BUKU YIMUADI YI SAMUELI

1 Bo Sauli kafua, ayi bo Davidi kafumina mu mvita wo kaye nuana na basi Amaleki, nandi wuviokisa bilumbu biodi ku Ziklague. 2 Mu kilumbu kintatu, vayiza dibakala dimueka difumina ku kibuangu Sauli baba nuanina mvita, nandi wuba bikhutu bibakuka na ntoto ku ntu. Bo kavitila vaba Davidi, nandi wufukama ayi wuyinika kizizi va tsi.

3 Davidi wunyuvula: “Kuidi ngie mafumina?” Nandi wumvutudila: “Minu yibe vuka mu mvita wo basi Isaeli babe nuana.” 4 Davidi wubue nyuvula: “Mambu mbi mabe monika? Lemvuka, khamba.” Nandi wunkamba: “Masodi ma Isaeli babe tina zimbeni ziawu, ayi bawombo mu bawu babe vangana phasi, bankaka babe fua. Sauli ayi muanꞌandi Yonatan mvandi babe fua.” 5 Davidi wuyuvula dibakala beni: “Buidi mazabila ti Sauli ayi muanꞌandi Yonatan mvandi babe fua?” 6 Dibakala beni wumvutudila: “Bo minu yibe vitila ku mongo wu Gilboa, yibe mona Sauli wuyekama va didionga diandi, ayi makalu ma mimvita ma zimbeni ayi masodi bandiatilanga mu mimvalu bafina fikama vo kabe ba. 7 Bo Sauli kabe kiebuka ayi kabe mbona, nandi bethela ayi minu yibe nkamba: ‘Minu kawu.’ 8 Nandi bekhuvula: ‘Ngie widi musi nani?’ Minu yibe mvutudila: ‘Yidi musi Amaleki.’ 9 Bosi nandi bekhamba: ‘Yiza mbanisa kuphonda, kibila yidi mu kutovuka beni.’ 10 Diawu yibe kuendila vo kabe ba ayi yibe mvonda, kibila yibe zaba ti kasinkuiza tatamana ko kuzinga, kibila bevangana beni phasi. Bosi yibe bonga kolowaꞌandi ayi nlunga wubedi mu koko kuandi, muingi kutuala biawu kuidi ngiewu mfumuꞌama.”

11 Bo Davidi kayuwa mambu amomo, nandi wukhakuna bikhutu biandi ayi babakala boso baba yandi, mvandi bakhakuna bikhutu biawu. 12 Bawu banyonga, badila ayi bavanga jejum nate va builu, mu kibila ki lufua lu Sauli, lu muanꞌandi Yonatan, mu kibila ki dikabu di Yave ayi mu kibila ki dikabu di Isaeli. Kibila bawombo mu bawu bafua mu mvita.

13 Bosi Davidi wubue yuvula ditoko beni: “Tatꞌaku widi nani?”Nandi wumvutudila: “Minu yidi muana wu musi Amaleki, vayi yidi nzenza ku kizunga akiki.” 14 Davidi wunkamba: “Kibila mbi ngie bekhambu muena boma kuvonda mutu Yave kasola?” 15 Bosi Davidi wutela disodi diandi dimueka ayi wunkamba: “Vonda dibakala adiodio.” Bosi disodi beni wuvonda dibakala beni. 16 Ayi Davidi wutuba: “Ngie veka widi fotu mu lufua luaku, kibila ngie betuba: ‘Minu yibe vonda mutu Yave kasola.’” Mambu amomo, mawu mabe tuadisa lufua luaku.

17 Bosi Davidi wuyola nkunga wu kiunda mu kibila ki lufua lu Sauli ayi lu muanꞌandi Yonatan, 18 ayi wutuba ti bafueti longa nkunga beni kuidi dikabu di Yuda. Ntu diambu wu nkunga beni widi “Ḿbasa” ayi wawu widi wusonama mu buku yi Jazar. Wawu wuntuba:

19 “Batu baku ba nzitusu ah Isaeli, bama bua mu miongo.

Masodi malutidi kupisuka babe bua.

25 Masodi malutidi mapisuka babe bua mu mvita.

Yonatan befua ku mbata mongo.

Mu minu, luzolo luaku lulutidi kena luzolo lu bakietu.

2 Bosi Davidi wuyuvula Yave: “Yifueti kue zingila mu mavula ma Yuda?” Yave wumvutudila: “Ngete yenda.” Davidi wubue nkuvula: “Buabu, ku divula mbi yifueti kuenda?” Nzambi wunkamba: “Yenda ku Hebrom.” 2 Bosi Davidi wuyenda ku divula beni va kimueka na bakietu bandi babuadi: Ainoa musi Jezreeli ayi Abigaili musi Karmelu no wuba nkazi wu Nabal. 3 Davidi mvandi wuyenda na babakala baba yandi, kadika mutu mu bawu wunata dikanda diandi, ayi bawu baye zingila mu mavula maba mafikama ku Hebrom. 4 Bosi babakala ba mvila wu Yuda bayenda kuba Davidi, ayi bambieka ntinu wu mvila wu Yuda.

Bawu bakamba Davidi: “Basi Jabes-Gileade, bawu bazikidi Sauli.” 5 Bo Davidi kayuwa mawu, nandi wufila mimvuala ku Jabes-Gileade muingi baba kamba mambu amama: “Bika Yave kalusakumuna, kibila benu lumonisini luzolo lukuikama kuidi Sauli mfumuꞌinu, bo lunzikidi. 6 Ayi bika Yave kalumonisa luzolo lukuikama ayi mamboti. Minu mvama yinkuiza lumonisa mamboti mu kibila ki mambu luvengi. 7 Buabu banu mangolo ayi monisanu kibakala, kibila mfumuꞌinu Sauli wufuidi ayi mvila wu Yuda bama mbieka ntinuꞌawu.”

8 Vayi Abner muana Ner, mfumu masodi ma Sauli, wunata Is-Bozeti muana Sauli ku Maanaim, divula didi ku khonzu yinkaka yi muila wu Yolidani, 9 ayi wumbieka ntinu wu Isaeli, wu mavula ma kizunga ki Ngileadi, ki Azer, ki Jezreeli, ki Efraim ayi ki Benyamini. 10 Is-Bozeti muana Sauli wuba 40 di mimvu bo bambieka ntinu wu Isaeli, ayi nandi wuyadila mu mimvu miodi. Vayi mvila wu Yuda baba buelanga mioko Davidi. 11 Davidi wuyadila mvila wu Yuda ku Hebrom mu 7 di mimvu ayi 6 di zingonda.

12 Bo vavioka mua thangu, Abner muana Ner ayi Is-Bozeti muana Sauli, bananguka ku Maanaim ayi bayenda ku Gibeão. 13 Joabe muana Zeruia ayi bisadi bi Davidi, mvandi bananguka ayi baye badengana va ndeku ditanga di nlangu di Gibeão. Dingumba dimueka diba ku khonzu yinkaka, ayi dingumba dinkaka diba ku khonzu yinkaka yi ditanga beni. 14 Bosi Abner wukamba Joabe: “Ndoko tusola masodi muingi bawu banuana vantualꞌitu.” Joabe wumvutudila: “Vasi diambu ko.” 15 Mu phila ayoyo, basola 12 di masodi baba mu mvila wu Benyamini, maba ku khonzu yi Is-Bozeti muana wu Sauli ayi 12 di masodi maba ku khonzu Davidi. 16 Bosi kadika mutu mu bawu bayisimbasana ku ntu ayi kadika mutu mu bawu wubanda wadi yandi mbedi ayi baboso bafua. Diawu bavanina kibuangu beni kidi ku Gibeão dizina Helkati-Hazurim.

17 Bosi vatona mvita wungolo, masodi ma Davidi banunga Abner na masodi ma Isaeli. 18 Joabe, Abizai ayi Azael bana batatu ba Zeruia, mvandi baba mu mvita beni. Azael wuba zithinu buka tsesi. 19 Azael wutona kukuka Abner. Nandi wutatamana kukuka Abner ayi kasa vekuka ko ne ku khonzu lubakala, ne ku khonzu lukietu. 20 Bo Abner katala kumbusa, nandi wunyuvula: “Ngie widi Azael?” Nandi wumvutudila: “Ngete, minu.” 21 Bosi Abner wukamba Azael: “Bika bue khuka, yenda ku khonzu yinkaka muingi wukuka mutu wunkaka ayi wubonga biuma biandi.” Vayi Azael wumanga ayi wutatamana kunkuka. 22 Abner wubue kamba Azael: “Bika bue khuka, khanu minu yekuvonda. Ayi minu kuvanga mawu, yinkuiza nyongisa khombꞌaku Joabe.” 23 Vayi Azael kasa bika ko kukuka Abner, diawu Abner kasimikina Azael didionga mu kivumu, ayi diawu dimbasikila kumbusa, bosi Azael wubua ayi wufua. Batu boso baba viokilanga va kibuangu Azael kafuila, baba telamanga vana.

24 Bosi Joabe ayi Abizai bakuka Abner. Bo buisi buaba kuila, bawu bavitila va mua mongo wu Amá, widi ku Gia mu nzila yi thandu yinkuenda ku Gibeão. 25 Ayi masodi ma mvila wu Benyamini bakutakana vaba Abner, bawu baba dingumba dimueka ayi baye telama va mua mongo. 26 Bosi Abner wutendukila Joabe: “Bukiedika ti tunkuiza tatamana to kunuana? Ngie wusa zaba ko ti ziphasi kuandi to tuidi mu kuyituadisa? Thangu mbi wunkuiza kambila masodi maku babika kubue tukuka, befu zikhomba ziawu?” 27 Joabe wumvutudila: “Yinleva phesi mu dizina di Nzambi yikiedika ti, boti ngie wusa tuba ko mambu amomo, khanu yono to va meni masodi mami bankuiza bika kulukuka.” 28 Bosi Joabe wusika phunzi ayi masodi mandi babika kukuka masodi ma Isaeli. Mu phila ayoyo, mvita wumana.

29 Mu builu boso bunani, Abner ayi masodi mandi, baviokila ku kizunga ki Arabá, muingi kusabuka muila wu Yolidani ayi ḿbuinga, bosi bavitila ku Maanaim. 30 Bo babika kukuka Abner, Joabe wukutikisa masodi moso ma Davidi ayi bamona ti vaba khambu 19 di masodi kubotula kuandi Azael. 31 Vayi masodi ma Davidi banunga ayi bavonda 360 di masodi ma Abner baba mu mvila wu Benyamini. 32 Bawu banata mvumbi wu Azael ayi baye zika wawu ku dibumbi di tatꞌandi didi ku Betelemi. Bosi Joabe ayi masodi maba yandi badiata builu boso ayi bo buisi bukia, bawu bavitila ku Hebrom.

3 Batu baba buelanga mioko Sauli ayi bo babe buelanga mioko Davidi, batatamana kunuana mimvita mu thangu yiwombo. Batu baba buelanga mioko dikanda di Davidi baba buelama, vayi batu baba buelanga mioko dikanda di Sauli baba dekuka.

2 Mu thangu ayoyo, Davidi wubuta bana ku Hebrom. Amnom, nandi muana wutheti wu Davidi. Mamꞌandi wuba Ainoa musi Jezreeli. 3 Kileabe nandi muana wummuadi wu Davidi. Mamꞌandi wuba Abigaili musi Karmelu no wuba nkazi wu Nabal. Absaloni nandi muana wuntatu wu Davidi. Mamꞌandi wuba Maká ayi Maká wuba muana wu Talmai ntinu Gezur. 4 Adonia nandi muana wunna wu Davidi. Mamꞌandi wuba Hagite. Sefatia nandi muana wuntanu wu Davidi. Mamꞌandi wuba Abital. 5 Itreão nandi muana wunsambanu wu Davidi. Mamꞌandi wuba Eglá. Bana boso abobo ba Davidi, babutukila ku divula di Hebrom.

6 Bo batu baba buelanga mioko Sauli ayi batu baba buelanga mioko Davidi batatamana kunuana mimvita, Abner wutatamana kukindisa kimfumu kiandi mu dikanda di Sauli. 7 Sauli wuba kimasi baba tedilanga Rispa muana wu Aiá. Kilumbu kimueka Is-Bozeti wukamba Abner: “Kibila mbi ngie bebundinina nyitu na kimasi tatꞌami kabika?” 8 Abner wudasuka mu kibila ki mambu Is-Bozeti katuba, diawu kankambila: “Ngie wummuena ti minu yima kubalukila ayi yeka ku khonzu basi Yuda? Nate bubu minu yimmonisanga lukuikumunu kuidi dikanda di Sauli, kuidi zikhomba ziandi ayi kuidi bakundi bandi, ayi yintatamananga ku kukieba muingi Davidi kabika ku kuvonda. Buabu ngie mathumisa muingi kufhundisa mu kibila ki mua nzimbala yima vanga matedi nkietu awowo. 9 Bika Nzambi kathuadisa ziphasi minu kukhambu vanga mambu Yave kakanikisa Davidi, 10 voti kubotula luyalu mu dikanda di tatꞌaku ayi kuvana luawu kuidi Davidi muingi kayadila dikabu di Isaeli ayi mvila wu Yuda, kutonina ku Dan nate ku Berseba.” 11 Is-Bozeti kasa bue tuba ko ne diambu, kibila waba mona boma Abner.

12 Muna thangu beni, Abner wufila zimvuala muingi bekamba Davidi: “Nani widi nsua wu kuyala ntoto awuwu?” Ayi wubue tuba: “Vanga yama luwawanu, ayi minu yinkuiza vanga mamoso muingi dikabu dioso di Isaeli baba ku khonzoꞌaku.” 13 Davidi wumvutudila: “Vasi diambu ko, minu yemvanga yaku luwawanu. Vayi yi kudinda, bo wala kuiza, fueti tuala mvandi nkaziꞌama Mikal muana Sauli.” 14 Bosi Davidi wufila zimvuala muingi bekamba Is-Bozeti muana Sauli: “Fila nkaziꞌama Mikal no yikuela mu kuvonda 100 di masodi* ma basi Filistea.” 15 Mu phila ayoyo, Is-Bozeti wutuma muingi babotula Mikal ku nzo nnuniꞌandi Paltiel muana wu Laís. 16 Vayi Paltiel waba dila ayi waba kue landakananga nkaziꞌandi nate ku Baurim. Bosi Abner wunkamba: “Vutuka ku nzo.” Nandi wuvutuka.

17 Mu thangu ayoyo, Abner wufila zimvuala muingi bekamba mambu amama kuidi bakulutu ba Isaeli: “Vama vioka thangu yiwombo tona luntombanga muingi Davidi kaba ntinu. 18 Buabu thangu yima fuana muingi luvanga dioso diambu, kibila Yave wukamba Davidi: “Mu nzila kisadi kiama Davidi, minu yinkuiza vukisa dikabu di Isaeli mu mioko mi basi Filistea ayi mu mioko mi zimbeni ziawu zioso.’” 19 Bosi Abner wuyoluka na mvila wu Benyamini. Abner mvandi wuyenda ku Hebrom muingi kue zabikisa Davidi makani basi Isaeli ayi mvila wu Benyamini babaka.

20 Bo Abner na 20 di babakala bayenda ku Hebrom muingi kue yoluka na Davidi, baba vangila nkungi kuidi Davidi. 21 Bosi Abner wukamba Davidi: “Ah ntinu phana nsua yikutikisa dikabu muingi bawu bavanga yaku luwawanu ayi ngie wunkuiza yadila biabioso. Diawu Davidi kavanina Abner nsua ayi nandi wuyenda mu nsika.

22 Mu thangu beni, Joabe na masodi ma Davidi bafumina mu mvita ayi batuala biuma babaka mu mvita. Abner kasa ba ko na Davidi ku Hebrom, kibila Davidi wumvana nsua muingi kenda mu nsika. 23 Bo Joabe ayi masodi moso bavitila, batu bakamba Joabe: “Abner muana Ner bekuiza tala ntinu Davidi, ayi ntinu bembika muingi kenda mukhambu kumvangila ne diambu dimbi.” 24 Diawu Joabe kayendila kuidi ntinu Davidi ayi wunkamba: “Kibila mbi ngie ntinu bevangila mambu amomo? Abner bekuiza kuidi ngiewu ayi ngie bembika muingi kavuka mu mioko miaku? 25 Ngie mfumu zebi buboti mayindu ma Abner muana Ner. Nandi kabe kuizila akuku, muingi ku kuvuna ayi kuzaba mambu moso ngie ntinu widi mu kuvanga.”

26 Bosi Joabe wunanguka vaba Davidi ayi wufila zimvuala muingi belanda Abner. Ayi bawu bayenda kuenlanda va dikanga di Sirá, vayi Davidi kasa zaba ko mawu. 27 Bo Abner kavitila ku Hebrom, Joabe wunnata va muelu wu divula muingi baba buadi bayoluka. Vayi Joabe wubanda Abner mbedi mu kivumu ayi nandi wufua. Kavangila mawu kibila Abner wuvonda Azael khombꞌandi. 28 Bo Davidi kazaba mambu mamonika, nandi wutuba: “Minu ayi batu boso badi mu kintinu kiama, tuisi ko fotu va mesu ma Yave mu lufua lu Abner muana Ner. 29 Bika Joabe ayi dikanda di tat’andi baba fotu mu lufua lu Abner. Va dikanda diandi valasa kambuanga ko mutu widi mbela yi kubasikanga biuma ku pheni, widi buazi, wunnunganga to kuvanga bisalu bi bakietu, kualasa kambuanga ko mutu wumfuila mu mvita ayi kualasa kambuanga ko mutu wumfua nzala.” 30 Mu phila ayoyo, Joabe ayi khombꞌandi Abizai bavonda Abner kibila Abner wuvonda Azael khombꞌawu ku Gibeão.

31 Davidi wukamba Joabe ayi masodi moso baba yandi: “Khakunanu bikhutu binu, vuatanu zitsaku ayi dilanu mu kibila ki lufua lu Abner.” Ayi ntinu Davidi wuba vambusa kipoya baba natina mvumbi wu Abner. 32 Bazika Abner ku Hebrom ayi ntinu Davidi wudila beni va dibumbi bazikila Abner. Dikabu dioso mvandi baba dila. 33 Ayi ntinu Davidi wuyola nkunga awuwu wu kiunda mu kibila ki lufua lu Abner:

“Kibila mbi Abner kabe fuila buka mutu wuphamba?

Ngie befua dedi bo bumfuilanga bandidu.”

