NKANDA KUIDI BASI FILIPI

1 Nkanda awuwu, wufumini kuidi Polo ayi Timoti, bisadi bi Yesu Klistu ayi tumfila wawu kuidi bisadi binlongo bi Yesu Klistu badi ku Filipi, kubunda mvandi bakulutu ba kimvuka ayi minsadisi mi bakulutu.

2 Bika ndembama ayi mamboti malutidi ma Nzambi, Tat’itu ayi ma Mfumu’itu Yesu Klistu, maba yinu.

3 Khumbu zioso yi lutebukilanga moyo, yimvutulanga matondo mawombo kuidi Nzambi 4 ayi khumbu zioso yinlombanga kuidi Nzambi mu mayangi, mu kibila kinu. 5 Yimvangilanga mawu, mu kibila ki kisalu kinu ki kutiamuna zitsangu zimboti, tona mu kilumbu luyuwa ziawu nati bubu. 6 Ayi yidi lufiatu ti Nzambi wala manisa kisalu kimboti katona mu benu ayi kiawu kiala tatamana nati kilumbu ki Mfumu Yesu Klistu, kiala kuiza. 7 Didi diambu dimboti kumu yindudila phila ayoyo, kibila luidi mu khati ntim’ami ayi benu mvinu luidi mu kutambula mamboti malutidi ma Nzambi. Mvandi lu kumbuelanga mioko bo yidi mu buloku, bo yinnuaninanga zitsangu zimboti ayi bo yinzabikisa kisalu kitu kuidi ntinu.

8 Nzambi kalenda ta kimbangi ti, minu yidi phuila yiwombo yi kumu mona, kibila luzolo luami mu benu, luidi dedi mueka na luzolo Yesu Klistu kadi mu benu. 9 Ayi minu yintatamananga kusambila muingi luzolo luinu, nzailu’inu yi kiedika ayi ndueng’inu, bitatamana kubuelama. 10 Mvandi, bika lutatamana kusikika mayindu minu mu mambu malutidi nkinza, muingi luba batu basama* ayi bakhambu vanganga bankaka kusumuka nati mu kilumbu ki Mfumu Klistu. 11 Ayi mvandi yinsambilanga muingi lubaka ndandu mu kisalu kioso kimboti Yesu kamvanga, mu ku tusadila muingi kutuadisa nkembu ayi nzitusu kuidi Nzambi.

12 Zikhomba, yintomba muzaba ti mambu maphasi yidi mu kuviokila, madi mu kusadisa kutembikisa zitsangu zimboti. 13 Ziphanga bakhanga mu kibila ki Yesu Klistu, zidi mu kusadisa masodi moso mankengidilanga ntinu wu Loma ayi batu bankaka bazaba kiedika. 14 Mvandi, mu kibila ki ziphanga bakhanga, mu thangu ayiyi, zikhomba ziwombo bansadilanga Mfumu, basiedi ko boma ayi badi mu kumonisa kibakala mu kusamuna diambu di Nzambi.

15 Tuzebi ti bankaka bansamuninanga matedi Yesu, kibila badi nsoki ayi kiphala. Vayi bankaka badi kibila kimboti bamvangilanga mawu. 16 Bo bansamuninanga mu kibila kimboti, bamvangilanga mawu mu luzolo. Kibila bazebi ti, minu basola muingi kukakidila zitsangu zimboti. 17 Vayi bo bansamunanga mu kibila ki kiphala ayi nsoki, bamvangilanga mawu mu kibila kimbi ayi bantomba kuthuadisa ziphasi bo yidi mu buloku. 18 Ndandu mbi mawu mantuadisanga? Bosokua bubela kibila bansamuninanga, kiba kuandi kimbi voti kimboti, zitsangu zi Yesu zidi mu kutembakana. Mawu ma kukhuangidikanga ayi mala tatamana kumbika mu mayangi. 19 Kibila yizebi ti mawu, mala tuadisa phulusu’ama mu nzila minsambu minu mingolo ayi mu lusalusu lu phevi yi Yesu Klistu. 20 Mawu madi kithuadi* na phuila ayi kivuvu yidi. Ayi yalasa mona ko zitsoni mu mawu. Yidi lufiatu ti, yala tatamana kukolukila mu kibakala muingi yibaka bu kuzitisila Yesu, dedi bo yimvangilanga mawu, kuba kuandi bo yidi wumonyo voti bo yela fua.

