NKANDA WUMMUADI KUIDI BASI KOLINTU

1 Minu Polo, apostolo yi Yesu Klistu mu luzolo lu Nzambi, va kimueka na Timoti khomb’itu, tumfila nkanda awuwu kuidi kimvuka ki Nzambi kidi ku Kolintu, kubunda mvandi banlongo boso badi ku kizunga ki Akaia:

2 Bika mamboti malutidi ayi ndembama yi Tat’itu Nzambi ayi ma Mfumu Yesu Klistu, maba yinu.

3 Bika Nzambi, Tata yi Mfumu’itu Yesu Klistu, Tata nkua kiadi ayi Nzambi yinkua mbombolo kazitusu, 4 kibila nandi wu tubombanga mu zikhuamusu zitu zioso, muingi mu mbombolo tuntambula kuidi Nzambi, tubomba mvandi bankaka badi mu kuviokila mu moso kua mambu maphasi. 5 Kibila dedi bo tumviokilanga mu ziphasi ziwombo mu kibila ki Klistu, buawu mvandi tuntambudilanga mbombolo yiwombo mu nzila Klistu. 6 Boti befu tuidi mu kuviokila mu ziphasi, tumviokila mu mawu, muingi ku muvana mbombolo ayi phulusu. Ayi boti befu tuidi mu kutambula mbombolo, tuidi mu kutambudila yawu muingi ku lubomba. Mawu ma kulusadisanga kukindama, mu zio ziawu ziphasi befu mvitu tuidi mu kuviokila. 7 Ayi kivuvu tuidi mu benu kidi kikinda, kibila tuzebi ti, dedi bo benu mumviokilanga mu ziphasi, mvandi muala tambula mbombolo.

8 Kibila zikhomba, befu tuntomba muingi benu muzaba ziphasi tuviokila ku dibueti di Azia. Befu tuviokila mu mambu makhambu ba mu kitesu kitu, diawu tuyiza bela beni boma ayi luzingu luitu mvandi luba va kingela. 9 Bukiedika, tuaba muena buka ti tutambula nzengolo yi lufua. Mawu mamonikina, muingi tubika kuyifiatila, vayi tufiatila mu Nzambi no wumvulubusanga bafua. 10 Nandi wu tukula mu mambu mabina tunata ku lufua ayi wutuvukisa. Mvandi wala kutuvukisa ayi tuidi kivuvu mu nandi ti wala tatamana kutuvukisa. 11 Benu mvinu mulenda kutusadisa, mu kutunatanga mu minsambu minu, kibila bawombo ba kusambila, befu tulenda tambula lusalusu banga mvutu wu minsambu beni, ayi mawu mala vanga bawombo kutonda Nzambi.

12 Kibila befu tukinyemisanga mu mambu amama: Kilunzi kitu kimvana kimbangi ti befu tummonisanga zikhadulu zimboti mu nza, ayi bulutidi mu matedi benu, mu busonga ayi mvandi mu kiedika kinkuizilanga mu Nzambi, kubika ti mu nduenga yi batu, vayi mu mamboti malutidi ma Nzambi. 13 Kibila befu tusa musonikina ko mambu mo lulendi nunga ko kutanga ayi kuvisa. Vayi minu yintomba mutatamana kuvisa buboti mambu amama, 14 nati kitesu kio benu luma visila, ti befu tuidi kibila muingi benu luyinyemisa, dedi bo benu luala bela muingi tuyinyemisa mu kilumbu ki Mfumu’itu Yesu.

15 Mu kibila ki lufiatu yidi mu benu, diawu yaba tombila kuiza lutala theti, muingi lubaka kibila kimmuadi ki kubela mu mayangi. 16 Kibila minu yiba mayindu ma kuiza lutala bo yaba tomba kukuenda ku Masedoni, ayi mu phutukulu’ama mvandi yaba tomba kuviokila koko, bosi benu luala kuephekisa bo yala vutuka ku Yuda. 17 Bukiedika ti bo yibaka makani amomo, yivangila mawu mu kusakana? Voti mayindu mami maba mayindu ma kinsuni, diawu yitubila “Ngete,” bosi yibue balula “Ndamba”? 18 Vayi mu kuzaba ti Nzambi widi wukuikama, diawu mambu tuidi kumu kamba, masi ko “ngete” ayi mu yoyawu thangu “ndamba.” 19 Kibila Yesu Klistu Muana Nzambi no minu, Silivanu ayi Timoti tunsamunanga kuidi benu, kasa kituka ko “ngete” ayi mu yoyawu thangu “ndamba.” Vayi “ngete” yikituka “ngete” matedi nandi. 20 Kibila zikhanu zioso zi Nzambi zinsaliminanga mu nzil’andi, kibila mu nzil’andi muawu mvandi tuntubilanga “Amem.” Ayi mawu mamvananga nzitusu kuidi Nzambi mu nzil’itu. 21 Vayi Nzambi nandi mutu wu tusola ayi wu tuvana bivisa ti befu ayi benu tuidi batu ba Klistu. 22 Nandi mvandi wutula kidimbu ki lunungu mu befu ayi wutula phevi’andi yinlongo mu mintima mitu, muingi ku tuvana bivisa mu mambu mala kuiza.

23 Yinleva phesi mu Nzambi ti, boti minu yiyiza ku Kolintu, khanu mawu ma lutuadisa kiunda kiwombo. 24 Masinsundula ko ti befu tuvuidi kiminu kinu, vayi befu tunsalanga yinu va kimueka muingi kubuela mayangi minu, kibila luididi bakuikama, mu nzila kiminu kinu.

2 Kibila minu yibeki makani ti khumbu yinkaka yinkuiza mu tala, yala lutuadisa mayangi. 2 Kibila minu kulunyongisa, buna nani wunkaka wunkuiza thuadisa mayangi? 3 Yimusonikini mambu amomo, muingi bo yinkuiza koko, yibika ba mu kiunda mu kibila ki batu bafueti kuthuadisa mayangi, kibila yidi lufiatu ti mambu ma kuthuadisanga mayangi ma ku lutuadisanga mvandi mayangi. 4 Kibila yimusonikini mambu amomo, na kiunda kingolo mu ntima ayi matsuela, kubika ti muingi ku munyongisa, vayi muingi luzaba ti luzolo luwombo yidi mu benu.