Bosi dikabu dioso babue dila mu kibila ki lufua lu Abner.

35 Bosi dikabu bayenda vaba Davidi muingi kumbomba. Bawu bannatina bidia muingi kadia, vayi nandi wuleva phesi mu kutuba: “Bika Nzambi kathuadisa ziphasi minu kudia kioso kiuma ava khotolo muinya.” 36 Bo dikabu bamona mawu, bawu bayangalala. Ayi bawu baba zolanga mambu moso ntinu kaba vanganga. 37 Mu phila ayoyo, masodi moso ma Davidi ayi dikabu di Isaeli bavisa muna kilumbu beni ti, ntinu Davidi kasa ba ko fotu mu lufua lu Abner muana Ner. 38 Bosi ntinu Davidi wukamba bisadi biandi: “Zabanu kuinu ti, bubu mfumu yinneni yibe fua ku Isaeli. 39 Kheti luma mbieka ntinu, vayi bubu yidi beni mu kiunda. Ayi babakala abobo, bana ba Zeruia badi beni buphunya. Bika Yave kavutudila mambi kuidi mutu widi mavanga mambi.”

4 Bo Is-Bozeti muana Sauli kayuwa ti Abner mafua ku Hebrom, mangolo mammana ayi dikabu dioso bayisa ba mu boma. 2 Vaba bisadi biodi bi Is-Bozeti muana Sauli baba tuadisanga dingumba di batu baba mavanga mambi. Wumueka baba kuntedilanga Baaná ayi wunkaka Rekabi, bawu baba bana ba Rimom musi Beeroti wuba mu mvila Benyamini. (Kibila divula di Beeroti mvandi diba mu khati kizunga ki mvila wu Benyamini. 3 Zi Beeroti batinina ku Gitaim ayi kuawu banzingilanga nate bubu.)

4 Bo Sauli ayi Yonatan bafua ku Jezreeli, Mefibozeti muana wu Yonatan wuba mimvu mitanu. Bo batuala tsangu ti Sauli ayi Yonatan babe fua, nkietu waba kiebanga Mefibozeti wunnanguna ayi wutina. Bo kaba tina, muana beni wubua ayi wuyiza ba malu mabela.

5 Rekabi ayi Baaná bana ba Rimom musi Beeroti, bayenda ku nzo Is-Bozeti va muinya bo nandi kaba lala. 6 Bawu bakota ku nzo yi Is-Bozeti buka bawu bakue landa trigu ayi babanda Is-Bozeti mbedi mu kivumu. Bosi Rekabi ayi khombꞌandi Baaná, batina. 7 Bo bakota ku nzo, bawu baye bata Is-Bozeti wulala va kika, bamvonda ayi banzenga ntu. Bosi babonga ntu beni ayi badiata builu boso mu nzila yidi ku Arabá. 8 Bosi bavitila ku Hebrom ayi bamonisa ntu wu Is-Bozeti kuidi Davidi ayi bankamba: “Awuwu widi ntu wu Is-Bozeti muana Sauli mbeniꞌaku, no waba tomba ku kuvonda. Bubu Yave mavutudila mambi kuidi Sauli ayi kuidi dikanda diandi dioso.”

9 Vayi Davidi wukamba Rekabi ayi Baaná bana ba Rimom musi Beeroti: “Yinleva phesi mu dizina di Yave no wuphukisa mu ziphasi ziama zioso, 10 ti bo dibakala dimueka kayiza kukhamba: ‘Sauli befua,’ mu kuyindula ti zitsangu zimboti kathuadila, minu yimbuila ayi yimvonda ku Ziklague. Awowo, wawu mfutu katambula mu zitsangu kathuadila. 11 Yidi bibila biwombo muingi kuvangila momawu mambu kuidi batu badi mavanga mambi, babe vonda mutu wukhambulu fotu ku khati nzoꞌandi ayi va kika kiandi. Buabu yemvana tsembolo kuidi batu babe tengula menga ma mutu wukhambulu fotu ayi ye luvonda.” 12 Bosi Davidi wutuma masodi mandi bavonda babakala beni. Bawu bazenga mioko ayi malu mawu ayi bazengidika zinyitu ziawu va ndeku ditanga ku Hebrom. Vayi ntu wu Is-Bozeti bazika wawu ku dibumbi di Abner ku Hebrom.

5 Buviokila thangu, mimvila mioso mi Isaeli bayenda kuidi Davidi ku Hebrom ayi bankamba: “Befu boso tuidi dikanda dimueka. 2 Mu mimvu kumbusa bo Sauli kaba ntinu, ngie waba tuadisanga masodi ma Isaeli mu mimvita. Ayi Yave wu kukamba: “Ngie wala tuadisa dikabu diama Isaeli ayi wunkuiza ba ntinu wu Isaeli.” 3 Mu phila ayoyo, bakulutu boso ba Isaeli bayenda kuidi Davidi ku Hebrom ayi ntinu Davidi wuvanga yawu luwawanu ku Hebrom vantuala Yave. Bosi babieka Davidi ntinu wu Isaeli.

4 Bo babieka Davidi ntinu, nandi wuba 30 di mimvu ayi wuyadila mu 40 di mimvu. 5 Davidi wuyadila mvila wu Yuda ku Hebrom mu 7 di mimvu ayi 6 di zingonda ayi wuyadila mimvila mioso mi Isaeli ku Yelusalemi mu 33 di mimvu. 6 Ntinu Davidi ayi masodi mandi bayenda ku Yelusalemi, muingi kue nuanisa zi Jebuzeu baba kalanga ku kizunga beni. Zi Jebuzeu bavueza Davidi, mu kutuba: “Ngie walasa nunga ko kukota ku divula adidi. Batu bafua mesu ayi babela malu, bala nunga ku kukuka.” Bawu baba muena ti Davidi kalendi nunga ko kukota ku divula diawu.’ 7 Vayi Davidi wununga kuvua divula di Sioni, dio bantedilanga bubu divula di Davidi. 8 Mu kilumbu beni, Davidi wukamba masodi mandi: “Masodi mankuiza nuanisa zi Jebuzeu bafueti kuendila mu nzila* yimviokilanga nlangu, muingi kuvonda batu abobo badi buka batu bafua mesu ayi babela malu bo Davidi kanlendanga.” Diawu bantubilanga: “Batu bafua mesu ayi babela malu balasa kotanga ko ku nzo ayiyi.” 9 Bosi Davidi wutona kuzingila ku divula beni, dio bavana dizina divula di Davidi. Ayi nandi wutunga bibaka kutonina ku yilu mongo nate ku khati divula. 10 Mu phila ayoyo, kintinu ki Davidi kitatamana kukindama, kibila Yave Nzambi nkua minkangu, waba kunsadisa.

11 Hirão ntinu Tile wufila mimvuala kuidi Davidi, mvandi wufila mabaya ma cedro, batu bamvanganga kisalu ki mabaya ayi batu bantunganga zinzo, muingi betunga bibaka bi divula ayi batungila Davidi nzo. 12 Davidi wuvisa ti Yave wukindisa kintinu kiandi ku Isaeli ayi Nzambi kavangila mawu, muingi kutuadisa ndandu kuidi dikabu diandi Isaeli.

13 Bo Davidi kabotuka ku Hebrom muingi kue zingila ku Yelusalemi, nandi wubue baka bimasi ayi wukuela bakietu bankaka, mvandi wubuta bana ba babakala ayi ba bakietu. 14 Ababa bawu bana Davidi kabuta ku Yelusalemi: Samua, Sobabi, Natani, Salomo, 15 Ibar, Elizua, Nefegue, Jafia, 16 Elisama, Eliada ayi Elifeleti.

17 Bo basi Filistea bazaba ti bama bieka Davidi ntinu wu Isaeli, bawu bakutikisa masodi mawu muingi kue buila Davidi. Vayi bo Davidi kazaba mawu, nandi wutina. 18 Bosi basi Filistea bayenda ayi bayevundila ku Refaim. 19 Davidi wuyuvula Yave: “Yifueti kue nuanisa basi Filistea? Ngie wunkuiza tsadisa yiba nunga?” Yave wumvutudila: “Yenda, kibila yinkuiza kusadisa muingi wuba nunga. 20 Bosi Davidi wuyenda ku Baal-perazim,* wunuanisa ayi wununga basi Filistea. Diawu Davidi katubila: “Yave mavonda zimbeni ziama vantualꞌama dedi bo nlangu wunzibudilanga nzila.” Diawu Davidi katedila kibuangu beni Baal-perazim. 21 Basi Filistea bayekula bitumba biawu vana ayi Davidi na masodi mandi banata biawu.

22 Bo vavioka mua thangu, basi Filistea babue kuiza ayi bayevundila ku Refaim. 23 Davidi wuyuvula Yave ayi Nzambi wumvutudila: “Bika kuba nuanisina kuntuala, vayi wuba yendila kumbusa muingi wuba nuanisina va ndeku minti mimbutanga zi amora. 24 Ngie kukuwa biyoko bi mimvita vayilu minti mimbutanga zi amora, ngie fueti monisa kibakala kibila Yave widi vantualꞌaku muingi ku kusadisa kununga basi Filistea.” 25 Davidi wuvanga mamoso buna buawu Yave kantumina ayi nandi wuvonda basi Filistea kutona ku Geba nate ku Gezer.

6 Davidi wukutikisa 30.000 di masodi ma Isaeli malutidi kupisuka. 2 Bosi Davidi ayi masodi maba yandi bayenda ku Baal-Yuda, muingi kue landa Kasu yi Luwawanu yi Nzambi yikiedika, bansadilanga muingi kuzaba mayindu ma Yave nkua minkangu no widi wukala vambata zikerubim. 3 Vayi batula Kasu yi Luwawanu yi Nzambi yikiedika mu dikalu dimona, muingi kubotula yawu ku nzo Abinadabi yiba vambata mua mongo. Uzá ayi Aiô bana ba Abinadabi, bawu baba tuadisa dikalu beni.

4 Mu phila ayoyo, bawu babotula Kasu yi Luwawanu yi Nzambi yikiedika ku nzo Abinadabi yiba va mua mongo, ayi Aiô wuba vantuala dikalu diaba nata Kasu beni. 5 Davidi ayi dikabu dioso di Isaeli baba kina vantuala Yave ayi baba sika bisikulu bivangulu mu mabaya ma junípero, mvandi baba sika zi harpa, zi pandeiro, zitsangu,* zi símbalu ayi bisikulu binkaka. 6 Vayi bo bavitila va kibuangu ki Nakom ki kusosila mbongo, Uzá wusimba Kasu yi Luwawanu yi Nzambi yikiedika kibila zingombi babina buisa Kasu beni. 7 Yave wudasuka ayi wuvonda Uzá, kibila kasa monisa ko lukinzu bo kasimba Kasu yi Luwawanu yi Nzambi yikiedika, ayi nandi wufuila vana ndeku Kasu beni. 8 Vayi Davidi wunyonga beni, kibila Yave wuvonda Uzá. Diawu bavanina kibuangu beni dizina Peres-Uzá* ayi buawu bantedilanga kibuangu beni nate bubu. 9 Muna kilumbu beni, Davidi wuyiza ba boma bu Yave ayi wutuba: “Buidi yinkuiza nungina kunata Kasu yi Luwawanu yi Yave ku divula diama?” 10 Davidi kasa bue nata ko Kasu yi Luwawanu yi Yave ku divula di Davidi. Vayi Davidi wutuma banata yawu ku nzo Obede-Edom musi Gati.

11 Kasu yi Luwawanu yi Yave yiba ku nzo Obede-Edom musi Gati mu zingonda zitatu, ayi Yave waba sakumunanga Obede-Edom ayi baboso baba kalanga ku nzoꞌandi. 12 Bosi bazabikisa ntinu Davidi mambu amama: “Yave widi mu kusakumuna Obede-Edom ayi biuma biandi bioso, mu kibila ki Kasu yi Luwawanu yidi ku nzoꞌandi.” Bosi Davidi wuyenda ku nzo Obede-Edom muingi kue landa Kasu yi Luwawanu yi Nzambi yikiedika, muingi kanata yawu ku divula di Davidi. 13 Bo batu baba nata Kasu yi Luwawanu yi Yave badiata mua nkadu, Davidi wuvonda ngombi ayi muana ngombi muingi kuvana nkhailu.

14 Davidi waba kina beni vantuala Yave ayi nandi wuvuata éfode yivangulu mu minsinga mi linho. 15 Davidi ayi dikabu dioso di Isaeli baba nata Kasu yi Luwawanu yi Yave mu mayangi ayi baba kue sikanga ziphunzi. 16 Vayi bo Kasu yi Luwawanu yi Yave yivitila ku divula di Davidi ayi bo Mikal muana Sauli katala va nela, nandi wumona Davidi waba kina vantuala Yave ayi nandi wutona kunlenza kutsi ntima. 17 Bosi banata Kasu yi Luwawanu yi Yave ku tenda Davidi katunga muingi kutula Kasu beni. Bosi Davidi wuvana Yave minkhailu miviku ayi minkhailu mi kithuadi. 18 Bo Davidi kamana kuvana minkhailu beni, nandi wusakumuna dikabu mu dizina di Yave, nkua minkangu. 19 Mvandi wuvana kuidi kadika mutu mu dikabu di Isaeli dipha didi buka nlunga, bolu yivangulu mu zitamara ayi bolu yivangulu mu makundi ma vinyu mayuma. Bosi dikabu dioso dinanguka ayi kadika mutu wuvutuka ku nzoꞌandi.

20 Bo Davidi kavutuka muingi kusakumuna dikanda diandi, Mikal muana Sauli wuye ndengana ayi wunkamba: “Ngie beyifuisa beni zitsoni mu phila bekinina buka kivungisi, vantuala bisadi biaku bi babakala ayi bi bakietu.” 21 Bosi Davidi wukamba Mikal: “Minu yibe kina vantuala Yave no wutsola muingi yiba ntinu wu Isaeli dikabu di Yave, kubika kuandi tatꞌaku ayi dikanda diandi dioso. Diawu minu yinkuiza tatamana kukina vantuala Yave, 22 mvandi yinkuiza luta kukikulula vantuala Nzambi ayi yinkuiza tatamana kuvanga mambu mammonisa ti minu yidi mutu wuphamba. Vayi bisadi abiobio ngie betubila, bawu bankuiza nzitisa.” 23 Mu kibila akiokio, Mikal muana Sauli, kasa buta ko muana nate kafua.

7 Bo ntinu katona kukalanga ku nzoꞌandi ayi bo Yave kamvana ndembama mu zimbeni ziandi zioso, 2 Ntinu Davidi wukamba ḿbikudi Natani: “Tala, minu yidi mu kuzingila mu nzo yimboti yivangulu mu mabaya ma cedro, vayi Kasu yi Luwawanu yi Nzambi yikiedika, yidi ku tenda.” 3 Bosi Natani wukamba ntinu: “Vanga mamoso wuntomba, kibila Yave widi yaku.”

4 Muna builu beni, Yave wukamba Natani mambu amama: 5 “Yenda kamba kisadi kiama Davidi: ‘Buakabu butubidi Yave: “Kibila mbi ngie wuntomba kuthungila nzo muingi yikalanga? 6 Minu yikalanga ko mu nzo, tona kilumbu yibotula dikabu diama Isaeli ku Ngipiti nate bubu, vayi yinzingilanga mu bibuangu biviakana, mu tenda ayi mu nzo yinlongo. 7 Mu thangu yoso yima diatanga na dikabu di Isaeli, bukiedika ti minu yimana kuvula kuidi wumueka mu mintuadisi mi Isaeli, no minu yisola muingi katuadisa dikabu diama: ‘Kibila mbi benu mukhambu thungila nzo yivangulu mu mabaya ma cedro?”” 8 Kamba mambu amama kuidi kisadi kiama Davidi: ‘Buakabu butubidi Yave nkua minkangu: “Minu yiku sola bo wuba nsungi wu mamemi, muingi wuba ntuadisi wu dikabu diama Isaeli. 9 Minu yala ba yaku koso wunkuenda, ayi yala bunga zimbeni ziaku zioso. Mvandi yinkuiza vanga wuba beni wuzabakana dedi bo buididi batu badi beni bazabakana va ntoto. 10 Yinkuiza sola kibuangu muingi dikabu diama Isaeli bakalanga. Bawu bala zingila kuna ayi ne mutu kalasa bue batatisanga ko. Zimbeni ziawu balasa bue batatisanga ko dedi bo baba bavangilanga kumbusa, 11 tona mu kilumbu yisola mintuadisi muingi batuadisanga dikabu diama Isaeli. Yinkuiza vanga wuba mu ndembama kuidi zimbeni ziaku zioso.

“‘“Yave mvandi be kukhamba ti, Yave wala tsikika luyalu va dikanda diaku. 12 Bo ngie wala fua ayi bo bala kuzika va kimueka na zikhaya ziaku, minu yala vana luyalu kuidi wumueka mu bana baku ayi yala tsikika kintinu kiandi. 13 Nandi wala thungila nzo muingi kuzitisa dizina diama ayi minu yala tsikika kintinu kiandi mu zithangu zioso. 14 Minu yala ba tatꞌandi ayi nandi wala ba muanꞌama. Ayi na kuvanga nzimbala, minu yala kunsemba, dedi bo tata kansembilanga muana. 15 Yalasa manisa ko luzolo luama lukuikama mu nandi, dedi bo yimanisina mu Sauli no yibotula mu luyalu, muingi ku kuvingisa. 16 Vayi kintinu kiala tatamana kuidi ngiewu ayi kuidi dikanda diaku, mu zithangu zioso. Mvandi kintinu kiaku kiala tatamana kisikama mu zithangu zioso”’”

17 Bosi Natani wukamba Davidi mambu moso Nzambi kanzabikisa.

18 Mu kibila akiokio, ntinu Davidi wuyenda vantuala Yave ayi wuvanga nsambu: “A Yave Mfumu Yilutidi, minu yidi nani? Ayi nkinza mbi dikanda diama didi, muingi wuphangila mambu moso amomo mamboti? 19 Kubotula kuandi amomo a Yave Mfumu Yilutidi, ngie mvaku betuba ti kisadi kiaku wala tatamana mu thangu yiwombo kuntuala. Ayi ni mutu kalendi balula ko thuadusulu ayoyo, a Yave Mfumu Yilutidi. 20 A Yave Mfumu Yilutidi, mbi binkaka kisadi kiaku Davidi kalenda bue tuba, mu kumona ti ngie tsebi buboti? 21 Mu kibila ki diambu diaku, ayi mu kutadila luzolo luaku, ngie mazabikisa mambu amomo ma kukuitukila kuidi kisadi kiaku. 22 Diawu ngie wididi Nzambi yi kukuitukila a Yave Mfumu Yilutidi, vasi ko Nzambi yinkaka widi buka ngiewu. Ayi mambu moso tumana longuka matedi ngiewu, mamvana bivisa mu mawu. 23 Vasi ko dikabu dinkaka va ntoto didi buka dikabu diaku Isaeli, ngie wukula dikabu diaku muingi kuzitisa dizina diaku, mu kuvangila dikabu diaku mambu ma kukuitukila. Ngie wutulula mimvila miwombo ayi zinzambi ziawu, muingi kutuadisa ndandu kuidi dikabu diaku dio ngie wukula ku Ngipiti. 24 A Yave Nzambi, ngie wusola dikabu di Isaeli, muingi ditatamana kuba dikabu diaku ayi ngie wuyiza ba Nzambiꞌawu.

