Kiuvu, ki Khambu Phasi Wulenda Kuvula

Mary ayi nnuni’andi John,a bankalanga ku kibuangu kio balenda samuna batu bawombo bamfuminanga ku tsi Filipinas. Mu thangu COVID-19, Mary wutona ndongukulu yi Kibibila kuidi batu kubika to ku tsi kaba kalanga vayi mvandi mu zitsi zinkaka. Buidi kavangila mawu?

Nandi waba kuvulanga minlonguki miandi mi Kibibila, “Vadi mutu wunkaka wuzebi kalenda zola kulonguka Kibibila?” Woso mutu waba tubanga ngete, nandi waba kunkambanga: “Wulenda tsadisa muingi yinzaba?” Kuvanga kiuvu akiokio kintuadisanga beni ndandu. Kibila mbi? Kibila baboso banzolanga diambu di Nzambi, bambanga phuila yi kuzabikisa mambu banlonguka kuidi basi dikanda ayi bakundi bawu. Ndandu mbi Yaya Mary kabaka mu kuvana kiuvu akikio?

Nlonguki’andi wu Kibibila bantedilanga Jasmin wunzabikisa kuidi batu banna baba tomba mvandi kulonguka. Wumueka mu batu beni wuba Kristine, nandi waba zolanga beni mambu kaba longuka ayi wundinda balongukanga khumbu wadi mu kadika sabala. Bo yaya Mary kanyuvula boti vadi mutu kazebi wuntomba kulonguka Kibibila, nandi wukikina ayi wunnata kuidi bakundi bandi. Mu mua zisabala, Kristine wuzabikisa yaya Mary, bakundi bandi banna baba tomba kulonguka Kibibila. Bosi kuidi bakundi bandi bankaka, ayi bawu mvawu bavanga momawu mambu.

Kristine mvandi waba tomba muingi basi dikanda diandi ku Filipinas balonguka Kibibila, diawu wuyoluka ayi muan’andi Andrea. Va thonono, Andrea wuyindula ti ‘zimbangi zi Yave baba to mua dingumba di batu bakhambu kikininanga mu Yesu, ayi ti bansadilanga to Masonoko ma Kiebeleo.’ Vayi bo katona kulonguka Kibibila, divuda dioso kaba dimana. Kadika khumbu kaba longukanga diambu dimona mu Kibibila, nandi waba tubanga: “Boti mambu amama madi mu Kibibila buna madi makiedika.”

Buviokila thangu, Andrea wuzabikisa kuidi yaya Mary bakundi bandi buadi ayi mutu waba salanga yandi muingi balonguka Kibibila. Mvandi, mama nleki yi Andrea wuba phovi bantedilanga Angela waba kuwanga bo yaya Mary ayi Andrea baba longukanga Kibibila. Kilumbu kimueka, Angela wudinda Andrea kanzabikisa kuidi yaya Mary muingi katona mvandi kulongukanga Kibibila. Angela waba zolanga mambu kaba longukanga. Mu ngonda mueka, wulunda va kilunzi matangu mawombo ma Kibibila, ayi wudinda muingi kalongukanga mu khumbu zinna kadika sabala. Nandi wutona kulandakananga zikhutukunu mu videoconferência mu lusalusu lu Andrea.

Bo yaya Mary kazaba ti nnuni wu Kristine bantedilanga Joshua, kabasa landakananga ko ndongukulu yi Kibibila, nandi wunyuvula boti mvandi wuntomba kulonguka. Joshua wutuba: “Yinkuiza yuwa to mambu munlonguka vayi bika kuphana biuvu, ngie kuvanga mawu yinkuiza basika.” Bo vavioka to minutu mitanu, nandi wuvana biuvu biwombo kuvioka Kristine ayi waba tomba kutatamana kulonguka.

Kiuvu yaya Mary kavana, kizibula nzila muingi bawombo balonguka Kibibila. Bo bayiza ba bawombo, nandi wufila zikhomba zinkaka muingi kuba longisa Kibibila. Yaya Mary wutona ndongukulu yi Kibibila na 28 di batu ba zitsi zinna.

Jasmin, nlonguki’andi wutheti wubotama mu Ngonda Yinna mvu 2021. Kristine wubotama mu Ngonda Yintanu mvu 2022 ayi wuvutuka ku tsi yi Filipinas kuidi dikanda diandi. Batu buadi, Kristine kazabikisa yaya Mary mvandi babotama. Angela wubotama mu mua zingonda ayi bubu widi ntuami ntuala. Nnuni wu Kristine Joshua, muan’andi Andrea ayi minlonguki minkaka mi Kibibila badi mu kukonzuka mu kipheve.

Mu thangu Yesu ayi bapostolo bandi, bawombo baba zabikisanga kuidi bakundi ayi basi dikanda mambu baba longukanga matedi Yesu. (Yoa. 1:​41, 42a; Mav. 10:​24, 27, 48; 16:​25-33) Buidi wummuena kukuvulanga minlonguki miaku mi Kibibila: “Vadi mutu wunkaka wuzebi kalenda zola kulonguka Kibibila?” Bukiedika, kuvanga kiuvu akikio kulenda vanga bawombo kulonguka Kibibila.