21 Minu kutatamana kuzinga, yala zingila to mu Klistu, vayi minu kufua, buna bulutidi mboti. 22 Minu kutatamana kuzinga mu kinsuni, buna yela tatamana kukivana mu kisalu kiami; vayi yisa zaba ko mbi bilutidi. 23 Mambu amomo mamuadi, divuda ma kuthulanga. Kibila yintomba kufua mu nyitu yi kinsuni, muingi yiba va kimueka na Klistu. Ayi yizebi ti diawu diambu dilutidi mu minu. 24 Vayi minu kutatamana kuzinga mu kinsuni, mawu mala ku lutuadisa ndandu yiwombo. 25 Diawu, mu kuba lufiatu mu mambu amomo, yizebi ti yala tatamana kuba yinu, muingi mutatamana kukonzuka ayi kukuangalala mu kiminu. 26 Mu phila ayoyo, mu thangu yala ba yinu va kimueka, mayangi minu mu Yesu Klistu, mala buelama mu kibila kiami.

27 Vayi yi ludinda to lutatamana kumonisa mavanga madi kithuadi na zitsangu zimboti zitedi Klistu, muingi bo yinkuiza mutala voti bo yidi ku kinanu, yitatamana kukuwanga zitsangu ti, luidi mu kithuadi, luidi phila yimueka yi kuyindudila ayi luntatamana kukindasana mu kiminu mu matedi zitsangu zimboti. 28 Bikanu kumona boma bu zikhuamusu zi zimbeni zinu, kibila ziawu zidi kidimbu ki mbungulu’awu. Vayi kuidi benu, ziawu zidi kidimbu ki phulusu, ayi naveka Nzambi wummonisanga kidimbu beni. 29 Benu lutambula luaku, kubika kuandi to lu kuba kiminu mu Klistu, vayi mvandi lu kutovuka yandi va kimueka. 30 Benu mvinu luidi mu kuviokila mu zioziawu ziphasi lumbona minu kuviokila ayi luzebi buboti ti yikhidi viokila mu ziphasi beni nati mu thangu ayiyi.

2 Luvanga mamoso lunnunga muingi kukindisa bankaka mu Klistu, kuba bomba mu luzolo, mu kuba kikundi na zikhomba zi kiphevi, mu kuba yawu kithuadi ayi kuba monisa kiadi. 2 Benu kuvanga mawu, lunkuiza buela mayangi mami. Zingilanu mu kithuadi, lumonisa luzolo benu na benu, luba kithuadi mu mavanga ayi mu mayindu. 3 Lubika vangila mambu mu nsoki ayi mu kiphala, vayi mu kuyikulula lutadila bankaka ti bawu ba mulutidi.* 4 Bika kutomba theti mamboti maku veka, vayi tomba theti mamboti ma bankaka.

5 Lutatamana kuyindudila mu phila Yesu kaba yindudilanga. 6 Kibila kheti nandi wuba buka Nzambi, vayi kasa yindula ko kubonga kimfumu ki Nzambi, voti kuba dedi mueka na Nzambi. 7 Vayi, nandi wubika biabioso kaba ayi wuvitika kuba mvika, mu kubutuka mu nyitu yi kinsuni. 8 Bulutidi, bo kayiza va ntoto, nandi wu yikulula ayi wutumamana nati kafua. Ngete, wufuila va dikunzi. 9 Mu kibila akiokio, Nzambi wumvana kimfumu kilutidi ayi wumvana dizina dilutidi kena mazina moso. 10 Nzambi kavangila mawu, muingi baboso kuba kuandi ku diyilu, va ntoto ayi kutsi ntoto, bazitisa dizina di Yesu. 11 Batu boso* bafueti kikinina ti Yesu nandi Mfumu, muingi bazitisa Nzambi Tat’andi.

