Ǹjẹ́ o ti rò ó rí pé: ‘Kí ló máa ń ṣẹlẹ̀ lẹ́yìn ikú? Ṣé àwọn èèyàn wa tó ti kú ń jìyà níbì kan? Ṣé a tún lè pa dà rí wọn? Kí ló máa jẹ́ kó dá wa lójú pé a lè rí wọn?’ Ó máa dáa ká mọ ohun tí Bíbélì sọ lórí kókó yìí. Lákọ̀ọ́kọ́, ẹ jẹ́ ká wo ohun tí Bíbélì fi ikú wé. Lẹ́yìn náà, a máa jíròrò ìrètí tí Bíbélì Ọ̀rọ̀ Ọlọ́run sọ pé ó wà fún àwọn tó ti kú.

Ipò wo làwọn òkú wà?

OHUN TÍ BÍBÉLÌ SỌ: “Nítorí àwọn alààyè mọ̀ pé àwọn yóò kú; ṣùgbọ́n ní ti àwọn òkú, wọn kò mọ nǹkan kan rárá, wọn kò sì ní owó ọ̀yà mọ́, nítorí pé a ti gbàgbé ìrántí wọn. Gbogbo ohun tí ọwọ́ rẹ bá rí láti ṣe, fi agbára rẹ ṣe é, nítorí pé kò sí iṣẹ́ tàbí ìhùmọ̀ tàbí ìmọ̀ tàbí ọgbọ́n ní Ṣìọ́ọ̀lù [tàbí Sàréè], ibi tí ìwọ ń lọ.”a​—Oníwàásù 9:​5, 10.

Ṣìọ́ọ̀lù ìyẹn Sàréè ni ibi tí gbogbo èèyàn ń lọ lẹ́yìn ikú; ó sì ń ṣàpẹẹrẹ ipò tí èèyàn kò ti mọ nǹkan kan mọ́, téèyàn ò sì lè ṣe ohunkóhun. Kí ni ohun tí Jóòbù ọkùnrin olóòótọ́ náà rò nípa Ṣìọ́ọ̀lù? Ọjọ́ kan ṣoṣo ni Jóòbù pàdánù àwọn ọmọ rẹ̀ àti gbogbo ohun tó ní, ni eéwo bá tún so sí gbogbo ara rẹ̀ látorí dé àtẹ́lẹsẹ̀. Ó wá bẹ Ọlọ́run pé: “Ì bá ṣe pé ìwọ yóò fi mí pa mọ́ sínú Ṣìọ́ọ̀lù [“ní ọ̀run àpáàdì,” Bíbélì Catholic Douay Version], pé ìwọ yóò pa mí mọ́.” (Jóòbù 1:​13-19; 2:7; 14:13) Ó dájú pé Jóòbù kò gbà pé Ṣìọ́ọ̀lù ìyẹn Sàréè jẹ́ ibi tí èèyàn ti ń joró nínú iná, níbi tí ìyà rẹ̀ ti máa pọ̀ sí i. Kàkà bẹ́ẹ̀, ó gbà pé ibẹ̀ ni òun ti máa rí ìtura.

Ọ̀nà míì wà tá a tún lè gbà mọ ohun tó ń ṣẹlẹ̀ nígbà téèyàn bá kú. A lè ṣàyẹ̀wò ohun tí Bíbélì sọ nípa àwọn mẹ́jọ tí wọ́n jíǹde.​—Wo àpótí náà “Àjíǹde Mẹ́jọ Tí Bíbélì Mẹ́nu Kàn.”

Kò sí ọ̀kan nínú àwọn mẹ́jọ yìí tó sọ bóyá òun lọ gbádùn tàbí pé òun joró nígbà tí òun kú. Tó bá jẹ́ pé wọ́n ṣe bẹ́ẹ̀, ó dájú pé wọ́n á sọ bí ọ̀hún ṣe rí fún àwọn míì. Tí wọ́n bá sì sọ ọ́, ǹjẹ́ irú àkọsílẹ̀ bẹ́ẹ̀ kò ní sí nínú Bíbélì fún wa? Àmọ́, kò sí irú nǹkan bẹ́ẹ̀ nínú Bíbélì. Àwọn mẹ́jẹ̀ẹ̀jọ kò sọ nǹkan kan nípa ọ̀rọ̀ yìí. Kí nìdí? Ìdí ni pé wọn kò mọ nǹkan kan nígbà tí wọ́n kú, àfi bí ẹni tó sun oorun àsùnwọra. Kódà, Bíbélì sábà máa ń fi ikú wé oorun. Bí àpẹẹrẹ, Bíbélì sọ pé Dáfídì àti Sítéfánù “sùn nínú ikú.”​—Ìṣe 7:60; 13:36.

