NKANDA WUMMUADI KUIDI TIMOTI

1 Minu Polo, apostolo yi Yesu Klistu mu luzolo lu Nzambi, mu kutadila luzingu ba tukanikisa mu nzila Yesu Klistu, 2 yimfila nkanda awuwu kuidi Timoti, muan’ama wu luzolo:

Bika mamboti malutidi, kiadi ayi ndembama yi Tata Nzambi ayi yi Mfumu’itu Yesu Klistu, biba yaku.

3 Yimvutula matondo kuidi Nzambi, no yimvangilanga kisalu kinlongo, mu kilunzi kidiodila dedi bo buvangila bakulu bama, ayi yizimbakananga ko ku kunata mu minsambu miama builu ayi muinya. 4 Bo yintebukila moyo matsuela maku, yimbanga beni phuila yiku kumona ayi minu ku kumona, yinkuiza yangalala beni. 5 Yintebuka moyo kiminu ki kiedika khayaku Loisi na mam’aku Eunisi bamonisa. Yidi lufiatu ti ngie mvaku, widi ntindu kiminu beni.

6 Mu kibila ki kiminu kiaku, yi kukindisa muingi wusadila nkhailu Nzambi ka kuvana mu kifuza, bo minu yikuvana kiyeku.* Ayi sadila wawu buka ngie wunlemisa mbazu. 7 Kibila phevi yinlongo yo Nzambi katuvananga, yi tuvanganga ko kuba boma, vayi yi kutuvananga mangolo, luzolo ayi nduenga. 8 Diawu, bika kumona zitsoni mu kuvana kimbangi matedi Mfumu’itu, voti matedi minu mu kuba mu buloku mu kibila ki Yesu. Vayi, ba lufiatu mu mangolo ma Nzambi ayi ba wukubama muingi kuviokila mu ziphasi mu kibila ki zitsangu zimboti. 9 Nandi wu tuvukisa ayi wu tutela mu thedulu yinlongo, kubika ti mu kibila ki mambu mamboti tuvanga, vayi mu kibila ki lukanu luandi ayi mu mamboti mandi malutidi. Befu tubakila luaku beni, tona thama mu kibila ki Yesu Klistu. 10 Vayi buabu, lukanu beni luyiza zabakana, bo Mvukis’itu Yesu Klistu kayiza. Nandi wumanisa lufua ayi wutuala kiezila ki luzingu lukhambu sukanga, mu nzila zitsangu zimboti. 11 Diawu, mu kibila ki zitsangu beni, baphana kiyeku ki kuba nsamuni, apostolo ayi nlongisi.

12 Diawu minu mvama yintovukilanga mu kibila ki kisalu akiokio, vayi yimonanga ko tsoni, kibila yizebi buboti Nzambi no yimfiatilanga, ayi yidi lufiatu ti, nandi widi mangolo ma kulunda buboti biuma yimvana nati mu kilumbu beni. 13 Mu kiminu ayi mu luzolo, simbidila thuadusulu yi mambu mamboti mo wuyuwa kuidi minu, mankuizilanga mu kithuadi na Yesu Klistu. 14 Mu lusalusu lu phevi yinlongo, kieba buboti kiuka, kio wutambula.

15 Ngie zebi ti nduka batu boso ku Azia, bandiekula, kubunda mvandi Figelo ayi Helimogeni. 16 Vayi, bika Mfumu kamonisa kiadi kuidi dikanda di Onezifolo, kibila mu thangu yiba mu buloku, nandi wumbomba zikhumbu ziwombo, ayi kasa mona ko zitsoni kuvanga mawu. 17 Mvandi, bo kayiza ku Loma, nandi wuvanga mangolo mawombo muingi kuthomba, ayi wumbakula. 18 Bika Mfumu kamvana luaku muingi katambula nlemvu wu Yave, mu kilumbu beni. Ngie zebi buboti phila nandi katsadisila mu mambu mawombo ku Efeso.