12 Zikhomba ziama zi luzolo, benu lutatamana kutumamana kubika ti bo yiba va khat’inu vayi kheti bo yikhambu va ba. Diawu, tatamananu kuvanga mamoso lunnunga muingi Nzambi ka luvukisa. 13 Kibila Nzambi, widi tho yi mangolo minu. Nandi ka luvananga ko to phuila, vayi mvandi mangolo ma kuvangila mambu, dedi bo nandi kantombila. 14 Tatamananu kuvangila mambu moso mu khambu nyunguta ayi mu khambu sombula.* 15 Muingi luba bana ba Nzambi bakhambulu kibila ayi bakhambulu fotu. Bo luntatamana kuzingila mu khambu ba fotu, benu luidi mu kulezama buka muinda mu nza ayiyi yiwedi bankua mambi. 16 Simbidilanu buboti diambu di luzingu. Mu phila ayoyo, minu yala baka kibila ki kukuangalala mu kilumbu ki Klistu. Mu kuzaba ti mangolo moso ayi kisalu kioso yivanga, kisa ba ko kiphamba. 17 Kheti yi kivananga buka nkhailu wu malavu bandukula va kikumu, minu yimvangilanga mawu muingi kubuela mioko kisalu kinu kuidi Nzambi, ayi kukindisa kiminu kinu. Minu yidi beni mu mayangi ayi yinkuangalala yinu va kimueka. 18 Bobuawu mvandi, minu yi kuludinda muingi luyangalala yama va kimueka.

19 Yidi kivuvu ti Mfumu Yesu, wunkuiza bika yi mufila Timoti muingi yibaka khindusulu mu zitsangu kala tuala zitedi benu. 20 Kibila vasi ko mutu wunkaka widi wukubama buka nandi, fueti kieba buboti zitsatu zinu. 21 Bankaka badi mu kutula zitsatu ziawu va theti kubika kuandi zi Yesu Klistu. 22 Benu luzebi ti Timoti wumonisa bivisa mu kuba kisadi* kimboti mu matedi kutembikisa zitsangu zimboti, dedi bo muana kansadilanga va khonzu tat’andi. 23 Minu kuzaba mambu mbi mankuiza mbonikina, nandi yidi mu kuyindula kufila. 24 Ayi yidi lufiatu ti mu thangu yikhufi, Mfumu wunkuiza phana luaku muingi minu mvama, yiza mutala.

25 Vayi mu thangu ayiyi, yibe yindula ku mufila khomb’ama Epafoloditu widi mvandi nkundi’ama wu kisalu ayi widi disodi buka minu, no benu mufila muingi kathuadila zitsangu ayi muingi kakieba zitsatu ziama. 26 Nandi wuntomba beni ku lumona, kibila widi mu kutatakana beni mu kuzaba ti benu muyuwidi ti nandi kubela kabedi. 27 Bukiedika, nandi wubedi kimbevu kingolo kibina nnata ku lufua. Vayi Nzambi wummueni kiadi ayi wumbueni mvama kiadi, muingi yibika viokila mu mambu mawombo ma kuphanga kuba mu kiunda. 28 Diawu yinkuiza mfidila mu thinu ayi mu nsualu, muingi bo lu kummona lubue yangalala ayi minu mvama yibika kubue tatakana beni. 29 Mu kuba khomb’inu mu Mfumu, lunyamba mu mioko miodi ayi tatamananu kukinzika batu badi buka nandi. 30 Kibila nandi wubina fua mu kuvanga kisalu ki Klistu ayi wutudidi luzingu luandi va kingela mu kibila kiama, mu kuzaba ti benu lusa ba ko yama va kimueka muingi kutsadisa.

3 Zikhomba ziama, lutatamana kukuangalala mu kuba minlandikini mi Mfumu. Kuidi minu, buisi ko bubi kubue musonikina momawu mambu. Yimvangila mawu mu kutadila mamboti minu.

2 Banu keba keba kuidi batu badi mavanga buka ma zimbua, kuidi batu bamvanganga mambu mambi. Mvandi, banu keba keba kuidi batu bantatamana mu mayindu ma kuzengisa nyitu yi kibakala. 3 Befu tunsadilanga Nzambi mu thuadusulu yi phevi’andi ayi tuntulanga lufiatu luitu mu nandi. Befu tuidi nyitu yi kibakala yizengu mu bukiedika, kubika kuandi mu kinsuni, vayi mu nzila Yesu Klistu. 4 Kheti batu boso badi kibila muingi kufiatila mu biuma bi kinsuni.