5 Buabu, boti vadi mutu mu benu bevanga diambu dimbi, kubika to minu kabe nyongisa ntima, vayi benu boso. Yintubila mawu, muingi yibika monikina ti yidi mutu wu makhema. 6 Tsembolo benu boso mube mvana, yifueni kuandi mu nandi. 7 Vayi, benu mufueti kumlemvukila mu ntima woso, ayi kumbomba muingi nandi kabika bua mu kiunda kingolo. 8 Minu yimu kindisa muingi lubue monisa luzolo luinu mu nandi. 9 Kiawu kibila kiphanga kumu sonikina, muingi yimona boti benu lumvana bivisa ti, luidi batu bantumukinanga mu mambu moso. 10 Benu kulemvukila mutu bevanga diambu dimbi, minu mvama yinkuiza nlemvikila. Bukiedika, minu kulemvukila (voti minu kulemvukila dioso diambu dimbi), benu munkuiza baka ndandu va ntuala Klistu. 11 Muingi Satana kabika ku tununga, kibila befu tuzebi buboti mintambu miandi.

12 Bo yivitila ku Toloade muingi kusamuna zitsangu zimboti matedi Klistu, ayi bo yiba luaku lu kuvanga kisalu ki Mfumu, 13 minu yaba kuazuka beni kibila yisa mona ko khomb’ama Titu. Diawu yikanina zikhomba ku Toloade ayi yinanguka muingi kukuenda ku Masedoni.

14 Vayi tuntondanga Nzambi, kibila wu tutuadisanga mu nzila lunungu va kimueka na Klistu, ayi mu kibila kitu, mfimbu wumboti wu nzailu widi mu kutiamuka mu bibuangu bioso. 15 Kibila kuidi Nzambi, befu tuidi mfimbu wumboti wu Klistu, kuidi batu badi mu nzila phulusu ayi kuidi batu badi mu nzila yimbungulu. 16 Kuidi batu batsuka, tuidi batu bantuadisanga lufua. Vayi kuidi batu batheti, tuidi mfimbu wu luzingu wumvananga luzingu. Buabu, nani widi wufuana mu mawu? 17 Befu tuidi bafuana, kibila befu tuisi ko batu bansumbisanga diambu di Nzambi dedi bo bankaka bamvangilanga, vayi befu tuntubanga mambu makiedika ma Klistu, va mesu ma Nzambi buka batu bafila.

3 Bukiedika ti vantombulu kubue vana bivisa bimmonisa ti befu tuidi banani? Voti befu tuntomba minkanda mimfumina kuidi benu mi tuvana nzitusu dedi bo bankaka bantombila? 2 Benu luidi nkand’itu wusonama mu mintima mitu, widi wuzabakana ayi wo batu boso bantanganga. 3 Kibila bivisa bimmonisa ti benu luidi nkanda wufumina kuidi Klistu, wo befu tusonika mu kuba bisadi bi Nzambi kubika ti mu ndimba, vayi mu phevi yi Nzambi yi monyo; kubika ti mu mamanya, vayi mu mintima mi batu.

4 Tuidi lufiatu alolo mu Nzambi, mu nzila Klistu. 5 Befu tuisintuba ko ti tulenda vanga kisalu akiokio befu veka, vayi Nzambi nandi wu tusadisanga kuvanga kisalu beni. 6 Bukiedika, nandi wu tusadisanga kuba bafuana, muingi kuba bisadi bi luwawanu lumona, lukhambulu nguizani na minsiku mi Mose, vayi mu phevi. Kibila minsiku mi Mose mintuadisanga lufua, vayi phevi yinlongo yimvananga luzingu.

7 Boti minsiku misonama mu mamanya mio miaba tuadisanga lufua, miba nkembu wuwombo, wo waba vanganga basi Isaeli babika tala Mose ku kizizi, 8 buabu, kibila mbi kisalu ki phevi kilendi luta bela ko nkembu? 9 Boti Minsiku mi Mose miaba tuadisanga nzengolo miba nkembu, buabu, yindula buidi buala bela nkembu wu kisalu kintuadisanga busonga. 10 Bukiedika, Minsiku mi Mose miba nkembu, nkembu beni wumana, mu kibila ki nkembu wulutidi. 11 Boti nsiku wo wuba tsukulu wutambula nkembu, buna kiuma kiala kadidila kiala luta tambula nkembu.

12 Bo tuidi kivuvu akiokio, diawu tunkolukilanga mu lufiatu luwombo, 13 ayi tuvanganga ko dedi bo buvangila Mose wufuka nledi ku busu buandi, mungi bana ba Isaeli babika tsikika thalu mu minsiku minkuiza suka. 14 Vayi phisulu’awu yiba yifuku. Kibila nati bubu, bo bantanga luwawanu lu khulu, nledi beni wuntatamananga wufuku, kibila wawu wala botukila to mu nzila Klistu. 15 Diawu nati bubu, kadika khumbu bantanga Minsiku mi Mose, nledi beni wuntatamananga kufuka mintima miawu. 16 Vayi bo mutu kamvutuka kuidi Yave, nledi beni wumbotukanga. 17 Yave widi phevi ayi voso vadi phevi yi Yave, vadi kiphuanza. 18 Ayi befu boso kheti mu kuba bizizi bifuku, tummonisanga nkembu wu Yave buka lumuenu, tunkitukanga mu fikula ayoyo mu nkembu wuwombo buka naveka Yave. Ayi Phevi Yinlongo yawu yitukitulanga mu phila ayoyo.

4 Buabu, mu kuzaba ti tutambula kisalu akiki mu kibila ki kiadi Nzambi ka tumonisa, diawu tubikanu kuvonga. 2 Befu tuloza mambu moso matsoni tuaba vangilanga ku kinsueki, vayi tummonisanga batu mambu madi mu diambu di Nzambi. Ayi mu kuvanga mawu, tummonisanga ti tuidi mu kuvanga mambu masulama va mesu ma Nzambi, muingi batu boso bazaba mawu. 3 Boti zitsangu zimboti tunsamunanga zidi zisuama, buna zidi to zisuama kuidi batu badi mu nzila mbungulu, 4 bawu badi batu nzambi yi nza ayiyi kafuka diela, muingi babika mona kiezila ki zitsangu zimboti zi nkembu wu Klistu, no widi kifuani ki Nzambi. 5 Kibila tulonganga ko matedi befu veka, vayi matedi Yesu Klistu widi Mfumu, ayi matedi befu veka banga bisadi binu mu kibila ki Yesu Klistu. 6 Kibila naveka Nzambi wutuba: “Muinda widi mu kulezama ku kitombi,” ayi nandi wunkiezulanga mintima mitu, mu nkembu wu nzailu matedi nandi mu nzila kizizi ki Klistu.

7 Vayi tuidi kiuka akiki kidi mu bibasa, muingi mangolo malutidi maba ma Nzambi, kubika ti ma befu veka. 8 Tumviokilanga mu ziphasi zi phila mu phila, vayi tuisi ko bakangama mukhambu baka bu kunyikukina. Tumbanga mu divuda, vayi tunzabanga* ma kuvanga. 9 Ba tukuamisanga, vayi Nzambi ka tuyekulanga ko. Ba tubuisanga, vayi ba tutululanga ko. 10 Befu tuntatamananga kukindama mu mambu maphasi dedi mo Yesu kaviokila, muingi luzingu lu Yesu lumonika mu befu. 11 Kibila befu tuidi bamonyo, tumviokilanga mu mambu mantulanga luzingu luitu va kingela mu kibila ki Yesu, muingi luzingu lu Yesu lumonika mu befu. 12 Mu phila ayoyo, lufua lumvanganga kisalu mu khat’itu, vayi luzingu lumvanganga kisalu mu khat’inu.

