Ngie Zebi?

Mbi Zinganga Nzambi ku Yelusalemi baba vanganga mu menga ma bibulu baba vaninanga minkhailu va kikuma?

ZINGANGA Nzambi ku Isaeli yikhulu baba vondanga bibulu biwombo kadika mvu muingi kuvana minkhailu va kikuma, bulutidi mu thangu Pasika. Nta kinongo musi Yuda Josefo, wutuba ti baba vondanga kuvioka 250.000 di mameme muingi kuvana minkhailu. Mu kibila akikio, baba tengulanga menga mawombo. (Levi. 1:​10, 11; Zinta. 28:​16, 19) Kuidi menga moso amomo maba kuendanga?

Batu bamfionguninanga biuma bikhulu babakula ti va wanda kikuma baba vikilanga minkhailu ku tempelo yi ntinu Elodi, vaba mavudu mawombo, muingi menga moso matengulu va kikuma ma basika. Baba sadilanga tempelo beni nati bayiza tulula yawu mu mvu 70 T.K.

Mona ziphila wadi baba sadilanga mavudu beni:

• Mavudu maba va wanda kikuma: Vaba mavudu muadi va khonzo sude yi tempelo. Menga ma bibulu matengulu, maba basikilanga mu mavudu maba va wanda kikuma ayi maba sobikisanga na nlangu waba viokilanga mu mabulu maba ku tempelo nati ku ḿbuinga wu Cédron.

  Batu bamfionguninanga biuma bikhulu, babakula mavudu mawombu ku khati tempelo ayi mabulu ku khonzo tempelo kuaba viokilanga nlangu ayi menga ma bibulu matengulu va kikuma.

• Mabulu maba viokilanga nlangu: Zinganga Nzambi baba tombanga nlangu wuwombo muingi kudiodisa kikuma baba vikilanga minkhailu mi bibulu, ayi vama vaba basikilanga menga. Diawu mu khati tempelo batungisa mabulu mawombo maba basikilanga nlangu. Joseph Patrich wumfionguninanga biuma bikhulu wutuba: “Phila batungila Tempelo beni yiba yikukuitukila.”