Nkanda Wufumini Kuidi Dingumba Dintuadisi

Zikhomba zitu zi luzolo:

Luzolo mu Nzambi ayi mu batu, luawu lu tuvanganga ‘tuyenda . . . tulonga batu ba zitsi zioso muingi baba minlandikini mi Yesu ayi babotama.’ (Matai 28:19, 20; Malako 12:28-31) Luzolo lu ntima woso luntuadisanga ndandu, kibila luawu lulenda nyikuna mintima mi batu badi “mintima mikubama muingi kubaka luzingu lu mvu ka mvu.”—Mava. 13:48.

Kumbusa, befu tuaba luta tsikikanga mayindu mitu mu kulunda zimbonosono ayi kukaba bilongulu. Vayi bubu, tuntomba kuluta pisuka mu phila tunkolukilanga na batu. Befu tuntomba kumonisa luzolo kuidi batu, mu kukoluka mambu mo bawu bamvua nkinza. Mawu mansundula ti tufueti zaba bu kunatina mambu, kuzaba mambu bawu bamvua nkinza ayi zitsatu ziawu. Buidi mua buku ayiyi yinkuiza tusadisila kuvanga mawu?

Mu mua buku ayiyi muidi 12 di malongi mantubila zikhadulu tufueti kuna muingi kumonisa luzolo kuidi batu ayi kuvanga minlonguki. Kadika dilongi dibongulu mu kinongo ki Kibibila, dimmonisa buidi Yesu voti mimvuala minkaka mu sekulu yitheti, bamonisina khadulu beni mu kisalu ki kusamuna. Makani mitu masiko to ma kusueka mu ntu mambu tuntomba kulonga, vayi ma kumonisa luzolo kuidi batu. Kheti zikhadulu zioso zidi nkinza mu kisalu kitu ki kusamuna, vayi tunkuiza tubila zikhadulu zio tufueti luta sadila bo tuntona masolo, bo tumvutukila batu ayi bo tuntuadisa ndongukulu yi Kibibila.

Bo wunkuiza longuka kadika dilongi, yindula buboti buidi wulenda monisina kadika khadulu bo wunkoluka na batu va kizunga kiaku. Vanga mangolo muingi wukindisa luzolo luaku mu Yave ayi mu batu. Ayi luzolo beni, luawu luala kusadisa kudukisa makani maku ma kuvanga minlonguki.

Befu tunzolanga beni kusala yaku va kimueka. (Sefa. 3:9) Bika Yave ka kusakumuna bo wuntatamana kuvanga mangolo muingi kuzola batu ayi kuvanga minlonguki!