Buku Yitheti yi Samueli
17 Basi Filistea bakutikisa masodi mawu ku Soko yidi ku Yuda muingi kuenuanisa basi Isaeli. Ayi baye vundila ku Efes-Damim, kibuangu kidi va ndeko Soko ayi Azeka. 2 Sauli ayi masodi ma Isaeli bakutakana ku Elá, ayi batandama muingi kunuanisa basi Filistea. 3 Basi Filistea baba ku mongo wuba ku khonzu yinkaka, ayi basi Isaeli baba ku mongo wuba ku khonzu yinkaka ayi ḿbuinga wuba vakhati.
4 Bosi vakhati masodi ma basi Filistea, vabasika disodi dimueka wuba wupisuka, baba kuntedilanga Ngoliati. Nandi wuba musi Gati ayi wuba nduka 3 di zimetro* mu kukula. 5 Nandi waba vuatanga phu yivangulu mu cobre, ayi waba vuatanga kikhutu ki kisengu kiba mako mavangulu mu cobre. Ayi kikhutu beni kiaba zitanga 5.000 di zisikulu.* 6 Nandi waba vuatanga mua biuma mu malu bivangulu mu cobre. Ayi waba tulanga kumbusa didionga divangulu mu cobre. 7 Nti bakuika mu didionga diandi wuba beni wunneni buka dikunzi ayi didionga diandi divangulu mu kisengu, diaba zitanga 600 di zisikulu.* Mutu waba natanga nkaku′andi, waba banga vantual′andi. 8 Bosi Ngoliati wutelama ayi wukamba masodi ma basi Isaeli: “Kibila mbi lube tandimina muingi kutunuanisa? Minu disodi dilutidi kupisuka mu masodi moso ma basi Filistea ayi benu luidi bisadi bi Sauli. Buabu solanu wumueka mu benu muingi kiza nuana yama. 9 Mutu beni lunsola na kununga kunuana ayi na kuphonda, buna befu tunkuiza ba bisadi binu, vayi minu kumvonda, buna benu lunkuiza ba bisadi bitu.” 10 Ngoliati wubue tuba: “Bubu minu yidi mu kufiesa masodi ma basi Isaeli. Filanu mutu muingi kiza nuana yama.”
11 Bo Sauli ayi masodi mandi bayuwa mambu Ngoliati katuba, bawu baba beni boma ayi baba titubuka.
12 Vaba ditoko dimueka baba tedilanga Davidi muana Yese. Yese waba kalanga ku Efrata yidi ku Betelemi yi Yuda, Yese wubuta 8 di bana. Mu thangu Sauli kaba ntinu ku Isaeli, Yese wuba kiboba. 13 Bana batatu ba bakulutu ba Yese bayenuana mvita na Sauli. Bawu baba: Eliabi muana wutheti, Abinadabi muana wummuadi ayi Samá muana wuntatu. 14 Davidi nandi wuba muana wutsuka wu Yese ayi zikhomba ziandi zitatu zi bakulutu, bayenda na Sauli mu mvita.
15 Davidi waba kuendanga kuidi Sauli, ayi waba vutukanga ku Betelemi muingi kukieba mamemi ma tat′andi. 16 Ayi mu kadika meni ayi kadika masika, Ngoliati wutatamana kufiesa masodi ma Isaeli mu 40 di bilumbu.
17 Kilumbu kimueka, Yese wukamba muan′andi Davidi: “Lemvuka, bonga efa yimueka yi zitheti zikangu ayi kumi di mapha muingi wunata kuidi zikhomba ziaku badi mu mvita. 18 Ayi nata kumi di bitini bi keju muingi wevana mfumu masodi.* Tomba kuzaba boti zikhomba ziaku badi buboti ayi thuadila bivisa bimmonisa ti ngie be kuba mona, ayi ti bawu badi buboti.” 19 Sauli, zikhomba zi Davidi ayi masodi mankaka ma Isaeli, baba ku ḿbuinga wu Elá muingi kunuanisa basi Filistea.
20 Bo Davidi kakotuka va meni, nandi wutomba mutu wunkaka muingi kakieba mamemi. Nandi wukubika biuma tat′andi Yese kankamba, ayi wuyenda. Bo kavitila va kibuangu masodi ma Isaeli baba, nandi wuyuwa masodi kutenduka muingi kuenuana. 21 Masodi ma basi Isaeli ayi masodi ma basi Filistea batandama muingi kunuana mvita. 22 Mu thinu Davidi wubika biuma kanata kuidi mutu waba kiebanga mimfuna, bosi wuduma va kibuangu masodi batandimina. Bo kavitila vana, nandi wuyuvula zikhomba ziandi boti bawu baba buboti.