Tọ́rọ̀ bá rí bẹ́ẹ̀, ǹjẹ́ ìrètí kankan wà fún àwọn tó ti kú? Ṣé wọ́n lè jí lójú oorun yìí?

Ṣé àwọn òkú lè jíǹde?

OHUN TÍ BÍBÉLÌ SỌ: “Wákàtí náà ń bọ̀, nínú èyí tí gbogbo àwọn tí wọ́n wà nínú ibojì ìrántí yóò gbọ́ ohùn rẹ̀, wọn yóò sì jáde wá.”​—Jòhánù 5:​28, 29.

Jésù sọ tẹ́lẹ̀ pé Sàréè máa ṣófo lábẹ́ Ìjọba òun lọ́jọ́ iwájú. Fernando tá a sọ̀rọ̀ rẹ̀ ní àpilẹ̀kọ tó ṣáájú sọ pé: “Ẹnu yà mí nígbà àkọ́kọ́ tí mo ka Jòhánù 5:​28, 29, ẹsẹ Bíbélì yìí jẹ́ kí n ní ìrètí, ó sì jẹ́ kí n mọ̀ pé ọ̀la ń bọ̀ wá dáa.”

Láyé ìgbàanì, ọkùnrin olóòótọ́ náà Jóòbù ní ìrètí pé Ọlọ́run máa jí òun dìde tí òun bá kú. Jóòbù béèrè pé: ‘Bí ènìyàn bá kú, ó ha tún lè wà láàyè bí?’ Òun fúnra rẹ̀ wá fi ìdánilójú dáhùn pé: “Jálẹ̀ gbogbo ọjọ́ òpò tí mo ní láti ṣe lápàpàǹdodo [nínú Sàréè] ni èmi yóò fi dúró, títí ìtura mi yóò fi dé. Ìwọ yóò pè, èmi fúnra mi yóò sì dá ọ lóhùn.”​—Jóòbù 14:​14, 15.

Ọ̀rọ̀ àjíǹde kì í ṣe nǹkan tuntun sí Màtá arábìnrin Lásárù. Nígbà tí Lásárù kú, Jésù sọ fún un pé: “Arákùnrin rẹ yóò dìde.” Màtá dáhùn pé: “Mo mọ̀ pé yóò dìde nínú àjíǹde ní ọjọ́ ìkẹyìn.” Jésù wá sọ fún un pé: “Èmi ni àjíǹde àti ìyè. Ẹni tí ó bá ń lo ìgbàgbọ́ nínú mi, bí ó tilẹ̀ kú, yóò yè.” (Jòhánù 11:​23-25) Lẹ́yìn náà, Jésù jí Lásárù dìde. Ìtàn yìí jẹ́ ká mọ ohun tó ń bọ̀ wá ṣẹlẹ̀ lọ́jọ́ iwájú. Fojú inú wo bó ṣe máa rí nígbà tí Jésù bá jí ọ̀pọ̀ àwọn tó ti kú dìde!

Ṣé àwọn kan máa jíǹde sí ọ̀run?