2 Diawu muan’ami, tatamana kuyikindisa mu nzila mamboti malutidi ma Nzambi, mankuizilanga mu Yesu Klistu, 2 tatamana mvandi mu mambu wuyuwa kuidi minu, mo batu bawombo batela kimbangi. Ayi yiku kindisa muingi wulonga mawu kuidi batu bakuikama, muingi bawu baba bakubama mu kulonga mawu kuidi bankaka. 3 Mu kuba disodi dimboti di Yesu Klistu, fueti ba wukubama muingi kuviokila mu ziphasi. 4 Vasi ko disodi dilenda kukivana mu mambu ma lungosu, muingi ku kuangidika mutu wuntula mu busodi. 5 Mawu mvandi mammonikanga mu bisavu, mutu kalendi tambula ko kolowa, boti kasa landakana ko zithuadusulu zioso zitedi kisavu beni. 6 Mvati no wunsalanga beni, nandi theti fueti dia mimbutu mitheti mi tsol’andi. 7 Tatamana kuyindula mu mambu amama yi kukamba: Mfumu wala kuvana phisulu mu mambu moso.

8 Tebuka moyo ti Yesu Klistu bamvulubusa mu bafua, ayi wubutukila mu nkuna wu Davidi, dedi buntubila zitsangu zimboti yinsamunanga. 9 Ayi mu kibila ki zitsangu beni, diawu yidi mu kutovukila ayi yididi wukangama mu ziphanga buka mvondi. Vayi kheti bobo, diambu di Nzambi disi ko dikangama. 10 Mvandi diawu yidi mu kukindimina mu mambu maphasi, mu kibila ki basolu, muingi bawu mvawu babaka phulusu, ayi nkembu wu mvu ka mvu wunkuizilanga mu nzila Yesu Klistu. 11 Mambu amama madi makiedika ayi ma lufiatu: Boti tufua yandi va kimueka, buna tuala zinga yandi va kimueka. 12 Befu kutatamana kukindama, buna mvandi tuala yala yandi. Vayi befu kummanga, nandi mvandi wala kutumanga, 13 befu kukhambu ba bakuikama, kheti bobo nandi wala tatamana wukuikama, kibila kalendi vanga ko mambu mambalula kimutu kiandi.

14 Tatamana kuba tebula moyo mambu amama, mu kubalonga va ntuala Nzambi, muingi babika ziphaka mu mambu makhambulu nkinza, kibila mambu amomo, manlebikisanga kiminu ki batu bankuwa mawu. 15 Vanga mamoso wunnunga, muingi wuba mutu wufuana va mesu ma Nzambi, banga kisadi kikhambulu kibila muingi kufua tsoni, mu kusadila buboti diambu di Nzambi.* 16 Vayi, tatuka masolo maphamba, mambundulanga mambu masonga, kibila mawu manluta tatulanga batu kuidi Nzambi. 17 Ayi mambu mawu, mala tembakana dedi bo mbeza yintembikininanga mu nyitu. Imeneu ayi Filetu, badi mu batu bamvanganga mawu. 18 Babakala abobo, bavekuka mu kiedika mu kutuba ti luvulubukusu luma monika. Ayi mambu bantubanga, madi mu kulebikisa kiminu ki bankaka. 19 Kheti bobo, Nzambi wutunga lusersu lungolo luala kadidila, luidi kidimbu akiki: “Yave zebi buboti batu bandi”, ayi “Baboso bamfiatila mu dizina di Yave,* bantatukanga mambu makhambulu masonga.”

20 Ku nzo kubanga ko to bisadulu bi wola ayi bi palata, vayi mvandi kuidi bisadulu bi mabaya ayi bi tuphandu. Bisadulu binkaka bidi binzitusu, vayi binkaka bisi ko binzitusu. 21 Bobuawu mvandi, boti mutu wuntatuka batu badi buka bisadulu bikhambulu nzitusu, nandi wala ba mutu wunzitusu, wuvedila, widi luvalu kuidi mfumu’andi, ayi widi wukubama muingi kuvanga kisalu kimboti. 22 Diawu, tina ziphuila zi butoko, vayi wukivana mu mambu masonga, ma kiminu, ma luzolo, ayi ma ndembama, va kimueka na batu bansadilanga Mfumu, mu ntima wuvedila.