23 Ayi bo Davidi kaba koluka na zikhomba ziandi, Ngoliati disodi dilutidi kupisuka mu masodi moso ma basi Filistea, waba kalanga ku Gati, wubotuka va kibuangu ki masodi ma basi Filistea, wuvutukila kutuba momawu mambu katuba. Ayi Davidi wuyuwa mawu. 24 Bo masodi ma basi Isaeli bamona Ngoliati, bawu baba boma ayi batina. 25 Masodi ma basi Isaeli baba tuba: “Luidi mu kumona dibakala adiodio? Nandi widi mu kuvueza masodi ma basi Isaeli. Vayi woso mutu wu kumvonda, ntinu wunkuiza mvana busina buwombo, ayi mvandi wunkuiza mvana muan′andi wunkietu muingi kankuela. Ayi dikanda di tat′andi, balasa bue futanga ko phaku.”
26 Bosi Davidi wuyuvula masodi maba va khonzu′andi: “Mbi bankuiza vana mutu wumvonda disodi adiodio musi Filistea, muingi kumanisa zitsoni mu dikabu di Isaeli? Disodi adiodio wukhambu buongiminanga Nzambi yikiedika, nandi kammuena ti widi nani, muingi kufiesa masodi ma Nzambi yikiedika?” 27 Masodi beni banzabikisa biuma bankuiza vana mutu wukumvonda, mu kutuba: ‘Abiobio biawu bankuiza vana mutu wumvonda disodi beni.” 28 Bo Eliabi khomba yi nkulutu yi Davidi kayuwa Davidi kukoluka na masodi, nandi wudasuka ayi wuyuvula Davidi: “Kibila mbi bekuizila akuku? Nani besa bikila mamemi? Minu yizebi mayindu maku mambi. Ngie bekuizila akuku muingi wiza tala mvita.” 29 Davidi wumvutudila: “Diambu mbi dimbi yima vanga? Minu kukuvula kuandi to yima kuvula.” 30 Bosi Davidi wubue yuvula masodi mankaka momawu mambu, ayi bawu bamvana wowawu mvutu.
31 Bo masodi mankaka bayuwa mambu Davidi katuba, baye zabikisa mawu kuidi Sauli, bosi Sauli wutumisa Davidi. 32 Davidi wukamba Sauli: “Bikanu kumona boma disodi adiodio musi Filistea, minu kisadi kiaku yennuana yandi. 33 Vayi Sauli wukamba Davidi: “Ngie wulendi nunga ko kunuana na disodi adiodio musi Filistea, kibila ngie widi ditoko, vayi nandi wutona kunuana mimvita tona mu butoko.” 34 Davidi wukamba Sauli: “A mfumu′ama, minu yidi nsungi wu mamemi ma tat′ama. Kilumbu kimueka bo khosi ayi wulusu banata dimemi, 35 minu yikuka kibulu beni ayi yivukisa dimemi kabuila. Bo kibulu beni kinduanisa, minu yibuila kiawu va dinga ayi yivonda kiawu. 36 Minu kisadi kiaku, yima vonda khosi ayi wulusu. Ayi mawu yemvangila musi Filistea awowo wukhambu buongiminanga Nzambi yikiedika, kibila nandi befiesa masodi ma Nzambi yikiedika.” 37 Davidi wubue tuba: “Yave no wuphukisa bo khosi ayi wulusu banduanisa, nandi mvandi wunkuiza phukisa mu mioko mi disodi adiodio musi Filistea.” Bosi Sauli wukamba Davidi: “Yenda nuana ayi bika Yave kaba yaku.”
38 Bosi Sauli wuvuika bikhutu biandi bimvita kuidi Davidi. Wumvuika phu yi kisengu, ayi kikhutu kiandi ki kisengu. 39 Davidi wuvuakika mbedi mu bikhutu biandi, ayi wumeka kudiata, vayi kabasa nunga ko kibila kasa kolama ko kuvuatanga bikhutu beni. Bosi Davidi wukamba Sauli: “Yisinnunga ko kudiata na bikhutu abibi, kibila yivuatanga ko biawu.” Diawu Davidi kavudila bikhutu beni. 40 Bosi Davidi wubonga nkawu′andi, wusola mamanya matanu va ndeko muila, ayi wutula mawu mu khutu minsungi mi mamemi baba natanga. Bosi wubonga fisga ayi wutona kufikama vaba disodi musi Filistea.