Vayi minu yilutidi bibila muingi kuvanga mawu, dedi: 5 Yizengusu nyitu yi kibakala mu kilumbu ki nana, yibutukila mu dikabu di Isaeli, mu mvila wu Beyamini, mvandi yidi muana wu basi Ebeleo. Ayi mu matedi Minsiku, yidi Mfalisi. 6 Mu matedi kumonisa kifuza, minu yituadisa zikhuamusu kuidi dikabu ayi mu matedi kulandakana Minsiku mu busonga, yidi mutu wukhambulu tsembulu. 7 Biuma bioso abiobio, biba nkinza kuidi minu, vayi yimana bitadila buka biuma bizimbala, mu kibila ki Klistu. 8 Bulutidi, minu yintadila biuma abiobio banga bizimbala, mu kibila ki thalu yilutidi yi kiedika kitedi Yesu Klistu, Mfumu’ami. Mu kibila kiandi, yikikinina kuzimbisa biuma bioso abiobio ayi yi bitadila buka tsodo, muingi yiba kikundi kifikama na Klistu, 9 ayi kuba yandi kithuadi. Busonga buama buyizilanga ko mu kuvanga mambu moso mu phila yisonga dedi buntubila Minsiku, vayi mu kuba kiminu mu Klistu. Ayi busonga beni, bumfuminanga kuidi Nzambi ayi busikimina mu kiminu. 10 Diambu minu yintomba didi, kunzaba ayi kuzaba mvandi mangolo* ma luvulubukusu luandi, kuviokila mu zioziawu ziphasi nandi kaviokila ayi kufua ntindu lufua nandi kafua, 11 muingi kumona boti yilenda ba mu luvulubukusu lutheti.

12 Mawu masinsundula ko ti yima tambula luaku alolo voti yeka mutu wuvedila. Vayi yidi mu kuvanga mangolo muingi boti kuba, yitambula mfutu wo Yesu Klistu katsodila. 13 Zikhomba, mawu masinsundula ko ti yima tambula mfutu beni, vayi mansundula ti: yidi mu kuvanga mangolo muingi kuzimbakana biuma yibika kumbusa ayi kunuana muingi kutambula bio binkuiza kuntuala. 14 Yidi mu kuvanga mangolo muingi kudukisa makani amomo ayi kutambula mfutu wo Nzambi kathedila ku diyilu, mu nzila Yesu Klistu. 15 Diawu, mu kuzaba ti befu boso tueka batu bayonzuka mu kiphevi, tufueti ba mayindu amomo. Ayi boti phila yinkaka luidi mu kuyindudila, buna Nzambi wala ku lumonisa phila yifuana yi kuyindudila. 16 Ayi boso kua bubela phila tuma konzukila mu kiphevi, tufueti tatamana kudiatila mu nzila ayoyo.

17 Zikhomba, benu boso landakananu kifuani kiama ayi tatamananu kutala kifuani ki batu banlandakana kifuani kio befu tu mubikila. 18 Kibila bawombo minu yaba tangunanga khumbu ziwombo, bubu yimana kuba tangunina mu kudila, kibila bawu bamana diatila mu kuzimbakana ziphasi zioso Klistu kamona va dikunzi.* 19 Mbungulu, yawu yala ba tsukulu’awu, kivumu kiawu, kimana ba nzambi’awu, bawu ba kinyemisanga mu mambu mo bafueti muena zitsoni ayi bansikikanga mayindu mawu mu biuma bi nza. 20 Vayi befu, divula ditu didi ku diyilu, kuawu kuala fumina mvukis’itu ayi Mfumu’itu Yesu Klistu, no tuidi mu kuvingila. 21 Nandi wala kitula zinyitu zitu zilebakana* muingi ziba dedimueka na nyitu’andi yi nkembu, mu kusadila mangolo madi yandi, mo mansadisa kutula biuma bioso ku tsi luyalu luandi.

4 Diawu zikhomba ziama, minu yimu zolanga beni ayi yidi phuila yi kumu mona, kibila benu luidi mayangi mami ayi kolow’ami. Zikhomba ziama zi luzolo, tatamananu bakuikama mu Mfumu.