13 Buabu mu kuzaba ti tuidi yoyawu phevi yi kiminu, yo yisonama: “Yilekila kiminu, diawu yiyolukila,” befu mvitu tunlekilanga kiminu, diawu tunkolukilanga, 14 kibila befu tuzebi ti mutu wuvulubusa Yesu, mvandi wala ku tuvulubusa muingi tuba va kimueka na Yesu, ayi nandi wala ku tunata va kimueka ayi benu va ntuala Yesu. 15 Mambu moso amomo, matedi mu kibila kinu, muingi lusakumunu* lu Nzambi luluta buelama, kibila bawombo badi mu kusambila kuidi Nzambi ayi mawu ma kumvananga nzitusu.

16 Diawu tubikanu kuvonga, kheti kimutu kitu ki nganda kidi mu kubiva, vayi kimutu kitu ki khati kidi mu kukindusu kadika kilumbu. 17 Kheti ziphasi tuidi mu kuviokila zidi to mu mua thangu ayi zidi ziluelu, vayi ziawu zi tukubikilanga nkembu wunneni tuala tambula wukhambu sukanga, 18 bo tunkhambu tsikika thalu mu biuma tummonanga, vayi mu biuma tukhambu monanga. Kibila biuma tummonanga bikadidilanga ko, vayi bio tukhambu monanga binkadidilanga.

5 Kibila tuzebi ti nyitu’itu yi kinsuni, yinsundula nzo yi ntoto yala tuluka. Ayi tuala baka nzo yi diyilu Nzambi kala tuvana, yo yikhambu vangulu mu mioko mi batu. 2 Kibila tunkuananga beni mu nzo ayiyi yi ntoto, ayi tuntomba mu phuila nzo yi diyilu tuala tambula. 3 Mu phila ayoyo, bo tuala baka yawu, tualasa khambu ko ni kiuma. 4 Bukiedika, befu tuidi mu nzo ayiyi, tunkuananga kibila tumengi kubotuka muawu, vayi tuntomba kubaka nzo yinkaka, muingi luzingu luvinginina kio kimfuanga. 5 Nzambi nandi wu tukubika mu mawu ayi wu tuvana phevi yinlongo, muingi ku tuvana lufiatu mu biuma binkuiza.

6 Diawu, tuidi lufiatu ayi tuzebi ti bo tukhidi mu nyitu yi kinsuni, tuidi batatuka na Mfumu. 7 Kibila tuidi mu kudiatila mu kiminu, kubika kuandi mu biuma tummona. 8 Vayi tuidi beni lufiatu ayi tuntomba kutatuka nyitu yi kinsuni, muingi kuba va kimueka na Mfumu. 9 Diawu, kheti tuidi yandi va kimueka voti tuidi batatuka, makani mitu madi ma kunkuangidika. 10 Kibila befu boso tuala ba va ntuala Klistu, muingi nandi ka tufundisa mu kutadila mambu kadika mutu mu befu kavanga bo tuba nyitu yi kinsuni, kuba kuandi mamboti voti mambi.

11 Diawu, mu kuzaba mbi binsundula boma bu Mfumu, tutatamananu kulonga bankaka muingi bakikinina. Vayi Nzambi wu tuzebi buboti, ayi minu yintomba muingi kilunzi kinu ki lusadisa kuvisa ntindu mbi batu befu tuidi. 12 Tuisintomba ko kubue yinyemisa kuidi benu, vayi tumukindisa muingi lukinyemisa mu kibila kitu, muingi kuvana mvutu kuidi bo bakinyemisanga mu mambu mammonikanga va mesu ma batu, kubika kuandi mu mambu madi mu ntima. 13 Kibila boti tuma vunzuka ntu, buna mu kibila ki Nzambi, vayi boti tuidi mayindu mamboti, buna mu kibila kinu tuididi mawu. 14 Luzolo Klistu kadi mu befu lu tukindisanga, kibila tuntubanga: “Dibakala dimueka to wufuila mu kibila ki batu boso, kibila baboso baba bafua.* 15 Ayi nandi wufuila mu batu boso, muingi batu banzinga babika zingila muingi kuyikuangidika baveka, vayi muingi kukuangidika mutu no wufuila mu kibila kiawu, no bavulubusa.

16 Diawu tona bubu, tulendi bue tadila ko ni mutu mu phila yi kinsuni, kibila kheti tumona Klistu mu phila yi kinsuni, vayi tusiala bue ntadila ko mu phila ayoyo. 17 Diawu, boti mutu weka kithuadi na Klistu, buna weka kivangu kimona. Biuma bioso bikhulu, biviokidi. Talanu! Mamoso meka mamona. 18 Vayi biuma bioso abiobio, bifumina kuidi Nzambi, no wuvutula kithuadi kio tuba yandi mu nzila Klistu, ayi wu tutuma muingi tusadisa bankaka baba yandi kithuadi. 19 Mawu mansundula ti Nzambi widi mu kusadila Klistu, muingi kuvanga batu babue vutuka kuba yandi kithuadi, ayi kasi bue tadila ko masumu mawu. Nandi wu tuvana kisalu ki kuzabikisa batu ti bawu balenda bue vutuka kuba kithuadi na Nzambi.

20 Diawu, tuidi zimvuala zi Nzambi va vingi Klistu, ayi Nzambi widi mu kulubula batu mu nzil’itu. Diawu mu kuba zimvuala va vingi Klistu, tuku mudinda: “Vutulanu kithuadi na Nzambi.” 21 Yesu kasa vola ko masumu, vayi Nzambi wunkitula nkua masumu mu kibila kitu, muingi mu nzil’andi tuba batu basonga va mesu ma Nzambi.

6 Mu kuba batu bansala va kimueka na Nzambi, tumu kindisa muingi lubika kikinina mamboti malutidi ma Nzambi mu phamba, ayi kuzimbisa makani ma mamboti beni. 2 Kibila Nzambi wutuba: “Mu thangu yifuana, minu yikuyuwa, ayi mu kilumbu ki phulusu minu yi kusadisa.” Talanu! Buabu yeka thangu yifuana. Talanu! Buabu kieka kilumbu ki phulusu.