41 Ngoliati waba fikama Davidi, ayi mutu waba natanga nkaku′andi, wuba vantual′andi. 42 Bo Ngoliati kamona ti Davidi wuba ditoko, nandi wutona kumvueza. Davidi wuba wubenga ayi wuba beni kitoko. 43 Ngoliati wukamba Davidi: “Ngie wummuena ti minu yidi mbua muingi wiza nduanisina mu mua nti?” Bosi Ngoliati wusinga Davidi mu kusadila mazina ma zinzambi ziandi. 44 Ngoliati wukamba Davidi: “Yiza nuana yama, minu yekuvonda ayi yemvana nyitu′aku kuidi zinuni ayi bibulu bi nsitu muingi badia.”
45 Davidi wukamba Ngoliati: “Ngie benata mbedi, didionga ayi ḿbasa muingi kunuana yama. Vayi minu yinkuiza nuanina yaku mu dizina di Yave nkua minkangu, Nzambi yi masodi ma Isaeli no ngie befiesa. 46 Bubu Yave wunkuiza tsadisa muingi yikununga. Minu yekuvonda ayi yenzenga ntu′aku, mvandi yinkuiza vana zinyitu zi masodi ma basi Filistea kuidi zinuni ayi bibulu bi nsitu. Mu phila ayoyo, batu boso va ntoto bala zaba ti Nzambi yi basi Isaeli, nandi Nzambi yikiedika. 47 Ayi batu boso badi avava, bankuiza zaba ti muingi Yave kavukisa, vasintombulu ko zimbedi ayi madionga, kibila mvita awuwu widi wu Yave, ayi nandi wunkuiza tusadisa muingi tulununga.”
48 Ngoliati wutatamana kufikama vaba Davidi muingi kunnuanisa, ayi Davidi wuduma vaba Ngoliati muingi kunnuanisa. 49 Bosi Davidi wukosa koko mu past′andi ayi wubonga dimanya, wutula mu fisga ayi wukuba diawu kuidi Ngoliati. Dimanya beni dikota va mbulu Ngoliati, ayi nandi wubua vatsi. 50 Mu phila ayoyo, Davidi wununga Ngoliati mu kusadila fisga ayi dimanya. Kheti Davidi kasa ba ko mbedi, vayi nandi wununga Ngoliati ayi wumvonda. 51 Davidi wuduma nate vaba Ngoliati, wutitika mbedi yi Ngoliati yiba mu lubunda ayi wunzenga ntu. Bo masodi ma basi Filistea bamona ti disodi wulutidi wupisuka mafua, bawu batina.
52 Mu kibila akiokio, masodi ma basi Isaeli batona kutenduka, ayi baba kuka masodi ma basi Filistea, kutonina ku ḿbuinga nate va ndeko mielu mi divula di Ekrom. Ayi mimvumbi mi masodi ma basi Filistea mimana kuwala mu nzila yinnengubuka ku Saraim nate ku Gati ayi ku Ekrom. 53 Masodi ma basi Isaeli batatamana kukuka masodi ma basi Filistea. Bosi masodi ma Isaeli bavutuka, ayi babonga biuma bioso basi Filistea babika.
54 Davidi wubonga ntu wu Ngoliati ayi wunata wawu ku Yelusalemi, vayi wunata mata ma Ngoliati, ku tend′andi.
55 Bo Davidi kaba duma muingi kenuana na Ngoliati, Sauli wuyuvula Abner mfumu masodi mandi: “Abner, ditoko adiodio tat′andi nani?” Abner wumvutudila: “Yinleva phesi mu dizina di ntinu ti yisa zaba ko.” 56 Ntinu wukamba Abner: “Vanga mamoso muingi wubakula tat′andi nani.” 57 Bosi bo Davidi kamana kuvonda Ngoliati, ayi bo kaba vutuka, Abner wunnata vantuala Sauli, ayi Davidi wuba na ntu wu Ngoliati va koko. 58 Bosi Sauli wuyuvula Davidi: “Tat′aku nani?” Davidi wumvutudila: “Minu yidi muana wu kisadi kiaku Yese, musi Betelemi.”