25 “Buabu a Yave Nzambi, bika mambu matuba matedi kisadi kiaku ayi dikanda diandi, matatamana kusalama mu zithangu zioso, dedi bo matubila. 26 Bika dizina diaku ditatamana kuzitusu mu zithangu zioso, muingi batu batubanga: ‘Yave nkua minkangu, widi Nzambi yi dikabu di Isaeli,’ ayi bika luyalu lutatamana lusikama va dikanda di kisadi kiaku Davidi. 27 Kibila ngie Yave nkua minkangu, Nzambi yi Isaeli, bezabikisa mambu amama kuidi kisadi kiaku, mu kutuba: ‘Luyalu luala tatamana va dikanda diaku.’ Diawu kisadi kiaku kabe bakila mangolo ma kuvanga nsambu awuwu. 28 A Yave Mfumu Yilutidi, ngie widi Nzambi yikiedika ayi mamoso wuntubanga, madi makiedika ayi ngie veka bekanikisa mambu amomo mamboti kuidi kisadi kiaku. 29 Buabu yiku dinda muingi wusakumuna dikanda diama, muingi bawu batatamana kubaka lukiebu luaku mu zithangu zioso. Kibila ngie veka bekanikisa mambu amomo a Yave Mfumu Yilutidi. Ayi bika dikanda di kisadi kiaku, ditatamana kubaka lusakumunu luaku.”

8 Bo vavioka mua thangu, Davidi wununga basi Filistea ayi nandi wuvua divula di basi Filistea baba tedilanga Metegue-Amá.

2 Davidi wunuanisa ayi wununga basi Moabi, wuba vanga balala va tsi ayi wuba kabula mu mangumba matatu. Wuvonda mangumba muadi ayi wubika dingumba dimueka. Ayi basi Moabi bayiza ba bisadi bi Davidi ayi baba kumfutanga ziphaku.

3 Bo Hadadezer ntinu wu Zobá muana wu Reobi, kaba kuenda ku kizunga ki muila wu Eufrate muingi kue kindisa kintinu kiandi, Davidi wunnunga. 4 Davidi wubuila 1.700 di masodi ma Hadadezer baba diatilanga mu mimvalu ayi 20.000 di masodi baba diatilanga dimalu. Bosi Davidi wuzenga bikodi bi mimvalu mintitikanga makalu ma mimvita, vayi wubika to 100 di mimvalu.

5 Bo masodi ma basi Silia yidi ku Damasco bayiza sadisa Hadadezer ntinu wu Zobá, Davidi wuvonda 22.000 di masodi ma basi Silia. 6 Davidi wubika masodi mandi ku Silia yidi ku Damasco. Ayi basi Silia bayiza ba bisadi bi Davidi ayi baba kumfutanga ziphaku. Yave waba sadisanga Davidi mu mimvita mioso kaba nuananga. 7 Davidi wubonga minkaku mioso mi bisadi bi Hadadezer mivangulu mu wola ayi wunata miawu ku Yelusalemi. 8 Davidi mvandi wubonga cobre yiwombo ku divula di Betá ayi ku divula di Berotai, mavula ma Hadadezer.

9 Toi ntinu wu Hamati, wuyiza zaba ti Davidi wununga masodi moso ma Hadadezer. 10 Diawu ntinu Toi kafidila muanꞌandi Jorão kuidi ntinu Davidi muingi kumvana mboti ayi kuntonda mu kununga Hadadezer, kibila Hadadezer waba nuanisanga beni Toi. Jorão wunatina Davidi biuma bi wola, bi palata ayi biuma bi cobre. 11 Ayi ntinu Davidi wukabila biuma beni kuidi Yave kubunda mvandi biuma katuala mu mimvita kanuana 12 na basi Silia, basi Moabi, basi Amom, basi Filistea ayi basi Amaleki, kubunda mvandi biuma katuala mu mvita kanuana na Hadadezer ntinu wu Zobá muana wu Reobi. 13 Davidi mvandi wuyiza luta ba wuzabakana, bo kafumina mu mvita kavondila 18.000 di masodi ma basi Edom mu ḿbuinga wu tsalu. 14 Davidi wutula masodi mandi ku kizunga ki Edom ayi basi Edom boso bayiza ba bisadi bi Davidi. Yave waba sadisanga Davidi kununga mimvita mioso kaba nuananga.

15 Davidi waba yadila basi Isaeli boso ayi nandi waba yadilanga mu phila yisonga. Luyalu luandi luaba tuadisanga ndandu kuidi dikabu dioso. 16 Joabe muana wu Zeruia, nandi wuba mfumu masodi ma Davidi ayi Yozafati muana wu Ailudi, nandi waba sonikanga mambu mabe monikanga mu luyalu. 17 Zadoki muana wu Aitubi ayi Aimeleki muana wu Abiatali baba zinganga nzambi ayi Seraía nandi wuba nsoniki wu ntinu. 18 Benaia muana wu Jeoiada, nandi waba tuadisanga Zikeretita ayi Zipeletita. Ayi bana ba Davidi bayiza ba zimfumu zi minyadi.

9 Bosi Davidi wuyuvula: “Vakhidi mutu va dikanda di Sauli, no minu yilenda monisa luzolo lukuikama, mu kibila ki Yonatan?” 2 Vaba dibakala dimueka waba sadilanga Sauli, baba tedilanga Ziba. Ntinu Davidi wuntumisa ayi wunyuvula: “Ngie widi Ziba?” Nandi wumvutudila: “Ngete, minu yidi kisadi kiaku.” 3 Ntinu wunyuvula: “Va dikanda di Sauli vakhidi mutu wumonyo no minu yilenda monisa luzolo lukuikama lu Nzambi?” Ziba wumvutudila: “Ngete, vadi muana wu Yonatan, vayi nandi widi malu mabela.” 4 Ntinu wunyuvula: “Kuidi kakeli?” Ziba wumvutudila: “Widi ku Lo-Debar, ku nzo yi Makir muana wu Amiel.”

5 Muna thangu beni, ntinu Davidi wutuma muingi benlanda ku Lo-Debar, ku nzo Makir muana wu Amiel. 6 Bo kavitila vaba Davidi, Mefibozeti muana wu Yonatan wufukama ayi wuyinika kizizi va tsi. Bosi Davidi wuntela: “Mefibozeti.” Nandi wumvutudila: “Minu kawu kisadi kiaku.” 7 Davidi wunkamba: “Bika kumona boma, kibila minu yinkuiza kumonisa luzolo lukuikama mu kibila ki tatꞌaku Yonatan ayi yinkuiza kuvutudila zitsola zioso zi khayꞌaku Sauli ayi ngie wunkuiza dianga yama.”

8 Bosi nandi wufukama ayi wutuba: “Minu yidi nani, muingi ngie mfumu wumonisa mamboti kuidi kisadi kiaku widi buka mbua yifua?” 9 Bosi ntinu wutumisa Ziba kisadi ki Sauli ayi wunkamba: “Bubu yidi mu kuvana kuidi ntekulu wu mfumuꞌaku, biuma bioso Sauli ayi dikanda diandi babika. 10 Ngiewu, bana baku ayi bisadi biaku, benu lunkuiza vatanga zitsola beni ayi kuvela mbongu, muingi kudikilanga dikanda di Mefibozeti. Vayi Mefibozeti ntekulu wu mfumuꞌaku, wunkuiza dianga yama.

Ziba wubuta 15 di bana ayi wuba 20 di bisadi. 11 Bosi Ziba wukamba ntinu: “Kisadi kiaku wunkuiza vanga mamoso ngie matuba.” Mu phila ayoyo, Mefibozeti waba dianga na Davidi ayi nandi wuba buka muana wu ntinu. 12 Mefibozeti mvandi wuba muana wu kilezi, baba tedilanga Mika. Ayi batu baba kalanga ku nzo yi Ziba, bayiza ba bisadi bi Mefibozeti. 13 Mefibozeti waba kalanga ku Yelusalemi ayi nandi waba dianga va kimueka na ntinu. Nandi wuba malu mabela.

10 Buviokila thangu ntinu wu Amom wuyiza fua ayi muanꞌandi Hanum wuyiza ba ntinu va mvingiꞌandi. 2 Bosi Davidi wutuba: “Yemmonisa luzolo lukuikama kuidi Hanum muana wu Naás dedi bo tatꞌandi Naás kambonisina luzolo lukuikama.” Mu phila ayoyo, Davidi wufila bisadi biandi muingi bebomba Hanum mu kibila ki lufua lu tatꞌandi. Vayi bo bisadi bi Davidi bavitila kuna, 3 minyadi mi basi Amom bakamba mfumuꞌawu Hanum: “Ngie wummuena ti Davidi kabe fidila batu abobo biza kubomba muingi kuzitisa tatꞌaku? Davidi kabe bafidila muingi biza fiongunina divula ayi kutulula diawu.” 4 Bosi Hanum wubuila batu Davidi kafila, wuba zenga ndambu mayedu ayi wuzenga bikhutu biawu nate mu mataku. Bosi wuba kamba benda kuawu. 5 Bo bazabikisa mawu kuidi Davidi, muna thangu beni nandi wufila batu muingi be badengana, kibila baba fuisa beni zitsoni. Ntinu Davidi wuba kamba: “Kalanu ku Yeliko nate mayedu minu mala mena.”

6 Bo basi Amom bavisa ti badasula Davidi mu mambu bavanga, diawu bafidila mimvuala muingi kufuta zimbongo kuidi basi Silia yi Beti-Reobi ayi basi Zobá ayi bawu bafila 20.000 di masodi muingi kuba sadisa. Mvandi bafuta kuidi ntinu wu Maká ayi nandi wuba fila 1.000 di masodi. Bosi bafuta kuidi basi Istobi ayi bawu baba fila 12.000 di masodi. 7 Bo Davidi kazaba mawu, nandi wufila Joabe na masodi moso, kubunda mvandi bo balutidi bapisuka muingi be nuana yawu. 8 Basi Amom babasika ayi baye tandimina va muelu wu divula, vayi masodi ma Silia bafumina ku Zobá ayi ku Beti-Reobi va kimueka na masodi mafumina ku Istobi ayi ku Maká batandimina va kibuangu kinkaka.

9 Bo Joabe kamona ti masodi ma zimbeni ziawu baba kuizila kuntuala ayi kumbusa, nandi wusola masodi ma Isaeli balutidi kupisuka ayi wuba kamba batandama muingi banuanisa masodi ma basi Silia. 10 Nandi wusola khombꞌandi Abizai muingi katuadisa masodi mankuiza nuanisa basi Amom. 11 Bosi Joabe wukamba khombꞌandi Abizai: “Masodi ma basi Silia ba kuluta mangolo kena minu, buna benu lufueti kuiza tusadisa, vayi masodi ma basi Amom ba kuluta mangolo kena benu, buna befu tunkuiza lusadisa. 12 Tufueti ba mangolo ayi kumonisa kibakala muingi kunuanina dikabu ditu ayi mavula ma Nzambꞌitu. Boti luidi luzolo lu Yave, buna nandi wunkuiza tusadisa.”

13 Bosi Joabe na masodi baba yandi, batona kunuanisa basi Silia ayi masodi ma Silia batina. 14 Bo masodi ma basi Amom bamona ti masodi ma basi Silia bamatina, bawu mvawu batina ayi bakota ku divula. Bosi, bo Joabe kamana kunuanisa basi Amom, nandi wuvutuka ku Yelusalemi.

15 Bo basi Silia bamona ti baba nunga kuidi basi Isaeli, bawu babue kubama. 16 Bosi Hadadezer wutumisa masodi ma Silia baba kalanga ku kizunga kidi ku khonzo yi muila wu Eufrate ayi bayenda ku Helam ayi Sobaki mfumu masodi ma Hadadezer nandi waba ku batuadisa.

17 Bo Davidi kazaba mawu, mu thinu nandi wukutikisa masodi moso ma basi Isaeli, basabuka muila wu Yolidani ayi bavitila ku Helam. Masodi ma Silia batandama muingi kunuanisa Davidi ayi masodi mandi. 18 Vayi masodi ma Silia batina masodi ma Isaeli. Davidi wuvonda 700 di masodi ma Silia baba natanga makalu ma mimvita. Mvandi wuvonda 40.000 di masodi ma Silia baba diatilanga mu mimvalu. Sobaki mfumu masodi ma Hadadezer wuvangana phasi ayi wufuila vana. 19 Bo mintinu mioso baba sadilanga Hadadezer bamona ti bama banunga kuidi masodi ma basi Isaeli, mu thinu bawu bavanga luwawanu na basi Isaeli ayi bayiza ba bisadi bi basi Isaeli. Basi Silia bayiza ba boma ayi balembu kubue sadisanga basi Amom.

11 Va thonono mvu, thangu mintinu baba kue nuananga mimvita, Davidi wufila Joabe va kimueka na bisadi biandi ayi masodi moso ma Isaeli, muingi bavonda basi Amom. Bawu bayenda ayi bazungidila divula di Rabá, vayi Davidi wusiala ku Yelusalemi.

2 Kilumbu kimueka bo buisi buaba kuila, ntinu Davidi wukotuka ayi wuyenda kue vuvusa kuyilu kibanga ki nzo. Bo kavitila kuna, nandi wumona nkietu waba kobila, nkietu beni wuba beni kitoko. 3 Davidi wutuma mutu muingi ke zaba nkietu beni wuba nani, bosi bankamba: “Nkietu beni widi Bate-Seba, muana wu Elião ayi widi nkazi wu Uria musi Hitita.” 4 Bosi Davidi wufila mutu muingi kuenlanda. Bo nandi kayiza, Davidi wubundana yandi nyitu. (Bawu babundana nyitu mu thangu nkietu kamfika bakanga buemba.) Bosi Bate-Seba wuvutuka ku nzoꞌandi.

5 Bate-Seba wuyiza ba buemba ayi wutuma bekamba Davidi: “Minu yeka buemba.” 6 Bo Davidi kazaba mawu, nandi wufila mvuala muingi kekamba Joabe: “Kamba Uria musi Hitita kiza akuku.” Bosi Joabe wufila Uria kuidi Davidi. 7 Bo Uria kavitila kuba Davidi, Davidi wunyuvula buidi Joabe ayi masodi badidi, mvandi wunyuvula buidi bunkuendila mvita. 8 Bosi Davidi wukamba Uria: “Yenda ku nzo muingi wevunda mua nkadu.” Bo Uria kananguka ku nzo Davidi, Davidi wumfila minkhailu mintinu bamvananga. 9 Uria kasa kuenda ko ku nzoꞌandi, vayi wulala va khotolo nzo yi ntinu, na bisadi bioso binkaka bi ntinu. 10 Bosi bakamba ntinu Davidi: “Uria kasa kuenda ko ku nzoꞌandi.” Mu kibila akiokio, Davidi wukamba Uria: “Ngie vangi kuandi mafumina mu viage, buabu kibila mbi bemanga kue ladila ku nzoꞌaku?” 11 Uria wukamba Davidi: “Kasu yi Luwawanu, masodi ma Isaeli ayi ma mvila wu Yuda badi mu mvita ayi badi mu zitenda. Mfumuꞌama Joabe na bisadi biandi binkaka, mvandi badi mu kulala va nganda. Buabu, buidi minu yilenda kuendila ku nzo, muingi kue dia, kue nua ayi kubundana nyitu na nkaziꞌama? Yinleva phesi mu dizina diaku a ntinu, minu yilendi vanga ko mambu amomo.”

12 Davidi wukamba Uria: “Bue kala akuku kilumbu kimueka ayi yono yala kuvana nsua muingi wuvutuka.” Mu phila ayoyo, Uria wukala ku Yelusalemi mu kilumbu beni ayi mu kilumbu kilanda. 13 Davidi wutumisa Uria muingi kadia ayi kanua yandi ayi Davidi wunkolusu. Vayi kheti bobo, Uria kasa kue lala ko ku nzoꞌandi, nandi wulala va kika kiandi va kimueka na bisadi binkaka bi ntinu. 14 Va meni, Davidi wusonika nkanda ayi wufila wawu kuidi Joabe mu nzila Uria. 15 Amama, mawu mambu Davidi kasonika mu nkanda beni: “Tula Uria kuntuala, ko mvita wunkuiza bela wungolo. Bosi kamba masodi mankaka bavutuka muingi nandi kasiala naveka ayi bamvonda.”

16 Joabe wufiongunina buboti divula ayi wutula Uria vama kazaba ti vawu vaba masodi ma zimbeni balutidi bapisuka. 17 Bo masodi ma divula beni babasika muingi kunuanisa Joabe, bawu bavonda mua ndambu di masodi ma Davidi, kubunda mvandi Uria musi Hitita. 18 Bosi Joabe wuzabikisa Davidi mambu moso maba monika mu mvita. 19 Joabe wufila mvuala ayi wunkamba: “Bo wukue zabikisa mambu moso mabe monika mu mvita kuidi ntinu, 20 ḿba nandi kalenda dasuka ayi kalenda ku kuvula: ‘Kibila mbi benu lube banuanisina va ndeku divula diawu? Benu lusa zaba ko ti bawu balenda ba kuyilu bibaka bi divula ayi kulunuanisa? 21 Nani wuvonda Abimeleki muana wu Jerubezeti? Bakana ko nkietu no wundodudila dimanya dio banyikinanga zitheti, kuyilu bibaka bi divula di Tebes? Kibila mbi benu lube kuendila va ndeku luphangu lu divula?’ Ngie fueti kunkamba: ‘Kisadi kiaku Uria musi Hitita, mvandi befua.’”

