Buku Yitheti yi Samueli

25 Buviokila thangu, Samueli wuyiza fua, ayi dikabu dioso di Isaeli bakutakana muingi kudila lufua luandi, ayi banzika va ndeku nzo′andi yiba ku Ramá. Bosi Davidi wuyenda ku thandu yi Paran.

2 Ku divula di Maum kuba dibakala dimueka waba sadilanga ku Karmelu,* nandi wuba busina buwombo. Wuba 3.000 di mamemi ayi 1.000 di zikhombo, nandi waba botula mika mi mamemi mandi ku Karmelu. 3 Dibakala beni baba kuntedilanga Nabal ayi nkaziꞌandi Abigaili. Nkazi′andi wuba nduenga ayi wuba beni kitoko, vayi nnuni′andi Nabal wuba mavanga mambi, nandi wubutukila mu dikanda di Kalebi. 4 Bo Davidi kaba ku thandu, wuyuwa ti Nabal waba botula mika mi mamemi mandi. 5 Davidi wufila 10 di babakala ayi wuba kamba: “Yendanu ku Karmelu kuidi Nabal, ayi benu kuvitila kuna, nkamb′anu ti minu yibe mfila mboti, 6 mu kutuba: ‘A mfumu bika wuzinga mimvu miwombo ayi bika mambu moso menda buboti kuidi ngiewu, kuidi dikanda diaku ayi kuidi biuma biaku bioso. 7 Minu yiyuwizi ti ngie widi mu kubotula mika mi mamemi maku. Bo batu bankiebanga mamemi maku babedi yitu, befu tusa bavangila ko ne diambu dimbi, ayi vasa zimbala ko ne dimemi dimueka mu thangu yoso babedi yitu ku Karmelu. 8 Yuvula bisadi biaku, ayi bawu bankuiza kukamba mawu. Davidi wukudinda muingi wu tutambula buboti kibila tube kuizila mu thangu yifuana. Diawu lemvuka, wutuvana befu bisadi biaku ayi vana muan′aku Davidi kioso kiuma.’”

9 Mu phila ayoyo, batu Davidi katuma bayenda ayi bakamba Nabal mambu moso Davidi kaba kamba. Bo bamana kutuba, 10 Nabal wukamba batu Davidi katuma: “Davidi muana Yese buna nani? Minu yisanzaba ko. Bubu bisadi biwombo bamana tina zimfumu ziawu. 11 Kibila mbi minu yifueti bongila mapha mami, nlangu′ama ayi zimbizi zi bibulu biami yibe vonda bio yifueti vana kuidi batu bambotula mika mi mamemi mami, muingi kuvana kuidi batu bo yikhambu zaba kuidi babe fumina?”

12 Bosi batu Davidi katuma, bavutuka ayi bakamba Davidi mambu moso Nabal katuba. 13 Mu thangu beni, Davidi wukamba babakala baba yandi: “Kubikanu zimbedi zinu. Bosi baboso bakubika zimbedi ayi Davidi mvandi wukubika mbedi′andi. 400 di babakala bayenda na Davidi, vayi 200 di babakala basiala muingi kulunga mimfuna.

14 Mu thangu beni, kisadi kimueka ki Nabal wukamba Abigaili nkazi wu Nabal: “Davidi befila babakala bandi muingi biza yoluka na mfumu, vayi nandi kasa batambula ko buboti. 15 Babakala abobo, batuvangidi mambu mawombo mamboti ayi basa tuvangila ko ne diambu dimbi, ayi vasa zimbala ko ne kibulu kimueka mu thangu yoso tubedi yawu ku thandu. 16 Mu thangu yoso tubedi ku thandu muingi kukieba bibulu, bawu ba tukiebizi kuba kuandi va muinya voti va builu. 17 Diawu vanga dioso diambu kibila mambu amomo, mankuiza tuadisa ziphasi kuba kuandi kuidi mfumu ayi kuidi batu boso bankalanga ku nzo′andi. Nabal widi beni mavanga mambi ayi nandi kanunganga ko kukoluka na batu mu ndembama.”

18 Muna thangu beni, Abigaili wubonga 200 di mapha, bibasa biodi binneni bi vinyu, mamemi matanu malambu, zi seá* zitanu zi zitheti zikangu, 100 di zibolu zivangulu mu makundi ma vinyu mayuma, 200 di zibolu zivangulu mu zifigu ziyuma ayi wutula biawu va mbata ziphunda. 19 Bosi Abigaili wukamba bisadi biandi: “Tuamanu ayi minu yidi mu kukuiza kumbus′inu.” Vayi nandi kasa kamba ko ne diambu kuidi nnuni′andi Nabal.

20 Abigaili wumaka vambata phund′andi, ayi bo kaba nengubuka mu nzila yidi mongo, nandi wudenga Davidi ayi babakala baba yandi. 21 Davidi waba yindula: “Kisalu kiphamba kuandi tuvengi ku thandu mu kukieba biuma bioso bi dibakala adiodio. Vasa zimbala ko ne kibulu kiandi kimueka, vayi tala ntindu mambu nandi kadi mu ku tuvangila. 22 Minu kukhambu vonda babakala boso badi ku nzo Nabal yono va meni, buna bika naveka Nzambi kavana tsembolo yingolo kuidi zimbeni zioso zi Davidi.”