3 Tulendi vana ko ni kibila kimvanga bankaka kusumuka, muingi babika tubila bubi kisalu kitu ki kusamuna. 4 Vayi mu mambu moso, befu tummonisanga ti tuidi bisadi bi Nzambi, mu kukindama mu zithotolo zioso, mu zikhuamusu, mu thangu tunkuazuka, mu ziphasi, 5 mu thangu zikhuba, mu buloku, bo batufietikisa kuidi nkangu wu batu badi buphunya, mu bisalu bingolo, mu kuviokisa builu mukhambu lala, mu thangu tukhambulu bidia, 6 mu kuba badiodila, mu kuzaba kiedika, mu kuba mvibudulu, mu kumonisa mamboti, mu phevi yinlongo, mu kuba luzolo lukiedika, 7 mu mambu makiedika, mu mangolo ma Nzambi, mu kuba binuanunu bisonga mu koko ku lubakala ayi ku lukietu, 8 mu thangu nkembu, mu thangu ba tuvueza, mu thangu ba tutubila buboti voti mu thangu ba tutubila bubi, mu thangu ba tutadila banga bankua luvunu, kheti tuidi batu bantubanga kiedika, 9 mu thangu ba tutadila buka batu bakhambu zabakana, kheti tuidi bazabakana; buka batu bambelama kufua, kheti tuidi bamonyo, buka batu bantovulanga, kheti basi tuvonda ko; 10 buka batu badi mu kiunda vayi bantatamana kukuangalala; buka batu bakhambulu mbakulu, vayi bansadisa bawombo kuba busina; buka batu bakhambulu ni kiuma vayi kheti bobo badi biuma bioso.

11 Befu tuyoluka yinu basi Kolintu, ayi tumu zibudila mintima mitu. 12 Tuisindekula ko luzolo luitu mu benu, vayi benu luidi mu kudekula luzolo luinu mu befu. 13 Diawu yiku lukambila buka bana bami, lemvukanu, zibulanu mvandi mintima minu kuidi befu.

14 Bikanu kuba kithuadi* na batu bakhambu kikininanga mu Mfumu. Nguizani mbi yidi mambu masonga na mambu makhambulu masonga? Voti nguizani mbi yidi kiezila na kitombi? 15 Mvandi, nguizani mbi yidi Klistu na Beliali?* Voti nguizani mbi yidi mutu wunkikininanga mu Mfumu na mutu wukhambu kikininanga mu Mfumu? 16 Ayi kithuadi mbi kidi tempelu yi Nzambi na bitumba? Kibila befu tuidi tempelu yi Nzambi yimonyo, dedi bo naveka katubila: “Yala kala yawu, yala diata yawu, yala ba Nzambi’awu, ayi bawu bala ba dikabu diama.” 17 “‘Diawu, botukanu va khati’awu ayi luba tatuka’ butubidi Yave, ‘ayi bikanu kubue simba biuma bi mvindu,’” “‘ayi minu yinkuiza luyamba.’” 18 ‘“Minu yinkuiza ba tat’inu ayi benu lunkuiza ba bana bami ba babakala ayi ba bakietu,’ butubidi Yave, Nkua Ngolo Zioso.”

7 Diawu zikhomba ziama zi luzolo, mu kuzaba ti Nzambi wu tukanikisa mambu amomo, tufueti kuyidiodisa mu mambu moso malenda bivisa zinyitu zitu, ayi mayindu mitu ma kuba banlongo, muingi kukinzika Nzambi.

2 Lutuzibudilanu mintima minu. Tusa vangila ko ni mutu mambu makhambulu masonga, tusa vukumuna ko ni mutu ayi tusa vuna ko ni mutu muingi kubonga biuma binu. 3 Yisintubila ko mawu muingi ku luzengila nkanu, kibila benu luidi mu mintima mitu, kuba kuandi bo tukhidi bamonyo voti befu kufua. 4 Yinkolukila yinu mu bukiedika ayi mukhambu sueka ni diambu. Yikinyemisanga beni mu kibila kinu. Yibe tambula mbombolo ayi yidi beni mu mayangi kheti mu ziphasi zitu zioso.

5 Bukiedika, bo tutuka ku Masedoni, tusa ba ko kiphuanza, vayi batatamana kutukuamisa mu ziphila zioso, tuaba viokila mu nzingu, kuba kuandi ku khati voti kunganda. 6 Vayi Nzambi nkua mbombolo, no wumbombanga batu badi mu kiunda, wutuvana mbombolo mu kufila Titu; 7 ayi tusa tambula ko to mbombolo bo nandi kavitila, vayi mvandi mu kibila ki mbombolo katambula mu nzil’inu, kibila nandi wutuzabikisa phuila benu muidi yi kumbona, kiunda muidi, phila muidi mu kukuazukila mu kibila kiama, ayi mawu mathuadisa beni mayangi.

8 Kibila, kheti minu yimutuadisa kiunda mu kibila ki nkanda yimufila, yisinyonga ko mu mawu kheti va thonono minu yinyonga, (kibila yimona ti nkanda beni, wu lunyongisa kheti mu mua thangu), 9 vayi bubu minu yinkuangalala, bika ti mu kibila ki kiunda kinu, vayi mu kibila ki kiunda kiluvanga kubalula mavanga. Kibila benu lunyongina mu phila yinkuangidika Nzambi, ayi mu phila ayoyo, tusa muvangila ko ni diambu di mutuadisa ziphasi. 10 Kibila kunyongina mu phila yinkuangidika Nzambi, kumvanganga mutu kubalula mavanga, mantuadisanga phulusu, ayi vasi ko mutu wulenda nyonga mu mawu. Vayi kuba mu kiunda mu phila yinkuangidika nza, kuntuadisanga lufua. 11 Kibila kuba mu kiunda mu phila yinkuangidika Nzambi, mabe mutuadisa ndandu ayiyi: mabe muvanga kubalula zikhadulu zinu, kukinzika Nzambi, kuba phuila yiwombo yi kunyongina masumu, kuba kifuza ayi kuludika zinzimbala zinu. Mu mambu moso amomo, benu mube monisa ti muidi batu badiodila. 12 Kheti minu yilusonikini nkanda, vayi yisa lusonikina ko wawu mu kibila ki mutu wuvengi diambu dimbi, mvandi ni mu kibila ki mutu bavangila diambu beni, vayi muingi kifuza muidi matedi kututumukina, kimonika va mesu ma Nzambi. 13 Diawu befu tube tambudila mbombolo yiwombo.

Vayi kubotula kuandi mbombolo tube tambula, tubeluta ba mu mayangi, mu kibila ki mayangi Titu kabe tambula, kibila benu lube kuangidika ntim’andi. 14 Kibila minu yisa mona ko zitsonyi kukinyemisa kuidi nandi matedi benu, vayi dedi bo mambu moso tube mukamba matedi nandi madidi makiedika, mvandi mambu tube kamba Titu matedi benu, mu kukinyemisa, madi makiedika. 15 Mvandi, luzolo kadi mu benu lumbuelamanga, mu thangu kantebuka moyo phila benu boso muntumukinanga, ayi mvandi phila benu muntambudila mu kummonisa lukinzu luwombo. 16 Minu yinkuangalala beni kibila yilenda ba lufiatu mu benu mu mambu moso.

