Ngie Widi Lunungu va Mesu ma Yave

1. Mayindu mbi bisadi bi Yave mu thangu yikhulu baba?

MAYANGI beni kuzaba ti dikabu di Nzambi didi lunungu luandi! Kibibila kintuba: ‘Yave wunkuangalalanga mu dikabu diandi.’ (Minku. 149:4) Khumbu zinkaka tulenda ba mu kiunda ayi kuyikuvusa: ‘Bukiedika ti minu yidi lunungu va mesu ma Yave?’ Bisadi biwombu bi Yave mu thangu yikhulu, baba kuyikuvusanga mambu amomo.—1 Samu. 1:​6-10; Yobi 29:​2, 4; Minku. 51:11.

2. Nani widi lunungu va mesu ma Yave?

² Kibibila kimmonisa ti batu ba masumu, balenda baka lunungu lu Yave. Buidi? Mu kulekila kiminu mu Yesu ayi kubotama. (Yoa. 3:16) Mu phila ayoyo, tulenda monisa kuidi batu boso ti befu tuma nyongina masumu mitu ayi tunkanikisa kuvanga luzolo lu Nzambi. (Mava. 2:38; 3:19) Yave wunkuangalalanga beni bo tumvanga mambu amomo, muingi kuba yandi kikundi kifikama. Bo tumvanga mangolo muingi kuzingila mu mambu tukanisa kuidi Yave, nandi wu tumonisanga ti tuidi lunungu luandi ayi wu tutadilanga bakundi bandi.—Minku. 25:14.

3. Mambu mbi tuanlonguka?

³ Kibila mbi bawombu banyindudilanga ti basi ko lunungu lu Yave? Buidi Yave kammonisinanga lunungu luandi? Ayi buidi Baklistu balenda kindisila lufiatu luawu ti badi lunungu lu Yave? Biuvu abiobio, biawu tuenlonguka mu dilongi adidi.

KIBILA MBI BANKAKA BAMMUENANGA TI BASI KO LUNUNGU LU YAVE?

4-5. Kheti tuyimuenanga ti tuisi ko luvalu, mambu mbi tufueti bela lufiatu?

⁴ Tona mu bumuana, bawombu mu befu tunnuananga na mayindu ma kuyimuena ti tuisi ko luvalu. (Minku. 88:15) Khomba mueka bantedilanga Adrián wutuba: “Minu yaba kuyitadilanga buka ti yisi ko luvalu. Yintebuka moyo ti yaba sambilanga muingi dikanda diama dizingila ku Paladizu, kheti minu veka yaba kuyimuenanga ti yisi ko wufuana muingi kuzingila kuna.” Khomba mueka bantedilanga Tony, wukhambu yonzukila va dikanda di kiphevi wutuba: “Matata mami batubanga ko ti, befu tukuzolanga. Bawu ba kukhambanga to ti yifueti tatamana kuvanga malutidi.”

⁵ Bo khumbu zinkaka tunnuana nzingu wu kuyimuena ti tuisi ko luvalu, tufueti tebukanga moyo ti naveka Yave wu tutumisa kuidi nandi. (Yoa. 6:44) Nandi wumona mambu mambote mu befu, mo befu veka tunkhambu mona ayi nandi zebi mintima mitu. (1 Samu. 16:7; 2 Lusa. 6:30) Diawu tufueti ba lufiatu bo nandi kantuba ti tuidi luvalu.—1 Yoa. 3:​19, 20.

6. Buidi Polo kaba kuyimuenanga mu kibila ki masumu kavanga kumbusa?

⁶ Ava kuzaba kiedika, bawombu mu befu tuvanga mambu mo tukidi nyonginanga nati bubu. (1 Pete. 4:3) Baklistu bankaka bakuikama, baviokila mu mambu amomo. Bukiedika ti ntim’aku wu kufundisanga? Boti buawu, ngie wulenda baka mbombolo mu kuzaba bisadi bikuikama bi Yave baviokila mu mawu. Dedi, mvuala Polo waba kuyitadilanga buka ti kasi ko luvalu bo kaba yindulanga mu zinzimbala ziandi. (Loma 7:24) Bukiedika, mvuala Polo wunyongina masumu mandi ayi wubotama. Khumbu mueka nandi wutuba ti “wudi wutsuka mu bapostolo boso” ayi nandi “lutidi” masumu.—1 Koli. 15:9; 1 Timo. 1:15.