22 Mu phila ayoyo, mvuala beni, wukamba Davidi mambu moso Joabe kankamba. 23 Mvuala beni wukamba Davidi: “Zimbeni zitu babe luta mangolo kena befu. Bawu babe basika muingi kuiza tunuanisa, vayi befu tube bakuka nate va khotolo divula diawu. 24 Bosi, masodi mawu bannuaninanga mu madionga babedi kuyilu bibaka bi luphangu babe tukuba madionga ayi mua ndambu mu masodi maku babe fua, kisadi kiaku Uria musi Hitita, mvandi befua.” 25 Davidi wukamba mutu Joabe kafila: “Kindisa Joabe mu kunkamba mambu amama: “Bika kutatubuka mu mambu mabe monika, kibila mu mvita, woso kua mutu kalenda fua. Vayi tatamananu kuba nuanisa nati lunkuiza banunga.”

26 Bo Bate-Seba kazaba ti nnuniꞌandi Uria befua, nandi wutona kudila. 27 Bo thangu yi lutu yi lufua lu Uria yimana, Davidi wutuma muingi batuala Bate-Seba ku nzoꞌandi, bosi nandi wuyiza ba nkaziꞌandi ayi wubuta muana. Vayi mambu Davidi kavanga, manyongisa beni Yave.

12 Bosi Yave wutuma ḿbikudi Natani kuidi Davidi. Natani wuyenda kuba Davidi ayi wunkamba: “Vaba babakala buadi baba Kalanga ku divula dimueka, wumueka wuba busina vayi wunkaka wuba kiphumbulu. 2 Dibakala wuba busina, wuba mamemi ayi zingombi ziwombo, 3 vayi dibakala wuba buphumbulu wuba to mua dimemi dimueka kasumba. Nandi waba kiebanga mua dimemi beni buboti ayi diawu diyonzuka va kimueka na bana bandi, diabe nuinanga nlangu mu mbunguꞌandi ayi waba dilekisanga mu khatꞌandi. Mua dimemi beni, diyiza ba buka muanꞌandi wunkietu. 4 Kilumbu kimueka bo nzenza kayiza ku nzo dibakala wuba busina, nandi wumanga kubonga dimemi voti ngombi mu bibulu biandi muingi kulambila nzenza wuyiza ku nzoꞌandi. Vayi wubonga mua dimemi di dibakala wuba buphumbulu muingi kalambila nzenza wuyiza ku nzoꞌandi.

5 Bo Davidi kayuwa mawu, nandi wukamba Natani: “Yinleva phesi mu dizina di Yave ti, mutu bevanga mambu amomo bafueti kumvonda. 6 Ayi dibakala beni bevanga mawu, kafueti futa bibulu binna vambata kibulu kabe bonga kuidi wadi yandi, kibila nandi kasa monisa ko kiadi kuidi wadi yandi.

7 Bosi Natani wukamba Davidi: “Ngiewu dibakala beni. Buakabu butubidi Yave Nzambi Isaeli: ‘Minu yikubieka ntinu wu Isaeli ayi yikuvukisa mu mioko mi Sauli. 8 Minu yikuvana nzo yi Sauli ayi bakazi bandi ayi yikubieka ntinu wu Isaeli ayi wu Yuda ayi yiba wukubama muingi ku kuvangila mambu mawombo mamboti. 9 Kibila mbi bekhambu tumukina Yave ayi bevangila mambu mambi va mesu mandi? Ngie bevonda Uria musi Hitita mu mvita na basi Amom ayi bo kabe fua ngie bekuela nkaziꞌandi. 10 Diawu ku nzoꞌaku kuala tatamananga kumonika mambu mambi, kibila ngie wusa tumukina ko nsiku wu Nzambi ayi bekuela nkazi wu Uria musi Hitita.’ 11 Buakabu butubidi Yave: ‘Yala vanga muingi ku nzoꞌaku kumonika mambu maphasi. Yala bonga bakazi baku ayi yala ku bavana kuidi dibakala dinkaka. Ngie wala mona mawu ayi nandi wala bundana yawu nyitu vanyalu nguba. 12 Ngie bevangila mambu amomo mambi ku kinsueki vayi minu yala vangila mawu vanyalu nguba, muingi basi Isaeli bamona mawu.’”

13 Davidi wukamba Natani: “Minu yibe sumuka va mesu ma Yave.” Natani wukamba Davidi: “Yave belemvukila masumu maku, ngiewu wusinkuiza fua ko. 14 Vayi mu kumona ti ngie mfumu wusa kinzika ko Yave mu mambu bevanga, muanꞌaku mabutuka wunkuiza fua.”

15 Natani wuyenda ku nzoꞌandi ayi Yave wuvanga muingi muana Bate-Seba kabuta na Davidi kabakana kubela. Bate-Seba wuba nkazi wu Uria. 16 Davidi wusambila ayi wuvanga jejum yingolo muingi Nzambi yikiedika kabelusa muana. Davidi waba kotanga ku kivinga ayi va builu waba lalanga va tsi. 17 Zimfumu baba sadilanga ku nzoꞌandi ayi babe banga yandi va kimueka, babe kunkambanga muingi kakotuka va tsi vayi Davidi waba manganga ayi kabasa kikininanga ko kudia yawu. 18 Mu kilumbu ki sambuadi muana beni wufua, vayi bisadi biandi baba boma bu kuzabikisa kuidi Davidi ti muana beni befua. Bawu baba tuba: “Bo muana beni kabedi wumonyo befu tuaba yolukanga na ntinu, vayi nandi kabasa tukuwilanga ko. Buabu buidi bu kunkambila ti muana beni befua? Nandi kalenda vanga diambu dimbi.”

19 Bo Davidi kamona bisadi biandi kunyunguta, nandi wuvisa ti muana beni befua, diawu nandi kayuvudila bisadi biandi: “Muanꞌama befua?” Bisadi biandi bantambudila: “Ngete befua.” 20 Bosi Davidi wutelama va tsi kaba, wuyobila wuvinda malasi ayi wuvingisa bikhutu. Wuyenda ku nzo yi Yave muingi kue sambila ayi bo kavutuka ku nzo, wudinda muingi bamvana kioso kiuma ki kudia ayi nandi wudia. 21 Bisadi biandi banyuvula: “Kibila mbi widi mu kuvangila mambu mu phila ayoyo? Bo muana kabedi wumonyo ngie wuvengi jejum ayi waba dilanga. Vayi bo muana kame fua ngie bekotuka va tsi ayi madia.” 22 Davidi wuba vutudila: “Bo muana kabedi wumonyo minu yivengi jejum ayi yaba dilanga kibila yaba yindula: ‘Ḿba Yave kalenda kumbona kiadi ayi kubika muana kazinga.’ 23 Buabu muana beni mafua, kibila mbi yifueti bevangila jejum? Minu kuvanga mawu muana beni wunkuiza vulubuka? Minu yizebi ti yala fua, vayi nandi kalendi bue vutuka ko kuidi minu bubu.”

24 Bosi Davidi wubomba nkaziꞌandi Bate-Seba. Davidi wubundana yandi nyitu ayi buviokila thangu, Bate-Seba wuba buemba wubuta muana dibakala ayi bamvana dizina Salomo. Yave waba zolanga beni Salomo. 25 Mu nzila Natani Nzambi wutuba ti bafueti tedila muana beni, Jedidia* kibila Yave waba kunzolanga beni.

26 Joabe wutatamana kunuanisa divula di Rabá di basi Amom, ayi wuvua divula diawu dilutidi nkinza mu kintinu. 27 Diawu Joabe kafidila mimvuala kuidi Davidi muingi bankamba: “Yima nuanisa divula di Rabá ayi yima vua zitho zinlangu zi divula beni. 28 Diawu kutikisa masodi moso badi yaku, yiza zungidilanu divula beni ayi vua diawu, muingi minu yibika ku divua ayi kutambula nzitusu mu mawu.”

29 Mu phila ayoyo, Davidi wukutikisa masodi moso maba yandi, bayenda ku Rabá, banuanisa divula beni ayi bavua diawu. 30 Bosi Davidi wubonga kolowa yiba ku ntu Malcã* nzambi yi basi Filistea ayi yawu yaba zita talentu* yimueka. Mu kolowa beni muba mvandi mamanya mankaka ma thalu ayi batula yawu ku ntu Davidi. Nandi mvandi wubonga biuma biwombo bi luvalu bi divula beni. 31 Davidi wubuila batu baba kuna ayi wuba vana kisalu ki kubula mamanya, kusadila mu bisadulu bi bisengu balengula, kusadila mu bitadi ayi kuvanga mateya. Amomo mawu kavangila kuidi batu boso kabuila mu mavula moso ma basi Amom. Bosi Davidi ayi masodi mandi bavutuka ku Yelusalemi.

13 Absaloni muana Davidi, wuba khomba yinkietu wuba beni kitoko baba tedilanga Tamali. Amnom muana Davidi wuyiza tona kunzinina. 2 Amnom waba zininanga beni khombꞌandi Tamali ayi mu kibila akiokio, nandi wuyiza bakana kubela. Tamali kabasa bundananga ko nyitu, diawu Amnom kaba muena ti kalendi nunga ko kumvangila dioso diambu. 3 Amnom wuba nkundi baba tedilanga Jonadabi ayi Jonadabi wuba beni diela. Nandi wuba muana Simeá, khomba Davidi. 4 Jonadabi wuyuvula Amnom: “Kibila mbi ngie muana ntinu bebela mu kiunda kilumbu kioso? Khamba mambu ma kutatisa.” Amnom wunkamba: “Yidi mu kuzola beni khombꞌama Tamali, no wubutuka ngudi mueka na khombꞌama Absaloni”. 5 Jonadabi wukamba Amnom: “Vuna ti widi mu kubela ayi yenda lala va kika. Tatꞌaku na kuiza kutala, ngie fueti kunkamba: ‘Lemvuka, vana nsua muingi khombꞌama Tamali kiza phana kioso kiuma muingi yidia. Na kundambila bidia bamvananga batu bambela vantualꞌama, buna minu yinkuiza dia biawu.”’

6 Mu phila ayoyo, Amnom wuvunikisa kubela ayi wulala va kika ayi ntinu Davidi wuyenda kuentala. Bosi Amnom wukamba ntinu Davidi: “Lemvuka, vana nsua muingi khombꞌama Tamali kiza phangila mapha muadi madi buka ntima vantualꞌama, muingi minu yidia mawu.” 7 Bosi Davidi wufila mutu muingi kekamba Tamali: “Lemvuka, yenda kuidi khombꞌaku Amnom ayi nkubikila kioso kiuma muingi kadia.” 8 Mu phila ayoyo, Tamali wuyenda ku nzo khombꞌandi Amnom, wubonga falinya, wuvanga mapha vantuala khombꞌandi ayi wukanga mawu. 9 Bosi Tamali wubonga mapha beni wutula mu lulonga ayi wuvana Amnom, vayi Amnom wumanga kudia ayi wutuba: “Kamba batu boso babasika.” Ayi baboso babasika.

10 Amnom wukamba khombꞌandi Tamali: “Tuala mapha beni ku kivinga* kiama yidila mawu mu mioko miaku.” Mu phila ayoyo, Tamali wubonga mapha beni madi buka ntima ayi wunata mawu ku kivinga ki khombꞌandi Amnom. 11 Bo Tamali kanata mapha beni muingi Amnom kadia, Amnom wumbuila ayi wunkamba: “Khombꞌama bundana yama nyitu.” 12 Vayi Tamali wunkamba: “Ndamba khombꞌama, bika kuphuisa zitsoni mu kuphangila ntindu mambu amomo. Bika kuvanga mambu amomo matsoni, kibila bavanganga ko mambu amomo ku Isaeli.” 13 Mbi yala vanga muingi yinunga kuvanga batu babika kubue tebukilanga monyo, mambu amomo matsoni wuntomba kuphangila? Ngie kuvanga mawu ngie wala ba mutu wuphamba ku Isaeli. Lemvuka dinda kuidi ntinu, kibila nandi wunkuiza kikinina kuphana kuidi ngiewu.” 14 Vayi Amnom kasa kuwila ko khombꞌandi, nandi wubuila Tamali ayi wumfuisa tsoni mu kunkuika kabundana yandi nyitu. 15 Amnom wutona kulenda beni khombꞌandi Tamali. Ayi luzolo loso kaba mu nandi lumana. Bosi Amnom wukamba Tamali: “Telama avovo ayi yenda kuaku.” 16 Vayi Tamali wunkamba: “Ndamba ah khombꞌama, kukhamba yenda mu phila ayoyo, bulutidi zitsoni kena mambu bevanga.” Vayi Amnom kasa nkuwila ko.

17 Bosi Amnom wutumisa kisadi kiandi ayi wunkamba: “Basisa nkietu awowo kunganda ayi zibika muelu.” 18 Mu phila ayoyo, kisadi ki Amnom wubasisa Tamali kunganda ayi wuzibika muelu. Tamali wuba wuvuata kikhutu kio bana ba ntinu ba bakietu bo kaba bundiniabu ko nyitu baba vuatanga. 19 Bosi Tamali wutula dibombi ku ntu, wukhakuna kikhutu kavuata, wutula mioko ku ntu ayi waba dila beni.

20 Bosi khombꞌandi Absaloni wunyuvula: “Khombꞌaku Amnom nandi be kuvangila mambu amomo? Tamali, bika kuzabikisa mawu kuidi ni mutu, kibila nandi widi khombꞌaku ayi bika kutatubuka mu mambu amomo.” Bosi Tamali wutona kukalanga ku nzo khombꞌandi Absaloni ayi waba kalanga va naveka. 21 Bo Davidi kazaba mambu Amnom kavanga, nandi wudasuka vayi kabasa tomba ko kunyongisa muanꞌandi Amnom. Nandi waba kunzolanga beni, kibila wuba muanꞌandi wutheti. 22 Absaloni kasa kamba ko ni diambu kuidi Amnom. Nandi wunlundila nganzi mu kibila ki mambu matsoni kavangila khombꞌandi Tamali.

23 Bo vavioka mimvu miodi, bisadi bi Absaloni bayenda ku Baal-Hazor yidi ku ndeku kizunga ki mvila wu Efraim, muingi kuebotula mika mi mamemi ma Absaloni. Ayi Absaloni wutumisa bana boso ba ntinu muingi benda kuna. 24 Mu phila ayoyo, Absaloni wuyenda kuidi ntinu Davidi ayi wunkamba: “Minu kisadi kiaku yidi mu kubotula mika mi mamemi mama, diawu lemvuka, yintomba kutumisa ntinu ayi bisadi biaku muingi luenda yama.” 25 Vayi ntinu Davidi wukamba Absaloni: “Ndamba muanꞌama, befu kukuenda befu boso ngie wunkuiza tatubuka beni mu kibila kitu.” Kheti Absaloni waba tatamana kudinda ntinu muingi kenda, vayi ntinu kasa kuenda ko, vayi nandi wunsakumuna. 26 Absaloni wukamba ntinu Davidi: “Boti ngie mfumu wisinkuenda ko buna bika khombꞌama Amnom kenda yitu”. Vayi ntinu Davidi wunyuvula: “Kibila mbi wuntombila Amnom kenda yaku?” 27 Absaloni wutatamana kudinda ntinu. Mu kibila akiokio, ntinu Davidi wubika bana bandi boso kubunda mvandi Amnom, muingi benda kuidi Absaloni.

28 Ayi Absaloni wukamba bisadi biandi: “Banu bakubama, bo Amnom kankuiza kolo vinyu, minu yinkuiza mukamba ‘vondanu Amnom’ buna benu lufueti mvonda. Bikanu kumona boma kibila minu veka yidi mu kulutuma, diawu banu mangolo ayi monisanu kibakala.” 29 Bisadi bi Absaloni bavangila Amnom buna buawu Absaloni kaba kambila. Bo bana bankaka ba ntinu bamona mawu, bamaka mu ziphunda* ziawu ayi batina. 30 Bo bana ba ntinu baba vutuka ku nzo vamonika mutu wuyenda kue kamba ntinu Davidi mambu amama: “Absaloni bevonda bana boso ba ntinu, ni wumueka kasa sobila ko.” 31 Bo ntinu kayuwa mawu, wutelama, wukhakuna bikhutu biandi ayi wulala va tsi. Ayi bisadi bioso bi ntinu baba yandi mvandi bakhakuna bikhutu biawu.

32 Vayi Jonadabi muana Simeá khomba Davidi, wutuba: “A mfumu bana baku boso basa fua ko, Amnom nandi to befua kibila Absaloni nandi betuma bamvonda. Absaloni wuba mayindu amomo tona kilumbu Amnom kafuisa zitsoni khombꞌandi Tamali. 33 Diawu a ntinu, bika kukikinina mu mambu babe kukamba ti bana baku boso babe fua, kibila Amnom nandi to befua.”

34 Mu thangu beni, Absaloni wutina ayi bo vavioka mua thangu, nsungi wu divula no wuba kuyilu kibanga wumona batu baba kuiza mu nzila, va ndeku mongo. 35 Jonadabi wukamba ntinu: “Tala bana baku bama vutuka. Bawu basa fua ko dedi bo minu kisadi kiaku yibe tubila.” 36 Bo Jonadabi kamana kutuba, bana ba ntinu bavitila ayi baba dila beni, ntinu ayi bisadi biandi mvandi baba dila. 37 Absaloni wutina ayi wuyenda kuidi ntinu baba tedilanga Talmai muana wu Amiude waba kalanga ku divula di Gezur. Ayi mu bilumbu biwombo Davidi wudila mu kibila ki lufua lu muanꞌandi Amnom. 38 Bo Absaloni kayenda ku divula di Gezur, nandi wuzingila kuna mimvu mitatu.

39 Bosi ntinu Davidi waba tomba kumona Absaloni, kibila kasa bue ba ko beni mu kiunda mu kibila ki lufua lu Amnom.

14 Bosi Joabe muana wu Zeruia, wuyiza zaba ti Davidi wuba phuila yi kumona Absaloni. 2 Mu phila ayoyo, Joabe wutumisa nkietu wumueka wuba beni diela, waba kalanga ku divula di Tekoa ayi wunkamba: “Vunikisa ti widi mu lutu, vuata bikhutu bi lutu ayi bika kuvinda malasi mu nyitu. Fueti vanga mambu mammonisa ti weka bilumbu biwombo mu lutu. 3 Bosi fueti kuenda kuidi ntinu ayi nkamba mambu yinkuiza kuzabikisa.” Mu phila ayoyo, Joabe wukamba nkietu beni mambu kafueti tuba.

