Deutelonomi

4 “Buabu, benu basi Isaeli yuwanu mambu yidi mu kululonga ayi tumukinanu minsiku mi Nzambi, muingi lutatamana kuzinga ayi lukota ku ntoto Yave Nzambi yi zikhaya zinu, kankuiza luvana muingi wuba kiuka kinu. 2 Lulendi buela ko voti kubotula ni diambu dimueka mu mambu yidi mu kululonga, vayi lufueti tumukina zithumu zi Yave Nzamb′inu.

3 “Benu veka lumona mambu Yave kavanga ku Peor, phila Yave kavondila batu boso babuongimina Baal. 4 Vayi baboso bamonisa lukuikumunu mu Yave Nzamb′inu, bakhidi bamonyo nati bubu. 5 Dedi bo Yave Nzambi′ami kathumina, minu yi kululonganga zithumu ziandi, muingi lutumukinanga ziawu nate luala kota ku ntoto ka lukanikisa. 6 Benu lufueti landakana zithumu aziozio mu lukuikumunu, muingi makabu mankaka bamona ti benu luidi nduenga ayi phisulu. Ayi bo bawu bala kuwa zithumu aziozio, bala tuba: ‘Bukiedika, dikabu adiodio didi batu badi nduenga ayi phisulu.’ 7 Vasi ko dikabu dinkaka badi nzambi yiku basadisanga thangu zioso, dedi bo Yave Nzamb′itu katusadisilanga bo tu kundinda lusalusu. 8 Dikabu mbi dinkaka didi zithuadusulu ayi zithumu zisonga, dedi zio minu yidi mu kuluzabikisa bubu?

9 “Diawu banu keba keba ayi bikanu kuzimbakana mambu moso lumona Nzambi kuvanga mu kibila kinu, ayi lufueti zabikisa mawu kuidi bana binu ayi kuidi batekulu binu. 10 Mu kilumbu benu luba vantuala Yave Nzamb′inu ku mongo Horebi, Yave wukhamba: ‘Kutikisa dikabu va ntual′ama muingi bayuwa mambu mami, muingi bakhinzikanga mu bilumbu bioso bankuiza zinga va ntoto ayi balonga mawu kuidi bana bawu.’

11 “Diawu benu lufikimina va ndeku mongo ayi va mbata mongo beni, vaba lema mbazu yaba vitila nate ku diyilu. Mvandi kuba matuti ayi kitombi kingolo. 12 Vana khati mbazu Yave wuyoluka yinu, benu luyuwa mbembu′andi, vayi lusa mona ko ni mutu. 13 Nandi wuluzabikisa luwawanu kavanga yinu. Ayi wulutuma muingi lutumukina kumi di minsiku, bosi nandi wusonika miawu mu mamanya muadi. 14 Muna thangu beni, Yave wuthuma muingi yi lulonga zithumu zio lufueti tatamana kutumukina ku ntoto wo benu lunkuiza vua.

15 “Mu kumona ti lusa mona ko ni mutu bo Yave kayoluka yinu va khati mbazu ku mongo Horebe, diawu tekanu matu, 16 muingi lubika vunuka mu kuvanga kitumba ayi kubuongimina kiawu, kuba kuandi kidi buka dibakala, voti buka nkietu, 17 kuba kuandi kidi buka kioso kua kibulu kidi va ntoto, voti yoso kua nuni, 18 voti kidi buka kioso kua kibulu kinkaka kinkokubukanga va ntoto, voti yoso kua mfu mu nlangu. 19 Ayi bo wuntala ku diyilu ayi ngie kumona thangu, ngonda, zimbuetila ayi biuma bioso bidi ku diyilu, bika kuvukumuka muingi ku bibuongimina, kibila Yave Nzambi′aku wuvanga biuma abiobio muingi kutuadisa ndandu kuidi batu boso va ntoto. 20 Vayi benu luidi batu Yave kabotula ku Ngipiti, kibuangu kidi buka fornu yi mbazu muingi luba dikabu diandi disolu, dedi bo luididi bubu.

21 “Yave wundasukila mu kibila kinu ayi wuleva phesi ti yalasa sabuka ko muila wu Yolidani, muingi kukuenda ku ntoto wumboti wo Yave Nzamb′inu kankuiza luvana. 22 Kibila minu yinkuiza fuila ku ntoto awuwu. Yalasa sabuka ko muila wu Yolidani, vayi benu luala sabuka ayi luala kota ku ntoto wumboti Nzambi kankuiza luvana. 23 Diawu banu keba keba muingi lubika zimbakana luwawanu Yave Nzamb′inu kavanga yinu. Bikanu kuvanga kitumba kidi buka kioso kua kiuma Yave Nzamb′inu kalukandimina. 24 Kibila Yave widi buka mbazu yimvikanga, nandi widi Nzambi wuntombanga bambuongimina to nandi.