OHUN TÍ BÍBÉLÌ SỌ: Bíbélì jẹ́ ká mọ̀ pé àjíǹde Jésù yàtọ̀ sí tàwọn mẹ́jọ yòókù tó wà nínú Bíbélì. Àwọn mẹ́jọ yìí jíǹde pa dà sáyé. Àmọ́ ní ti àjíǹde Jésù, Bíbélì sọ pé: “Jésù Kristi . . . wà ní ọwọ́ ọ̀tún Ọlọ́run, nítorí tí ó bá ọ̀nà rẹ̀ lọ sí ọ̀run.” (1 Pétérù 3:​21, 22) Ṣé Jésù nìkan ló máa jíǹde sí ọ̀run? Ṣáájú kí Jésù tó kú, ó sọ fún àwọn àpọ́sítélì rẹ̀ pé: “Bí mo bá bá ọ̀nà mi lọ, tí mo sì pèsè ibì kan sílẹ̀ fún yín, èmi tún ń bọ̀ wá, èmi yóò sì gbà yín sí ilé sọ́dọ̀ ara mi, pé níbi tí mo bá wà kí ẹ̀yin pẹ̀lú lè wà níbẹ̀.”​—Jòhánù 14:3.

Kristi lọ sí ọ̀run láti lọ pèsè àyè sílẹ̀ fún díẹ̀ lára àwọn ọmọlẹ́yìn rẹ̀ tó ń bọ̀. Iye àwọn tó máa jíǹde sí ọ̀run jẹ́ ọ̀kẹ́ méje ó lé ẹgbàajì [144,000]. (Ìṣípayá 14:​1, 3) Ṣùgbọ́n, kí ni àwọn ọmọlẹ́yìn Jésù yìí fẹ́ máa ṣe lọ́run?

Iṣẹ́ ńlá ni wọ́n fẹ́ lọ ṣe! Bíbélì sọ pé: “Aláyọ̀ àti mímọ́ ni ẹnikẹ́ni tí ó ní ipa nínú àjíǹde èkíní; ikú kejì kò ní àṣẹ kankan lórí àwọn wọ̀nyí, ṣùgbọ́n wọn yóò jẹ́ àlùfáà Ọlọ́run àti ti Kristi, wọn yóò sì ṣàkóso gẹ́gẹ́ bí ọba pẹ̀lú rẹ̀ fún ẹgbẹ̀rún ọdún náà.” (Ìṣípayá 20:6) Àwọn tó máa jíǹde sí ọ̀run máa jẹ́ ọba àti àlùfáà pẹ̀lú Kristi, wọ́n sì máa ṣàkóso ayé.

Àwọn wo ló máa jíǹde lẹ́yìn náà?

OHUN TÍ BÍBÉLÌ SỌ: Àpọ́sítélì Pọ́ọ̀lù sọ nínú Bíbélì pé: “Mo sì ní ìrètí sọ́dọ̀ Ọlọ́run, ìrètí tí àwọn ọkùnrin yìí pẹ̀lú ní, pé àjíǹde àwọn olódodo àti àwọn aláìṣòdodo yóò wà.”​—Ìṣe 24:15.

Àwọn wo ló máa wà lára “àwọn olódodo” tí Pọ́ọ̀lù mẹ́nu kàn? Ẹ jẹ́ ká wo àpẹẹrẹ ẹnì kan. Nígbà tó ku díẹ̀ kí Dáníẹ́lì ọkùnrin olóòótọ́ kú, áńgẹ́lì Jèhófà sọ fún un pé: “Ìwọ yóò sì sinmi, ṣùgbọ́n ìwọ yóò dìde fún ìpín rẹ ní òpin àwọn ọjọ́.” (Dáníẹ́lì 12:13) Ibo ni Dáníẹ́lì máa jíǹde sí? Bíbélì sọ pé: “Àwọn olódodo ni yóò ni ilẹ̀ ayé, wọn yóò sì máa gbé títí láé lórí rẹ̀.” (Sáàmù 37:29) Jésù tún sọ tẹ́lẹ̀ pé: “Aláyọ̀ ni àwọn onínú tútù, níwọ̀n bí wọn yóò ti jogún ilẹ̀ ayé.” (Mátíù 5:⁠5) Dáníẹ́lì àtàwọn olóòótọ́ míì lọ́kùnrin àti lóbìnrin máa jíǹde sórí ilẹ̀ ayé, wọ́n á sì máa gbébẹ̀ títí láé.