4 Nkietu beni musi Tekoa wuyenda kuidi ntinu, wufukama ayi wuyinika kizizi kiandi va tsi ayi wutuba: “A ntinu lemvuka, tsadisa.” 5 Ntinu wunyuvula: “Mambu mbi mamvioka?” Nkietu beni wumvutudila: “Minu yidi mfuizi, nnuniꞌama wufua, 6 ayi wumbikila minu kisadi kiaku bana buadi. Bo bana beni babe kuenda kunsitu, babe kuambila ayi babe nuana. Vasa ba ko ne mutu muingi kuba kakula, diawu wumueka bevonda wadi yandi. 7 Buabu basi dikanda diama dioso babe kumbalukila minu kisadi kiaku ayi babe tuba: ‘Tuala muana bevonda khambꞌandi muingi befu tumvonda. Kheti nandi widi nsua wu kuvua kiuka ki tata.’ Bawu bantomba kuvonda mutu wutsuka wo yintudila kivuvu, ayi kuvanga dizina di nnuniꞌama dizimbala.”

8 Ntinu Davidi wukamba nkietu beni: “Yenda ku nzoꞌaku ayi minu yinkuiza dedikisa mambu beni.” 9 Bosi nkietu beni musi Tekoa wukamba ntinu Davidi: “A mfumuꞌama bika minu ayi basi dikanda di tataꞌama, tuba fotu mu mambu amomo. Vayi ngie ntinu ayi luyalu luaku, muisi ko fotu mu mawu.” 10 Ntinu Davidi wukamba nkietu beni: “Va kubue monika mutu wu kutatisa matedi mambu amomo, buna ntuala akuku ayi nandi kalasa bue kutatisa ko.” 11 Vayi nkietu beni wukamba ntinu: “Lemvuka a ntinu tebukila monyo Yave Nzambiꞌaku muingi basi dikanda diama bantomba kuvonda muanꞌama, babika kuvanga mambu amomo mambi.” Ntinu Davidi wumvutudila: “Yinleva phesi mu dizina di Yave ti, yalasa bika ko ne mutu kavangila muanꞌaku ne diambu dimueka dimbi.” 12 Nkietu beni wubue tuba: “A ntinu lemvuka bue phana nsua muingi yibue tuba.” Ntinu Davidi wumvutudila: “Tuba kuaku.”

13 Nkietu beni wukamba ntinu: “Buabu, kibila mbi ngie ntinu wuntombila kuvangila momawu mambu kuidi dikabu di Nzambi? Ngie ntinu widi mu kuyifundisa mu mambu matuba, kibila wisimbika ko muingi muanꞌaku kavutuka. 14 Bukiedika befu boso tuala fua ayi tuala ba buka nlangu bandukula va tsi wo balendi bue nonga ko. Nzambi kasintomba ko kuvonda ne mutu, vayi nandi wuntombanga luaku muingi mutu kabe semba kavutuka kuidi nandi. 15 Yibe kuizila akuku muingi kuiza yoluka na ngie mfumuꞌama ntinu, minu yibe ba boma bu dikabu. Minu kisadi kiaku yibe yindula: ‘Yekue yoluka na ntinu ayi ḿba ntinu wunkuiza yuwa mambu minu kisadi kiandi yinkuiza nkamba, 16 ayi kuphukisa mu mioko mi mutu wuntomba kuphonda, wuntomba kuvonda muanꞌama ayi ku tubotula ku ntoto Nzambi katuvana.’ 17 Minu kisadi kiaku yibe yindula: “Mambu ntinu kankuiza tuba mankuiza mbomba, kibila ngie mfumuꞌama widi buka mbasi yi Nzambi yikiedika, wunzabanga kusuasisa mamboti ayi mambi. Bika Yave Nzambiꞌaku kaba yaku a mfumuꞌama.”

18 Ntinu wukamba nkietu beni: “Bika kutsueka ne diambu mu mambu ye kukuvula.” Nkietu beni wutuba: “Lemvuka a ntinu tuba kuaku.” 19 Bosi ntinu wuyuvula nkietu beni: “Joabe nandi be kukamba wutuba mambu amomo?” Nkietu beni wuvutudila ntinu: “Yinleva phesi mu dizina diaku a ntinu ti, Joabe nandi bethuma kutuba mambu amomo ayi nandi bekhamba mambu moso minu kisadi kiaku yima tuba. 20 Kisadi kiaku Joabe kabe vangila mawu, muingi ngie ntinu wutadila mawu mu phila yinkaka. Vayi ngie mfumuꞌama widi nduenga ayi widi buka mbasi yi Nzambi yikiedika ayi zebi mambu moso madi mu kumonika ku tsi ayiyi.”

21 Bosi Ntinu Davidi wukamba Joabe: “Vasi diambu ko, yemvanga mambu wuntomba. Yenda landa Absaloni.” 22 Mu kibila akiokio, Joabe wufukama, wuyinika kizizi va tsi ayi wuzitisa ntinu mu kutuba: “Bubu minu kisadi kiaku yima zaba ti yidi lunungu va mesu maku a mfumuꞌama kibila ngie makikinina mambu minu kisadi kiaku yibe kudinda.” 23 Bosi Joabe wunanguka ayi wuyenda ku divula di Gezur, wuyenda kue landa Absaloni ayi wuntuala ku Yelusalemi. 24 Vayi ntinu Davidi wutuba: “Bika nandi kavutuka ku nzoꞌandi, vayi kabika monika vantualꞌama.” Mu phila ayoyo, Absaloni wuvutuka ku nzoꞌandi, vayi kasa monika ko vantuala ntinu.

25 Ku Isaeli koso, kusa ba ko ne mutu wunkaka wuluta kitoko kena Absaloni. Kutonina ku ntu nate mu bitambi, nandi wuba beni kitoko. 26 Minlengi Absaloni kaba zenganga ku ntuꞌandi, miaba zitanga 200 di zisikulu* mu kutadila kizongulu baba sadilanga ku nzo ntinu. (Nandi waba zenganga minlengi beni kadika mvu, kibila miaba banga miwombo). 27 Absaloni wubuta bana batatu ba babakala ayi muana wumueka wunkietu baba tedilanga Tamali, nandi wuba beni kitoko.

28 Absaloni wuzingila ku Yelusalemi mu mimvu miodi, vayi kasa monika ko vantuala ntinu. 29 Diawu, Absaloni wutumisa Joabe muingi kamfila kuidi ntinu vayi Joabe wumanga kukuenda kuba Absaloni. Bosi Absaloni wubue tumisa Joabe mu khumbu yimmuadi, vayi Joabe wubue manga. 30 Absaloni wukamba bisadi biandi: “Tsola yi Joabe yidi va ndeku tsolꞌama ayi nandi wuvata muna cevada. Diawu yendꞌanu vikanu tsola beni.” Mu phila ayoyo, bisadi bi Absaloni bavika tsola yi Joabe. 31 Mu kibila akiokio, Joabe wuyenda ku nzo Absaloni ayi wunyuvula: “Kibila mbi bisadi biaku babe vikila tsolꞌama?” 32 Absaloni wuvutudila Joabe: “Minu yibe fila thumu ayiyi: ‘Yiza yikufila kuidi ntinu Davidi muingi wunyuvula: “Kibila mbi wutumina muingi bendanda ku divula di Gezur? Khanu diluta ba diambu dimboti kumbika yikala kuami kuna. Buabu phana nsua muingi yiza kumona a ntinu, boti diambu dimbi yivanga buna bika wuphonda.”’”

33 Mu phila ayoyo, Joabe wuyenda kuidi ntinu, ayi wunzabikisa mambu moso. Bosi ntinu Davidi wutumisa Absaloni ayi Absaloni wuyenda kuba ntinu, wufukama ayi wuyinika kizizi va tsi. Bosi ntinu Davidi wuvana Absaloni besu.

15 Bosi Absaloni wutuma bavanga dikalu ayi wukubika mvandi mimvalu, ayi wusola 50 di batu babe kue dumanga vantualꞌandi. 2 Absaloni waba kotukanga meni meni muingi kukuenda mu nzila yinkuenda va muelu wu divula. Bo vaba monikanga mutu wabe kuendanga muingi kuzabikisa mambu mandi kuidi ntinu, Absaloni waba tumisanga mutu beni ayi waba kunkuvulanga: “Ngie widi musi divula mbi?” mutu beni waba kumvutudilanga: “Minu kisadi kiaku yidi musi mvila awuwu wu Isaeli.” 3 Absaloni waba kambanga mutu beni: “Mambu wuntomba kue zabikisa ntinu, madi masulama ayi madi mamboti, vayi vasi ko ne mutu mu luyalu lu ntinu, wunkuiza kuyuwa muingi kudedikisa mambu maku.” 4 Absaloni waba tubanga: “Boti bambieka mfundisi, khanu batu boso bankuiza yizanga kuidi minu ayi minu khanu yinkuiza dedikisanga mambu mawu mu busonga.”

5 Ayi bo mutu kaba fikamanga vaba Absaloni muingi kafukama vantualꞌandi, Absaloni waba simbanga mutu beni ayi waba kumvananga besu. 6 Amomo mawu Absaloni kaba vangilanga batu boso baba kuendanga kuidi ntinu, muingi kue dedikisa mambu. Mu phila ayoyo, Absaloni waba vukumunanga basi Isaeli muingi baba ku khonzoꞌandi.

7 Bo vavioka mimvu minna, Absaloni wukamba ntinu Davidi: “Lemvuka, phana nsua muingi yenda ku Hebrom kue dukisa tsila yivanga kuidi Yave. 8 Kibila bo yaba kalanga ku Gezur yidi ku Silia, minu yivanga tsila ayiyi: “Yave na kutsadisa kuvutuka ku Yelusalemi, buna yala vana kuidi Yave nkhailu.’” 9 Ntinu Davidi wukamba Absaloni: “Yenda mu ndembama.” Mu phila ayoyo, Absaloni wuyenda ku Hebrom.

10 Bosi Absaloni wufila mimvuala mu mimvila mioso mi Isaeli ayi wuba kamba: “Benu kukuwa biyoko bi ziphungi lufueti tuba: ‘Absaloni weka ntinu ku Hebrom.’” 11 Absaloni wutumisa 200 di babakala ayi bawu bananguka ku Yelusalemi ayi bayenda na Absaloni. Vayi babakala beni basa zaba ko mambu Absaloni kaba tomba kuvanga. 12 Mvandi bo bamana kuvana nkhailu, Absaloni wutumisa Aitofel musi Gilo no waba vananga malongi kuidi Davidi. Thalu yi batu baba buela mioko Absaloni muingi kubalukila ntinu Davidi yaba buelama.

13 Bosi vamonika mutu wuyenda kue kamba Davidi mambu amama: “Basi Isaeli bawombo beka ku khonzu Absaloni.” 14 Muna thangu beni, Davidi wukamba bisadi biandi ayi batu boso baba yandi ku Yelusalemi: “Ndokuꞌanu tutina kibila khanu ne mutu kasinkuiza vuka ko mu mioko mi Absaloni. Vanganu nsualu, kibila nandi khanu wunkuiza tununga ayi kuvonda batu boso ku divula.” 15 Bisadi biandi bankamba: “A ntinu befu tuidi bakubama muingi kuvanga mambu moso wuntomba.” 16 Mu phila ayoyo, ntinu wunanguka ayi wuyenda na baboso baba kalanga ku nzoꞌandi. Vayi wubika 10 di bimasi biandi muingi bakieba nzo yi ntinu. 17 Ntinu Davidi na batu boso baba yandi, bananguka ku divula ayi bayevundila ku Bete-Meraki.

18 Zimfumu zioso zi masodi ma ntinu mayenda yandi, zikeretita zipeletita, zigeteu kubunda mvandi 600 di masodi balandakana Davidi kutonina ku Gati, basabuka muila ayi Davidi waba kuba fiongunina boti baba baduka. 19 Ntinu Davidi wukamba Itai musi Geteu: “Kibila mbi ngie mvaku wuntomba kukuenda yitu? Vutuka ayi yenda ku khonzu ntinu wumona kibila ngie widi nzenza banata va buvika. 20 Ngiewu vangi kuandi wuyizizi. Buabu kibila mbi fueti diatilanga yitu koso kua kuma tunkuenda? Vutuka, nata zikhomba ziaku ayi bika Yave ka kumonisa luzolo luandi lukuikama.” 21 Vayi Itai wukamba ntinu: “Yinleva phesi mu dizina di Yave ayi mu dizina diaku ngie ntinu ti, koso kua kuma ngie wunkuenda, kuawu minu kisadi kiaku mvandi yala kuenda, kheti mawu mansundula kufua voti kutatamana kuzinga.” 22 Bo Davidi kayuwa mawu nandi wukamba Itai: “Vasi diambu ko sabuka.” Mu phila ayoyo, Itai musi Geteu wusabuka ḿbuinga, va kimueka na batu boso baba yandi kubunda mvandi bana balezi.

23 Batu boso baba kalanga va kizunga beni, baba dila bo batu bayenda na Davidi baba sabuka ḿbuinga muingi kuviokila mu nzila yinkuenda ku thandu. Bo bawu baba sabuka, Davidi wuba wutelama va ḿbuinga wu Cédron. 24 Zadoki na zilevita zioso mvandi baba vana ayi baba nata Kasu yi Luwawanu yi Nzambi yikiedika. Bawu batula yawu vatsi, batu boso baba na Davidi babasika ku divula ayi basabuka ḿbuinga. Abiatali mvandi wuba vana. 25 Vayi ntinu Davidi wukamba Zadoki: “Vutula Kasu yi Luwawanu yi Nzambi yikiedika ku Yelusalemi. Boti minu yidi lunungu va meso ma Yave, buna Nandi wala tsadisa yibe vutuka ku divula, muingi kumona Kasu yi Luwawanu ayi kibuangu bantulanga Kasu beni. 26 Vayi Nzambi na kutuba: ‘Ngie wusiedi ko lunungu va meso mama,’ buna bika nandi kavanga moso mambu katidi.” 27 Ntinu Davidi wukamba Zadoki nganga nzambi: “Ngie widi mutu wummonanga bimona meso, diawu vutuka ku divula ayi nata mvandi batu ababa: Muanꞌaku Aimaás ayi Yonatan muana Abiatali. 28 Minu yinkuiza vingila mu bibuangu bansabukilanga ḿbuinga bidi va ndeko thandu nate luela mfila zitsangu.” 29 Mu phila ayoyo, Zadoki ayi Abiatali bavutula Kasu yi Luwawanu yi Nzambi yikiedika ku Yelusalemi ayi batatamana kukala kuna.

30 Bo Davidi kaba tombuka mongo wu minti mi olive, nandi waba dila, kasa vuata ko zisandali ayi wufuka ntu. Batu boso baba na Davidi, mvandi bafuka ntu ayi baba dila bo babe tombuka mongo beni. 31 Bosi bakamba Davidi: “Aitofel weka ku khonzo Absaloni muingi kubalukila ntinu.” Bo Davidi kayuwa mawu, nandi wutuba: “Ah Yave lemvuka, vanga muingi malongi ma Aitofel mavunzikisa makani ma Absaloni.”

32 Bo Davidi kavitila va mbata mongo vo dikabu baba buongiminanga Nzambi, nandi wuye bata vana Huzai musi Arkita. Huzai wuba bikhutu bibakuka ayi wutula ntoto ku ntu. 33 Davidi wunkamba: “Ngie ku kuenda yama wisinkuiza baka ko bu kutsadisila. 34 Vayi ngie kuvutuka ku divula ayi ku kamba Absaloni: ‘Minu yibedi kisadi ki tatꞌaku buabu yeka kisadi kiaku,’ buna ngie wunkuiza vunzikisa malongi ma Aitofel. 35 Zadoki ayi Abiatali zinganga nzambi bankuiza ba yaku, ngie fueti kuba zabikisa mambu mamvioka ku nzo ntinu. 36 Zadoki ayi muanꞌandi Aimaás kubunda mvandi Abiatali na muanꞌandi Yonatan mvandi bala ba yaku ayi mu nzila Aimaás na Yonatan ngie fueti kumfila zitsangu matedi mambu moso mamvioka ku nzo ntinu. 37 Mu phila ayoyo, Huzai nkundi wu lufiatu wu Davidi, wuvutuka ku Yelusalemi ayi nandi wuvitila kuna bo Absaloni kaba kota ku divula.

16 Bo Davidi kamana kutombuka mongo, Ziba kisadi ki Mefibozeti waba temina Davidi na ziphunda wadi ziba na 200 di mapha, 100 di zibolu zivangulu mu makundi ma vinyu mayuma, 100 di zibolu zivangulu mu makundi bamvelanga mu thangu mvula ayi mvandi kibasa kinneni ki vinyu. 2 Ntinu Davidi wuyuvula Ziba: “Kibila mbi betuadila biuma bioso abiobio?” Ziba wuvutudila ntinu: “Yibe tuadila ziphunda, muingi batu bankalanga ku nzo ntinu bamaka, yibe tuadila mapha ayi makundi bamvelanga mu thangu mvula, muingi batu bankuenda yaku badia, yibe tuadila vinyu muingi batu bankuiza vonga mu nzila banua.” 3 Ntinu Davidi wunyuvula: “Abu Mefibozeti ntekulu wu mfumuꞌaku kuidi kadi?” Ziba wuvutudila ntinu: “Nandi besiala ku Yelusalemi ayi betuba: ‘Bubu basi Isaeli bankuiza mbieka ntinu buka khayꞌama.’” 4 Ntinu Davidi wukamba Ziba: “Biuma bioso bi Mefibozeti bieka biaku.” Ziba wukamba ntinu: “Minu yimfukama vantuala ntinu ayi bika yibaka lunungu va mesu maku a mfumu.”

5 Bo ntinu Davidi kavitila ku Baurim vamonika dibakala dimueka musi dikanda di Sauli baba tedilanga Simei, muana wu Gera waba kuiza ku khonzo Davidi ayi waba singa Davidi. 6 Nandi waba kuba mamanya kuidi ntinu Davidi, kuidi bisadi bi Davidi, kuidi dikabu ayi kuidi masodi baba ku khonzo lubakala ayi ku lukietu lu ntinu Davidi. 7 Simei waba singa Davidi mu kutuba: “Yenda, yenda ngie widi mvondi ayi widi mutu wuphamba. 8 Yave widi mu ku kufundisa mu kutengula menga ma dikanda di Sauli, mutu no ngie wuvinginina mu luyalu. Yave widi mu kuvionya luyalu mu mioko miaku muingi kuvana kuidi muanꞌaku Absaloni. Buabu ngie wentovuka mu kutengula menga.”