7. Mbi tufueti tebukanga moyo matedi musumu tuvola kumbusa?

⁷ Tat’itu yi diyilu wunkanikisa ku tulemvukila befu kunyongina masumu mitu. (Minku. 86:5) Befu kunyongina masumu mitu mu bukiedika, tulenda ba lufiatu ti Yave—wala tulemvukila.—Kolo. 2:13.

8-9. Budi tulenda nungina mayindu ma kuyimuena ti tuisimvanga ko malutidi mu kisalu ki Yave?

⁸ Befu boso tuntomba kusadila Yave mu ntima woso. Kheti tulenda kuyimuena ti tuisi ko bafuana muingi kutambula lunungu luandi. Khomba mueka bantedilanga Amanda wutuba: “Minu yaba yindulanga ti yala tatamana kuvanga malutidi mu kisalu ki Yave. Ayi zikhumbu zinkaka yintombanga kuvanga mambu makhambulu mu kitesu kiama. Ayi mi kukhambu nunga kuvanga mawu, yinyindulanga ti Yave widi mu kiunda mu kibila ki mambu beni.”

⁹ Buidi tulenda nungina mayindu ma kuyindula ti tulendi vanga ko mawombu muingi kukuangidika Yave? Yave ka tukuikanga ko kuvanga mambu makhambulu mu kitesu kitu. Nandi wunkuangalalanga beni bo tunnunga kuvanga mambu make mu kitesu kitu. Yindula bifuani bi Kibibila bi batu basadila Yave mu ntima woso. Dedi mvuala Polo, nandi wusamuna zitsangu zimboti mu kifuza, wuvanga ziviagi ziwombu mu kisalu ki misioni ayi wusadisa kutsikika bimvuka biwombu. Kheti bobo, va monika mambu mantula nkaku mu kisalu kikuyivana. Bukiedika ti nandi kasa baka ko lunungu va mesu ma Nzambi? Ndamba. Nandi wutatamana kuvanga mo kanunga ayi Yave wunsakumuna. (Mava. 28:​30, 31) Bobuawu mvandi, mo tumvana kuidi Yave malenda ba disuasana, vayi tulenda kuyikuvusa: Kibila mbi tumvangila mawu? Tuemmona mua ziphila Yave kammonisinanga ti tuidi lunungu va mesu mandi.

BUIDI YAVE KAMMONISINANGA LUNUNGU LUANDI?

10. Buidi tulenda “kuwila” Yave kutu kamba ti tuidi lunungu luandi? (Yoane 16:27)

¹⁰ Mu nzila Kibibila. Yave wunzolanga kumonisa lunungu luandi kuidi batu bo nandi kanzolanga. Masonoko mantubila khumbu wadi Yave kakamba kuidi Yesu ti wu kunzolanga ayi widi lunungu luandi. (Matai 3:17; 17:5) Ngie wuntomba kukuwa Yave ka kukamba ti ke lunungu luandi? Yave kayolukanga ko yitu mu kimutu, vayi wunkolukanga yitu mu nzila Kibibila. befu tulenda kuwa Yave ku tukamba ti tuidi lunungu luandi bo tuntanga mambu Yesu katuba mu zibuku zintubila matedi nandi. (Tanga Yoane 16:27.) Yesu wulandakana kimutu ki Tat’andi mu phila yivedila. Diawu bo tuntanga mambu Yesu kakamba kuidi minlandikini miandi kheti baba batu ba masumu, tulenda mona buka ti Yave kemu kutu kamba mambu beni.—Yoa. 15:​9, 15.

11. Kibila mbi bo tumviokila mu ziphasi tulendi yindula ko ti tusiedi ko lunungu lu Yave? (Tia. 1:12)

¹¹ Mu kutuvana lusalusu luntombulu. Yave widi phuila yi kutuvana lusalusu lu biuma tuntomba. Khumbu zinkaka Yave wumbikanga tuviokila mu mambu maphasi, dedi bumonikina Yobi. (Yobi 1:​8-11) Bo tumviokila mu ziphasi, masinsundula ko ti tusiedi ko lunungu lu Nzambi. Ayi ziphasi zi tuvana luaku muingi kumonisa luzolo lungolo ayi lufiatu tuidi mu Yave. (Tanga Tiagu 1:12.) Bo tumviokila mu ziphasi, befu tummonanga luzolo lu Yave mu befu ayi wu tusadisanga kukindama.

