Mintuadisi
5 Mu kilumbu beni, Débora ayi Barake muana wu Abinoão, bayola nkunga awuwu:
2 “Mu kibila ki minlengi mikutuka ku Isaeli,
Mu kibila ki dikabu ba kivana mu ntima woso,
Zitisanu Yave.
3 Yuwanu benu mintinu. Tekanu matu benu minyadi!
Minu yenyodila Yave nkunga.
Minu yinkuiza yola nkunga wunzitisa Yave, Nzambi yi Isaeli.
4 A Yave, bo wubotuka ku Seir,
Ayi bo wuzungidila kizunga ki Edom,
Ntoto wutitubuka ayi zimvula zinoka,
Matuti mabuisa nlangu.
5 Miongo mititubuka* vantuala Yave,
Ayi Mongo Sinai mvandi wutitubuka vantuala Yave, Nzambi yi Isaeli.
6 Mu bilumbu bi Sangar muana wu Anate,
Ayi mu bilumbu bi Jaeli, batu babasa bue viokilanga ko mu zinzila zinneni.
Vayi baba viokilanga mu zinzila zinkaka.
7 Mu mala ma Isaeli, musa bue ba ko batu.
Bukiedika, musa bue ba ko batu nate minu Débora yitelama,
Nate yitelama buka ngudi ku Isaeli.
8 Bawu batona kubuongimina zinzambi zinkaka.
Diawu kuyiza tonina kubela mimvita mu mielu mi mavula,
Ayi mu 40.000 di masodi ma basi Isaeli, ni wumueka wuba nkaku voti didionga.
9 Minu yidi ku khonzo zimfumu zi masodi ma Isaeli,
Bo bakivana va kimueka na dikabu mu ntima woso.
Zitisanu Yave.
10 Benu mundiatilanga mu ziphunda zi ndimba yi castanha,
Benu munkalanga mu zitapete zithalu,
Ayi benu lundiatilanga mu zinzila,
Yindulanu mambu amama.
11 Zimbembu zi batu badi mu kutekila bibulu nlangu, zidi mu kukuwakana.
Bawu badi mu kukolukila matedi mambu masonga ma Yave,
Badi mu kukolukila matedi mambu masonga ma batu bankalanga mu mala ma Isaeli.
Bosi dikabu di Yave diyenda nate mu mielu.
12 Telama, telama, a Débora!
Telama, telama muingi wuyola nkunga!
Telama a Barake! Nata mimvika miaku, a muana wu Abinoão!
13 Bosi batu basobila banengumuka nate vaba zimfumu.
Dikabu di Yave diyiza kuidi minu, muingi tunuanisa batu bake mangolo.
14 Batu baba ku ḿbuinga, bayizila mu mvila wu Efraim.
Bawu baba va kimueka na masodi maku, a Benyamini.
Zimfumu zi masodi zi Makir bakuluka,
Ayi mu mvila wu Zebuloni, muyizila batu bansadilanga bisadulu bi kusonikina.
15 Zimfumu zi mvila wu Isakali baba na Débora,
Ayi Barake mvandi wuba yandi.
Bamfila di malu ku ḿbuinga
Ayi mvila wu Rubem waba yindula beni.
16 Kibila mbi ngie bekadila abobo, buka kibulu kinlambalala va mimfuna miandi miodi kannata,
Ayi wunkuwa minsungi mi bibulu bansika bisiku?
Mvila wu Rubem waba yindula beni.
17 Batu bankalanga ku divula di Ngileadi, batatamana ku khonzo yinkaka yi Yolidani.
Ayi kibila mbi mvila wu Dan kasiadila va kibuangu kidi makumbi?
Mvila wu Azer, wukala va ndeku ḿbu,
Ayi wutatamana va kibuangu kinsesilanga makumbi.
18 Mvila wu Zebuloni wutula luzingu luandi va kingela.
Mvila wu Nafitali mvandi wutula luzingu luandi va kingela mu miongo.
19 Mintinu mi Kanani bayiza.
Ayi banuana ku Taanaki.
Va kibuangu kiba zitho zi nlangu zi Megido.
Bawu basa nata ko palata.
20 Zimbuetila zinuanisa Sizera,
Bo ziaba diengila ku diyilu.
21 Nlangu wu muila wu Kisom wuba nata,
Nlangu wu muila wukhulu wu Kisom wuba nata.
Minu yitulula batu bake mangolo.
22 Bosi mimvalu miawu mi mimvita, miaba diata mu nganzi,
Ayi bikodi biawu bivanga ntoto kutitubuka.
23 Mbasi yi Yave yituba: ‘Singanu divula di Meroz,’
‘Ngete, singanu batu bankalanga kuna,
Kibila bawu basa sadisa ko Yave,
Basa sadisa ko Yave ayi masodi mandi.’
24 Jaeli nkazi Héber musi Keneu,
Nandi nkietu lutidi lusakumunu.
Mu bakietu boso bankalanga mu zitenda, Jaeli nandi lutidi lusakumunu.
25 Sizera wundinda nlangu, vayi Jaeli wumvana leta.
Wumvanina leta yikoba mu mbungu yimboti.
26 Nandi wusimba mua nti bansikimisilanga tenda, mu koko kuandi ku lukietu,
Ayi mu koko kuandi ku lubakala, nandi wusimba martelu yi bisadi.
Ayi wubanda wawu mu ntu wu Sizera,
Nti beni wukotila ku khonzo yinkaka ayi wubasikila ku khonzo yinkaka.
27 Nandi wubua va malu mandi,
Wubua ayi wukala vana.
Vo kabuila vawu kafuila.
28 Nkietu mueka wuba va nela,
Ngudi Sizera, waba tala ayi wukiyuvusa:
‘Kibila mbi dikalu diandi didi mu kukadila kisina?
Kibila mbi yikhambu fika kuwila biyoko bi mimvalu miandi?’
29 Nkietu wuluta ba nduenga ku nzo′andi waba kuntambudilanga.
Ngete, nandi mvandi wutuba mambu amama:
30 ‘Bawu ḿba badi mu ku kabana biuma abibi ba bebaka mu mvita:
Kadika disodi widi mu kusola nkietu mueka voti bakietu buadi,
Sizera widi mu kusola minledi mithalu midi matona,
Ngete, minledi mithalu midi matona, kikhutu batunga mu ḿbilu, nledi widi matona
Ayi bikhutu biodi batunga mu ḿbilu, muingi kukanga mu dinga.’
31 Bika zimbeni ziaku bafua, a Yave,
Vayi bika baboso ba kuzolanga, balezama dedi bo bunleziminanga thangu.”
Bosi basi Isaeli bayiza ba mu ndembama mu 40 di mimvu.