25 “Ayi kheti bo luala zingila mimvu miwombo ku ntoto balukanikisa ayi bo luala buta bana ayi kulela batekulu, bikanu kuvukumuka mu kuvanga kioso kua kitumba muingi kubuongimina. Kibila benu kuvanga mawu, lunkuiza sumuka ayi kunyongisa Yave Nzamb′inu. 26 Bubu diyilu ayi ntoto binta kimbangi ti, benu kubuongimina bitumba yala kuluvonda mu thinu ku ntoto wo lunkuiza vua, ntoto widi ku khonzo yinkaka yi muila wu Yolidani. Ayi benu lualasa zinga ko kuna mimvu miwombo kibila minu yala kulutulula. 27 Yave wala kulutiamuna mu zi tsi zi zinzenza, ayi mua nkadu to mu benu luala vuka mu zi tsi beni Yave kala lutiamuna. 28 Ayi mu zi tsi beni, benu luala buongimina zinzambi zimabaya ayi zi mamanya, zinzambi zivangu kuidi batu zio zikhambu nunganga kumona, kukuwa, kudia ayi kukuwa mfuku.

29 “Bo luala ba mu zi tsi beni, benu kubuongimina Yave mu ntima woso ayi mu muela woso, nandi wala kulufikama. 30 Mu thangu beni bo benu luala viokila mu mambu maphasi ayi bo mambu amomo mala kulumonikina, benu luala tomba Yave Nzamb′inu ayi nandi wala kulukuwa. 31 Kibila Yave Nzambi′aku widi Nzambi nkua kiadi. Nandi kalasa kukuekula ko, kalasa kutulula ko ayi kalasa zimbakana ko luwawanu kavanga na zikhaya zinu bo kaleva phesi.

32 “Buabu, tombanu kuzaba mambu mamonika mu thangu yikhulu, ava benu kubutuka tona Nzambi kavanga batu batheti va ntoto. Fiongunina ntoto woso boti vadi mutu mana kuwa voti kumona mambu amama ma kukuitukila kumonika. 33 Bukiedika ti vadi dikabu dinkaka dimana kuwa mbembu yi Nzambi va khati mbazu ayi batatamana kuzinga dedi bo benu luyuwila mbembu yi Nzambi ayi luidi mu kutatamana kuzinga? 34 Bukiedika ti vadi dikabu dinkaka Nzambi kamana kula mu buvika mu kusadila bidimbu, mangitukulu, mimvita ayi mangolo mandi dedi bo Yave Nzamb′itu katubotudila ku Ngipiti, dedi bo benu veka lumuena? 35 Nzambi kabikila mambu amomo kumonika mu kibila kinu, muingi luzaba ti Yave nandi to Nzambi yikiedika. 36 Kutonina ku diyilu nandi wuvanga luyuwa mbembu′andi, muingi kulusemba. Ayi va ntoto nandi wuluvanga lumona mbazu ayi benu luyuwa mambu mandi va khati mbazu.

37 “Nzambi wuzola zikhaya zinu diawu kalusodila, ayi ka lukudila ku Ngipiti mu kusadila mangolo mandi. 38 Nandi wutulula makabu balutidi batu ayi balutidi mangolo kena benu, muingi kaluvana ntoto′awu wuba kiuka kinu, dedi bo luidi mu kumuena bubu. 39 Diawu zabanu ayi bikanu kuzimbakana ti, Yave nandi to Nzambi yikiedika, ku diyilu ayi va ntoto. Vasi ko Nzambi yinkaka. 40 Muingi benu ayi bana binu lubaka ndandu mu luzingu, ayi lutatamana kuzinga mimvu miwombo ku ntoto Yave Nzamb′inu kankuiza luvana, lufueti tumukina minsiku ayi zithumu yidi mu kululonga bubu.”

41 Mu thangu beni, Mose wusola mavula matatu ku khonzo leste yi muila wu Yolidani. 42 Mutu na kuvonda wadi yandi mukhambu lutia, kafueti tinina mu mavula amomo, muingi babika kumvonda. 43 Amama mawu mazina ma mavula beni: Bezer, divula didi ku thandu yikhambulu miongo, di mvila wu Rubem. Ramote, divula didi ku Ngileadi di mvila wu Gadi ayi divula di Golam, didi ku Bazan di mvila wu Manase.

44 Awowo wawu nsiku Mose kazabikisa kuidi dikabu di Isaeli. 45 Bo basi Isaeli babasika ku Ngipiti, Mose wuba zabikisa minsiku ayi zithumu aziozio. 46 Nandi wuba zabikisa ziawu bo baba ku kizunga ki muila wu Yolidani, ku ḿbuinga widi va ndeku Bete-Peor ku ntoto wu Siom ntinu zi Amoreu no waba kalanga ku Hesbom, no Mose ayi basi Isaeli banunga bo babasika ku Ngipiti. 47 Banunga ayi bavua ntoto′andi ayi ntoto wu Ogue ntinu wu Bazan. Mintinu miodi amiomio mi zi Amoreu baba yadilanga ku kizunga kidi ku khonzo leste yi muila wu Yolidani, 48 kutonina ku Aroer ḿbuinga widi ku Arnom, nate ku mongo Siom wunsundula mongo wu Hermom, 49 kizunga kioso ki Arabá, kidi ku khonzo leste yi muila wu Yolidani nate ḿbu wu Arabá ku ndeku mongo wu Pisga.