8 Buabu zikhomba, tuntomba luzaba mamboti malutidi Nzambi kamonisa kuidi bimvuka bidi ku Masedoni. 2 Kheti mu zithotolo ayi mu zikhuamusu baviokila, vayi mu mayangi bawu bakabila bankaka, kheti mukhambu mbakulu. Ayi mawu mammonisa kifu ki kukaba bawu badi. 3 Kibila bawu bakabila mu kutadila mbakulu’awu. Minu yinta kimbangi ti bawu baluta vana kuvioka mbakulu’awu. 4 Bawu batatamana kutudinda muingi babaka luaku lu kuvana minkhailu, ayi kubuela mioko kisalu ki kusadisa banlongo. 5 Ayi bawu bavanga malutidi kena mo tuaba yindula, kibila bakivana theti kuidi Mfumu, bosi kuidi befu, mu luzolo lu Nzambi. 6 Diawu, tunkindisa Titu, muingi kamanisa kisalu katona va khat’inu, ki kukongula makaba minu. 7 Diawu, dedi bo benu muididi kimvuama mu mambu moso, mu kiminu, mu mambu muntuba, mu nzailu, mu kifuza kioso, ayi mu luzolo luitu mu benu, bobuawu mvandi, banu kimvuama mu matedi kuvana minkhailu mu ntima woso.

8 Yisintubila ko mawu muingi ku luvana nsiku, vayi muingi yi luzabikisa matedi kifuza ki bankaka, ayi muingi yizaba boti luzolo luinu, luidi lukiedika. 9 Kibila benu muzebi mamboti malutidi ma Mfumu’itu Yesu Klistu: kheti nandi wuba kimvuama, vayi wukituka mutu wukhambulu mbakulu mu kibila kinu, muingi lubaka kimvuama mu kukhambu kuandi ku mbakulu.

10 Ayi mu matedi mambu amomo, minu yimvana diyindu diama: lunkuiza baka ndandu benu kuvanga mawu, kibila vama vioka mvu mueka tona mutona kisalu akiokio, ayi mu kumonisa phuila yi kuvanga kiawu. 11 Buabu, manisanu kisalu mutona muingi mudukisa makani minu, mu kutadila mbakulu’inu. 12 Nkhailu mutu kamvaninanga mu ntima woso, wunkuangidikanga Nzambi, kibila nandi wuntomba mutu kavanina, mu kutadila mbakulu’andi. 13 Kibila yisintomba ko kudekula kizitu ki bankaka, muingi kubuela kiawu kuidi benu. 14 Vayi yintomba, mbakulu yo benu muidi bubu, yidukisa zitsatu ziawu, ayi muingi bo bawu bala baka mbakulu, badukisa zitsatu zinu. Ayi mu phila ayoyo, benu boso munkuiza ba dedi mueka. 15 Dedi bo busonimina: “Woso wuluta ba biuma biwombo, kasa luta baka ko, ayi no wuba biuma biluelu, kasa khambu ko.”

16 Tumvutula matondo kuidi Nzambi, mu kutula mu ntima wu Titu, momawu mabanza befu tuidi mu benu, 17 kibila nandi kasa kikinina ko to kuiza mutala bo befu tunkindisidi, vayi naveka mvandi wubeki makani amomo mu ntima woso. 18 Befu tuidi mu kumfila va kimueka na khomba bantubilanga buboti kuidi bimvuka bioso, mu kibila ki kisalu kamvanganga mu matedi zitsangu zimboti. 19 Kubika kuandi to amomo, vayi mvandi bimvuka bimvana kiyeku akiokio, ki kukuenda yitu muingi kukaba minkhailu mimvana nzitusu kuidi Mfumu, ayi kumonisa ti tuidi bakubama muingi kusadisa. 20 Mu phila ayoyo, tuidi mu kuvanga mamoso muingi batu babika ku tutubila bubi, mu kisalu akiokio tuidi mu kuvanga ki kukaba minkhailu. 21 Kibila ‘tuvengi mamoso mu phila yimboti, kubika to va mesu ma Yave, vayi mvandi va mesu ma batu.’

22 Mvandi, tuidi mu kuba fila va kimueka na khomb’itu, no tumueni ti widi kifuza mu mambu mawombo. Vayi buabu nandi wunkuiza luta monisa kifuza, mu kibila ki lufiatu luwombo kadi mu benu. 23 Vayi boti divuda muidi matedi Titu, zabanu ti nandi wusala yama va kimueka, muingi ku mutuadisa ndandu. Mvandi, boti divuda muidi mu matedi zikhomba zitu, zabanu ti bimvuka, biawu biba fila, ayi bawu banzitisanga Klistu. 24 Diawu, monisanu bivisa ti luku bazolanga, ayi monisanu kuidi bimvuka kibila tukinyemisinanga mu kibila kinu.

9 Mu matedi kisalu ki kubuela mioko banlongo, vasintombulu ko kumu sonikina muingi luvanga mawu. 2 Kibila yizebi ti muidi bakubama, ayi yintubilanga buboti matedi khubumunu’inu kuidi zikhomba ku Masedoni, mu kutuba ti zikhomba ku Akaia, beka bakubama tona mvu wubedi. Ayi kifuza kinu, kinsadisanga bawombo mu bawu. 3 Diawu yiku mufidila zikhomba muingi mo tuntubanga, mabika ba maphamba, ayi muingi benu muba bakubama, dedi bo minu yiba kambila. 4 Minu kukuiza na zikhomba zi Masedoni, ayi minu kuiza mubata ti muisi ko bakubama, khanu befu, kubunda mvandi benu tunkuiza ba mu zitsoni, kibila tutubila mu lufiatu matedi benu. 5 Diawu yibe kindisila zikhomba muingi biza koko ava minu kuvitila, ayi bafika kubika minkhailu minu, muingi miawu miluta ba mikubuku buka biuma lumvanina mu ntima woso, kubika ti mu lukuiku.

6 Mu matedi mambu amomo, woso wumvata biluelu, wala vela mvandi biluelu, vayi woso wumvata biwombo, wala vela biwombo. 7 Bika kadika mutu kavanina boso kabe bakila makani mu ntim’andi, kubika ti mu manyongi voti mu lukuiku, kibila Nzambi wunzolanga mutu wumvaninanga mu ntima woso.