2 Yindinda kuidi Evodia ayi Sintike muingi baba phila yimueka yi kuyindudila mu Mfumu. 3 Ayi ngie mvaku widi nkundi’ama wukiedika wu kisalu, tatamana kusadisa bakietu abobo basala yama va kimueka mu kusamuna zitsangu zimboti, kubunda mvandi Kelemente ayi baboso bankaka basala yama va kimueka, badi mazina masonama mu buku yi luzingu.

4 Tatamananu kukuangalala mu Mfumu. Yemvutukila, Yangalalanu! 5 Bika batu boso bazaba ti benu, lukuikanga ko bankaka kukikinina mayindu minu. Mfumu mafikama. 6 Bikanu kukuazuka* mu kioso kua kiuma, vayi sambilanganu kuidi Nzambi, lombanu muingi ka muvana thuadusulu mu mambu moso ayi ntondanganu. 7 Benu kuvanga mawu, ndembama yi Nzambi yilutidi diela dioso di batu, yala kieba mintima minu ayi mayindu minu, mu nzila Yesu Klistu.

8 Diawu zikhomba, tatamananu kuyindula mu mambu moso makiedika, mankinza, masonga, madiodila, ma luzolo, bantubilanga buboti, mamboti ayi mambu moso ma nzitusu. 9 Tatamananu kusadila mambu moso mulonguka, mutambula, muyuwa, ayi mo lumbona kuvanga. Mu phila ayoyo, Nzambi yi ndembama wala ba yinu.

10 Yinkuangalala beni ayi yimvutula matondo kuidi Mfumu mu phila lube kumbonisina mamboti. Kheti lunkuazukanga beni matedi minu, vayi lubakanga ko luaku lu kutsadisa. 11 Bakana ko bo yidi mu kuviokila mu tsatu, buawu yintubila mawu, kibila minu yilonguka kukuangalalanga boso kua bubela mambu yidi mu kuviokila. 12 Yizebi kuzingila mu biuma biluelu ayi mvandi mu biuma biwombo. Mu mamoso ayi mu zithangu zioso, yilonguka kukuangalala kuba kuandi mu thangu yidi wuyukuta voti yidi mu nzala, mu thangu yidi mbakulu ayi mu thangu yidi mu tsatu. 13 Minu yinkindamanga mu mambu moso, mu kibila ki mangolo Mfumu ka kuphananga.

14 Vayi, diambu dimboti muvengi mu kutsadisa mu mambu maphasi yiviokidi. 15 Ayi benu basi Filipi luzebi ti bo yibotuka ku Masedoni ayi mu khumbu yitheti luyuwa zitsangu zimboti, vasa ba ko kimvuka kinkaka kitsadisa, kubotula kuandi benu. 16 Ayi bo yiba ku Tesalonika, benu mufila kioso kiuma muingi kukieba zitsatu ziama, kubika to khumbu mueka vayi khumbu wadi. 17 Yisintubila ko mawu muingi mubue fila minkhailu minkaka, vayi yintomba to lutambula lusakumunu lunkuizilanga mu kukabila bankaka. 18 Kibila yidi biuma biwombo kuvioka bio yidi tsatu. Ayi tona yitambudi biuma lufila mu nzila Epafoloditu, yisiedi ko mu tsatu. Biuma abiobio, bidi buka nkhailu wumboti, widi mfimbu wunkuangidikanga Nzambi. 19 Mu kibila akiokio, Nzambi’ama wala dukisa zitsatu zinu, mu kutadila kimvuama kiandi ayi nkembu’andi mu nzila Yesu Klistu. 20 Bika Tat’itu Nzambi, katambula nkembu wo kafueni mvu ka mvu. Amem.

21 Luvana zimboti kuidi bisadi bioso binlongo bi Nzambi, mu kithuadi na Yesu Klistu. Zikhomba zioso badi yama akuku, ba kuluveka zimboti. 22 Bisadi bioso binlongo, vayi bulutidi batu bansadilanga ku nzo ntinu Sezali, ba ku muveka zimboti.

23 Ayi bika mamboti malutidi ma Mfumu’itu Yesu Klistu, maba yinu bo luntatamana kumonisa phila yimboti yi kuyindudila.