Zikhomba Zima Nuna—Benu Luidi Luvalu Luwombo mu Kimvuka
“Bo yiba ditoko, yinunga kuvanga mambu mawombo. Vayi bubu yisiedi ko mangolo ma kuvanga mambu mawombo yaba vanganga.”—Ditubulu kuidi yaya Connie, weka 83 di mimvu.
Ḿba mu kibila ki bubunu, ngie wusiala bue nunga ko kuvanga mawombo. Kheti wusadila mimvu miwombo mu kisalu ki Yave, ḿba ngie wumbanga mu kiunda, kibila wulendi bue nunga ko kuvanga mambu waba vanganga. Ḿba ngie wundedikisanga mambu wumvanganga bubu na mambu waba vanganga kumbusa. Boti buawu, mbi bilenda kusadisa kuba mayindu mafuana?
MBI YAVE KANTOMBA WUVANGA?
Wukiyuvusa: Mbi Yave kantomba muingi yivanga? Ngie wulenda baka khindusulu mu mambu Deutelonomi 6:5, yintuba: ‘Zola Yave Nzambi’aku, mu ntim’aku woso, mu muel’aku woso ayi mangolo maku moso.’
Dedi bo lutangu alolo lummonisa, Yave wuntomba muingi wunsadila mu ntim’aku woso, muel’aku woso ayi mangolo maku moso. Kuzaba mambu amomo, kulenda kusadisa kubika kuyidedikisa na bankaka, voti kudedikisa mambu wumvanganga bubu na mambu waba vanganga kumbusa.
Mambu mbi ngie waba vanganga mu kisalu ki Yave bo wuba ditoko? Bawombo bantubanga ti bavanga mamoso banunga. Ḿba ngie wuvanga mamoso wununga mu kutadila buidi bubela luzingu luaku thangu beni. Buabu, mbi wulenda vanga bubu? Ngie wulenda vanga mambu wunnunga madi mu kitesu kiaku. Ngie kutadila mambu mu phila ayoyo, wunkuiza mona ti Yave wunkuiza kusadisa dedi bo kavangila mu thangu wuba ditoko. Kibila mu butoko buaku ngie wuvanga malutidi mu kisalu ki Yave, ayi bubu, mawu wukhidi tatamana kuvanga.
Ngie wuvanga mamoso wununga mu kisalu ki Yave bo wuba ditoko, ayi wukhidi vanga mawu kheti mu bununu buaku
BANKAKA BALENDA BAKA NDANDU MU KIFUANI KIAKU
Bika kutsikika thalu mu mambu wulendi bue nunga ko kuvanga, vayi tadila bununu buaku dedi luaku lu kusadisa bankaka. Bukiedika, ngie widi luaku lu kuvanga mambu mawombo wusa nunga ko kuvanga bo wuba ditoko. Dedi, tala mambu wulenda vanga bubu:
Zabikisa kuidi bankaka mambu wulonguka mu luzingu luaku. Tala mambu batu basonama mu Kibibila batuba:
Ntinu Davidi: ‘Minu yiba ditoko vayi yima nuna, vayi yimonanga ko mutu wusonga wuyekulu voti bana bandi kutomba dipha.’—Minku. 37:25.
Yosua: ‘Talanu, minu yambelama kufua, ayi benu luzebi mu ntim’inu ayi mu muel’inu woso ti, zikhanu zioso Yave Nzamb’inu kavanga, zisalama. Ayi ni lukanu lumueka lusa khambu salama ko, kibila ziazioso zisalama.’—Yosua 23:14.
Ḿba ngie mana yimuena buka bawu. Ntinu Davidi ayi Yosua batuba mambu baviokila mu luzingu luawu. Bisadi abiobio bikuikama bi Yave bamona mu mimvu miwombo phila Yave ka basadisila, diawu bazabikisa mawu mu lufiatu.
Boti ngie widi mu kusadila Yave mu mimvu miwombo, mvandi wulenda zabikisa kuidi bankaka phila Yave ka kusakumunina. Ngie wuntebuka moyo phila yimueka wumona Yave kusadisila dikabu diandi? Ngie wulenda zabikisa mawu kuidi zikhomba zinkaka. Bo bawu bankuwa kifuani kiaku, bawu balenda baka khindusulu bantomba muingi bakindama.—Lom. 1:11, 12.