23 Mvandi, tatuka mambu mantuadisanga ziphaka, kibila ngie zebi ti mambu amomo, mamvanganga batu kukuambila.* 24 Busa fuana ko kisadi ki Mfumu kukuambila, vayi vantombuluanga nandi kumonisa lukinzu kuidi batu boso, kuba wufuana muingi kulonga, kuzaba kukiyala bo ba kumvangila mambu mambi, 25 ayi wumbanga wuvumbama bo kanlonga batu bakhambu kikininanga mu mambu kantuba. Mu phila ayoyo, ḿba Nzambi kalenda kuba vana luaku lu kubalula mavanga mawu, ayi kubaka nzailu yi mambu makiedika. 26 Mu phila ayoyo, batu abobo bala vionyuka mu ntambu wu Nkadi’ampemba, kibila nandi wuba buila muingi bavanga luzolo luandi.

3 Vayi zaba ti mu bilumbu bitsuka, yala ba thangu ziphasi muingi kuzingila. 2 Kibila batu bala luta kuyizola baveka, bala zola beni zimbongo, bala vanga mambu bakhambulu nsua, bala ba lunangu, bala vuezanga Nzambi, balasa tumukinanga ko matata mawu, balasa tondanga ko, balasa ba ko bakuikama, 3 balasa monisa ko luzolo kuidi basi dikanda diawu, balasa ba ko bakubama muingi kudedikisa mambu, bala ba mimvuezi, balasa zaba ko kukiyala, bala ba batu ba makhema, bala ba zimbeni zi mambu mamboti, 4 bala vakulanga badi yawu, bala ba kithemu,* lungundayi, bala luta zola minyengu kena Nzambi, 5 ayi bala monikina buka ti bansadilanga Nzambi, vayi mavanga mawu mala monisa ti, basi ko bisadi bi Nzambi. Batu ba phila ayoyo, ngie fueti kuba tatuka. 6 Bankaka mu bawu, bamfielubukanga mu makanda muingi kuvukumuna bakietu bakhambulu mayindu masikama, mu kibila ki masumu mawombo bavola ayi bawedi phuila yi mambu mambi. 7 Ayi bawu, kheti banlongukanga beni, vayi banunganga ko kubaka nzailu yi kiedika.

8 Dedi bo Janes ayi Jambres babayisila Mose, bawu mvawu bambayisanga kiedika. Bawu badi mayindu mabola ayi basi ko Kiminu. 9 Mu phila ayoyo, bawu balendi kuenda ko ntuala, kibila batu boso bankuiza zaba buvulu buawu, dedi bo buvulu bu Janes ayi Jambres buzabikinina. 10 Vayi ngie wulandakana malongi mami, zikhadulu, zikhanu, kiminu, mvibudulu, luzolo ayi kukindama kuama, 11 mvandi wumona ziphasi ziama dedi zio yimona ku Antiokia, Ikonio ayi ku Listra. Minu yikindama mu mambu amomo ma phasi, ayi Mfumu wukhula mu mawu. 12 Vayi zaba ti, baboso bantomba kusadila Nzambi, mu kithuadi na Yesu Klistu, mvandi bala viokila mu ziphasi. 13 Vayi bankua mambi ayi batu ba luvunu bala luta vanga mambu mambi, bala vuna bankaka ayi baveka bala vunuka.

14 Vayi ngiewu, tatamana mu mambu bakulonga, ayi ba kusadisa kubaka bivisa. 15 Kibila tona mu bumuana buaku, ngie zebi buboti masonoko malenda kusadisa kubaka nduenga ayi kubaka phulusu, mu nzila kiminu mu Yesu Klistu. 16 Masonoko moso masonimina mu thuadusulu yi phevi yi Nzambi, madi nkinza muingi kulonga, kutumbudila, kuludika mambu, kusemba muingi kudiatila mu busonga, 17 muingi kisadi ki Nzambi kaba wuduka ayi wukubama, mu kuvanga kisalu kioso kimboti.

