Buku Yitheti yi Samueli
9 Vaba dibakala dimueka wubutukila mu mvila wu Benyamini baba tedilanga Kis muana wu Abieli, Abieli muana wu Zeror, Zeror muana wu Bekorati ayi Bekorati muana wu Afia. Kis wuba busina buwombo. 2 Kis wubuta muana dibakala baba tedilanga Sauli, ayi nandi wuba beni kitoko. Mu basi Isaeli boso vasa ba ko mutu wuluta ba kitoko kena Sauli, ayi nandi wuluta ba wukula mu babakala boso. Kibila baboso baba kumbakidilanga to mu mavangiti.
3 Bo ziphunda zi Kis zizimbala, nandi wukamba muan′andi Sauli: “Lemvuka yenda na kisadi kiama muingi luetomba ziphunda zibe zimbala.” 4 Bawu bayenda ayi bataba kizunga kidi miongo ki mvila wu Efraim ayi ntoto wu Salisa, vayi basa zibakula ko. Bosi bayenda ku ntoto wu Salim, mvandi basa zibakula ko. Ayi bataba kizunga kioso ki mvila wu Benyamini mvandi basa zibakula ko.
5 Bosi bawu bakota ku ntoto wu Zufi ayi bo bakota kuna, Sauli wukamba kisadi kiandi: “Ndoko tuvutuka, kibila khanu papa kasinkuiza bue yazukila ko mu kibila ki ziphunda, vayi mu kibila kitu.” 6 Vayi kisadi kiandi wutuba: “Ku divula adidi kuidi ḿbikudi wu Nzambi, ayi batu bakunkinzikanga beni, kibila mambu moso kantubanga mansalamanga. Tuendi kuna, ḿba nandi kalenda tusadisa kubakula ziphunda beni.” 7 Bosi Sauli wukamba kisadi kiandi: “Befu kukuenda kuna, mbi tunkuiza vana ḿbikudi wu Nzambi? Mu zitsaku zitu muisi ko mapha ayi ne kioso kiuma kinkaka tulenda kumvana.” 8 Kisadi beni wukamba Sauli: Tala minu yidi mua palata mu koko muingi kuvana ḿbikudi wu Nzambi yikiedika muingi katusadisa kubakula ziphunda beni.” 9 (Mu thangu yikhulu ku Isaeli, bo mutu kaba tombanga kuzaba tsangu yi Nzambi, nandi waba tubanga: “Ndoko kuidi mutu wummonanga bimona mesu.” Kibila mu thangu yikhulu, baba tedilanga miḿbikudi mutu wummonanga bimona meso.) 10 Sauli wukamba kisadi kiandi: “Mambu matuba madi mamboti, diawu tuendi kuna.” Mu phila ayoyo, bawu bayenda ku divula kuba ḿbikudi wu Nzambi yikiedika.
11 Bo baba tombuka ku divula, bawu badengana bakietu baba basika ku divula muingi kue teka nlangu. Sauli ayi kisadi kiandi baba yuvula: “Mutu wummonanga bimona mesu widi ku divula?” 12 Bakietu beni baba vutudila: “Ngete. Yendanu mu nsualu, nandi vangi kuandi kama kota ku divula. Kibila bubu dikabu bankuiza vana nkhailu ku kibuangu kinlongo. 13 Diawu yendanu mu nsualu muingi lumbakidila ava nandi katuka ku kibuangu kinlongo ko kankuiza dila mbizi yi kibulu bamvana nkhailu. Dikabu basinkuiza dia ko ava nandi kuvitila, kibila nandi wunkuiza sakumuna nkhailu bankuiza vana. Na kumana kuvanga mawu, bosi batu babe tumisa bankuiza dia.” 14 Mu phila ayoyo, Sauli ayi kisadi kiandi bakota ku divula ayi bamona Samueli waba kuiza badengana bo kaba tombuka ku kibuangu kinlongo.
15 Ava Sauli kadengana Samueli, Yave wukamba Samueli: 16 “Yono mu kilokula akiki, minu yala fila dibakala musi Benyamini muingi kiza kuidi ngiewu. Fueti kumbieka muingi kaba ntinu wu dikabu diama, ayi nandi wala kula basi Isaeli mu mioko mi basi Filistea. Kibila minu yidi mu kumona ziphasi dikabu diama badi mu kuviokila ayi bidilu biawu bibe vitila kuidi minu.” 17 Bo Samueli kamona Sauli, Yave wukamba Samueli: “Anono nandi dibakala beni yikukembi ti ‘fueti bieka ntinu wu dikabu diama.’”
18 Bo Sauli kafikama vaba Samueli va muelu divula, Sauli wunyuvula: “Lemvuka, wulenda tumonisa nzo yi mutu wummonanga bimona mesu?” 19 Samueli wutambudila Sauli: “Minu mutu beni wummonanga bimona mesu. Tuama nate ku kibuangu kinlongo, kibila bubu benu lunkuiza dia yama, ayi yono va meni yala luzabikisa mambu moso luntomba kuzaba, bosi lulenda kuenda kuinu. 20 Bika kukuazuka matedi ziphunda zi tat′aku zizimbidi, kibila babe bakula ziawu. Biuma bioso bimboti ayi bilutidi luvalu bi Isaeli, bidi biaku ayi bi dikanda di tat′aku.” 21 Vayi Sauli wumvutudila: “Minu yidi musi Benyamini mvila wukhambulu beni luvalu mu mimvila mi Isaeli, ayi dikanda diama diawu dikhambulu beni luvalu mu makanda moso madi mu mvila wu Benyamini. Buabu, kibila mbi widi mu kukhambila mambu amomo?”
22 Vayi Samueli wunata Sauli ayi kisadi kiandi ku kivinga baba dilanga, ayi wuba vana bikundu bilutidi. Ku kivinga beni mvandi kuba 30 di babakala batumisa. 23 Samueli wukamba mutu waba lamba: “Tuala bitini bi mbizi bio yibe kukamba wuvengumuna.” 24 Bosi mutu waba lamba wubonga kito ki kibulu, ayi wutula kiawu vantuala Sauli. Ayi Samueli wukamba Sauli: “Akiki kiawu kitini tube kukubikila muingi wudia mu kilumbu akiki yibe tumisa dikabu muingi tudia va kimueka. Mu phila ayoyo, Sauli wudia va kimueka na Samueli. 25 Bosi babotuka ku kibuangu kinlongo ayi bayenda ku divula. Samueli wutatamana kusolula na Sauli ku kibanga ki nzo. 26 Bo baba buadi bakotuka va meni, Samueli wutela Sauli wuba ku kibanga ki nzo ayi wunkamba: “Kubama kibila yintomba ku kukanina.” Bosi Sauli wukubama ayi baba buadi babasika. 27 Bo bavitila va muelu wu divula, Samueli wukamba Sauli: “Kamba kisadi kiaku katuama” (kisadi beni wutuama) “vayi ngiewu siala yama avava muingi yiku zabikisa zitsangu zi Nzambi.”