18. Bó tilẹ̀ jẹ́ pé Hábákúkù ń retí ìṣòro, irú ẹ̀mí wo ló ní?

¹⁸ Ogun sábà máa ń fa ìṣòro, àní fáwọn tó bá ṣẹ́gun lẹ́yìn-ọ̀-rẹyìn pàápàá. Ọ̀wọ́n gógó oúnjẹ lè wà. A lè pàdánù dúkìá. Sànmánì lè lọ́ tín-ín-rín. Bí ìyẹn bá ṣẹlẹ̀ sí wa, kí la máa ṣe? Hábákúkù ní ìwà táa lè fara wé, nítorí ó wí pé: “Bí ó tilẹ̀ jẹ́ pé igi ọ̀pọ̀tọ́ lè má yọ ìtànná, àjàrà sì lè má mú èso jáde; iṣẹ́ igi ólífì lè yọrí sí ìkùnà ní ti tòótọ́, àwọn ilẹ̀ onípele títẹ́jú sì lè má mú oúnjẹ wá ní ti tòótọ́; a lè ya agbo ẹran nípa kúrò nínú ọgbà ẹran ní ti tòótọ́, ọ̀wọ́ ẹran sì lè má sí nínú àwọn gbàgede; Síbẹ̀, ní tèmi, dájúdájú, èmi yóò máa yọ ayọ̀ ńláǹlà nínú Jèhófà; èmi yóò kún fún ìdùnnú nínú Ọlọ́run ìgbàlà mi.” (Hábákúkù 3:17, 18) Lọ́nà tó bọ́gbọ́n mu, Hábákúkù ń retí ìṣòro, kódà ó ń retí ìyàn pàápàá. Síbẹ̀, kò sígbà kan tí kò ní ìdùnnú nínú Jèhófà, ọ̀dọ̀ ẹni tí ìgbàlà rẹ̀ ti wá.

20. Bí ìṣòro ìgbà díẹ̀ bá tilẹ̀ wà, kí ló yẹ ká pinnu láti ṣe?

²⁰ Ìṣòro ìgbà díẹ̀ yòówù táa bá dojú kọ, ẹ máà jẹ́ ká sọ ìgbàgbọ́ nù nínú agbára Jèhófà tí ń gbani là. Ọ̀pọ̀ nínú àwọn arákùnrin àti arábìnrin wa ní Áfíríkà, ní Ìlà Oòrùn Yúróòpù, àti ní àwọn ibòmíràn dojú kọ àwọn ìṣòro tó lékenkà, àmọ́, wọ́n ń báa nìṣó láti máa ‘yọ ayọ̀ ńlá nínú Jèhófà.’ Gẹ́gẹ́ bí tiwọn, ẹ má ṣe jẹ́ kí àwa náà jáwọ́ nínú ṣíṣe ohun kan náà tí wọ́n ń ṣe. Ẹ jẹ́ ká rántí pé, Jèhófà Olúwa Ọba Aláṣẹ ní Orísun “ìmí” wa. (Hábákúkù 3:19) Kò ní já wa kulẹ̀ láé. Ó dájú pé Amágẹ́dónì yóò dé, ó sì dájú pé ayé tuntun tí Ọlọ́run ṣèlérí yóò tẹ̀ lé e. (2 Pétérù 3:13) Nígbà náà ni “ilẹ̀ ayé yóò kún fún mímọ ògo Jèhófà bí omi ti bo òkun.” (Hábákúkù 2:14) Títí di àkókò àgbàyanu yẹn, ẹ jẹ́ ká tẹ̀ lé àpẹẹrẹ Hábákúkù. Ní gbogbo ìgbà, ẹ jẹ́ ká máa ‘yọ ayọ̀ ńláǹlà nínú Jèhófà, ká sì máa kún fún ìdùnnú nínú Ọlọ́run ìgbàlà wa.’