Buku Yitheti yi Samueli
8 Bo Samueli kayiza ba kiboba, nandi wuvana bana bandi kiyeku ki kufundisa dikabu. 2 Muan′andi wutheti baba kuntedilanga Yoeli, ayi wummuadi Abia. Bawu baba mimfundisi ku Berseba. 3 Vayi bana bandi basa landakana ko kifuani ki tat′awu, kibila bawu baba lindanga zimbongo bo bandedikisa mambu ayi babasa dedikisanga ko mambu mu phila yisonga.
4 Buviokila thangu, bakulutu boso ba Isaeli bakutakana ayi bayenda kuidi Samueli ku Ramá. 5 Bawu bankamba: “Ngie weka kiboba, ayi bana baku balandakananga ko kifuani kiaku. Buabu tuntomba ngie wutubiekila ntinu muingi katu tuadisa, dedi bo buididi makabu mankaka.” 6 Vayi bo bakamba Samueli: “Tuntomba ngie wutubiekila ntinu muingi katu tuadisa,” Samueli wunyonga ayi nandi wusambila kuidi Yave, 7 ayi Yave wukamba Samueli: “Vanga mamoso dikabu badi mu kukulinda, kibila minu badi mu kumanga muingi yiba ntinu′awu, kubika kuandi ngiewu. 8 Bawu badi mu kuvutukila momawu mambu bamvanganga tona yiba basisa ku Ngipiti nate bubu. Bawu ba kumbandanga mbusa, ayi bansolanga kusadila zinzambi zinkaka. Mawu mvandi badi mu kukuvangila. 9 Vanga mambu bawu badi mu kukulinda, vayi fueti kuba zabikisa mambu ntinu badi mu kulinda, kankuiza bakuika kuvanga.”
10 Bosi Samueli wuba zabikisa mambu Yave kankamba. 11 Samueli wuba kamba: “Ntinu luidi mu kulinda, wala vanga mambu amama: Nandi wala bonga bana binu, muingi banatanga makalu mandi ma mimvita ayi mimvalu miandi. Bankaka mu bawu bala kue dumanga vantuala makalu mandi. 12 Nandi wala vana bankaka kiyeku ki kutuadisa 1.000 di masodi, bankaka 50 di masodi, bankaka bala vantanga mbongu mu zitsola ziandi, ayi bankaka bala kongulanga mbongu beni. Bankaka bala vanganga makalu mandi ma mimvita. 13 Mvandi wala bonga bana binu ba bakietu muingi bavangila ntinu malasi madi mfimbu wumboti, balambanga ku nzo′andi ayi bamvangilanga mapha. 14 Nandi wala bonga zitsola zinu zinluta butanga mbongu, zindima zi minti mi makundi ma vinyu ayi zi minti mi olive, ayi wala vana ziawu kuidi bisadi biandi. 15 Wala bonga kikhuku ki kumi ki mbongu yi zitsola zinu ayi zi makundi ma vinyu, ayi wala vana biawu kuidi zimfumu bansadilanga ku nzo′andi ayi bisadi biandi binkaka. 16 Wala bonga bisadi binu bi babakala ayi bi bakietu, mvandi wala bonga zingombi zinu zilutidi ayi ziphunda zinu, muingi bavanganga bisalu biandi. 17 Ayi mu kadika kumi di mamemi minu, nandi wala bonganga dimemi dimueka. Ayi benu luala ba bisadi biandi. 18 Ayi bo ntinu lunsola kala luvangila mambu amomo, benu luala kuana beni, vayi Yave kalasa lutambudila ko.”
19 Vayi dikabu basa vua ko nkinza mambu Samueli katuba, ayi bankamba: “Bika kuandi mabela bobo, tuntomba to ngie wutubiekila ntinu. 20 Mu phila ayoyo, tunkuiza ba dedimueka na makabu mankaka. Ntinu′itu wunkuiza tuyadila ayi wunkuiza tutuadisanga mu mimvita.” 21 Bo Samueli kamana kukuwa mambu dikabu bankamba, nandi wuzabikisa mawu kuidi Yave. 22 Yave wukamba Samueli: “Vanga mambu dikabu bama kukamba, wuba biekila ntinu.” Bosi Samueli wukamba babakala ba Isaeli: “Vutukanu mu mavula minu.”