8 Kubotula kuandi amomo, Nzambi kalenda muvana biwombo mu kutadila mamboti mandi malutidi. Mu phila ayoyo, benu mualasa khambu ko ni kiuma, vayi muala baka biwombo muingi kuvanga kisalu kioso kimboti. 9 (Dedi bo madidi masonama: “Nandi wumvananga minkhailu miwombo ayi wunkabilanga kuidi bakhambulu mbakulu. Busonga buandi buntatamananga mvu ka mvu.” 10 No wumvananga mbongu yiwombo kuidi mvati, ayi no wumvananga dipha muingi batu badia. Mvandi wala ku luvana mbongu yiwombo muingi luvata, ayi wala buela mimbutu minu mi busonga.) 11 Mu mambu moso, Nzambi widi mu kuluvana lusakumunu, muingi mubaka bu kuvanina mu ntima woso ayi mu ziphila zioso. 12 Kibila kisalu akiokio muidi mu kuvanga, kialasa dukisa ko to zitsatu zi banlongo, vayi mvandi kiala ba tho muingi batu bawombo bavutudila Nzambi matondo. 13 Bawu banzitisanga Nzambi kibila kisalu akiokio mumvanganga ki kusadisa, kimmonisa bivisa ti benu muntumukinanga zitsangu zimboti zitedi Klistu, dedi bo benu lusamunina va nyalu nguba. Mvandi kimmonisa ti luidi kifu ki kukaba, kuba kuandi kuidi bawu voti kuidi batu boso. 14 Ayi bawu bammonisanga ti baku luzolanga, muku lunatanga mu minsambu, mu kibila ki mamboti malutidi ma Nzambi mu benu.

15 Tufueti vutudila Nzambi matondo, mu kibila ki nkhailu wunneni katuvana, wo tulendi nunga ko kusudikisa.

10 Minu veka Polo yi kululomba mu ndembama ayi mu mamboti Klistu katumonisa. Kheti minu yidi mutu wukikululanga bo yidi va khat’inu, vayi yidi mutu wu makhema bo yikulusonikina minkanda, dedi bo bankaka banyindudilanga, 2 vayi yikuludinda muingi lubika kumbona boma bo yinkuiza ba yinu va kimueka, kibila yisinkuiza ba ko mutu wu makhema voti kubaka makani mambi mu matedi batu bantubanga ti befu tuidi mayindu ma batu ba nza ayiyi. 3 Kibila kheti tuidi batu ba kinsuni, vayi tuvangilanga ko mambu dedi bo batu mu nza bamvangilanga. 4 Kibila binuanunu tunsadilanga mu mvit’itu, bisi ko bio batu mu nza bansadilanga, vayi biawu binkuizilanga kuidi Nzambi, ayi bidi mangolo muingi kutulula biuma bingolo. 5 Kibila tuidi mu kutulula mayindu moso ma luvunu ayi mambu moso mantulanga nkaku nzailu yi Nzambi, ayi tuidi mu kununga mayindu beni, muingi matumukina Klistu. 6 Benu kumonisa ti luntumukina mu mambu moso, befu tunkuiza luta ba bakubama, muingi kusemba baboso bakhambu tumukinanga.

7 Benu mumfundisanga mu kutadila mambu lummona. Boti vadi mutu widi lufiatu ti widi kisadi ki Klistu, buna bika kabue yindula mu mambu amama: Dedi bo nandi kadidi kisadi ki Klistu, befu mvitu tuidi bisadi biandi. 8 Kibila kheti minu kusabisa mu kukinyemisa, matedi kiyeku Mfumu katuvana ki kumu kindisa kubika ti ki kumu vongisa, minu yisinkuiza fua ko zitsoni. 9 Vayi yisintomba ko luyindula ti yidi mu kulutula boma, mu mambu yidi kumu sonikina. 10 Kibila bankaka mu benu bantubanga: “Minkanda miandi midi kizitu ayi mangolo, vayi bo nandi kambanga va khat’itu nandi wumbanga wulebakana ayi mambu kantubanga masi ko mfunu”. 11 Bika mutu beni wuntubanga mawu kazaba ti, mambu tuntubanga mu minkanda mioso tumu filanga, mawu tunkuiza vanga bo tuala ba yinu koko. 12 Kibila tumengi kuyidedikisa ayi kuyifuanikisa na bankaka badi va khat’inu, ba kinangikanga baveka. Vayi bo bakinangika mu kutadila mayindu mawu, ayi bo bakidedikisa baveka, bawu bammonisanga ti basi ko phisulu.

13 Tuisinkuiza yinyemisa ko mu kuvioka kitesu kitu, vayi tunkuiza yinyemisa to mu mambu tulenda vanga, matedi kiyeku Nzambi katuvana ayi benu mvinu, muidi mu khati kiyeku beni. 14 Bukiedika, tuisi mu kuvanga ko ni kiuma kikhambulu mu kiyeku Nzambi katuvana, buka ti benu muisi ko mu khati kiyeku beni, kibila befu theti tumu zabikisa zitsangu zimboti matedi Klistu. 15 Tuisi yinyemisa ko mu mambu makhambulu mu biyeku Nzambi katuvana, mansundula bisalu batu bankaka bavanga. Vayi bo kiminu kinu kidi mu kubuelama, tuntomba muingi kisalu kitu mvandi kitatamana kukonzuka, mu kutadila biyeku Nzambi katuvana. Diawu tunkuiza buela kuvanga mawombo, 16 muingi tusamuna zitsangu zimboti, mu bizunga binkaka bidi kinanu na vo mukala, muingi tubika kukinyemisa mu kisalu batu bankaka bavanga, mu bizunga binkaka. 17 “Vayi woso mutu tidi kukinyemisa, buna bika kakinyemisina mu Yave.” 18 Kibila Yave wunnangikanga mutu widi lunungu va mesu mandi, kubika kuandi no wukinangikanga naveka.

11 Kheti minu yimmonikina buka ti yidi kivungisi, vayi yintomba luvibidila mua nkadu mu mawu. 2 Minu yiluzolanga beni dedi bo Nzambi ka luzodilanga. Mu kuzaba ti minu yilukanikisa dikuela na dibakala dimueka to, Klistu, kibila yintomba ku lutambika kuidi nandi buka nkietu no ka kabundiniabu ko nyitu. 3 Vayi boma yimmona, muingi momawu mambu mamonikina Eva bo bamvukumuna kuidi nyoka, mabika ku lumonikina, muingi mayindu minu mabika ku lutatula mu kiedika ayi mu mambu mavedila matedi Klistu. 4 Kibila boti mutu wunkaka wunkuiza lulonga malongi mankaka matedi Klistu, kena mo tumulonga voti ku muvana phevi* yinkaka kena yo mutambula, ayi ku mulonga zitsangu zinkaka kubika kuandi zio lukikinina, benu lunkuinza kikinina mu mambu kantuba. 5 Minu yiyindulanga ko ti bapostolo binu balutidi kena minu. 6 Kheti minu yisi ko wupisuka mu kukoluka, vayi yidi nzailu yi Nzambi. Kibila tumu monisa bivisa mu ziphila zioso ayi mu mambu moso.

