Biuvu bi Mintangi

Mu 2 Tesalonika 3:​14, Banani Polo Kakamba ti Bafueti ba Keba Keba mu zikhomba baba bankua divunza? Bakulutu ba kimvuka, voti zikhomba zioso mu kimvuka?

Tala mambu mvuala Polo kasonikina kuidi Baklistu ku Tesalonika: “Vayi boti vadi mutu wummanga kutumukina mambu tuidi mu kulukamba mu nkanda awuwu, banu keba keba mu nandi.” (2 Te. 3:14) Kumbusa, tuaba tubanga ti thuadusulu ayoyo, yaba tubilanga to matedi bakulutu ba kimvuka. Boti khomba mueka waba manganga kutumukina minsua mi Kibibila, kheti bakulutu ba kimvuka bamana kuedika kunsadisa khumbu ziwombo, vaba tombulu bakulutu ba kimvuka bavanga dilongi ditedi mambu beni mu kimvuka. Mu phila ayoyo, baba bikanga kubue viokisa yandi thangu, vayi kudengininanga to yandi mu zikhutukunu ayi mu kisalu ki kusamuna.

Vayi tufueti ludika phisulu ayoyo. Bivisa bimmonisa ti dilongi di Polo, dintubila makani kadika kisadi ki Yave kalenda baka mu mua mambu. Diawu, valasa bue tombuluanga ko bakulutu ba kimvuka bavanga dilongi muingi kulubula kimvuka kioso. Kibila mbi tuma bakila phisulu yimona? Ndoko tufiongunina buboti mambu Polo kaba tubila.

Polo wumona ti bawombo mu kimvuka ‘baba manga kutumukina.’ Bawu baba manga kutumukina malongi mabongulu mu Diambu di Nzambi. Bo kayenda kue batala, nandi wuba vana dilongi adidi: “Boti mutu kasintomba ko kusala, buna mvandi kalendi dia ko.” Kheti bobo, bawombo baba manganga kusala, kheti baba luaku lu kuvanga mawu. Mvandi, bawu baba kue kotanga mu mambu mangana. Buidi Polo katubila batadila zikhomba aziozio?—2 Te. 3:​6, 10-12.

Polo wuba kamba: “Banu keba keba mu nandi”. Kikuma ki Kingeleku basekudila “banu keba keba” kinsudula kuzaba mutu beni ayi kukieba muingi kabika kutambikisa mavanga mandi mambi. Polo waba vana thuadusulu ayoyo kuidi kimvuka kioso, kubika kuandi to kuidi bakulutu ba kimvuka. (2 Te. 1:1; 3:6) Diawu vaba tombulu kadika khomba kuba keba keba muingi kubika ba kithuadi na zikhomba baba bankua divunza.

Bukiedika ti vaba tombulu bawu bantadila banga mutu bebotuka mu kimvuka? Ndamba. Polo wubuela tuba: “Tatamananu kumvana malongi ayi lufueti kuntadila banga khomba.” Diawu, bawu baba luaku lu kuba yandi mu zikhutukunu ayi mu kisalu ki kusamuna. Vayi mvandi, baba lualu lu kusola kumanga kuviokisa yandi thangu mu ziphila zinkaka, dedi kuvuvisa ayi kumanga kuntumisa mu minkungi. Kibila mbi? Polo wutuba: “Muingi nandi kafua tsoni”. Mawu maba vanganga khomba beni kumona zitsoni mu mambu kaba vanganga ayi kubalula zikhadulu ziandi.— 2 Te. 3:​14, 15.

Buidi Baklistu bubu balenda landikinina dilongi adiodio? Ditheti, tufueti ba bivisa bikiedika ti khomba beni, widi nkua divunza, dedi bo Polo katubila. Nandi kabasa tomba ko kutubila matedi disuasana di mayindu mu batu, voti mambu makhambulu kuandi mambi, wunkaka kakhambu zolanga. Mvandi, kabasa tomba ko kutuba ti tulendi viokisa ko thangu na batu ba tulueka ntima. Vayi, Polo waba tubila matedi batu baba solanga baveka kumanga kutumukina Nzambi.

Bubu, befu kumona ti khomba mueka wunsola kumanga kutumukina Nzambi, a tufueti sola kumanga kuviokisa yandi thangu mu ziphila zinkaka, dedi kumanga kuvuvisa yandi ayi kumanga kuntumisa mu minkungi. Bo buidi ti amomo madi makani ma kadika mutu, tulendi zabikisa ko mawu kuidi batu bakhambu mu dikanda ditu, dinkalanga yitu nzo yimueka. Vayi tulenda tatamana kuitu kuba yandi kithuadi mu zikhutukunu ayi mu kisalu ki kusamuna. Na kubalula zikhadulu ziandi, tulenda vutuka kubue viokisa yandi thangu ayi kuvuvisa yandi.