Mu Nza Yoso Muinha Widi mu Kuluta ba Wungolo—Mbi Kibibila Kinlonga?

Mu Ngonda Yisambuadi mu mvu 2022, muinha wuluta ba wungolo mu nza yoso:

• “Ku China 70 di mavula batovukizi beni mu kibila ki nhufi mu zikhumbu wadi ”—mu kilumbu 25 Ngonda Yisambuadi mu mvu 2022.

• “Minsitu miwombo ku Europa mi vidi mbazu mu kibila ki muinha wungolo.”—Mu kilumbu 17 Ngonda Yisambuadi mvu 2022.

• “Mu kilumingu kilumbu 24 Ngonda sambuadi mvu 2022, mavula mawombo ku Estados Unidos matovukizi mu kibila ki diufi. Ayi mawu mabasika mu jornal, The New York Times.

Mbi mambu moso amomo mansundula? Mambu amomo mala vanga muingi ntoto wuba kibuangu kimbi muingi kuzingila? Mbi Kibibila kinlonga?

Nhufi yidi mu kubuelama, bukiedika ti yidi mbonosono ti zimbikudulu zidi mu kusalama?

Ngete. Nhufi kubuelama, yidi mu khati mambu Kibibila kibikula mala monika mu bilumbu bitsuka. Dedi, Yesu wubikula ti ‘batu bala mona mambu matsisi’ ayi ‘bidimbu bi tsisi ku ’diyilu.’ (Luka 21:11; Good News Translation) Phila nhufi yibuelimina va ntoto yivanga bawombo kukuazuka ayi kuyindula ti batu bankuiza tulula ntoto.

Ntoto winsinkuiza bue ba ko kibuangu kimboti muingi kuzingila?

Ndamba. Nzambi wuvanga ntoto muingi batu batatamana kuzingila muawu. (Minku. 115:16; Mpovi 1:4) Nandi kasinkuiza bikila ko batu batulula ntoto vayi, dedi bo kakanikisa nandi ‘wunkuiza tulula batu bantululanga ntoto’.—Nzai. 11:18.

Mona zimbikudulu wadi zimmonisa mambu mankaka Nzambi kakanikisa:

• “Thandu ayi ntoto wuyuma bala kuangalala, zithandu ziala ba mu mayangi ayi muala mena biteka banga biteka bi açafrão.” (Yesa. 35:1) Nzambi kalasa bika ko muingi batu batulula ntoto, vayi nandi wala ludika noto.

• ‘Ngie wunkiebanga ntoto, wumvananga mbongo ayi bidia biwombo.’ (Minku. 65:9) Mu lusakumunu lu Nzambi, ntoto woso wala ba paladizu.

Muingi wubuela zaba buidi kubuelama ku nhufi kundukisila zimbikudulu zi Kibibila, tanga dilongi ‘Muinha Widi mu Kuluta ba Wungolo—Mbi Kibibila Kintuba Mala Monika Kuntuala.’

Muingi wubuela zaba matedi lukanu lu Kibibila matedi kuludika ntoto, tala dilongi “Nani Wala Vukisa Ntoto?”