7 Voti, bukiedika ti minu nzimbala yivanga mu kuyikulula muingi ba lunangika, mu ku lusamuna zitsangu zimboti zi Nzambi mu khambu tambula ni mfutu? 8 Minu yikikinina lusadusu lu bimvuka binkaka muingi yi lusadisa, ayi mawu maba buka ti minu yi bayiba muingi yilusadisa. 9 Vayi mu thangu yiviokila mu tsatu bo yiba yinu, yisa ba ko kizitu mu matedi zitsatu ziama kuidi ni mutu mu benu, kibila zikhomba ziba ku Masedoni badukisa zitsatu ziama. Ngete, minu yiba keba keba muingi yibika ba kizitu mu benu mu dioso diambu, ayi yinkuiza tatamana kuvanga mawu. 10 Yintuba kiedika buka Klistu ti yalasa bika ko kukinyemisa mu kutubanga mambu amomo mu bibuangu bioso bidi ku Akaia. 11 Bukiedika ti yiluzolanga ko diawu yikhambu tambudila kioso kiuma kuidi benu? Nzambi zebi ti minu yiluzolanga.

12 Vayi mambu yidi mu kuvanga yinkuiza tatamana kuvanga mawu, muingi kubotula luaku kuidi bo bantomba kibila ki kuba yitu dedi mueka, mu matedi mambu bawu ba kinyemisinanga. 13 Kibila batu abobo, badi bapostolo ba luvunu, bisadi bi luvunu ayi bamvunanga kuba bapostolo ba Klistu. 14 Mawu masi ko makukuitukila, kibila Satana mvandi wumvunikisanga kuba mbasi* yikiezila. 15 Diawu, masi ko ma kukuitukila kumona mvandi bisadi biandi kuvunikisa kuvanga mambu masonga. Vayi bawu mvawu bala tambula mfutu’awu mu kutadila mavanga mawu.

16 Minu yeka bue tuba: Ni mutu kabika kuyindula ti minu yidi kivungisi. Vayi boti benu lunyindula mu mawu, buna khikininanu buka mutu wu buvungisi, muingi minu mvama yikinyemisa mua nkadu. 17 Bubu yisinlandakana ko kifuani ki Mfumu mu mambu yidi mu kutuba. Vayi yidi mu kutubila buka kivungisi, ayi yidi kibila ki kukinyemisa mu lufiatu. 18 Bo bankaka bakinyemisinanga mu mambu ma kinsuni, buna minu mvama yinkuiza yinyemisa. 19 Benu luidi nduenga, tatamananu kuvibidila mu ntima woso bo badi bivungisi. 20 Vibidilanu kuidi batu ba lukitulanga mimvika, bankuibanga biuma binu, bamvionyanga biuma binu, bakinangikanga va ntual’inu ayi kuidi batu ba lubulanga mu bizizi.

21 Didi diambu dimbi kutuba mambu amomo, kibila tulenda monikina ti tuidi balebakana.

Vayi boti bankaka bakinyemisa mu mambu bamvanga, buna minu mvama yilenda kukinyemisa—yidi mu kutuba buka kivungisi. 22 Bawu badi basi ebeleo? Minu mvama yidi. Bawu badi basi Isaeli? Minu mvama yidi. Bawu badi nkuna wu Abalahami? Minu mvama yidi. 23 Bawu badi bisadi bi Klistu? Yimvana mvutu buka kivungisi, minu yilutidi kuba kisadi ki Klistu kena bawu, kibila: yiluta vanga kisalu kena bawu, baluta thula mu buloku kena bawu, baluta thuta khuba kena bawu ayi yiluta viokila mu mambu matula luzingu luama va kingela, kena bawu. 24 Khumbu zitanu basi yuda bathuta 39 di makhomi, 25 khumbu zitatu bambula mu bikoti, khumbu yimueka bakhuba mamanya, khumbu zitatu yidukukila mu dikumbi, yiviokisa kilumbu kimueka ayi builu bumueka kuneni ḿbu. 26 Mu ziviage ziwombo yiviokila va kingela mu mila, kuidi mivi, kuidi dikabu diama veka, kuidi basi nza, mu mavula, ku thandu, ku ḿbu, kuidi zikhomba zi luvunu, 27 mu mangolo mawombo mu kuvanga bisalu bingolo, mu kuviokisa builu mukhambu lala, mu nzala ayi mu phuila yi nlangu, mu kuviokisa bilumbu biwombo mukhambu dia, mu kiozi ayi mu khambu baka ki kuvuata.

28 Kubotula kuandi mambu amomo, vadi diambu dinkaka di kuphanganga phasi: yinkuazukanga beni mu matedi bimvuka bioso. 29 Boti vadi mutu wulebakana, minu mvama yinkuiza ba wulebakana. Boti vadi mutu bevola disumu, minu yinkuiza ba mu kiunda.

30 Boti vantombulu minu yikinyemisa, buna yifueti kukinyemisina mu mambu mammonisa kulebakana kuama. 31 Nzambi, Tata yi Mfumu Yesu, no fueni tambula nzitusu mvu ka mvu, zebi ti minu yisimvuna ko. 32 Ku Damasco, nyadi no wuba mu thuadusulu yi ntinu Alieta, wutula minsungi mu mielu mi divula muingi bambuila, 33 diawu bakhuludila mu kiphanya va nela yiba mu kibaka ki divula, diawu yivukila.

12 Minu yifueti kukinyemisa. Buabu, yentubila matedi bimona mesu, ayi zitsangu zifumina kuidi Mfumu, kheti mawu masi kuthuadisa ko ndandu. 2 Yizaba dibakala dimueka mu 14 di mimvu, no widi nlandikini wu Klistu, no banata ku diyilu dintatu, yisa zaba ko boti bannatina mu nyitu’andi yoso yi kinsuni voti ndamba, vayi Nzambi to zebi. 3 Bukiedika, yizebi dibakala beni, vayi yisa zaba ko boti bannatina mu nyitu’andi yoso yi kinsuni voti ndamba, Nzambi to zebi. 4 Bannata ku paladizu, ayi wuyuwa mambu mo balendi zabikisa ko ayi mo ni mutu kadi nsua wu kutuba. 5 Minu yinkuiza yinyemisa mu kibila ki dibakala adiodio, vayi yisinkuiza yinyemisa ko mu minu veka, kubotula kuandi mu kulebakana kuama. 6 Kibila kheti minu kukinyemisa, yisinkuiza ba ko kivungisi, kibila yinkuiza tuba kiedika. Vayi yisintomba ko kuvanga mawu muingi ni mutu kabika kuphana nzitusu mu mambu kakhambu mona mu minu, voti mo kankuwa minu yintuba, 7 mu kibila ki bimona mesu bi kukuitukila yimmonanga.