4 Minu yiku vana lutumu alulu va ntuala Nzambi ayi va ntuala Yesu Klistu, no wala fundisa batu bafua ayi bamonyo, bo kala monika mu Kintinu kiandi. 2 Samuna diambu di Nzambi, vanga mawu mu thinu kuba kuandi mu thangu ziphasi voti mu thangu zinyenzi, semba, tumbudila ayi lubula mu mvibudulu woso buka nlongisi wupisuka. 3 Kibila vala ba thangu, batu balasa bue tomba ko kukuwa malongi makiedika, vayi mu kutadila ziphuila ziawu, bala tomba minlongisi muingi baba longa mambu bawu bantomba kukuwa. 4 Bawu bala zibika makutu mu malongi makiedika, vayi bala teka matu mu binongo bi luvunu. 5 Vayi ngie, tatamana kuyikieba mu mambu moso amomo, kindama mu ziphasi, vanga kisalu ki kusamuna ayi manisa kisalu kiaku buboti.

6 Minu yidi buka nkhailu wu malavu badi mu kudukula va kikumu, ayi thangu’ama yi kufua, yima fikama. 7 Yinueni nzingu wu kiminu, yidumizi nati kutsuka ayi yizingidi mu kiminu. 8 Kutona kuandi bubu, badi mu kundundila kolowa yi busonga, yo Mfumu widi mfundisi wusonga, kala kuphana banga mfutu mu kilumbu beni, kubika to minu, vayi mvandi kuidi baboso bamvingila mu phuila thangu nandi kala monika.

9 Vanga mangolo muingi wiza thala mu thinu. 10 Dema wundiekula, kibila nandi waba luta zola nza ayiyi, diawu kayendila ku Tesalonika, Klecente wuyenda ku Ngalatia ayi Titu wuyenda ku Dalmacia. 11 Luka nandi to widi yama. Bo wunkuiza, tuala Malaku, kibila nkinza wuwombo kadi mu kisalu yimvanga. 12 Yifididi Tikiku ku Efeso. 13 Bo wunkuiza, thuadila kiyunga kidi ku nzo yi Kalipu ku divula di Toloade, thuadila mvandi zibuku, bulutidi zio zivangulu mu nkanda bibulu.

14 Alesandele no wumvanganga bisalu bi cobre, wuthuadisidi beni ziphasi. Vayi Yave wunkuiza mfundisa mu kibila ki mavanga mandi. 15 Diawu, ngie mvaku fueti ba keba keba mu nandi, kibila widi mu kutubila bubi zitsangu tuidi mu kulonga.

16 Khumbu yitheti bamfundisa, ni mutu kasa ba ko ku khonzu’ama, baboso bandiekula—vayi Nzambi kabika kuba fundisa mu mawu. 17 Vayi Mfumu wuba ku khonzu’ama ayi wukhindisa muingi mu nzil’ama, zitsangu zimboti zisamunu kuidi batu ba mimvila mioso. Minu baphukisa mu munu wu khosi. 18 Mfumu wala kuphukisa mu mambu moso mambi, ayi wala kundata mu Kintinu kiandi ku diyilu. Bika nandi katambula nkembu wu mvu ka mvu. Amem.

19 Vana zimboti ziama kuidi Priska ayi Akila, mvandi kuidi basi dikanda di Onezifolo.

20 Elasitu wusiedi ku Kolintu, vayi yibikidi Tolofimu ku Miletu, wumbela. 21 Vanga mamoso wunnunga muingi wuvitila akuku ava thangu kiozi kingolo.

Eubulu wu kufila zimboti, mvandi Pudente, Linu, Klaudia ayi zikhomba zioso ba kufila zimboti.

22 Bika Mfumu katatamana yaku mu mamoso wumvanga. Bika mamboti mandi malutidi maba yinu.