Buku Yimmuadi yi Samueli
13 Absaloni muana Davidi, wuba khomba yinkietu wuba beni kitoko baba tedilanga Tamali. Amnom muana Davidi wuyiza tona kunzinina. 2 Amnom waba zininanga beni khombꞌandi Tamali ayi mu kibila akiokio, nandi wuyiza bakana kubela. Tamali kabasa bundananga ko nyitu, diawu Amnom kaba muena ti kalendi nunga ko kumvangila dioso diambu. 3 Amnom wuba nkundi baba tedilanga Jonadabi ayi Jonadabi wuba beni diela. Nandi wuba muana Simeá, khomba Davidi. 4 Jonadabi wuyuvula Amnom: “Kibila mbi ngie muana ntinu bebela mu kiunda kilumbu kioso? Khamba mambu ma kutatisa.” Amnom wunkamba: “Yidi mu kuzola beni khombꞌama Tamali, no wubutuka ngudi mueka na khombꞌama Absaloni”. 5 Jonadabi wukamba Amnom: “Vuna ti widi mu kubela ayi yenda lala va kika. Tatꞌaku na kuiza kutala, ngie fueti kunkamba: ‘Lemvuka, vana nsua muingi khombꞌama Tamali kiza phana kioso kiuma muingi yidia. Na kundambila bidia bamvananga batu bambela vantualꞌama, buna minu yinkuiza dia biawu.”’
6 Mu phila ayoyo, Amnom wuvunikisa kubela ayi wulala va kika ayi ntinu Davidi wuyenda kuentala. Bosi Amnom wukamba ntinu Davidi: “Lemvuka, vana nsua muingi khombꞌama Tamali kiza phangila mapha muadi madi buka ntima vantualꞌama, muingi minu yidia mawu.” 7 Bosi Davidi wufila mutu muingi kekamba Tamali: “Lemvuka, yenda kuidi khombꞌaku Amnom ayi nkubikila kioso kiuma muingi kadia.” 8 Mu phila ayoyo, Tamali wuyenda ku nzo khombꞌandi Amnom, wubonga falinya, wuvanga mapha vantuala khombꞌandi ayi wukanga mawu. 9 Bosi Tamali wubonga mapha beni wutula mu lulonga ayi wuvana Amnom, vayi Amnom wumanga kudia ayi wutuba: “Kamba batu boso babasika.” Ayi baboso babasika.
10 Amnom wukamba khombꞌandi Tamali: “Tuala mapha beni ku kivinga* kiama yidila mawu mu mioko miaku.” Mu phila ayoyo, Tamali wubonga mapha beni madi buka ntima ayi wunata mawu ku kivinga ki khombꞌandi Amnom. 11 Bo Tamali kanata mapha beni muingi Amnom kadia, Amnom wumbuila ayi wunkamba: “Khombꞌama bundana yama nyitu.” 12 Vayi Tamali wunkamba: “Ndamba khombꞌama, bika kuphuisa zitsoni mu kuphangila ntindu mambu amomo. Bika kuvanga mambu amomo matsoni, kibila bavanganga ko mambu amomo ku Isaeli.” 13 Mbi yala vanga muingi yinunga kuvanga batu babika kubue tebukilanga monyo, mambu amomo matsoni wuntomba kuphangila? Ngie kuvanga mawu ngie wala ba mutu wuphamba ku Isaeli. Lemvuka dinda kuidi ntinu, kibila nandi wunkuiza kikinina kuphana kuidi ngiewu.” 14 Vayi Amnom kasa kuwila ko khombꞌandi, nandi wubuila Tamali ayi wumfuisa tsoni mu kunkuika kabundana yandi nyitu. 15 Amnom wutona kulenda beni khombꞌandi Tamali. Ayi luzolo loso kaba mu nandi lumana. Bosi Amnom wukamba Tamali: “Telama avovo ayi yenda kuaku.” 16 Vayi Tamali wunkamba: “Ndamba ah khombꞌama, kukhamba yenda mu phila ayoyo, bulutidi zitsoni kena mambu bevanga.” Vayi Amnom kasa nkuwila ko.
17 Bosi Amnom wutumisa kisadi kiandi ayi wunkamba: “Basisa nkietu awowo kunganda ayi zibika muelu.” 18 Mu phila ayoyo, kisadi ki Amnom wubasisa Tamali kunganda ayi wuzibika muelu. Tamali wuba wuvuata kikhutu kio bana ba ntinu ba bakietu bo kaba bundiniabu ko nyitu baba vuatanga. 19 Bosi Tamali wutula dibombi ku ntu, wukhakuna kikhutu kavuata, wutula mioko ku ntu ayi waba dila beni.
