Ọlọ́run àti ẹlẹ́ṣẹ̀?”+ 19 Nítorí náà, kí àwọn tó ń jìyà lọ́nà tó bá ìfẹ́ Ọlọ́run mu máa fi ara* wọn lé Ẹlẹ́dàá tó jẹ́ olóòótọ́ lọ́wọ́,* kí wọ́n sì máa ṣe rere.+

5 Torí náà, bí èmi náà ti jẹ́ alàgbà, tí mo fojú ara mi rí àwọn ìyà tí Kristi jẹ, tí mo sì máa pín nínú ògo tí a máa ṣí payá,+ mò ń rọ àwọn alàgbà tó wà láàárín yín* pé: 2 Ẹ máa ṣe olùṣọ́ àgùntàn agbo Ọlọ́run+ tó wà níkàáwọ́ yín, kí ẹ máa ṣe alábòójútó,* kì í ṣe tipátipá àmọ́ kó jẹ́ tinútinú níwájú Ọlọ́run;  + kó má ṣe jẹ́ nítorí èrè tí kò tọ́,+ àmọ́ kí ẹ máa fi ìtara ṣe é látọkàn wá; 3 ẹ má ṣe jẹ ọ̀gá lórí àwọn tó jẹ́ ogún Ọlọ́run,+ àmọ́ kí ẹ jẹ́ àpẹẹrẹ fún agbo.+ 4 Tí a bá sì fi olórí olùṣọ́ àgùntàn+ hàn kedere, ẹ máa gba adé ògo tí kì í ṣá.+

5 Bákan náà, kí ẹ̀yin ọ̀dọ́kùnrin máa tẹrí ba fún àwọn àgbà ọkùnrin.*+ Àmọ́ kí gbogbo yín gbé ìrẹ̀lẹ̀* wọ̀* nínú àjọṣe yín, torí Ọlọ́run dojú ìjà kọ àwọn agbéraga, àmọ́ ó ń fi inú rere àìlẹ́tọ̀ọ́sí hàn sí àwọn onírẹ̀lẹ̀.+

6 Torí náà, ẹ rẹ ara yín sílẹ̀ lábẹ́ ọwọ́ agbára Ọlọ́run, kó lè gbé yín ga ní àkókò tó yẹ,+ 7 ẹ máa kó gbogbo àníyàn* yín lọ sọ́dọ̀ rẹ̀,+ torí ó ń bójú tó yín.*+ 8 Ẹ máa ronú bó ṣe tọ́, ẹ wà lójúfò!+ Èṣù tó jẹ́ ọ̀tá yín ń rìn káàkiri bíi kìnnìún tó ń ké ramúramù, ó ń wá bó ṣe máa pani jẹ.*+ 9 Àmọ́ ẹ kọjú ìjà sí i,+ kí ẹ dúró gbọn-in nínú ìgbàgbọ́, ẹ mọ̀ pé irú ìyà kan náà ló ń jẹ gbogbo àwọn ará yín* nínú ayé.+ 10 Àmọ́ lẹ́yìn tí ẹ bá ti jìyà fún ìgbà díẹ̀, Ọlọ́run onínúure àìlẹ́tọ̀ọ́sí gbogbo, ẹni tó pè yín sí ògo àìlópin rẹ̀+ ní ìṣọ̀kan pẹ̀lú Kristi, máa fúnra rẹ̀ parí ìdálẹ́kọ̀ọ́ yín. Ó máa fún yín lókun,+ ó máa sọ yín di alágbára,+ ó sì máa fẹsẹ̀ yín múlẹ̀ gbọn-in. 11 Kí agbára jẹ́ tirẹ̀ títí láé. Àmín.

12 Mo fi ọ̀rọ̀ díẹ̀ tí mo kọ yìí ránṣẹ́ sí yín nípasẹ̀ Sílífánù,*+ arákùnrin olóòótọ́, kí n lè fún yín níṣìírí, kí n sì lè jẹ́rìí taratara pé inú rere àìlẹ́tọ̀ọ́sí tòótọ́ látọ̀dọ̀ Ọlọ́run nìyí. Ẹ dúró gbọn-in nínú rẹ̀. 13 Obìnrin tó wà ní Bábílónì, tó jẹ́ àyànfẹ́ bíi tiyín ń kí yín. Máàkù+ ọmọ mi náà ń kí yín. 14 Ẹ fi ìfẹnukonu ìfẹ́ kí ara yín.

Kí gbogbo ẹ̀yin tí ẹ wà ní ìṣọ̀kan pẹ̀lú Kristi ní àlàáfíà.