Kí Ló Yẹ Kí N Ṣe Lẹ́yìn Tí Mo Bá Ṣèrìbọmi?​—Apá 2: Máa Ṣe Ohun Tó Tọ́ Lójú Ọlọ́run

Bíbélì sọ pé “Jèhófà kò ní fawọ́ ohun rere sẹ́yìn lọ́dọ̀ àwọn tó ń rìn nínú ìwà títọ́.” (Sáàmù 84:11) Kí ló túmọ̀ sí láti máa “rìn nínú ìwà títọ́”? Ohun tó túmọ̀ sí ni pé kó o máa ṣe ohun tó o ṣèlérí fún Jèhófà nígbà tó ya ara ẹ sí mímọ́ fún un. (Oníwàásù 5:​4, 5) Báwo lo ṣe lè máa rìn nínú ìwà títọ́ lẹ́yìn tó o ṣèrìbọmi?

Nínú àpilẹ̀kọ yìí

• Máa fara da ìṣòro

• Máa sá fún ìdẹwò

• Jẹ́ kí ìtara ẹ máa pọ̀ sí i

Máa fara da ìṣòro

Ẹsẹ Bíbélì: “A gbọ́dọ̀ ti inú ọ̀pọ̀ ìpọ́njú wọ Ìjọba Ọlọ́run.”​—Ìṣe 14:22.

Ohun tó túmọ̀ sí: Ó dájú pé gbogbo Kristẹni ló máa dojú kọ ìṣòro nígbèésí ayé. Lára àwọn ìṣòro tó o máa dojú kọ torí pé o jẹ́ Kristẹni ni àtakò tàbí kí wọ́n máa fi ẹ́ ṣe yẹ̀yẹ́. Yàtọ̀ síyẹn, àwọn ìṣòro míì wa tó ń bá gbogbo èèyàn fínra tí ò sì ní yọ ìwọ náà sílẹ̀. Lára àwọn ìṣòro yìí ni àìlówó lọ́wọ́, àìsàn àti bẹ́ẹ̀ bẹ́ẹ̀ lọ.

Ohun tó ṣeé ṣe kó ṣẹlẹ̀: Nǹkan á máa yí pa dà fún ẹ látìgbàdégbà, o sì lè bára ẹ nípò tí ò bára dé. Bíbélì sọ pé nǹkan burúkú lè ṣẹlẹ̀ sí ẹni kẹ́ni nígbàkigbà yálà ẹni náà jẹ́ Kristẹni tàbí bẹ́ẹ̀ kọ́.​—Oníwàásù 9:11.

Ohun tó o lè ṣe: Múra sílẹ̀ láti kojú ìṣòro torí pé kò sígbà tíṣòro ò ní dé. Máa wo ìṣòro ẹ bí ohun tó máa jẹ́ kó o túbọ̀ gbẹ́kè lé Jèhófà kí ìgbàgbọ́ ẹ sì lágbára sí i. (Jémíìsì 1:​2, 3) Bọ́jọ́ ṣe ń gorí ọjọ́, ìwọ náà á lè sọ bíi ti àpọ́sítélì Pọ́ọ̀lù pé: “Mo ní okun láti ṣe ohun gbogbo nípasẹ̀ ẹni tó ń fún mi lágbára.”​—Fílípì 4:13.

Àbá: Kẹ́kọ̀ọ́ lára Jósẹ́fù. O lè kà ìtàn ẹ̀ nínú Jẹ́nẹ́sísì orí 37 àti orí 39 sí 41. Bi ara ẹ pé: Àwọn ìṣòro tí ò rò tẹ́lẹ̀ wo ló dojú kọ, báwo ló sì ṣe borí wọn? Báwo ni Jèhófà ṣe rán Jósẹ́fù lọ́wọ́?

Tó o bá fẹ́ mọ̀ sí i

• Ka àpilẹ̀kọ yìí:

  “Kí Ni Mo Lè Ṣe Tí Àjálù Bá Dé Bá Mi?”

  “Báwo Ni Mo Ṣe Ní Ìforítì Tó?”

  “Ohun Tó O Lè Ṣe Tí Àyípadà Bá Ṣẹlẹ̀”

• Wa ìwé yìí jáde:

  “Ohun Tó O Lè Ṣe tí Òbí Ẹ Bá Ń Ṣàìsàn”

Máa sá fún ìdẹwò

Ẹsẹ Bíbélì: “Àdánwò máa ń dé bá kálukú nígbà tí ìfẹ́ ọkàn rẹ̀ bá fà á mọ́ra, tó sì tàn án jẹ.”​—Jémíìsì 1:14.

Ohun tó túmọ̀ sí: Gbogbo wa ni èròkerò máa ń wá sí lọ́kàn lẹ́ẹ̀kọ̀ọ̀kan, àmọ́ tá ò bá kíyè sára, wọ́n lè mú ká ṣe ohun tí kò tọ́.

Ohùn tó ṣeé ṣe kó ṣẹlẹ̀: Lẹ́yìn tó o bá ṣèrìbọmi, á ṣì máa ṣe ẹ́ bíi pé kó o tẹ́ “ìfẹ́kúfẹ̀ẹ́ ti ara” lọ́rùn. (2 Pétérù 2:18) Ó tiẹ̀ lè máa ṣe ẹ́ bíi pé kó o ní ìbálòpọ̀ kó o tó ṣègbéyàwó.