Phila yinkaka wulenda kindisa zikhomba yidi, mu kulandakananga zikhutukunu ku Nzo Kintinu ngie kununga. Kuvanga mawu, kunkuiza kindisa zikhomba ayi mvandi kuyikindisa. Yaya Connie tuma tubila, wutuba: “Kulandakananga zikhutukunu ku Nzo Kintinu, ku kutsadisanga kubika ba mu kiunda, kibila zikhomba ba kumbonisanga luzolo. Kheti mu mambu maluelu, yimmonisanga ti yimvutulanga matondo mu lusalusu luawu.”
YAVE WUMVUANGA NKINZA LUKUIKUMUNU LUAKU
Mu Kibibila, muidi bifuani bi batu bawombu basa ba ko luaku lu kuvanga mambu mawombo mu kisalu ki Yave, vayi nandi waba kuba zolanga. Dedi, tala kifuani ki Simioni wumueka mu basi Isaeli wuba kiboba, waba telimina mbutukulu yi Yesu. Bo kaba kuendanga ku tempelu, nandi waba monanga matoko mawombo kukieba biyeku binkinza. Mu mayindu ma batu, khanu nandi wutona kuyimuena buka ti kasa ba ko luvalu va mesu ma Yave. Vayi nandi wuba luvalu luwombo va mesu ma Nzambi. Yave waba tadilanga Simioni banga mutu wusonga, diawu kansakumunina mu kumvana luaku lu kumona Yesu. Ayi mvandi, Yave wusadila Simioni muingi kubikula matedi Mesia. (Luk. 2:25-35) Bukiedika, Yave kasa tsikika ko thalu’andi mu bununu bu Simioni vayi mu kiminu kingolo nandi kaba.
Yave wusakumuna Simioni mu kumvana luaku lu kumona Yesu, ayi kubikula matedi Mesia
Ba lufiatu ti Yave mvandi wumvuanga nkinza lukuikumunu luaku kheti wusiala bue nunga ko kuvanga mawombo mu kisalu kiandi, kibila nandi wuntomba mutu kavanina, mu kutadila mbakulu’andi.—2 Ko. 8:12.
Diawu, tsikika mayindu maku mu mambu wulenda nunga kuvanga. Dedi, ngie wulenda kukivana muingi kusamuna mu ziphila ziviakana kheti mu thangu yiluelu. Wulenda vanga mawu mu kusonikina nkanda voti kuvana kimbangi mu telefone. Zikhomba bambakanga khindusulu bo bammona mangolo widi mu kuvanga mu kisalu ki Yave, kheti mu bununu buaku.
Bankaka basiedi ko buvinya bumboti. Tala kifuani ki khomba mueka ku África Oriental mu quadro “Lutangu lu Kibibila lu Vukisa Luzingu Luandi.”
Bika kuzimbakana ti kifuani kiaku kikuikama kilenda sadisa batu bankaka. Diawu, ba lufiatu ti “Nzambi widi wusonga, ayi kalendi zimbakana ko kisalu lumvanganga ayi luzolo lummonisanga mu dizina diandi, mu kusadisa banlongo ayi mu kutatamana kuba sadisa.”—Ebe. 6:10.
TATAMANA KUSADISA BANKAKA
Batu ba luzabu bantubanga ti batu bama nuna bakivananga muingi kusadisa bankaka, badi buvinya bumboti, mayindu mafuana ayi mayangi mu luzingu.
Vayi, kuvanga mambu mamboti malendi manisa ko ziphasi zioso zi bununu. Kintinu ki Nzambi kiawu to kiala vanga mawu, mu kumanisa ziphasi zinkuizilanga mu disumu tutambakana ayi lufua.—Lom. 5:12.
Vayi kheti bobo, bo wumvanga mangolo muingi kusadisa bankaka kuzaba Yave ayi kunsadila, ngie wulenda baka ndandu yiwombo. Zikhomba zima nuna, zabanu ti Yave wu muzolanga beni ayi wumvuanga nkinza mambu moso mumvanganga mu kisalu kiandi. Ayi mvandi, zikhomba mu kimvuka banlongukanga mambu mawombo mu kifuani kinu kimboti.