Buku Yitheti yi Samueli
13 Sauli wuba . . .* di mimvu bo katona kuyala, ayi wuyadila basi Isaeli mu mimvu miodi. 2 Sauli wusola 3.000 di masodi ma Isaeli. 2.000 di masodi maba na Sauli ku Mikmás, kibuangu kidi miongo ku Beteli ayi 1.000 di masodi mankaka maba na Yonatan ku Gibeá, kibuangu ki mvila wu Benyamini. Vayi masodi mankaka Sauli wuba kamba bavutuka mu zinzo ziawu. 3 Bosi Yonatan wuvonda masodi ma basi Filistea baba ku Geba. Ayi basi Filistea bayiza zaba mambu Yonatan kavanga, diawu Sauli kafidila mimvuala basika zitulumbeta ku Isaeli, muingi kutumisa basi Isaeli. 4 Basi Isaeli bayuwa thumu ayiyi: “Sauli wuvondisi masodi ma basi Filistea, buabu basi Filistea bama lundila basi Isaeli nganzi.” Diawu batumisina masodi ma basi Isaeli muingi balandakana Sauli ku Gilgal.
5 Basi Filistea mvawu bakutikisa masodi muingi kunuanisa basi Isaeli. Bawu baba 30.000 di makalu ma mimvita, 6.000 di masodi bandiatilanga mu mimvalu, ayi bakutikisa masodi mawombo buka nsengiseni wu ḿbu. Bawu batombuka ku Mikmás, ku khonzu leste yi Bete-Áven. 6 Bo basi Isaeli bamona ti basiedi ko ma kuvanga, bankaka bayesuama mu minsuku mi mamanya, mu miḿbuinga, mu matanga ayi mu bibuangu binkaka. 7 Masodi mankaka ma basi Isaeli basabuka muila wu Yolidani, muingi kutinina ku ntoto wu Gadi ayi ku Ngileadi. Vayi Sauli wusiala ku Gilgal, ayi masodi moso maba yandi, baba beni boma. 8 Sauli wutemina sambuadi di bilumbu dedi bo Samueli kankambila, vayi Samueli kasa vitila ko ku Gilgal. Ayi masodi maba na Sauli batona kutiamuka. 9 Bosi Sauli wutuba: “Tuala bibulu muingi tuvana nkhailu wuviku ayi minkhailu mi kithuadi.” Sauli wuvana nkhailu wuviku.
10 Vayi bo Sauli kamana kuvana nkhailu wuviku, Samueli wuvitila. Bosi Sauli wuye dengana Samueli ayi wumvana mboti. 11 Ayi Samueli wunyuvula: “Kibila mbi mavangila mambu amomo?” Sauli wumvutudila: “Minu yibe mona ti masodi mabe ba yama, babe tona kukhuekula ayi ngie mvaku savitila ko mu thangu yifuana, ayi yibe kuwa ti basi Filistea babe kutakana ku Mikmás. 12 Diawu minu yibe yindudila: ‘Buabu, basi Filistea badi mu kukuiza ku Gilgal muingi kunduanisa ayi minu yitombiziabu ko lusalusu lu Yave,’ Diawu yibe vanina nkhailu wuviku.”
13 Samueli wukamba Sauli: “Ngie wusa monisa ko nduenga, wusa tumukina ko thuadusulu Yave Nzambi′aku kakuveni. Boti ngie betumukina, khanu Yave wunkuiza vanga kintinu kiaku kikadidila. 14 Vayi buabu, ngie walasa tatamana ko kuba ntinu, kibila Yave wunkuiza sola mutu wunkaka no wunkuangidika ntim′andi, ayi Yave wunkuiza mbieka ntinu wu dikabu diandi. Kibila ngie wusa tumukina ko nsiku Yave kakuveni.”
15 Bosi Samueli wunanguka ku Gilgal ayi wuyenda ku Gibeá yidi ku Benyamini. Sauli wutangisa masodi maba yandi ayi wumona ti wusiala to na 600 di masodi. 16 Sauli na muan′andi Yonatan, kubunda mvandi masodi maba yandi, basiala ku Geba yidi ku Benyamini, vayi masodi ma basi Filistea baba ku Mikmás. 17 Bosi masodi ma basi Filistea bananguka va kibuangu baba mu mangumba matatu. Dingumba ditheti diyenda mu nzila yinanguka ku Ofra, yinkuenda ku Suali. 18 Dingumba dimmuadi diyendila mu nzila yinkuenda ku Bete-Horom. Ayi dingumba dintatu diyendila mu nzila yidi mu zindilu zidi mu ḿbuinga ku Zeboim, nzila yinkuenda ku khonzu thandu.
19 Basi Filistea bakandimina basi Isaeli muingi babika vanganga zimbedi ayi madionga. Diawu ku Isaeli kuisa bue ba ko ne mutu wumvanganga biuma mu kusadila bisengu. 20 Mu kibila akiokio, basi Isaeli boso baba kuendanga kuidi basi Filistea muingi kulengula zitsengo ziawu, bitadi, zimbedi ayi biuma binkaka. 21 Basi Filistea baba dindanga basi Isaeli zimbongo* ziwombo muingi balengudila basi Isaeli zimbedi, bitadi ayi zisengo. Ayi mvandi muingi kukuika nti baba tuadisilanga zingombi. 22 Mu kibila akiokio, mu kilumbu bayenda kue nuana mvita, ne disodi dimueka di basi Isaeli kasa ba ko mbedi voti didionga. Sauli ayi muan′andi Yonatan, bawu to baba na binuanunu.
23 Masodi ma basi Filistea bayenda va kibuangu bansabukilanga kizunga ki Mikmás.