23 Bo Abigaili kamona Davidi, mu thinu nandi wukuluka mu phunda ayi wufukama vantuala Davidi ayi wuyinika kizizi va tsi. 24 Bo kafukama vantuala Davidi, Abigaili wutuba: “A mfumu′ama minu yidi fotu mu mambu amomo. Phana luaku muingi yituba ayi lemvuka, yuwa mambu kisadi kiaku kentuba. 25 Lemvuka a mfum′ama bika kusikika thalu mu mambu mutu awowo widi mavanga mambi kabe tuba, kibila mavanga mandi madi madedakana na tsundu yi dizina diandi Nabal.* Nandi kasi ko nduenga vayi minu kisadi kiaku yisa mona ko babakala bo ngie betuma. 26 Buabu a mfumu′ama, yinleva phesi mu dizina di Yave ayi mu dizina diaku ti, Yave nandi ma kutula nkaku muingi wubika tengula menga ma batu bakhambulu kibila ayi wubika dedikisila mambu mu phil′aku. Bika zimbeni ziaku ayi batu boso bantomba ku kuvanga bubi, baba buka Nabal. 27 Buabu a mfumu′ama vana kuidi bisadi biaku nkhailu awuwu minu kisadi kiaku yibe kukubikila. 28 Lemvukila nzimbala minu kisadi kiaku yibe vanga. Yave wunkuiza kuvana lusakumunu luala kadidila, kibila ngie mfumu′ama widi mu kunuana mimvita mi Yave ayi ngie wusa vanga ko ne diambu dimbi mu luzingu luaku loso. 29 Bo batu bala kutomba muingi kukuvonda, Yave Nzambi wala sueka luzingu luaku mu bolsu′andi yi luzingu, ayi nandi wala kuba zimbeni ziaku zioso ku kinanu, dedi bo mutu kankubilanga dimanya mu fisga. 30 Bo Yave kala kuvana biuma bioso ka kukanikisa, ayi bo kala kubieka ntuadisi wu Isaeli, 31 ngie walasa ba ko mu kiunda voti kunyonga mu kutengula menga ma batu bakhambulu fotu, voti mu kudedikisila mambu mu phil′aku. Ayi bo Yave kala kuvangila mambu moso mamboti ka kukanikisa, lemvuka thebukila monyo minu kisadi kiaku.”

32 Bosi Davidi wukamba Abigaili: “Bika Yave Nzambi Isaeli no be kutuma muingi wiza ndengana mu kilumbu akiki, kazitusu. 33 Bika Nzambi ka kusakumuna mu nduenga bemonisa mu kuthula nkaku kutengula menga ma batu bakhambulu fotu ayi kuvangila mambu mu phil′ama. 34 Yinleva phesi mu dizina di Yave Nzambi Isaeli no bethula nkaku kuvanga mambu mambi ti, boti ngie wusa kuiza ko mu thinu khanu yono va meni yinkuiza vonda babakala boso bankalanga ku nzo Nabal.” 35 Mu phila ayoyo, Davidi wutambula biuma Abigaili kanata ayi wunkamba: “Yenda mu ndembama ku nzo′aku ayi minu yinkuiza vanga mambu moso matuba.”

36 Bo Abigaili kavutuka ku nzo, nandi wuyebata nnuni′andi Nabal waba vanga nkungi buka nkungi wu mintinu. Nabal wuba wukolu ayi wuba beni mu mayangi, vayi Abigaili kasa nkamba ko ne diambu nate mu kilumbu kilanda. 37 Mu kilumbu kilanda va meni bo malavu mansakuka, nkazi′andi Abigaili wunzabikisa mambu moso. Bo Nabal kayuwa mawu, nandi wuyiza ba buka mutu befua ayi kasa bue nyikuka ko, wuba buka dimanya. 38 Bo vavioka kumi di bilumbu, Yave wuvanga muingi Nabal kafua.

39 Bo Davidi kazaba ti Nabal mafua, nandi wutuba: “Bika Yave no madedikisa mambu mami ayi no mambotula mu zitsoni zio Nabal kaphangidi, ayi no wuthudidi nkaku kuvanga mambu mambi, kazitusu. Naveka Yave mavutudila mambi kuidi Nabal.” Bosi Davidi wufila thumu muingi bekamba Abigaili ti, nandi wuntomba kunkuela. 40 Bo batu Davidi katuma bavitila kuba Abigaili ku Karmelu, bawu bankamba: “Davidi betutuma tuiza kulanda muingi wuba nkazi’andi.” 41 Mu thinu Abigaili wuyinika kizizi va tsi ayi wutuba: “Kisadi kiaku widi wukubama muingi kasukulanga malu ma bisadi bi mfumu′ama.” 42 Bosi Abigaili wukubama wumaka mu phunda ayi wuyenda kuba Davidi muingi kaba nkazi′andi. Nandi wuyenda na bisadi biandi bi tanu bi bakietu va kimueka na babakala Davidi kafila.

43 Davidi mvandi wukuela Ainoa musi Jezreeli. Mu phila ayoyo, Ainoa ayi Abigaili bayiza ba bakietu ba Davidi.

44 Vayi Sauli wukuedisa muan′andi Mikal nkazi wu Davidi kuidi dibakala dinkaka baba tedilanga Palti muana wu Laís, waba kalanga ku Galim.