9 Bosi Abizai muana wu Zeruia wukamba ntinu Davidi: “Kibila mbi tufueti bikila mutu awowo widi buka mbua yifua kasinga ntinu? Phana nsua yenda vo kadi muingi yinzenga ntu.” 10 Vayi ntinu Davidi wutuba: “A bana ba Zeruia mambu amomo masa lutala ko, bika nandi katsinga kibila Yave benkamba: ‘Singa Davidi.’ Diawu vasi ko mutu widi nsua muingi kunkamba: ‘Kibila mbi widi mu kuvangila mambu amomo?’” 11 Ntinu Davidi wukamba Abizai ayi bisadi biandi bioso: “Boti Absaloni muanꞌami no minu veka yibuta wuntomba kuphonda, abuabu mbi yilenda tuba matedi musi Benyamini. Bika katsinga kibila Yave nandi benkamba kavanga mawu. 12 Ḿba Yave wunkuiza mbona kiadi ayi Yave wunkuiza tsakumuna va mvingi mambu dibakala adiodio kama tuba muingi kutsinga.” 13 Ntinu Davidi na batu boso baba yandi batatamana kudiata, vayi Simei waba ku balandakana ku khonzo mongo, waba kuba singa ayi waba ku bakuba mamanya ayi ntoto.

14 Bosi ntinu Davidi na batu boso baba yandi, bavitila va kibuangu baba kuenda. Bawu baba bavonga ayi bo bavitila vana, bawu bavunda.

15 Muna thangu beni, Absaloni na batu boso baba yandi bavitila ku Yelusalemi, Aitofel mvandi wuba yawu. 16 Bo Huzai musi Arkita nkundi wu lufiatu wu Davidi kavitila vaba Absaloni, nandi wukamba Absaloni: “Tuzitisanu ntinu, Tuzitisanu ntinu.” 17 Bosi Absaloni wuyuvula Huzai: “Ayoyo Yawu phila wummonisina luzolo lukuikama kuidi nkundiꞌaku? Kibila mbi bekhambu kuendila yandi?” 18 Huzai wukamba Absaloni: “Minu yilendi vanga ko mambu amomo. Minu yidi ku khonzo mutu basola kuidi Yave, kuidi dikabu ayi kuidi babakala boso ba Isaeli. Ayi nandi minu yinkuiza buela mioko. 19 Buabu nani mutu wunkaka yifueti buela mioko bakana ko muana? Minu yinkuiza kubuela mioko dedi bo yibuedidi mioko tatꞌaku.”

20 Bosi Absaloni wukamba Aitofel: “Phana malongi ayi khamba mbi tufueti vanga?” 21 Aitofel wukamba Absaloni: “Bundana nyitu na bimasi bi tatꞌaku bio kabikizi muingi bakieba nzo yi ntinu. Bo basi Isaeli boso bala zaba ti ngie weka mbeni yi tatꞌaku, batu badi ku khonzuꞌaku bankuiza luta kubuela mioko.” 22 Mu phila ayoyo, batelimisa tenda kuyilu kibanga ayi Absaloni wubundana nyitu na bimasi bi tatꞌandi kuyilu tenda beni, vantuala dikabu dioso di Isaeli.

23 Mu thangu beni baba tadilanga malongi ma Aitofeli buka malongi mamfumina kuidi Nzambi yikiedika. Buawu Davidi ayi Absaloni baba tadilanga malongi ma Aitofel.

17 Aitofel wukamba Absaloni: “Lemvuka phana nsua muingi yikutikisa 12.000 di masodi, muingi tuenuanisa Davidi va builu abubu. 2 Minu yeke nnuanisa bo kadi wuvonga ayi yinkuiza mvanga kuba boma ayi bo batu boso badi yandi bankuiza tina, minu yinkuiza vonda to ntinu. 3 Bosi minu yinkuiza vanga muingi dikabu dioso bavutuka ku divula ayi ba kubuela mioko. Mutu widi mu kutomba na kufua, dikabu dioso bankuiza vutuka kuidi ngiewu ayi vankuiza ba ndembama.” 4 Absaloni ayi bakulutu boso ba Isaeli bazola beni mambu Aitofel katuba.

5 Vayi Absaloni wutuba: ‘Telanu mvandi Huzai musi Arkita muingi tuzaba mayindu mandi.” 6 Bo Huzai kavitila vaba Absaloni, Absaloni wunkamba: “Amama mawu malongi ma Aitofel. Buawu wummuena, tufueti sadila mambu kabe tuba? Boti ndamba wutu kamba mambu mbi tufueti vanga.” 7 Bosi Huzai wukamba Absaloni: “Khumbu ayiyi dilongi Aitofel kabe vana disi ko dimboti.”

8 Huzai wubue tuba: “Ngie zebi buboti ti tatꞌaku ayi batu boso badi yandi, badi beni mangolo ayi badi mu kukuazuka buka kibulu ki nganzi kintomba bana bandi babe zimbala. Mvandi tatꞌaku widi disodi dipisuka, diawu nandi kasinkuiza viokisa ko builu va kimueka na dikabu. 9 Mu thangu ayiyi tumbula mbembu, nandi widi wusuama kunsuku dimanya voti ku kibuangu kinkaka. Na kutuama ku kunuanisa, batu bankuiza zaba mawu bankuiza tuba: ‘Bama nunga baboso bambuelanga mioko Absaloni.’ 10 Ayi kheti batu badi kibakala buka khosi, bankuiza titubuka mu boma kibila basi Isaeli boso bazebi ti tatꞌaku, widi disodi dipisuka ayi batu boso badi yandi badi beni kibakala. 11 Diyindu diama diakadi: Kutikisa masodi moso ma Isaeli kutonina ku Dan nati ku Berseba. Bawu bafueti ba bawombo buka nsengisini wu ḿbu ayi ngie fueti batuadisa mu mvita. 12 Befu tunkuiza nuanisa Davidi na nkangu wunneni wu masodi, dedi bo mvula wunneni wunnokinanga va ntoto. Mu phila ayoyo, vasi ko mutu wunkuiza vuka. 13 Davidi na kusuamina ku divula dimueka dikabu dioso di Isaeli bala kuenda kuna muingi kutulula divula dioso ayi ne kheti dimanya dialasa sobila ko ku divula beni.”

14 Bosi Absaloni na babakala boso ba Isaeli baba yandi batuba: “Mambu Huzai musi Arkita kabe tuba malutidi kena malongi Aitofel kabe vana.” Batubila mawu, kibila Yave wubaka makani ma kuvunzikisa malongi Aitofel kavana. Yave kavangila mawu muingi kutuadisa ziphasi kuidi Absaloni.

15 Bosi Huzai wukamba Zadoki ayi Abiatali zinganga nzambi: “Amomo mawu malongi Aitofel kabe vana kuidi Absaloni ayi bakulutu boso ba Isaeli. Vayi minu yibe mvana malongi amama. 16 Buabu, yendanu mu thinu ayi zabikisanu mambu amama kuidi ntinu Davidi: ‘Bika kuviokisa builu mu bibuangu bansabukilanga muila wu Yolidani bidi va ndeku thandu. Vayi fueti sabuka muila wu Yolidani, kibila benu kumanga kuvanga mawu, ngie ntinu na batu boso badi yaku bankuiza muvonda.”’

17 Yonatan ayi Aimaás baba vingila ku En-Rogel. Nkietu wumueka wuyiza bazabikisa mambu beni. Kibila Yonatan ayi Aimaás basa tomba ko kutula luzingu luawu va kingela, mu kukota ku divula beni. Bo baba kamba tsangu beni, bawu bayenda kue kamba mawu kuidi ntinu Davidi. 18 Vayi ditoko dimueka wuba mona ayi nandi wuzabikisa mawu kuidi Absaloni. Bosi mu thinu Yonatan ayi Aimaás bayenda ku nzo dibakala dimueka ku Baurim ayi ku nzo beni, kuba ditanga bawu basuamina. 19 Nkazi wu dibakala beni, wufuka ditanga beni ayi wutula va mbata kiuma kafuka zitheti zinyiku. Ayi ne mutu kasa zaba ko ti batu basuamina muna. 20 Bisadi bi Absaloni bayenda ku nzo nkietu beni ayi banyuvula: “Kuawu Yonatan ayi Aimaás badi?” Nkietu beni wuba vutudila: “Bawu babe kuenda ku khonzo yi muila.” Bosi bisadi bi Absaloni bayenda kue babila, vayi basa ku bamona ko diawu bavutukila ku Yelusalemi.

21 Bo bisadi bi Absaloni bavutuka, Yonatan ayi Aimaás batapuka mu ditanga ayi bayenda kue zabikisa zitsangu kuidi ntinu. Bawu bakamba ntinu Davidi: “Yendanu, sabukanu muila mu thinu kibila amama mawu mambu Aitofel kabe tuba matedi benu.” 22 Muna thangu beni, Davidi na batu boso baba yandi batona kusabuka muila wu Yolidani. Bo buisi bukia, baboso bamana kusabuka muila wu Yolidani.

23 Bo Aitofel kamona ti basa kikinina ko malongi kavana, nandi wukubika phunda ayi wuyenda ku nzo ku divula diandi, bosi wuvana zithuadusulu kuidi basi dikanda diandi ayi wu yiledika. Mu phila ayoyo, nandi wufua ayi banzikila ku dibumbi di zikhaya ziandi.

24 Mu thangu ayoyo, Davidi wuyenda ku Maanaim ayi Absaloni na babakala boso ba Isaeli basabuka muila wu Yolidani. 25 Absaloni wusola Amasa muingi kaba mfumu masodi mandi va mvingi Joabe. Amasa wuba muana wu Itra musi Isaeli kabuta na Abigaili. Abigaili wuba muana wu Naás, ayi khomba Zeruia ayi Zeruia wuba ngudi wu Joabe. 26 Absaloni na batu boso baba yandi, bayenda kue vundila ku Ngileadi.

27 Bo Davidi kavitila ku Maanaim, Sobi muana wu Naás musi Rabá divula didi ku kizunga ki basi Amom ayi Makir muana Amiel musi Lo-debar kubunda mvandi Barzilai musi Ngileadi yidi ku Rogelim, 28 banata bika, mabola, zinzungu zivangulu mu tuphandu, trigu, cevada, falinya, zitheti zikangu, mintindu miodi mi madezu, 29 mvandi banata wika, mantega, mamemi ayi kejo. Banata biuma bioso abiobio muingi Davidi ayi batu boso baba yandi badia, kibila batuba: “Batu badi yaku badi mu nzala, mu phuila ayi badi bavonga.”

18 Bosi Davidi wutangisa masodi mandi ayi wubieka zimfumu zi 1.000 ayi zi 100 di masodi. 2 Davidi wukabula masodi mandi mu mangumba matatu. Wutula dingumba ditheti mu thuadusulu yi Joabe, dimmuadi mu thuadusulu yi Abizai muana wu Zeruia khomba Joabe ayi dingumba dintatu mu thuadusulu yi Itai musi Gati. Bosi ntinu wuba kamba: “Minu mvama yinkuenda yinu.” 3 Vayi bawu bankamba: “Ngie wulendi kuenda ko yitu, kibila befu kutina voti ba kuvonda nduka masodi mitu moso, bawu balasa ma kuazukila ko kibila ngiewu bawu bantomba kuvonda. Kuidi befu, ngie ntinu widi buka 10.000 di masodi mitu. Diawu, bika kukuenda yitu vayi siala ku divula muingi wu tufila lusalusu.” 4 Ntinu Davidi wuba kamba: “Yinkuiza vanga mambu luma tuba.” Mu phila ayoyo, Ntinu Davidi wuba va ndeku muelu wu divula bo masodi baba basika mu mangumba ma 100 ayi 1.000 di masodi. 5 Bosi ntinu wukamba mambu amama kuidi Joabe, Abizai ayi Itai: “Bikanu kuvonda muanꞌama Absaloni, kibila minu yikunzolanga.” Masodi moso bayuwa bo ntinu kavana zithuadusulu aziozio matedi Absaloni kuidi zimfumu zioso zi masodi.

6 Bosi masodi ma Davidi bayenda kue nuanisa masodi ma Isaeli, ayi banuanina mvita beni mu nsitu wu mvila wu Efraim. 7 Masodi ma Davidi banunga masodi ma Isaeli ayi bavonda 20.000 di masodi ma Isaeli. 8 Mvita wuyiza ba wungolo va kibuangu beni ayi mu kilumbu beni, nsitu wuluta vonda batu kena batu masodi bavonda.

9 Absaloni wuba va mbata phunda bo kayenda kue nuanisa masodi ma Davidi. Ayi bo kaba tina masodi beni, phunda* kaba yiviokila kutsi nti wunneni ayi ntu wu Absaloni wukandana mu matafi ma nti beni. Mu phila ayoyo, Absaloni wulelama mu nti, vayi kibulu kabe diatila kisa ḿbika vana. 10 Vaba mutu wumueka wumona mawu ayi nandi wuyenda kue kamba mawu kuidi Joabe: “Yibe mona Absaloni belelama mu nti wunneni.” 11 Joabe wukamba mutu beni: “Boti ngie bemmona kibila mbi be khambu kumvondila? Boti ngie bemvonda, khanu minu yinkuiza kuvana phonda* ayi kumi di zimbongo zi palata.” 12 Vayi dibakala beni wukamba Joabe: “Kheti ba kuphana 1.000 di zimbongo zi palata minu yilendi vonda ko muana wu ntinu, kibila befu boso tube kuwa mambu kabe kukamba, kabe kamba Abizai ayi Itai: ‘Bikanu kuvonda muanꞌama Absaloni kibila minu yikunzolanga.’ 13 Boti minu yibe mvonda mu khambu tumukina ntinu, khanu ntinu wunkuiza zaba mawu, ayi khanu ngie mfumuꞌama wisinkuiza khakidila ko mu mioko miandi.” 14 Joabe wutuba: “Yisi bue bungisa ko thanguꞌama mu kukoluka yaku.” Mu phila ayoyo, Joabe wubonga madionga matatu, ayi bo kayenda kue bata Absaloni wumonyo ayi wukandana mu nti, nandi wumbanda didionga mu ntima. 15 Bosi kumi di bisadi baba natanga mata ma Joabe bavitila, bamanisa kuvonda Absaloni. 16 Joabe wusika phungi ayi masodi ma Davidi babika kubue nuanisa masodi ma Isaeli. Mu phila ayoyo, mvita wumana. 17 Masodi ma Davidi baloza Absaloni mu dibulu dinneni diba mu nsitu beni, ayi batula mamanya mu dibulu beni. Vayi masodi moso ma Isaeli bavutuka mu zi nzo ziawu.

18 Bo Absaloni kaba wu monyo, nandi wutelimisa dikunzi va ḿbuinga wu ntinu kibila wutuba: “Dizina diama dilenda zimbala, kibila yisi ko ne muana dibakala.” Diawu kavanina dikunzi beni dizina diandi, ayi nate bubu bantedilanga dikunzi beni, dikunzi di Absaloni.

19 Aimaás muana wu Zadoki wutuba: “Lemvuka mbika yenda muingi yezabikisa zitsangu aziozio kuidi ntinu, kibila Yave bemvangila mambu masonga mu kumvukisa mu mioko mi zimbeni ziandi.” 20 Vayi Joabe wunkamba: “Bubu bakana ko ngie wunkuiza nata zitsangu, kibila muana wu ntinu befua.” 21 Joabe wukamba musi Kuchi:* “Yenda kuidi ntinu ayi nkamba mambu ngie bemona.” Bosi musi Kuchi beni wuyinika ntu vantuala Joabe ayi wuyenda. 22 Aimaás muana Zadoki wubue dinda kuidi Joabe: “Lemvuka boso kua bubela mambu yilenda monikina, bika yilandakana musi Kuchi.” Vayi Joabe wunkamba: “Muanꞌama kibila mbi ngie mvaku wuntombila kukuenda mu kuzaba ti vasiedi ko zitsangu zinkaka muingi wuzabikisa kuidi ntinu?” 23 Vayi Aimaás wutatamana kutuba: “Boso kua bubela mambu yilenda monikina phana nsua muingi yenda. Mu kibila akiokio, Joabe wunkamba: “Yenda” ayi Aimaás wuduma ayi wuviokila mu nzila yidi ku kizunga ki Yolidani ayi wuvioka musi Kuchi.

24 Davidi wuba wukala va ndeku mielu mi divula ayi bo nsungi kamaka kuyilu kibanga kiba va ndeku muelu wu divula, nandi wumona dibakala dimueka waba duma naveka. 25 Nsungi beni wutenduka muingi kuzabikisa mawu kuidi ntinu ayi ntinu wunkamba: “Boti nandi widi mu kukuiza naveka, buna zitsangu kadi mu kutuala.” Ayi bo dibakala beni kaba fikama, 26 nsungi wubue mona dibakala dinkaka waba duma. Diawu nsungi kakambila nkengididi wu mielu: “Yidi mu kubue mona dibakala dinkaka widi mu kuduma naveka.” Ntinu Davidi wutuba: “Dibakala adiodio mvandi zitsangu kadi mu kutuala.” 27 Nsungi wutuba: “Mu phila dibakala ditheti kadi mu kudumina ḿba nandi widi Aimaás muana wu Zadoki.” Ntinu Davidi wutuba: “Aimaás mavanga mamboti madi yandi diawu zitsangu zimboti kadi mu kutuala.” 28 Aimaás wukamba ntinu mu mbembu yinangama: “Mamoso madi mu kukuenda kuandi buboti.” Bosi Aimaás wufukama vantuala ntinu wuyinika kizizi kiandi va tsi ayi wutuba: “Bika Yave Nzambiꞌaku no mavonda batu boso babe kubalukila kazitusu.”

29 Ntinu Davidi wuyuvula Aimaás: “Muanꞌama Absaloni widi buboti?” Aimaás wumvutudila: “Bo Joabe kabe tuma kisadi kiaku ayi bo kabe kuthuma, yibe mona batu bawombo babedi bakutakana ayi vabe ba ntengu ntengu vayi yisazaba ko mambu mbi mabe monika.” 30 Ntinu Davidi wukamba Aimaás: “Ba va khonzu muingi tutemina dibakala dinkaka widi mu kukuiza.” Mu phila ayoyo, Aimaás wuvenguka ayi wuvingila.

