Basi Pulitika Badi mu Kutubila Matedi Alimangedoni—Mbi Kibibila Kintuba?

Mu kikunda va meni, kilumbu,  10, Ngonda Yikumi, mvu 2022, masodi ma Russia bakuba zitsoto zilutidi zingolo mu mavula mawombo ku Ucrânia. Bavangila mawu kibila ki bawu batolumuna kikada kinkuika tsi yi Russia ayi Crimeia. Mu kibila ki mambu amomo, basi pulitika bawombo batuba ti ḿba ayoyo yawu Alimangedoni.

•  Mu kilumbu 6 Ngonda Yikumi, mvu 2022, Ntinu wu Estados Unidos Joe Biden, wutubidi: “Ḿba mvita wu Alimangedoni wantona. Kibila khumbu yitsuka phila mambu amomo manokina, yidi mu thangu [John] Kennedy [wuyala ku Estados Unidos] kabakula ti baba fonda zitsoto zingolo ku Cuba ...Mu phila yimmuena, ba kusadila phila zitsoto aziozio zinneni, buna Alimangedoni yinkuiza monika. Vasi ko phila yinkaka.”

•  Mu kilumbu 8 Ngonda Yikumi, mvu 2022, bo dingumba di zijornalista di BBC News bayuvula Ntinu wu Ucrânia, Volodymyr Zelensky matedi kusadila zitsoto zilutidi zingolo, nandi wutuba: “Yinkikinina ti ayoyo yidi Alimangedoni, kibila nza yimvimba yeka va kingela.

Bukiedika ti batu ba kusadila zitsoto zilutidi zingolo, buna mawu mankuiza tuala Alimangedoni? Mbi Kibibila kintuba?

Bukiedika ti Zitsoto Zingolo, Ziawu ziala tuadisa Alimangedoni?

Ndamba. Khumbu yimueka to kikuma “Alimangedoni” kimmonikina mu Kibibila. Kidi kisonama mu Nzaikusu 16:16. Kiawu kisintubila ko mimvita mi zitsi, vayi mvita wu Nzambi ayi ‘mintinu mi nza yimvimba.’ (Nzaikusu 16:14) Nzambi wala sadila mvita wu Alimangedoni muingi kumanisa luyalu lu batu.—Danieli 2:44.

Muingi wubuela longuka matedi Alimangedoni, mambu mbi Alimangedoni yala tuadisa kuidi batu va ntoto? Tanga dilongi, Mbi bio mvita wu Alimangedoni?

Bukiedika ti zitsoto zilutidi zingolo ziawu ziala bunga batu ayi ntoto wumvimba?

Ndamba. Kheti batu balenda sadila zitsoto zingolo kuntuala, vayi Nzambi kalasa bika ko bawu babunga ntoto. Kibibila kintuba:

•  ‘Ntoto wala kadidila mvu ka mvu.’—Mpovi 1:4.

•  ‘Basonga bala vua ntoto ayi bala zingila muawu mvu ka mvu.’— Minkunga 37:29.

Vayi, zimbikudulu zi Kibibila ayi mambu madi mu kumonika mu nza mammonisa ti diambu dimueka dingolo dienduka kumonikina batu va ntoto. (Matai 24:3-7; 2 Timoteo 3:1-5) Bakula mbi Kibibila kintuba matedi bilumbu binkuiza, mu kulonguka Kibibila mu khambu futa.