20 Bosi khombꞌandi Absaloni wunyuvula: “Khombꞌaku Amnom nandi be kuvangila mambu amomo? Tamali, bika kuzabikisa mawu kuidi ni mutu, kibila nandi widi khombꞌaku ayi bika kutatubuka mu mambu amomo.” Bosi Tamali wutona kukalanga ku nzo khombꞌandi Absaloni ayi waba kalanga va naveka. 21 Bo Davidi kazaba mambu Amnom kavanga, nandi wudasuka vayi kabasa tomba ko kunyongisa muanꞌandi Amnom. Nandi waba kunzolanga beni, kibila wuba muanꞌandi wutheti. 22 Absaloni kasa kamba ko ni diambu kuidi Amnom. Nandi wunlundila nganzi mu kibila ki mambu matsoni kavangila khombꞌandi Tamali.
23 Bo vavioka mimvu miodi, bisadi bi Absaloni bayenda ku Baal-Hazor yidi ku ndeku kizunga ki mvila wu Efraim, muingi kuebotula mika mi mamemi ma Absaloni. Ayi Absaloni wutumisa bana boso ba ntinu muingi benda kuna. 24 Mu phila ayoyo, Absaloni wuyenda kuidi ntinu Davidi ayi wunkamba: “Minu kisadi kiaku yidi mu kubotula mika mi mamemi mama, diawu lemvuka, yintomba kutumisa ntinu ayi bisadi biaku muingi luenda yama.” 25 Vayi ntinu Davidi wukamba Absaloni: “Ndamba muanꞌama, befu kukuenda befu boso ngie wunkuiza tatubuka beni mu kibila kitu.” Kheti Absaloni waba tatamana kudinda ntinu muingi kenda, vayi ntinu kasa kuenda ko, vayi nandi wunsakumuna. 26 Absaloni wukamba ntinu Davidi: “Boti ngie mfumu wisinkuenda ko buna bika khombꞌama Amnom kenda yitu”. Vayi ntinu Davidi wunyuvula: “Kibila mbi wuntombila Amnom kenda yaku?” 27 Absaloni wutatamana kudinda ntinu. Mu kibila akiokio, ntinu Davidi wubika bana bandi boso kubunda mvandi Amnom, muingi benda kuidi Absaloni.
28 Ayi Absaloni wukamba bisadi biandi: “Banu bakubama, bo Amnom kankuiza kolo vinyu, minu yinkuiza mukamba ‘vondanu Amnom’ buna benu lufueti mvonda. Bikanu kumona boma kibila minu veka yidi mu kulutuma, diawu banu mangolo ayi monisanu kibakala.” 29 Bisadi bi Absaloni bavangila Amnom buna buawu Absaloni kaba kambila. Bo bana bankaka ba ntinu bamona mawu, bamaka mu ziphunda* ziawu ayi batina. 30 Bo bana ba ntinu baba vutuka ku nzo vamonika mutu wuyenda kue kamba ntinu Davidi mambu amama: “Absaloni bevonda bana boso ba ntinu, ni wumueka kasa sobila ko.” 31 Bo ntinu kayuwa mawu, wutelama, wukhakuna bikhutu biandi ayi wulala va tsi. Ayi bisadi bioso bi ntinu baba yandi mvandi bakhakuna bikhutu biawu.
32 Vayi Jonadabi muana Simeá khomba Davidi, wutuba: “A mfumu bana baku boso basa fua ko, Amnom nandi to befua kibila Absaloni nandi betuma bamvonda. Absaloni wuba mayindu amomo tona kilumbu Amnom kafuisa zitsoni khombꞌandi Tamali. 33 Diawu a ntinu, bika kukikinina mu mambu babe kukamba ti bana baku boso babe fua, kibila Amnom nandi to befua.”
34 Mu thangu beni, Absaloni wutina ayi bo vavioka mua thangu, nsungi wu divula no wuba kuyilu kibanga wumona batu baba kuiza mu nzila, va ndeku mongo. 35 Jonadabi wukamba ntinu: “Tala bana baku bama vutuka. Bawu basa fua ko dedi bo minu kisadi kiaku yibe tubila.” 36 Bo Jonadabi kamana kutuba, bana ba ntinu bavitila ayi baba dila beni, ntinu ayi bisadi biandi mvandi baba dila. 37 Absaloni wutina ayi wuyenda kuidi ntinu baba tedilanga Talmai muana wu Amiude waba kalanga ku divula di Gezur. Ayi mu bilumbu biwombo Davidi wudila mu kibila ki lufua lu muanꞌandi Amnom. 38 Bo Absaloni kayenda ku divula di Gezur, nandi wuzingila kuna mimvu mitatu.
39 Bosi ntinu Davidi waba tomba kumona Absaloni, kibila kasa bue ba ko beni mu kiunda mu kibila ki lufua lu Amnom.