31 Bosi musi Kuchi wuvitila ayi wutuba: “A ntinu azizi ziawu zitsangu yima kutuadila: Bubu Yave ma kuvangila mambu masonga mu kukuvukisa mu mioko mi batu boso ba kubalukila.” 32 Vayi ntinu Davidi wuyuvula musi Kuchi: “Khambabu muanꞌama Absaloni widi kuandi buboti?” Musi Kuchi beni wutambudila ntinu: “Bika zimbeni ziaku zioso, baboso ba kubalukila ayi bantomba kuku vanga bubi bamanina buka Absaloni.”

33 Ntinu Davidi wuyiza ba beni kiunda ayi wumaka kuyilu kibanga kiba va ndeku muelu wu divula. Nandi waba dila bo kaba kue diatanga ayi waba tuba: “Muanꞌama Absaloni, muanꞌama, muanꞌama Absaloni. Bulutidi boti minu yibe fuila va mvingiꞌaku Absaloni muanꞌama, muanꞌama.”

19 Bosi bazabikisa Joabe mambu amama: “Ntinu widi mu kudila ayi widi mu kukuana mu kibila ki lufua lu Absaloni.” 2 Mu kibila akiokio, kheti batu baba ku khonzo Davidi banunga mvita, vayi bayiza ba mu kiunda bo bazaba ti ntinu wuba beni mu kiunda mu kibila ki lufua lu muanꞌandi. 3 Mu kilumbu beni, masodi ma Davidi mavutuka mu kiunda dedi bo masodi babe tina mvita bambelanga mu kiunda ayi mu zitsonyi. 4 Ntinu wufuka busu ayi wutatamana kutuba mambu amama mu mbembu yinangama: “Muanꞌama Absaloni, Absaloni muanꞌama, muanꞌama.”

5 Bosi Joabe wuyenda kuba ntinu ayi wunkamba: “A mfumu ngie widi mu kufuisa tsoni masodi babe vukisa luzingu luaku, lu bana baku boso, lu bakazi ayi bimasi biaku. 6 A mfumu, ngie wunzolanga batu ba kulendanga ayi wunlendanga batu ba kuzolanga, kibila bubu ngie mamonisa ti zimfumu zi masodi maku ayi masodi maku moso basi ko luvalu. Kibila yidi lufiatu ti boti befu tube fua ayi Absaloni bevuka, khanu kuidi ngiewu mamoso madi kuandi buboti. 7 Buabu lemvuka, basika muingi wukindisa bisadi biaku, kibila yinleva phesi mu dizina di Yave ti ngie kumanga vanga mawu, builu abubu, baboso bankuiza kuyekula ayi mawu mankuiza luta kutuadisa ziphasi kena mambu moso maphasi mana viokila, tona mu butoko buaku. 8 Mu phila ayoyo, ntinu wubasika ayi wuyenda kue kala va muelu divula. Bosi bazabikisa mambu amama kuidi dikabu: “Ntinu weka wukala va ndeku muelu wu divula.” Mu kibila akiokio, dikabu dioso bayenda vantuala ntinu.

Vayi masodi ma Isaeli batina ayi bayenda mu zinzo ziawu. 9 Mu mimvila mioso mi Isaeli, batu baba tubanga mambu amama: “Ntinu wutuvukisa mu mioko mi basi Filistea ayi mu mioko mi zimbeni zitu, vayi nandi wutinizi ayi wuyendizi ku tsi yinkaka mu kibila ki muanꞌandi Absaloni. 10 Ayi Absaloni no tusola muingi ka tuyadila wufuidi mu mvita. Buabu kibila mbi tummanga kuvangila dioso diambu, muingi ntinu kavutuka?

11 Ntinu Davidi wufila thumu ayiyi kuidi zinganga nzambi Zadoki ayi Abiatali: “Kambanu mambu amama kuidi bakulutu ba basi Yuda: ‘Minu yiyuwizi mambu basi Isaeli badi mu kukoluka. Buabu kibila mbi benu mu khambu tuamina ntuala muingi kuvutula ntinu ku nzo? 12 Benu muidi zikhomba ziama, mvila wumueka tubutukila. Kibila mbi mu khambu tuamina ntuala muingi kuvutula ntinu ku nzo? 13 Mvandi lufueti kamba mambu amama kuidi Amasa: ‘Ngie wisi ko khombꞌama? Yinleva phesi mu dizina di Nzambi ti, minu yinkuiza kubieka mfumu masodi mama va mvingi Joabe.’”

14 Mu phila ayoyo, ntinu Davidi wuvanga basi Yuda boso muingi bamfiatila. Ayi bawu bamfila thumu ayiyi: “Vutuka ku nzo na batu boso badi yaku.”

15 Bo ntinu kavitila ku muila Yolidani, basi Yuda bavitila ku Gilgal muingi kudengana ntinu ayi kunsadisa kusabuka muila Yolidani. 16 Mvandi Simei muana Gera muisi Benyamini, wunkalanga ku Baurim, wuyenda mu thinu na babakala ba basi Yuda muingi kue dengana ntinu Davidi. 17 Nandi wuba na kivevi ki babakala ba mvila wu benyamini. Ayi mvandi Ziba kisadi ki Sauli na 15 di bana bandi kubunda mvandi 20 di bisadi biandi, baba na Simei. Bawu bayenda mu nsualu ku muila wu Yolidani ava Ntinu kavitila. 18 Ziba wusabuka muila muingi kusadisa batu bankalanga ku nzo ntinu ayi kuvanga mamoso ntinu kantomba. Vayi bo ntinu kaba belama kutaba muila wu Yolidani Simei muana Gera wufukama vantualꞌandi. 19 Nandi wukamba ntinu: “Ndevukila, bika kutebukila monyo mambu mambi yikuvangila mu kilumbu ngie mfumu wubasika ku Yelusalemi ayi bika kufhundisa mu mawu. 20 Minu yinkikinina ti nzimbala yivanga. Diawu bubu, minu mutu wutheti mu dikanda di Yozefi yibe kuiza kudengana.”

21 Muna thangu beni, Abizai muana wu Zeruia wutuba: “Simei kafueti fua kibila nandi wusinga mutu Yave kasola”. 22 Vayi Davidi wutuba: “Kibila mbi benu bana ba Zeruia mu nkuazukila mu mawu? Muntomba kuthombisa mambu? Vafueti fua mutu bubu ku Isaeli? Bubu minu yima vutuka kubue ba ntinu ku Isaeli.” 23 Diawu ntinu wukamba Simei: “Ngiewu wisinkuiza fua ko.” Ayi ntinu, wuleva phesi mu mawu.

24 Mefibozeti ntekulu wu Sauli mvandi wuyenda kue dengana ntinu. Nandi kasa lava ko malu mandi, kasa ludika ko mayedu mandi, ni kusukula bikhutu tona kilumbu ntinu kayenda nati kilumbu kavutuka mu ndembama. 25 Bo Mefibozeti kavitila ku Yelusalemi muingi kedengana ntinu, Ntinu wunyuvula: “Mefibozeti, kibila mbi wukhambu kuendila yama?” 26 Nandi wumvutudila: “A mfumu, kisadi kiama wuphuna. Mu kumona ti yidi malu mabela diawu yikambila kisadi kiama: ‘Yinkuiza tuma bakubika phundꞌama muingi yenda na ntinu’. 27 A ntinu nandi wuphunina mambu kuidi ngiewu, vayi ngie widi buka mbasi yi Nzambi yikiedika. Diawu a mfumu vanga moso mambu wutidi. 28 Ngie ntinu wuba luaku lu kuvonda basi dikanda dioso di khayꞌama vayi kheti bobo, ngiewu wuphana luaku lu kudianga ku nzoꞌaku. Buabu nsua mbi yidi muingi kubue dinda binkaka kuidi ngiewu ntinu?”

29 Vayi ntinu wunkamba: “Bika kubue koluka ni diambu, kibila makani mama madi ngiewu ayi Ziba mu fueti kabana nsitu.” 30 Diawu Mefibozeti wukamba ntinu: “bika kabonga nsitu woso kibila ngie mfumuꞌama ntinu, bevutuka mu ndembama ku nzo.

31 Barzilai musi Ngileadi wunanguka ku Rogelim muingi kue vekisa ntinu nate ku muila Yolidani. 32 Barzilai wuba kiboba ayi wuba 80 di mimvu. Nandi wuba beni busina ayi wuvana ntinu bidia bo kaba ku Maanaim. 33 Ntinu wukamba Barzilai: “Tuenda ku Yelusalemi minu yinkuiza kukiebanga.” 34 Vayi Barzilai wukamba ntinu: “Minu yima nunina ngolo, kibila mbi yifueti kuendila na ntinu ku Yelusalemi? 35 Minu yeka 80 di mimvu, yisiala bue nunga ko kusuasisa mamboti ayi mambi, minu kisadi kiaku yisiala bue mona ko lueki mu bidia, biuma yinnua ayi yisiala bue mona ko lueki lu kukuwa minkunga. Diawu minu kukuenda yaku, kisalu kuandi to yinkuiza kubuela. 36 Minu yidi mu mayangi mu kununga kuiza vekisa mfumu nate ku muila wu Yolidani. Buabu kibila mbi wuntomba kuphanina mfutu awowo? 37 Lemvuka bika minu kisadi kiaku yivutuka ayi bika yifuila ku divula yibutukila, kuziamina tatꞌama ayi mamama. Vayi a mfumuꞌama nata Kimã kisadi kiaku ayi mvangila moso mambu wutidi.”

38 Bosi ntinu wunkamba: “Minu yennata Kimã ayi yinkuiza mvangila mambu moso ngiewu wuntomba yimvangila, mvandi yinkuiza kuvangila mambu moso wuntomba.” 39 Dikabu dioso ditona kusabuka muila wu Yolidani. Bo ntinu kaba belama kusabuka, wuvana Barzilai besu, wunsakumuna ayi Barzilai wuvutuka ku nzo. 40 Bo ntinu kasabuka ayi kayenda ku Gilgal, Kimã mvandi wuyenda yandi. Babakala boso ba basi Yuda ayi ndambu yi babakala ba basi Isaeli mvandi basabuka muila na ntinu.

41 Bosi babakala boso ba Isaeli bayenda ke ntinu ayi banyuvula: “Kibila mbi zikhomba zitu basi Yuda babe kuendila kue landila ngiewu ntinu ayi basi dikanda diaku, na masodi maku moso ayi ku musadisa kusabuka muila wu Yolidani?” 42 Babakala boso ba basi Yuda batambudila basi Isaeli: “Tube vangila mawu kibila ntinu wubutukila mu mvilꞌitu. Nandi kasa tuvana ko bidia ayi kasa tuvana ko nkhailu mu mambu tube vanga. Buabu kibila mbi benu mundasukila mu mawu?”

43 Vayi babakala ba basi Isaeli batambudila babakala ba mvila wu Yuda: “Ku khonzoꞌitu kuidi 10 di mimvila, diawu befu tulutidi vua ntinu Davidi kena benu. Buabu kibila mbi mube tulenzila? Khanu befu batu batheti tube kue landa ntinu ayi kumvutula ku nzo.” Vayi basi Yuda, bawu banunga mu ziphaka bafindana na basi Isaeli.

20 Vaba dibakala dimueka waba vukumunanga bankaka, baba tedilanga Seba muana Bicri musi Benyamini. Nandi wusika phunzi ayi wutuba: “A Isaeli, ndokanu tuvutuka kuidi zinzambi zitu, kibila befu tuisi ko mu mvila wumueka na Davidi ayi tuisi ko mu dikanda di Yese.” 2 Bo bayuwa mawu, babakala boso ba basi Isaeli, bayekula Davidi ayi balandakana Seba muana Bicri. Vayi babakala ba mvila wu Yuda kutonina ku kizunga ki Yolidani nate ku Yelusalemi, batatamana kuba ku khonzo Davidi.

3 Bo ntinu Davidi kavitila ku nzoꞌandi ku Yelusalemi, nandi wubonga kumi di bimasi kabika muingi bakiebanga nzoꞌandi ayi wuba tula mu nzo yinkaka. Nandi waba kuba vananga bidia vayi kabasa bue bundananga ko yawu nyitu. Bawu batatamana kuzinga va baveka, buka mimfuisi nate bayiza fua, kheti nnuniꞌawu wuba wumonyo.

4 Ntinu Davidi wukamba Amasa: “ Va bika kuvioka bilumbu bitatu, ngie fueti kutikisa babakala ba basi Yuda, ayi lufueti kuiza vantualꞌama.” 5 Mu phila ayoyo, Amasa wuyenda kue kutikisa babakala ba basi Yuda, vayi kasa vutukila ko mu bilumbu banzengila kuidi ntinu. 6 Bosi Davidi wukamba Abizai: “Seba muana Bicri ḿba kalenda luta kututuadisa ziphasi kena Absaloni. Diawu, kamba masodi mama muingi lunlandakana. Kibila Seba kalenda suamina ku divula ditungu ayi nandi kalenda vuka mu mioko mitu.” 7 Mu phila ayoyo, babakala baba na Joabe zikeretita, zipeletite ayi babakala boso baba beni mangolo, bananguka ku Yelusalemi ayi bayenda muingi kue nuanisa Seba muana Bicri. 8 Bo bavitila va ndeko dimanya dinneni ku Gibeão, Amasa wuyiza badengana. Joabe wuba wuvuata bikhutu bi masodi ayi wuba na mbedi mu lukieto bo kafikama vaba Amasa. Nandi wukubika mbediꞌandi.

9 Joabe wukamba Amasa: “A khombꞌama widi buboti?” Bosi Joabe wusimba mayedo ma Amasa mu koko ku lubakala, buka nandi wukumvana besu. 10 Vayi Amasa kasa mona ko mbedi yiba va koko ku Joabe. Mu phila ayoyo, Joabe wumbanda mbedi beni mu kivumu ayi minlia mimbasika. Vasa bue tombulu ko kubue nkima khumbu yimmuadi, muingi kumvonda. Bosi Joabe ayi khombꞌandi Abizai, bayenda muingi kue nuanisa Seba muana Bicri.

11 Ditoko dimueka wuba na Joabe wutelama va ndeko Amasa wutuba: “Woso widi ku khonzo Joabe ayi widi ku khonzo Davidi kafueti landakana Joabe.” 12 Bo Amasa kaba mana monyo waba vindubuka va mbata menga mandi mu nzila. Bo ditoko beni kamona ti batu boso baba kue telamanga vana, wubotula nyitu yi Amasa mu nzila ayi wutula yawu ku bititi bosi wufuka yawu nledi. 13 Bo bamana kubotula nyitu beni mu nzila, babakala boso balandakana Joabe muingi kue nuanisa Seba muana Bicri.

14 Seba wuviokila mu mimvila mioso mi Isaeli ayi wuyenda nate ku divula di Abeli Bete-Maaká. Basi Bicri bakutakana ayi banlandakana nate ku divula beni.

15 Joabe ayi babakala baba ku khonzoꞌandi, bazungidila divula di Abeli Bete-Maaká, bathetikisa mamanya va ndeko bibaka, kibila divula beni diba kukhati luphangu. Ayi babakala boso baba na Joabe, basika mu lusersu muingi kutulula bibaka bi divula beni. 16 Bosi nkietu wumueka wuba nduenga waba kalanga ku divula beni, wutenduka: “A babakala lemvukanu, kambanu Joabe muingi kiza kibila minu yintomba kukoluka yandi.” 17 Bo Joabe kafikama nkietu beni, nkietu beni wunyuvula: “Ngie widi Joabe?” Nandi wumvutudila: “Ngete.” Nkietu beni wubue tuba: “Yuwa mambu minu kisadi kiaku yikukamba.” Joabe wumvutudila: “Tuba kuaku yidi mu kukuwa.” 18 Nkietu beni wubue tuba: “Mu thangu yikhulu, batu baba tubanga, ‘muingi wununga kuzonza mambu dinda malongi kuidi batu bankalanga ku divula di Abeli.’ 19 Minu yidi mu kukolukila va mvingi batu bakuikama ayi bantuadisanga ndembama ku Isaeli. Ngie wuntomba kutulula divula didi buka ngudi yi Isaeli. Kibila mbi wuntomba kutuludila kiuka ki Yave?” 20 Joabe wumvutudila: “Minu yisa kuiza ko muingi kutulula divula adidi. 21 Befu tuba kuizila muingi kubuila dibakala dimueka bantedilanga Seba muana Bicri wunkalanga ku kizunga kidi miongo, wu mvila wu Efraim wubalukidi ntinu Davidi ayi bekuiza suamina ku divula adidi. Benu kutuvana nandi, befu tunkuiza yenda kuitu.” Nkietu beni wukamba Joabe: “Befu tueka mukuba ntu wu dibakala beni.”

22 Muna thangu beni, nkietu awowo wuba nduenga, wuzabikisa mambu beni kuidi baboso baba kalanga ku divula beni. Bosi bawu bazenga ntu wu Seba, muana Bicri ayi bayuka wawu kuidi Joabe. Mu phila ayoyo, Joabe wusika phunzi ayi babakala boso baba yandi, babika divula beni ayi kadika mutu wuvutuka ku nzoꞌandi ayi Joabe wuvutuka ku Yelusalemi kuidi ntinu.

23 Joabe nandi waba tuadisanga masodi moso ma basi Isaeli, Benaia muana Jeoiada nandi waba tuadisanga zikeretita ayi zipeletite. 24 Adorão nandi waba kengidilanga, batu boso baba vanganga bisalu bingolo. Yozafati muana wu Ailudi nandi waba sonikanga mambu moso mabe monikanga mu luyalu. 25 Sewe wuba nsoniki wu ntinu, Zadoki ayi Abiatali baba zinganga nzambi. 26 Ayi Ira musi Jair wuyiza ba wumueka mu minyadi milutidi luvalu mi Davidi.