Àwọn wo ló máa wà lára “àwọn aláìṣòdodo” tí Pọ́ọ̀lù mẹ́nu kàn? Àwọn ni ọ̀pọ̀ èèyàn tí wọn ò láǹfààní láti kẹ́kọ̀ọ́ Bíbélì kí wọ́n sì ṣe ìfẹ́ Ọlọ́run nígbà tí wọ́n wà láàyè. Lẹ́yìn tí wọ́n bá jíǹde, wọ́n á láǹfààní láti mọ Jèhófàa àti Jésù, kí wọ́n sì fi hàn pé ìfẹ́ Ọlọ́run làwọn máa sẹ. (Jòhánù 17:3) Àwọn tó bá yàn láti ṣe ìfẹ́ Ọlọ́run máa wà títí lọ kánrin lórí ilẹ̀ ayé, bí Jèhófà fúnra rẹ̀ ṣe wà títí láé.

Báwo ni nǹkan ṣe máa rí lórí ilẹ̀ ayé?

OHUN TÍ BÍBÉLÌ SỌ: Ọlọ́run “yóò sì nu omijé gbogbo nù kúrò ní ojú wọn, ikú kì yóò sì sí mọ́, bẹ́ẹ̀ ni kì yóò sí ọ̀fọ̀ tàbí igbe ẹkún tàbí ìrora mọ́.” (Ìṣípayá 21:4) “Wọn yóò kọ́ ilé, wọn yóò sì máa gbé inú wọn; dájúdájú, wọn yóò gbin ọgbà àjàrà, wọn yóò sì máa jẹ èso wọn.”​—Aísáyà 65:21.

Fojú inú wo bó ṣe máa dùn tó kó o máa gbé ní irú ipò yìí pẹ̀lú àwọn èèyàn rẹ tí wọ́n ti jíǹde! Àmọ́, ìbéèrè kan ni pé, Kí ló máa mú kó dá ọ lójú pé àjíǹde máa wáyé lóòótọ́?

Ṣé àsọdùn ni kéèyàn sọ pé àwọn òkú máa jíǹde? Àpọ́sítélì Pọ́ọ̀lù kò gbà pé àsọdùn ni ọ̀rọ̀ yẹn. Ọlọ́run mí sí i láti sọ pé: “Bí ó bá jẹ́ pé nínú ìgbésí ayé yìí nìkan ni a ti ní ìrètí nínú Kristi, àwa ni ó yẹ láti káàánú jù lọ nínú gbogbo ènìyàn. Àmọ́ ṣá o, nísinsìnyí a ti gbé Kristi dìde kúrò nínú òkú, àkọ́so nínú àwọn tí ó ti sùn nínú ikú.” (1 Kọ́ríńtì 15:​19, 20) Jésù fúnra rẹ̀ jíǹde, èyí sì mù kó dá Pọ́ọ̀lù lójú pé àjíǹde àwọn òkú máa wáyé.a (Ìṣe 17:31) Ìdí nìyẹn tí Pọ́ọ̀lù fi pe Jésù ní “àkọ́so”​—nítorí pé òun lẹni àkọ́kọ́ tó jíǹde sí ìyè ayérayé. Tí Jésù bá jẹ́ ẹni àkọ́kọ́ tó jíǹde sí ọ̀run, á jẹ́ pé àwọn míì ṣì wà tó máa jíǹde.

Ẹ̀rí míì tún wà tá á mú kó dáwa lójú pé àwọn òkú máa jíǹde. Ìyẹn ni pé Ọlọ́run òtítọ́ ni Jèhófà. Bíbélì sọ pé: “Ọlọ́run . . . kò lè purọ́.” (Títù 1:⁠2) Jèhófà kò purọ́ ri, kò sì le purọ́ láé. Ó tiẹ̀ tún fi hàn wá pé òun lágbára láti jí àwọn òkú dìde. Tó bá jẹ́ bẹ́ẹ̀, ṣé Ọlọ́run máa wá ṣe ìlérí pé òun máa jí àwọn òkú dìde, kó má sì mú ìlérí rẹ̀ ṣẹ? Ó dájú pé kò ní ṣe bẹ́ẹ̀!

