Buku Yitheti yi Samueli
22 Bosi Davidi wunanguka vana ayi wutina ku nsuku wu dimanya wu Adulão. Bo zikhomba ziandi ayi baboso baba kalanga ku nzo tat’andi bazaba mawu, bayenda va kibuangu kaba. 2 Ayi batu boso baba tovuka beni, baba zipholo ayi baba vangilanga mambu makhambulu masonga, bayenda ku khonzu Davidi ayi nandi wuyiza ba mfumu’awu. Vaba nduka 400 di babakala.
3 Buviokila thangu, Davidi wuyenda ku Mispa yidi ku Moabi, ayi wukamba ntinu wu Moabi: “Lemvuka, bika tat’ama ayi mam’ama bakala ku kizunga kiaku mu mua thangu, nate yinkuiza zaba mambu mbi Nzambi kankuiza phangila.” 4 Mu phila ayoyo, nandi wubika matata mandi kuidi ntinu wu Moabi, ayi bawu baba zingila kuna mu thangu yoso Davidi kaba tina.
5 Bo vavioka mua thangu, ḿbikudi Gadi wukamba Davidi: “Bika kutinina ku kibuangu akiki, yenda ku ntoto wu Yuda.” Mu phila ayoyo, Davidi wuyenda ayi wuye kota ku nsitu wu Hereti.
6 Bosi bazabikisa kuidi Sauli kibuangu Davidi ayi babakala bandi basuamina. Mu thangu beni, Sauli wuba wukala va mua mongo ku ndeku Gibeá, ku tsi nti wumbutanga zitamara. Nandi wuba na didionga diandi va koko, ayi bisadi biandi banzungidila. 7 Bosi Sauli wukamba batu boso baba yandi: “Yuwanu benu basi Benyamini: Bukiedika ti muana Yese wala nunga kuvana benu boso zitsola zi minti mi makundi ma vinu? Nandi wunkuiza nunga kulubieka zimfumu zi 1.000 voti 100 di masodi? 8 Benu boso lusiedi ko ku khozuꞌama, kibila ne wumueka mu benu kasa khamba ko bo muanꞌama kavengi luwawanu na muana Yese. Benu lukhinzikanga ko, kibila lusa nzabikisa ko ti muanꞌama wuvukumuni kisadi kiama muingi kambalulkila, dedi bo kadi mu kuvangila bubu.”
9 Bosi Doegue musi Edom, no wuba mfumu yi batu baba kiebanga bibulu bi Sauli, wutuba: “Minu yimueni muana wu Yese bo kayizidi ku Nobi, ayi wudengini na Aimeleki muana wu Aitubi. 10 Aimeleki wutomba kuzaba makani ma Yave matedi Davidi, ayi wumveni bidia. Mvandi wumveni mbedi yi Ngoliati musi Filistea.” 11 Muna thangu beni, ntinu Sauli wutuma belanda nganga nzambi Aimeleki muana wu Aitubi, ayi zinganga nzambi bayizila mu dikanda di tat’andi, baba ku Nobi, ayi baboso bayenda kuidi ntinu.
12 Ntinu Sauli wukamba Aimeleki: “A muana wu Aitubi yuwa.” Aimeleki wumvutudila: “Tuba kuaku a ntinu.” 13 Sauli wunkamba: “Kibila mbi ngiewu ayi muana wu Yese luma mbalukila? Ayi kibila mbi ngie wumvanini mapha, mbedi ayi wutombidi kuzaba makani ma Nzambi matedi Davidi? Nandi bembalukila ayi besuama muingi kanduanisa.” 14 Bosi Aimeleki wukamba Sauli: “Mu bisadi biaku bioso a ntinu, Davidi nandi wunluta monisanga lukuikumunu. Nandi widi kikuekizi kiaku, ayi widi mfumu yi batu banlunganga ntinu, ayi baboso badi ku nzo’aku ba kunkinzikanga. 15 Bukiedika ti ayoyo yawu khumbu yitheti minu yima tomba kuzaba makani ma Nzambi matedi Davidi? Minu yilendi balukila ko mfumu’ama. A ntinu bika kuphana fotu mu mambu amomo, ayi bika kuvana fotu zinganga nzambi bayizila mu dikanda di tat’ama, kibila minu yisa zaba ko mambu amomo.”
16 Vayi ntinu wukamba Aimeleki: “Ngiewu ayi zinganga nzambi bayizila mu dikanda di tat’aku, tueka luvonda.” 17 Bosi ntinu wukamba minsungi miandi baba batelama va khonzu’andi: “Vondanu zinganga nzambi zi Yave, kibila bawu badi ku khonzu yi Davidi. Bawu bamona Davidi kutina, vayi basa khamba ko mawu.” Vayi bisadi bi ntinu bamanga kuvonda zinganga nzambi zi Yave. 18 Bosi ntinu Sauli wukamba Doegue: “Vonda ngiewu zinganga nzambi.” Muna thangu beni, Doegue musi Edom wuvonda zinganga nzambi. Mu kilumbu beni, nandi wuvonda 85 di babakala baba vuatanga éfode yivangulu mu minsinga mi linho. 19 Nandi mvandi wuvonda batu baba kalanga ku Nobi, divula di zinganga nzambi, kuba kuandi babakala, bakietu, bana balezi, zingombi, ziphunda ayi mamemi.
20 Vayi Abiatali muana wu Aimeleki, Aimeleki muana wu Aitubi, wununga kutina ayi wuyenda kuba Davidi. 21 Bo Abiatali kavitila kuba Davidi, nandi wunkamba: “Sauli mavonda zinganga nzambi zi Yave.” 22 Bosi Davidi wukamba Abiatali: “Bo minu yimona Doegue musi Edom ku Nobi, mu kilumbu yiba kuna, minu yizaba ti nandi wunkuiza zabikisa mamoso kuidi Sauli. Ndemvukila, minu yidi fotu mu lufua lu batu boso ba dikanda di tat’aku. 23 Ba ku khonzu’ama, ayi bika kumona boma, kibila mutu wuntomba ku kuvonda, mvandi wuntomba kuphonda, vayi bo weka ku khonzu’ama, basinkuiza bue kuvonda ko.”