Diawu, muingi yibika kuyinangika, baphana mbela mu nyitu yidi buka mbasi yi Satana, yintatamananga kuthovula. 8 Yidinda kuidi Mfumu khumbu zitatu muingi kambotula mbela ayoyo. 9 Vayi nandi wukhamba: “Mamboti mami malutidi mu ngiewu, mafueni, kibila mangolo mami manluta monikanga mu kulebakana kuaku.” Diawu mu mayangi, yinkuiza yinyemisa mu kulebakana kuama, muingi mangolo ma Klistu matatamana mu minu buka tenda. 10 Diawu, yinkuangalalanga mu kulebakana, mu bifingu, bo yidi mu tsatu, mu zikhuamusu, ayi mu ziphasi, mu kibila ki Klistu. Kibila bo yidi wulebakana, yawu thangu yidi mangolo.

11 Minu yikituka buka kivungisi. Ayi benu lukhuika muingi yibela mu phila ayoyo, kibila lusa kunduanina ko. Kheti yisi ko luvalu va mesu minu, vayi yisa vanga ko ni diambu dimmonisa ti bapostolo binu, bawu bandutidi. 12 Benu lumona bidimbu bimmonisa ti minu yidi apostolo, mu kukindama kungolo, mu bidimbu, mu mangitukulu, ayi mu mambu ma kukuitukila. 13 Minu yisa ba ko kizitu kuidi benu mu matedi zitsatu ziama, ayi adiodio, diawu diambu muididi disuasana na bimvuka binkaka. Buabu, nzimbala yivanga? Boti yivanga nzimbala, buna ndemvukilanu mu mawu.

14 Ayiyi, yawu khumbu yintatu yidi wukubama muingi kuiza mutala, ayi minu yisi ko kizitu mu matedi zitsatu ziama kuidi benu, kibila yisintomba ko kuvua biuma binu, vayi benu yintomba kumona. Kibila bakana ko bana badi kiyeku ki kulundila busina kuidi matata, vayi matata bawu badi kiyeku akiokio. 15 Vayi mu matedi minu, yintomba kukivana muingi ku mutuadisa ndandu. Boti minu yiku luzolanga beni, bukiedika ti yisi ko nsua wu kuluta tambula luzolo luinu? 16 Boso kua bubela, minu yisa ba ko kizitu kuidi benu mu matedi zitsatu ziama. Vayi benu luntubanga ti minu yidi “nkua luvunu” ayi ti “mu luvunu,” muawu yilu bakila. 17 Bukiedika ti minu yilufidisa batu muingi ba luvuna ayi kubonga biuma binu? 18 Yitatamana kukindisa Titu muingi kiza lutala, ayi yimfila va kimueka na khomba wunkaka. Bukiedika ti nandi wu luvuna muingi kubonga biuma binu? Minu ayi Titu tudiatilanga ko mu phevi ayi mu nzila yimueka?

19 Benu lummuena ti befu tuidi mu kuyikakidila mu mambu moso lu tuvunini? Tuidi mu kukolukila mambu amomo, va ntuala Nzambi, mu kithuadi na Klistu. Vayi zikhomba ziama zi luzolo, mambu moso tuvanga, tuma vangila muingi ku lukindisa. 20 Kibila boma yimmona bo yala kuiza kuidi benu, yisintomba ko kuiza lubata mu phila yinkaka kena yo minu yinyindudila, ayi benu mvinu, lubika kumbona mu phila lukhambu zodila. Mvandi boma yimmona muingi yibika kuiza bata va khat’inu ziphaka, kiphala, nganzi, bisombolo, kufingasana, manyunguta, lunangu ayi divunza. 21 Ḿba bo minu yala bue kuiza, Nzambi wala kumfuisa zitsoni va ntual’inu, ayi minu yala dila mu kibila ki batu basumuka ayi bamanga kunyongina masumu mawu, bo babua mu zitsumukunu, ayi mu nzingulu yimbi banzingilanga.

13 Ayiyi yawu khumbu yintatu yinkuiza lutala. Diawu “mambu moso mafueti dedukusu mu kimbangi ki batu buadi voti batatu.” 2 Kheti minu yisi ko yinu koko mu thangu ayiyi, vayi yidi buka ti yidi yinu koko mu khumbu yimmuadi. Yinlubula kuidi baboso basumuka ayi kuidi bankaka ti, yalasa ku bamona ko kiadi minu kukuiza koko, 3 mu kuzaba ti benu luntomba kumona bivisa ti Klistu wunyolukilanga mu nzil’ama, ayi ti Klistu beni kasi ko wulebakana va khat’inu, vayi widi mangolo va khat’inu. 4 Kibila nandi wufuila va dikunzi mu kibila ki kulebakana kuinu, vayi widi wumonyo mu kibila ki mangolo ma Nzambi. Bukiedika, befu mvitu tuidi balebakana mu nandi, vayi tuala zinga va kimueka ayi nandi mu kibila ki mangolo ma Nzambi madi mu benu.

5 Luyifiongunina boti luidi mu kudiatila mu kiminu, ayi tatamananu kuyifiongunina benu veka. Benu lusa zaba ko ti Yesu Klistu widi yinu kithuadi? Boti ndamba, buna benu luisi ko bafuana. 6 Minu yintomba benu luzaba ti befu tuidi bafuana.

7 Tunsambilanga kuidi Nzambi muingi benu lubika vanga ni diambu dimbi, kubika ti muingi befu tumonikina batu bafuana, vayi muingi benu luvanga mambu mamboti, kheti befu tummonikina ti tuisi ko batu bafuana. 8 Kibila tulendi vanga ko ni diambu dikhambulu kithuadi na kiedika, vayi tumvanganga to mambu madi kithuadi na kiedika. 9 Befu tunkuangalalanga mu thangu tuidi balebakana, vayi benu luidi mangolo. Ayi mambu tundindanga mu minsambu madi, lubalula phil’inu yi kuyindudila. 10 Diawu yiku lusonikina mambu amama bo yikhambulu yinu koko, muingi bo yala kuiza, yibika ku lumonisa lukasu mu kusadila kimfumu Yesu Klistu kaphana ki kulukindisa, kubika kuandi ki kulutulula.

11 Diawu zikhomba, tatamananu kukuangalala, kubalula phil’inu yi kuyindudila, kubombasana, kuyindudila mu phila yimueka ayi kuzingila mu ndembama. Mu phila ayoyo, Nzambi yi luzolo ayi yi ndembama wala ba yinu. 12 Vanasananu zimboti, mu kuyivanasana besu yinlongo. 13 Banlongo boso ba kulufila zimboti.

14 Bika mamboti malutidi ma Mfumu Yesu Klistu, luzolo lu Nzambi, ayi lusakumunu lu phevi yinlongo, biba kuidi benu boso.