Buku Yimmuadi yi Samueli
7 Bo ntinu katona kukalanga ku nzoꞌandi ayi bo Yave kamvana ndembama mu zimbeni ziandi zioso, 2 Ntinu Davidi wukamba ḿbikudi Natani: “Tala, minu yidi mu kuzingila mu nzo yimboti yivangulu mu mabaya ma cedro, vayi Kasu yi Luwawanu yi Nzambi yikiedika, yidi ku tenda.” 3 Bosi Natani wukamba ntinu: “Vanga mamoso wuntomba, kibila Yave widi yaku.”
4 Muna builu beni, Yave wukamba Natani mambu amama: 5 “Yenda kamba kisadi kiama Davidi: ‘Buakabu butubidi Yave: “Kibila mbi ngie wuntomba kuthungila nzo muingi yikalanga? 6 Minu yikalanga ko mu nzo, tona kilumbu yibotula dikabu diama Isaeli ku Ngipiti nate bubu, vayi yinzingilanga mu bibuangu biviakana, mu tenda ayi mu nzo yinlongo. 7 Mu thangu yoso yima diatanga na dikabu di Isaeli, bukiedika ti minu yimana kuvula kuidi wumueka mu mintuadisi mi Isaeli, no minu yisola muingi katuadisa dikabu diama: ‘Kibila mbi benu mukhambu thungila nzo yivangulu mu mabaya ma cedro?”” 8 Kamba mambu amama kuidi kisadi kiama Davidi: ‘Buakabu butubidi Yave nkua minkangu: “Minu yiku sola bo wuba nsungi wu mamemi, muingi wuba ntuadisi wu dikabu diama Isaeli. 9 Minu yala ba yaku koso wunkuenda, ayi yala bunga zimbeni ziaku zioso. Mvandi yinkuiza vanga wuba beni wuzabakana dedi bo buididi batu badi beni bazabakana va ntoto. 10 Yinkuiza sola kibuangu muingi dikabu diama Isaeli bakalanga. Bawu bala zingila kuna ayi ne mutu kalasa bue batatisanga ko. Zimbeni ziawu balasa bue batatisanga ko dedi bo baba bavangilanga kumbusa, 11 tona mu kilumbu yisola mintuadisi muingi batuadisanga dikabu diama Isaeli. Yinkuiza vanga wuba mu ndembama kuidi zimbeni ziaku zioso.
“‘“Yave mvandi be kukhamba ti, Yave wala tsikika luyalu va dikanda diaku. 12 Bo ngie wala fua ayi bo bala kuzika va kimueka na zikhaya ziaku, minu yala vana luyalu kuidi wumueka mu bana baku ayi yala tsikika kintinu kiandi. 13 Nandi wala thungila nzo muingi kuzitisa dizina diama ayi minu yala tsikika kintinu kiandi mu zithangu zioso. 14 Minu yala ba tatꞌandi ayi nandi wala ba muanꞌama. Ayi na kuvanga nzimbala, minu yala kunsemba, dedi bo tata kansembilanga muana. 15 Yalasa manisa ko luzolo luama lukuikama mu nandi, dedi bo yimanisina mu Sauli no yibotula mu luyalu, muingi ku kuvingisa. 16 Vayi kintinu kiala tatamana kuidi ngiewu ayi kuidi dikanda diaku, mu zithangu zioso. Mvandi kintinu kiaku kiala tatamana kisikama mu zithangu zioso”’”
17 Bosi Natani wukamba Davidi mambu moso Nzambi kanzabikisa.
18 Mu kibila akiokio, ntinu Davidi wuyenda vantuala Yave ayi wuvanga nsambu: “A Yave Mfumu Yilutidi, minu yidi nani? Ayi nkinza mbi dikanda diama didi, muingi wuphangila mambu moso amomo mamboti? 19 Kubotula kuandi amomo a Yave Mfumu Yilutidi, ngie mvaku betuba ti kisadi kiaku wala tatamana mu thangu yiwombo kuntuala. Ayi ni mutu kalendi balula ko thuadusulu ayoyo, a Yave Mfumu Yilutidi. 20 A Yave Mfumu Yilutidi, mbi binkaka kisadi kiaku Davidi kalenda bue tuba, mu kumona ti ngie tsebi buboti? 21 Mu kibila ki diambu diaku, ayi mu kutadila luzolo luaku, ngie mazabikisa mambu amomo ma kukuitukila kuidi kisadi kiaku. 22 Diawu ngie wididi Nzambi yi kukuitukila a Yave Mfumu Yilutidi, vasi ko Nzambi yinkaka widi buka ngiewu. Ayi mambu moso tumana longuka matedi ngiewu, mamvana bivisa mu mawu. 23 Vasi ko dikabu dinkaka va ntoto didi buka dikabu diaku Isaeli, ngie wukula dikabu diaku muingi kuzitisa dizina diaku, mu kuvangila dikabu diaku mambu ma kukuitukila. Ngie wutulula mimvila miwombo ayi zinzambi ziawu, muingi kutuadisa ndandu kuidi dikabu diaku dio ngie wukula ku Ngipiti. 24 A Yave Nzambi, ngie wusola dikabu di Isaeli, muingi ditatamana kuba dikabu diaku ayi ngie wuyiza ba Nzambiꞌawu.
25 “Buabu a Yave Nzambi, bika mambu matuba matedi kisadi kiaku ayi dikanda diandi, matatamana kusalama mu zithangu zioso, dedi bo matubila. 26 Bika dizina diaku ditatamana kuzitusu mu zithangu zioso, muingi batu batubanga: ‘Yave nkua minkangu, widi Nzambi yi dikabu di Isaeli,’ ayi bika luyalu lutatamana lusikama va dikanda di kisadi kiaku Davidi. 27 Kibila ngie Yave nkua minkangu, Nzambi yi Isaeli, bezabikisa mambu amama kuidi kisadi kiaku, mu kutuba: ‘Luyalu luala tatamana va dikanda diaku.’ Diawu kisadi kiaku kabe bakila mangolo ma kuvanga nsambu awuwu. 28 A Yave Mfumu Yilutidi, ngie widi Nzambi yikiedika ayi mamoso wuntubanga, madi makiedika ayi ngie veka bekanikisa mambu amomo mamboti kuidi kisadi kiaku. 29 Buabu yiku dinda muingi wusakumuna dikanda diama, muingi bawu batatamana kubaka lukiebu luaku mu zithangu zioso. Kibila ngie veka bekanikisa mambu amomo a Yave Mfumu Yilutidi. Ayi bika dikanda di kisadi kiaku, ditatamana kubaka lusakumunu luaku.”