21 Mu luyalu lu Davidi vayiza ba nzala mu mimvu mitatu. Mu phila yoyo, Davidi wutomba kuzaba mayindu ma Yave ayi Yave wunkamba ti, Sauli ayi basi dikanda diandi bawu badi fotu mu mambu amomo kibila bavonda basi Gibeão. 2 Bosi ntinu Davidi wutumisa basi Gibeão ayi wusolula yawu. Basi Gibeão basa ba ko basi Isaeli vayi baba basi Amon. Basi Isaeli bavanga tsila ti balasa vonda ko basi Gibeão, vayi Sauli kabasa kuangalalanga ko kumona basi Gibeão kuzingila va kimueka na Isaeli ayi basi Yuda, diawu kaba vondila. 3 Davidi wuyuvula basi Gibeão: “Mbi tufueti luvana ayi mbi tufueti vanga muingi kumanisa tsingulu ayoyo, muingi lusakumuna dikabu di Yave?” 4 Basi Gibeão bamvutudila: “Vasintombulu ko kutuvana palata voti wola mu mambu Sauli ayi basi dikanda diandi batuvangila. Mvandi tuisi ko nsua wu kuvonda ne mutu ku Isaeli.” Mu phila ayoyo, ntinu Davidi wuba kamba: “Minu yinkuiza vanga mamoso munkuiza ndinda.” 5 Basi Gibeão bakamba ntinu Davidi: “Matedi mutu wubaka makani ma ku tuvonda ayi ku tumanisa vakhati basi Isaeli, 6 wutu vana 7 di bana bandi. Befu tunkuiza bavonda ayi tunkuiza ledika zimvumbi ziawu vantuala Yave, ku divula di Gibeá ko Sauli mutu Yave kasola kabe kalanga.” Ntinu Davidi wuba kamba: “Minu yinkuiza luvana batu beni.”

7 Vayi mu kibila ki luwawanu Davidi ayi Yonatan bavanga vantuala Yave, ntinu Davidi wumona kiadi Mefibozeti muana Yonatan ayi Yonatan wuba muana Sauli. 8 Mu phila ayoyo ntinu Davidi wubuila Armoni ayi Mefibozeti bana babuadi ba Rispa kabuta na Sauli ayi Rispa wuba muana wu Aia. Ayi wubuila mvandi bana batanu ba Mikal, kabuta na Adrieli, Mikal wuba muana wu Sauli ayi Adrieli wuba muana wu Barzilai muisi Melata. 9 Davidi wuvana babakala beni mu mioko mi basi Gibeão ayi basi Gibeão ba bavonda ayi baledika zinyitu zi batu beni, mu mongo vantuala Yave. Sambuadi yoso yi batu baba vondila va kimueka, mu bilumbu bitheti bamvelanga mbongo yi cevada. 10 Bosi Rispa muana wu Aiá wubonga tsaku ayi wuyala yawu vambata dimanya ayi wukala vana tona mu thangu yi kuvela mbongo, nate zimvula zitona kunoka. Nandi kasa bika ko ni nuni yibeta mu zinyitu beni va muinya, ni kheti bibulu bi nsitu muingi bifikama vabuilu.

11 Bazabikisa kuidi Davidi mambu Rispa muana wu Aiá kavanga. 12 Bosi ntinu Davidi wuyenda kue landa mimvesi mi Sauli ayi mi Yonatan muana Sauli, miba mu mioko mi zimfumu zi basi Jabes-Gileade. Bawu bayiba zinyitu ziawu bo ziba ku dizandu di basi Bete-Sã ko basi Filistea baledika zinyitu beni, bo ba bavonda ku mongo wu Gilboa. 13 Nandi wunata mimvesi mi Sauli ayi mi Yonatan muana Sauli ayi wubunda miawu na mimvesi mi babakala bavonda. 14 Bazika mimvesi mi Sauli ayi mi muanꞌandi Yonatan ku Zela. Ku ntoto wu Benyamini va dibumbi di Kis tata Sauli. Bo bavanga mambu moso ntinu katuma, Nzambi wuyuwa minsambu miawu ayi wusakumuna ntoto.

15 Basi Isaeli bayiza bue nuana mvita na basi Filistea. Mu mvita beni Davidi wuyiza vonga. 16 Dibakala dimueka wubutukila mu dikanda di zi Refaim baba tedilanga Isbi Benobi, wuba na didionga divangulu mu cobre diaba zita 300 di zisikulu.* Mvandi wuba na mbedi yimona ayi waba fikama Davidi muingi kumvonda. 17 Muna thangu beni, Abizai muana wu Zeruia wuvukisa Davidi mu kuvonda muisi Filistea beni. Bosi masodi ma Davidi bavanga tsila ayiyi mu kutuba: “Ngie mfumu wulendi bue kuendanga ko yitu mu mimvita, muingi muinda wu Isaeli wubika doka.”

18 Bosi basi Isaeli bayiza bue nuana mvita na basi Filistea ku Gobi. Mu mvita awowo, Sibekai muisi Huzá wuvonda Safi wubutukila mu dikanda di zi Refaim.

19 Basi Isaeli babue nuana mvita na basi Filistea ku Gobi. Ayi Elanã muana Jare-Oreguim muisi Betelemi, wuvonda Ngoliati muisi Gati no wuba didionga didi na mva widi buka mua nti.

20 Vayiza bue ba mvita vayi khumbu ayiyi ku divula di Gati. Kuba disodi dimueka muisi Filistea wuba beni wuzangama. Nandi wuba 6 di zinzala mu kadika kitambi ayi kadika dikanda. Kubundikisa zinzala zi mioko ayi zi malu wuba 24 di zinzala. Nandi wubutukila mu dikanda di zi Refaim. 21 Disodi adiodio muisi Filistea, waba fiesanga masodi ma basi Isaeli, diawu Yonatan kamvondila. Yonatan wuba muana Simei ayi Simei wuba khomba Davidi.

22 Masodi manna amomo ma basi Filistea, babutukila mu dikanda di zi Refaim ku Gati. Davidi ayi masodi mandi bavonda babakala beni.

22 Bo Yave kavukisa Davidi mu mioko mi Sauli ayi mu mioko mi zimbeni ziandi zioso, Davidi wutonda Yave mu kuyola nkunga awuwu: 2 “Yave widi dimanya diama dinneni,*

Mangolo mama ayi mvukisiꞌama.

11 Nandi wukuluka ku diyilu va mbata kerubim.

Wukulukila ku diyilu va mbata mavavi ma mbasi.

13 Vantualꞌandi vaba lezama ayi vaba lema mbazu.

Ayi nandi widi kisuamunu kingolo kuidi baboso bantombanga lukiebu luandi.

32 Kibila Yave nandi to Nzambi yikiedika.

Vadi mutu wunkaka widi buka dimanya dinneni kubotula kuandi Nzambꞌitu?

44 Ngie wala kukhieba mu zikhuamusu zi dikabu diama.

47 Yave wunzinganga thangu zioso. Bika dimanya diama dinneni kazitusu.

Nzambiꞌama dimanya diama dinneni di luvukusu kazitusu.

23 Amama mawu mambu Davidi katuba ava kafua: “Mambu Davidi muana Yese mutu no banangika, mutu wusolu kuidi Nzambi yi Yakobi, nyimbidi wumboti waba kuimbilanga minkunga mi Isaeli.

Ayi wumvanga muingi bivatu bimena.

 5 Nzambi wumona ti dikanda diama buawu bela yadila.

8 Amama mawu mazina ma masodi malutidi mangolo ma Davidi: Yozebe-Bazebeti musi Hacmoni, nandi wuba wutheti mu masodi ma matatu. Kilumbu kimueka, nandi wuvonda 800 di babakala mu didionga diandi. 9 Wummuadi wuba Eliazali muana Dodai ayi Dodai wuba muana Aoíta. Bo basi Filistea bakutakana muingi kunuanisa basi Isaeli ayi bo basi Isaeli batina, Eliazali wuba wumueka mu masodi matatu malutidi mangolo, baba na Davidi muingi kunuanisa basi Filistea. 10 Eliazali mu kusadila mbediꞌandi, wuvonda masodi mawombo ma basi Filistea nate koko kuyiza ntiva. Mu lusalusu lu Yave, bawu banunga mvita beni. Bosi masodi ma Isaeli bavutuka muingi kuiza bonga biuma bi luvalu masodi ma basi Filistea babika.

11 Wuntatu wuba Samá muana Agé musi Harari. Bo basi Filistea bakutakana ku Leí mu tsola yi madezu, masodi ma basi Isaeli batina basi Filistea. 12 Vayi Samá wutelama mu khati tsola beni ayi kasa bika ko basi Filistea bavua yawu ayi wuba vonda. Mu phila ayoyo, Yave wuba sadisa banunga mvita beni.

13 Masodi matatu baba mu khati 30 di zimfumu zi masodi, bayenda kue dengana Davidi kunsuku dimanya di Adulão mu thangu yi kuvela mbongo. Ayi muna thangu beni, masodi ma basi Filistea baba bakutakana ku ḿbuinga wu Refaim. 14 Bo Davidi kaba wusuama, nkangu wu masodi ma basi Filistea baba ku Betelemi. 15 Davidi wutuba mambu amama: “Kubaka kuandi mutu wu kue ndandila nlangu wu kunua widi phosi, mu bisima bidi va ndeko muelu wu Betelemi. 16 Bosi masodi matatu badi beni mangolo, bayenda va kibuangu vaba masodi ma basi Filistea. Baba nuanisa ayi bateka nlangu mu kisima kidi va ndeko muelu wu Betelemi. Bosi banata wawu kuidi Davidi, vayi Davidi wudukula wawu vatsi buka nandi wumvana nkhailu kuidi Yave. 17 Davidi wutuba: “Minu yilendi vanga ko mambu amomo a Yave. Buidi yilenda nuina menga ma batu babe tula luzingu luawu va kingela?” Mu phila ayoyo, Davidi kasa nua ko nlangu beni. Amomo mawu mambu ma kukuitukila masodi matatu malutidi mangolo ma Davidi bavanga.

18 Abizai khomba Joabe muana Zeruia, wuba mfumu wu dingumba dinkaka di masodi matatu. Nandi wuvonda 300 di batu mu didionga diandi ayi nandi wuba beni wuzabakana buka masodi matatu matheti. 19 Kheti nandi wuluta ba wuzabakana ayi wuba mfumu mu khati dingumba di masodi matatu, vayi nandi kasa vitila ko mu kitesu ki masodi matatu matheti.

20 Benaia muana Jeoiada wuba beni kibakala ayi nandi wuvanga mambu mawombo ma kukuitukila ku Kabzeli. Nandi wuvonda bana buadi ba Ariel musi Moabi, mvandi wukuluka mu kisima mu kilumbu kinoka mvula wu neve ayi wuvonda khosi. 21 Benaia mvandi wuvonda musi Ngipiti wuba beni wuzangama. Kheti musi Ngipiti beni wuba na didionga va koko, vayi Benaia wuba to na nkawuꞌandi va koko. Benaia wuvionya didionga va mioko mi musi Ngipiti beni ayi wumvondila mu didionga beni. 22 Amomo mawu mambu ma kukuitukila Benaia muana Jeoiada kavanga. Nandi wuba beni wuzabakana buka dingumba di masodi matatu matheti badi beni mangolo. 23 Kheti wuluta ba wuzabakana kena dingumba di 30 di zimfumu zi masodi, vayi kasa vitila ko mu kitesu ki masodi matatu mathedi malutidi mangolo. Kheti bobo, Davidi wumbieka nsungiꞌandi.

24 Azael khomba Joabe wuba mu khati dingumba di 30 di zimfumu zi masodi, Elanã muana wu Dodai musi Betelemi, 25 Samá musi Harodi, Elika musi Harodi, 26 Helezi musi Bete-Peleti, Ira muana wu Ikes musi Tekoa, 27 Abiezer musi Anatoti, Mebunai musi Huzá, 28 Zalmom musi Aoíta, Marai musi Netofa, 29 Helebi muana wu Baaná musi Netofa, Itai muana wu Ribai musi Gibeá yidi mu kizunga ki mvila wu Benyamini, 30 Benaia musi Piratom, Hidai wunkalanga ku ḿbuinga wu Gaás, 31 Abi-Albom musi arbatita, Azmavete musi Baurim, 32 Eliaba musi Salbim, bana ba Jázen, Yonatan, 33 Samá musi Harari, Aião muana wu Sarar musi Harari, 34 Elifeleti muana wu Aasbai ayi Aasbai wuba muana wu Zimakatita, Elião muana wu Aitofel musi Gilo, 35 Hezro musi Karmelu, Parai musi Arabia, 36 Igali muana wu Natani musi Zobá, Bani musi Gadi, 37 Zeleke musi Amom, Naarai musi Beeroti no waba natanga nkaku wu Joabe muana Zeruia, 38 Ira musi itrita, Garebi musi itrita, 39 Ayi Uria musi Hitita, baboso baba—37.

24 Yave wubue dasukila dikabu di Isaeli, bo Davidi kavukumuka ayi bo katuba mambu amama: “Yenda tangisa dikabu di Isaeli ayi di Yuda.” 2 Ntinu Davidi wukamba Joabe mfumu masodi: “Yenda mu mimvila mioso mi Isaeli kutonina ku Dan nate ku Berseba ayi tangisa batu boso muingi tuzaba thalu kua tuidi.” 3 Vayi Joabe wukamba ntinu Davidi: “Bika Yave Nzambiꞌaku kafunisa dikabu khama di zikhumbu ayi ngie mfumu wumona mawu. Buabu kibila mbi ngie ntinu wuntombila kutangisa dikabu?”

4 Vayi mambu ntinu Davidi katuba mawu masalama, kubika kuandi mambu Joabe ayi zimfumu zi masodi batuba. Mu phila ayoyo, Joabe na zimfumu zi masodi bananguka vaba ntinu ayi bayenda kue tangisa dikabu di Isaeli. 5 Basabuka muila wu Yolidani ayi bayenda kue vundila ku khonzu lubakala yi divula di Aroer, didi mu khati ḿbuinga. Bosi bayenda ku khonzu kizunga ki Gadi ayi bayenda ku Jazer. 6 Babue kuenda ku Ngileadi ku kizunga ki Tatim-Hodki. Bo babasika ku kizunga akiokio, bayenda ku Dã-Jaã, bosi bayenda ku Sidon. 7 Bayenda ku divula ditungu di Tile, mu mavula moso ma zi Heveu, ma basi Kanani, bosi bavitila ku Berseba yidi ku Neguebe yidi mu mvila wu Yuda. 8 Badiata mu tsi yoso yi Isaeli ayi bavutuka ku Yelusalemi bo vavioka 9 di zingonda ayi 20 di bilumbu. 9 Bosi Joabe wuzabikisa kuidi ntinu Davidi thalu yoso yi batu katangisa. Ku Isaeli kuba 800.000 di masodi baba na zimbedi, ku Yuda kuba 500.000 di masodi.

10 Vayi Davidi waba kuazuka beni bo katangisa dikabu. Diawu nandi kakambila Yave: “Disumu dingolo yima vanga mu kutangisa dikabu. Diawu a Yave, ndemvukila minu kisadi kiaku mu nzimbala yibe vanga, kibila yisa monisa ko nduenga mu mambu amomo.” 11 Mu kilumbu kilanda va meni, Yave wuzabikisa mambu amama kuidi ḿbikudi Gadi: 12 “Yenda kuidi Davidi ayi nkamba: ‘Buakabu butubidi Yave: “Sola mu mambu matatu amama diambu mbi yifueti kuvangila.”’” 13 Bosi Gadi wuyenda kuidi Davidi ayi wunkamba kasola dimueka mu mambu matatu amama: “Vafueti monika nzala ku Isaeli mu tsambuadi di mimvu? Fueti viokisa zingonda zitatu mu kue tinanga zimbeni ziaku bantomba ku kuvonda? Voti ku Isaeli kufueti monika kivunga mu bilumbu bitatu? Diawu yindula buboti muingi wukhamba mvutu mbi yifueti kamba mutu bethuma.” 14 Bosi Davidi wukamba Gadi: “Amomo madi mambu maphasi kuidi minu. Bulutidi naveka Yave ka tufundisa kena zimbeni ziama, kibila nandi widi nkua kiadi.”

15 Bosi Yave wutuadisa kivunga ku Isaeli, kutonina va meni nate mu thangu kasikika. Mu phila ayoyo, kuyiza fua 70.000 di batu kutonina ku Dan nate ku Berseba. 16 Bo mbasi kaba belama kutulula Yelusalemi, Yave wuba mona kiadi ayi wukamba mbasi beni waba vonda batu: “Bikila bobo.” Mbasi beni yi Yave wuba va ndeku kibuangu ki kusosila mbongo ki Arauna musi Jebus.

17 Davidi wukamba Yave mambu amama bo kamona mbasi waba vonda batu: “Minu yidi fotu mu mambu amomo, buabu kibila mbi widi mu kuvondila batu bakhambulu fotu? Lemvuka tuadisa ziphasi aziozio kuidi minu ayi kuidi dikanda di tatꞌama.”

18 Bosi Gadi wuyenda kuidi Davidi mu kilumbu beni ayi wunkamba: “Yenda ku kibuangu ki kusosila mbongo ki Arauna musi Jebus, ayi tungila Yave kikumu va kibuangu beni.” 19 Mu phila ayoyo, Davidi wuyenda ayi wuvanga mambu Yave kankamba mu nzila Gadi. 20 Bo Arauna kamona ntinu Davidi na masodi mandi, mu thinu nandi wuba fikama, wufukama vantuala ntinu ayi wuyinika kizizi kiandi va tsi. 21 Arauna wuyuvula ntinu Davidi: “A mfumu, kibila mbi bekuizila kuidi kisadi kiaku?” Ntinu Davidi wuntambudila: “Yima kuizila muingi kusumba kibuangu wunsosilanga mbongo ayi kutungila Yave kikumu va kibuangu beni, muingi kivunga kidi mu kuvonda dikabu kimana.” 22 Vayi Arauna wukamba ntinu Davidi: “Minu yekuvana kibuangu beni a ntinu, ayi vanina vana mioso minkhailu wuntomba. Bonga zingombi azizi muingi wuvana nkhailu wuviku ayi mabaya amama muingi wuvangila bisuadi. 23 Yikuvana biuma abiobio a ntinu. Arauna wubue kamba ntinu Davidi: “Bika Yave Nzambiꞌaku ka kusakumuna.”

24 Bosi ntinu Davidi wukamba Arauna: “Yilendi vanga ko mambu amomo. Minu yinkuiza sumba biabioso. Yilendi vana ko nkhailu kuidi Yave Nzambiꞌama mu khambu futa ne kiuma.” Mu phila ayoyo, Davidi wusumba kibuangu baba sosilanga mbongo ayi zingombi mu 50 di zisikulu* zi palata. 25 Davidi wutungila Yave kikumu va kibuangu beni, ayi wuvana minkhailu miviku ayi minkhailu mi kithuadi. Bosi Yave wuyuwa nsambu wu Davidi matedi dikabu di Isaeli ayi kivunga beni kimana.