Deutelonomi
33 Amama mawu mambu Mose kisadi ki Nzambi yikiedika katuba muingi kusakumuna basi Isaeli ava kafua. 2 Nandi wutuba:
“Yave—wuyiza ku mongo Sinai,
Nandi wulezama vantual′awu kutonina ku Seir.
Wumonisa nkembu′andi kutonina ku miongo midi ku kizunga ki Paran,
Nandi wuba va kimueka na bivevi na bivevi bi zimbasi,
Masodi mandi maba ku khonzo′andi yi lubakala.
3 Nandi wuzola dikabu diandi.
Ayi dikabu dioso adidi dinlongo didi mu lukiebu luandi.
Bawu baba bakala va khonzo bitambi biandi,
Ayi batona kukuwa mambu kaba tuba.
4 (Mose wutuvana minsiku,
Muingi miba kiuka ki dikabu di Yakobi)
5 Ayi nandi wuyiza ba ntinu ku Jezurum,*
Bo bakulutu ba dikabu bakutakana,
Na mimvila mioso mi Isaeli.
6 Bika mvila wu Rubem wutatamana kuzinga,
Ayi bika thalu yi batu mu bawu yibika kudekuka.”
7 Bosi nandi wusakumuna mvila wu Yuda mu kutuba:
“A Yave, yuwa mbembu yi Yuda,
Ayi mvutula kuidi dikabu diandi.
Nandi wukakidila biuma biandi,
Ayi nsadisa kanunga zimbeni ziandi.”
8 Ayi matedi mvila wu Levi, nandi wutuba:
“Mutu widi wukuikama mu ngiewu, nandi vuidi Tumim ayi Urim yaku,
No ngie wuthota ku Masá.
Ayi no wutona kukuambisa matedi nlangu wu Meribá.
9 Nandi wutuba matedi tat′andi ayi mam′andi: ‘Minu yiba vuanga ko nkinza.’
Ayi mvandi kavuanga ko nkinza zikhomba ziandi,
Ayi wubanda mbusa bana bandi.
Kibila batumukina mambu maku,
Ayi balandakana luwawanu luaku.
10 Bika bawu balonga makani maku kuidi Yakobi
Ayi Minsiku miaku kuidi Isaeli.
Bika bawu bavana malasi madi mfimbu wumboti wu kukuangidika
Ayi bavana minkhailu va kikuma.
11 A Yave, wuba buela mangolo,
Ayi bika wuyangalala mu kisalu bawu bamvanganga.
Bokuna malu ma batu ba kuba nuanisa,
Muingi zimbeni ziawu zinkaka zibika kubue tomba kuba nuanisa.”
12 Matedi mvila wu Benyamini, nandi wutuba:
“Bika Yave katatamana kuba kieba ayi bazingila mu nsika,
Ayi bika Nzambi katatamana kunkieba mu bilumbu bioso,
Ayi kazingila mu ndembama va khonzo′andi.”
13 Ayi matedi mvila wu Yozefi, nandi wutuba:
“Bika Yave kasakumuna ntoto′aku
Bika ka kusakumuna mu kunokisa zimvula
Ayi bika ka kusadisa kubasisa nlangu mu zitho zi nlangu zidi va ntoto.
14 Bika nandi kabengisa mimbutu minu,
Ayi kasakumuna bivatu binu kadika ngonda.
15 Bika ka lusakumuna mu kumenisa biuma lumvata mu bizunga bidi miongo,
Ayi kumenisa biuma bimboti mu miongo mu zithangu zioso.
16 Bika ka lusakumuna mu kuluvana biuma bilutidi bimboti va ntoto,
Ayi lubaka lunungu lu Mutu no wumonika va khati nti wu zitsendi.
Bika mambu moso amomo mamonikina Yozefi,
Mutu basola va khati zikhomba ziandi.
17 Nzitusu′andi widi buka nzitusu wu muana ngombi wutheti,
Ziphoka ziandi zidi buka ziphoka zi ngombi yi nsitu.
Ayi mu ziphoka beni, muawu kala pusila makabu moso
Nate kusukisila nza.
Mu Yozefi, muawu muyizila mafunda ma batu badi mu mvila wu Efraim,
Ayi muawu muyizila mafunda ma batu badi mu mvila wu Manase.”
18 Matedi mvila wu Zebuloni, nandi wutuba:
“A Zebuloni, yangalala mu lungosu luaku,
Ayi ngiewu Isakali, yangalala mu zitenda ziaku.
19 Bawu bala kutikisa makabu ku mongo.
Ayi kuawu bala vanina minkhailu mu busonga.
Bawu bala bonga kiuka kiwombo kidi mu ḿbu
Ayi biuma bi luvalu bidi mu nsengisini.”
20 Matedi mvila wu Gadi, nandi wutuba:
“Bika mutu wumbuela kizunga ki Gadi, katambula lusakumunu.
Kibila nandi widi buka khosi,
Yidi yikubama muingi kudia koko ayi ntu wu kibulu kambuila.
21 Va kizunga beni, nandi wala sola kibuangu kilutidi,
Kibuangu kio banlundanga muingi kuvana mutu wumfondanga minsiku.
Bakulutu ba dikabu bala kutakana.
Nandi wala tuadisa busonga bu Yave,
Ayi wala vanga muingi makani ma Nzambi masalama ku Isaeli.”
22 Matedi mvila wu Dan, nandi wutuba:
“Dan widi buka muana khosi.
Nandi wala nuanisanga batu kutonina ku Bazan.”
23 Matedi mvila wu Nafitali, nandi wutuba:
“Nafitali widi mu mayangi mu kibila ki lunungu lu Yave.
Ayi widi lusakumunu luwombo.
Kibuangu kiandi kidi beni kinneni, kutonina ku khonzo oeste nate ku khonzo sul.”
24 Matedi mvila wu Azer, nandi wutuba:
“Azer widi lusakumunu lu kubuta bana bawombo.
Bika nandi kabaka lunungu lu zikhomba ziandi,
Ayi bika kabuika bitambi biandi mu nzeta.
25 Nandi wunzibikilanga mielu mi divula diandi mu bisengu ayi cobre,
Ayi ngie wala baka nsika mu bilumbu biaku bioso.
26 Vasi ko nzambi yinkaka widi buka Nzambi yi Jezurum,
No wundiatilanga mu mvalu ku diyilu mu matuti
Mu kumonisa nkembu′andi muingi kiza kusadisa.
27 Tona mu thangu yikhulu, Nzambi widi kisuamunu,
Nandi wuntatamananga ku kukieba.
Ayi nandi wala kukisa zimbeni ziaku vantual′aku,
Ayi wala kukamba: ‘Wuba tulula!’
28 Isaeli wala zingila mu nsika,
Ayi nkuna wu Yakobi wala zingila mu nsika
Ku ntoto widi mimbutu ayi vinyu,
Ntoto wunnokanga beni zimvula.
29 Mayangi kuidi ngie, A Isaeli!
Dikabu mbi dinkaka didi buka ngiewu,
Dikabu dio Yave kadidi mvukisi′awu,
Nkaku wu kuba kieba
Ayi mbedi?
Zimbeni ziaku ziala titubuka mu boma vantual′aku,
Ayi ngiewu wala kuba nyesa ayi kuba tulula.”