Ohun tó o lè ṣe: Tó o ba fẹ́ borí ìdẹwò, àsìkò yìí gan-an ló yẹ kó o múra sílẹ̀ kí ìdẹwò tó dé, kó o lè ṣe ìpinnu tó tọ́. Rántí ohun tí Jésù sọ pé: “Kò sí ẹni tó lè sin ọ̀gá méjì.” (Mátíù 6:24) Ìwọ lo máa pinnu ẹni tó o máa sìn. Àmọ́, ohun tó bọ́gbọ́n mu ni pé kó o yàn láti sin Jèhófà. Fi sọ́kàn pé, tó bá tiẹ̀ ń wù ẹ́ gan-an láti ṣe ohun tí kò dáa, o lè ṣèpinnu tó tọ́.​—Gálátíà 5:16.

Àbá: Mọ ibi tí agbára ẹ mọ àti ibi tó o kù sí. Yàtọ̀ síyẹn, àwọn ọ̀rẹ́ gidi ni kó o máa bá rìn. Yẹra fáwọn èèyàn ti ìwà wọn ò dáa, ibi tó léwu, àtàwọn ipò tó lè mú kó ṣòro láti ṣe ohun tó tọ́.​—Sáàmù 26:​4, 5.

Tó o bá fẹ́ mọ̀ sí i

• Ka àpilẹ̀kọ yìí:

  “Báwo Ni Mo Ṣe Lè Kọ Ìdẹwò?”

  “Báwo Ni Mo Ṣe Lè Gbọ́kàn Kúrò Lórí Ìbálòpọ̀?”

  “Kí Ni Mo Lè Ṣe Káwọn Ojúgbà Mi Má Bàa Ba Ìwà Mi Jẹ́?”

  “Ṣé Ojú Tí Jèhófà Fi Ń Wo Nǹkan Ni Ìwọ Náà Fi Ń Wò Ó?”

Jẹ́ kí ìtara ẹ máa pọ̀ sí i

Ẹsẹ Bíbélì: “Máa ṣiṣẹ́ kára . . . títí dé òpin, kí ẹ má bàa máa lọ́ra.”​—Hébérù 6:​11, 12.

Ohun tó túmọ̀ sí: Téèyàn ò bá gbájú mọ́ṣẹ́, ó lè bẹ̀rẹ̀ sí í fiṣẹ́ falẹ̀.

Ohùn tó ṣeé ṣe kó ṣẹlẹ̀: Ó dájú pé inú ẹ dùn gan-an lẹ́yìn tó o ṣèrìbọmi, ó sì nítara. Bákan náà, tọkàntọkàn lo nífẹ̀ẹ́ Jèhófà. Àmọ́, bọ́jọ́ ṣe ń gorí ọjọ́, ó lè má rọrùn fún ẹ láti máa pa gbogbo òfin Jèhófà mọ́, ìyẹn lè mú kí nǹkan tojú sú ẹ, kí ìtara ẹ sì dínkù.​—Gálátíà 5:7.

Ohun tó o lè ṣe: Máa ṣe ohun tó tọ́, kódà tí kò bá rọrùn. (1 Kọ́ríńtì 9:27) Máa kẹ́kọ̀ọ́ nípa Jèhófà bàbá rẹ ọ̀run kó o sì máa gbàdúrà sí i látìgbàdégbà, ìyẹn á jẹ́ kó o túbọ̀ sún mọ́ ọn. Bákan náà, àwọn tó ń fòótọ́ ọkàn sin Jèhófà ni kó o yàn lọ́rẹ̀ẹ́.

Àbá: Fi sọ́kàn pé Jèhófà nífẹ̀ẹ́ ẹ, ó sì ṣe tán láti ràn ẹ́ lọ́wọ́. Má ronú pé ó ń bínú sí ẹ láwọn ìgbà tí ìtara ẹ bá dín kù. Bíbélì sọ pé: “Ó ń fún ẹni tó ti rẹ̀ ní agbára, ó sì ń fún àwọn tí kò lókun ní ẹ̀kúnrẹ́rẹ́ okun.” (Àìsáyà 40:29) Ó dájú pé, Jèhófà máa ràn ẹ́ lọ́wọ́ kó o lè nítara pa dà.

Tó o bá fẹ́ mọ̀ sí i

• Ka àpilẹ̀kọ yìí:

  “Ẹ̀yin Ọ̀dọ́​​—Ẹ Máa Ṣiṣẹ́ Ìgbàlà Yín Yọrí”

  “Báwo Ni Mo Ṣe Lè Gbádùn Ìjọsìn Ọlọ́run?”

• Wo fídíò yìí:

  Ohun Táwọn Ojúgbà Rẹ Sọ​—Ìgbésí Ayé Tó Dára Jù Lọ

Kókó ibẹ̀ ni pé: Tó o bá ń rìn nínú ìwà títọ́, wà á múnú Jèhófà dùn. (Òwe 27:11) Inú Jèhófà máa dùn tó o bá pinnu láti sìn ín, ó sì máa tì ẹ́ lẹ́yìn kó o lè borí àwọn àtakò Sátánì.