Kí nìdí tí Jèhófà fi pinnu láti jí àwọn òkú dìde? Ó jẹ́ nítorí ìfẹ́ tó ní fún wa. Jóòbù béèrè pé: “Bí abarapá ènìyàn bá kú, ó ha tún lè wà láàyè bí?” Jóòbù fúnra rẹ̀ wá dáhùn pé: “Ìwọ yóò pè, èmi fúnra mi yóò sì dá ọ lóhùn. Ìwọ yóò ṣe àfẹ́rí iṣẹ́ ọwọ́ rẹ.” (Jóòbù 14:​14, 15) Ó dá Jóòbù lójú pé ó wu Bàbá wa ọ̀run láti jí òun dìde. Ṣé Ọlọ́run ti wá yí pa dà ni? Ọlọ́run sọ pé: “Èmi ni Jèhófà; èmi kò yí padà.” (Málákì 3:6) Ọlọ́run fẹ́ kí àwọn òkú jíǹde, kí wọ́n ní ìlera tó dáa, kí wọ́n sì láyọ̀. Bó ṣe máa wu òbí tó pàdánù ọmọ rẹ̀ láti rí ọmọ náà pa dà, bẹ́ẹ̀ náà ló ṣe ń wu Ọlọ́run láti jí àwọn tó ti kú dìde. Ìyàtọ̀ tó wà níbẹ̀ ni pé Ọlọ́run ní agbára láti ṣe ohunkóhun tó bá fẹ́.​—Sáàmù 135:6.

Jèhófà máa fún Jésù lágbára láti mú ayọ̀ wá fún gbogbo àwọn tó ti pàdánù èèyàn wọn. Báwo ni ọ̀rọ̀ àjíǹde ṣe rí lára Jésù? Ṣáájú kó tó jí Lásárù dìde, ó rí ìbànújẹ́ tó bá àwọn ẹbí àti ọ̀rẹ́ Lásárù, èyí sì mú kó sunkún. (Jòhánù 11:35) Nígbà kan, Jésù pàdé opó Náínì tó pàdánù ọmọkùnrin kan ṣoṣo tó bí. “Àánú rẹ̀ ṣe [Jésù], ó sì wí fún un pé: ‘Dẹ́kun sísunkún.’” Lẹ́yìn náà, ó jí ọmọ rẹ̀ dìde. (Lúùkù 7:13) Èyí fi hàn pé ó máa ń dun Jésù láti rí ìbànújẹ́ tí ikú ń fà. Ẹ ò rí i pé inú rẹ̀ máa dùn púpọ̀ nígbà tó bá sọ ìbànújẹ́ ọ̀pọ̀ èèyàn di ayọ̀!

Ǹjẹ́ o ti pàdánù èèyàn rẹ kan rí? Ó lè máa ṣe ẹ́ bíi pé o kò ní rí ẹni náà mọ́. Ṣùgbọ́n jẹ́ kó dá ẹ lójú pé Ọlọ́run máa lo Ọmọ rẹ̀ láti jí àwọn òkú dìde. Ó fẹ́ kó o rí àwọn èèyàn rẹ tó ti kú, kó o sì wà níbẹ̀ láti kí wọn nígbà tí wọ́n bá jíǹde. Fojú inú wo bí ìgbà yẹn ṣe máa dùn tó fún ìwọ àtàwọn èèyàn rẹ láìbẹ̀rù pé ikú lè mú ẹnikẹ́ni lọ!

Lionel, tá a sọ̀rọ̀ rẹ̀ ní àpilẹ̀kọ tó ṣáájú sọ pé: “Nígbà tó yá, mo kẹ́kọ̀ọ́ nípa àjíǹde. Mi ò kọ́kọ́ gbà gbọ́ pé àjíǹde máa wà, mo tiẹ̀ rò pé ẹni tó ń kọ́ mi fẹ́ ṣì mí lọ́nà ni. Àmọ́, ìgbà tí mo rí i nínú Bíbélì ni mo tó gbà pé òótọ́ ni. Ní báyìí, mò ń fojú sọ́nà láti rí bàbá ìyá mi lẹ́ẹ̀kan sí i.”

Ṣé wàá fẹ́ mọ̀ sí i? Inú àwa Ẹlẹ́rìí Jèhófà máa dùn láti fi hàn ẹ́ nínú Bíbélì rẹ ìdí tá a fi gbà pé àjíǹde máa wà lọ́jọ́ iwájú.b