Nani Wala Vukisa Batu Bantovukanga mu Kibila ki Mimvita, Kheti Basiko Bawu Bantuadisanga Miawu? —Mbi Kibibila Kintuba?

Tala zitsangu zifumini kuidi Nações Unidas:

• Kutona mu kilumbu 7 nati 23 Ngonda Yikumi, 2023, nati bubu, mvita widi mu kumonika ku tsi yi Israel, wuma vonda kuvioka 6.400 di batu ayi 15.200 di batu bavangana phasi kheti bawombo mu bawu, basinnuana ko mvita beni. Mvandi, bawombo batinizi mu zinzo ziawu.

• Nati mu kilumbu 24, Ngonda Yivua, mvu 2023, mvita wu Rússia ayi Ucrânia, wuvondizi 9.701 di batu bakhambu ba masodi ayi 17.748 di batu ku Ucrânia, bameni kuvangana phasi.

Kivuvu mbi Kibibila kimvana kuidi batu bantovukanga mu kibila ki mimvita?

Kibila mbi Wufueti bela Kivuvu?

Kibibila kibikula ti Nzambi ‘wala manisa mimvita mu ntoto wumvimba.’ (Minkunga 46:9) Nandi wala sadila Kintinu kiandi kidi ku diyilu muingi kuvinginina mintinu mi luyalu midi mu kuyala mu bilumbu bitu. (Danieli 2:44) Kintinu ki Nzambi kiala tuala mbombolo kuidi batu boso va ntoto.

Tala mambu Yesu Klistu, Ntinu wu Kintinu beni kala vanga:

• ‘Nandi wala vukisa kiphumbulu kindinda lusalusu ayi mvandi batu basukama ayi noso wukambulu mutu wu kunsadisa.’—Minkunga 72:12-14.

Mu nzila Kintinu kiandi, Nzambi wala manisa buphumbulu va ntoto ayi ziphasi zioso zinkuizilanga mu kibila ki mimvita ayi buphunya.

• “Nandi wala fiona matsuela moso mu mesu mawu, ayi lufua lualasa bue ba ko, kiunda ki lufua, kialasa bue ba ko, bidilu ayi ziphasi, bialasa bue ba ko. Kibila mambu maphasi mameni.”—Nzaikusu 21:4.

Thangu yikhufi yima siala, Nzambi wandedikisa mambu mu nza. Tona thama, Kibibila kibikula ti tuala “kuwa mimvita ayi zitsangu zi mimvita.’ (Matai 24:6) Mambu amomo ayi mankaka, mammonisa ti tueka mu ‘bilumbu bitsuka’ bi luyalu lu batu.—2 Timoteo 3:1.