12. Mbi tulenda longuka mu kifuani ki yaya Dmitrii?

¹² Mona kifuani ki yaya Dmitrii ku Ásia. Nandi kasa bue ba ko kisalu ayi vavioka zingonda ziwombu muingi kubue baka kisalu kinkaka. Diawu kabakila makani ma kubuela kukivana mu kisalu ki kusamuna, mu phila ayoyo nandi wumonisa lufiatu mu Yave. Vavioka zingonda ziwombu mu khambu baka kisalu ayi wubakana kimbevu kingolo. Nandi wumona ti kabasa dukisa ko buboti kiyeku kiandi ki kuba mfumu dikanda ayi wuyindula ti kasa ba ko lunungu lu Yave. Vayi builu bumueka, muan’andi wu nkietu wuntuadila nkanda wuba matangu ma Yesaya 30:15. Mawu mantuba: “Munkuiza bakila mangolo, benu kutatamana bavumbama ayi kumfiatila.” Bosi muan’andi wunkamba, “Papa, ngie kuba mu kiunda yindulanga mu mambu amomo.” Yaya Dmitrii wuvisa ti kafueti vutulanga matondo kuidi Yave. Ayi wuvisa ti dikanda diandi, diba biuma biaba tombulu muingi kuzinga. Nandi wutuba “Vaba tombulu to minu kuba wuvumbama ayi kutatamana kufiatila mu Nzambi.” Boti widi mu kuviokila mu mambu ma phila ayoyo, wulenda ba lufiatu ti Yave wunkuiza kusadisa kukindama.

13. Nani Yave kalenda sadila muingi ku tumunisa ti tuidi lunungu luandi ayi buidi kamvangilanga mawu?

¹³ Mu nzila zikhomba zitu. Yave wummonisanga ti wutuvuanga nkinza mu kusadila zikhomba zitu. Dedi, nandi kalenda sadila batu muingi ba tukamba mambu malenda ku tukindisa mu thangu yifuana. Khomba mueka yinkietu ku Ásia wumona mawu bo kaba viokila mu ziphasi. Bambotula mu kisalu ayi wuyiza bakana kimbevu kingolo. Bosi nnuni’andi wuyiza vola disumu dingolo ayi wubika kubue ba nkulutu wu kimvuka. Nandi wutuba: “Yisa visa ko kibila mbi mambu amomo mambonikina.” Mu kibila akiokio, wuyindula ti “nzimbala kavanga ayi kasa bue ba ko lunungu va mesu ma Yave.” Nandi wudinda kuidi Yave, muingi kamvumbika mabanza mu zikhuamusu kaba viokila. Buidi nandi kavangila mawu? Nandi wubue tuba: “Bakulutu ba kimvuka bayoluka yama ayi bakhindisa mu kumbonisa luzolo Yave kadi mu minu. Buviokila thangu yibue dinda lusalusu kuidi Yave. Mu kilumbu beni yitambula nkanda wufumina kuidi zikhomba mu kimvuka kiama. Bo yitanga nkanda beni, yimona ti Yave wuyuwa minsambu miama.” Bukiedika, khumbu ziwombo Yave wumbonisa ti yiba lunungu va mesu mandi mu khindusulu yitambula kuidi bankaka.—Minku. 10:17.

14. Phila mbi yinkaka Yave kammonisinanga ti tuidi lunungu luandi?

¹⁴ Yave mvandi wummonisanga ti tuidi lunungu va mesu mandi mu kusadila zikhomba zitu muingi kutuvana malongi mantombulu. Dedi mu sekulu yitheti, Yave wusadila mvuala Polo muingi kusonika 14 di minkanda kuidi zikhomba ziandi. Mu minkanda amiomio, Polo wuvana malongi ma tsembolo mu luzolo ayi mu phila yifuana. Kibila mbi Yave katuadisila mvuala Polo muingi kasonika minkanda amiomio? Yave widi tata yimboti ayi wusembanga ‘bana bandi kanzolanga.’ (Zinga. 3:​11, 12) Befu kutambula malongi mabongulu mu Kibibila, tulenda ba lufiatu ti tuidi lunungu va mesu ma Yave. Diawu bo mutu katuvana malongi mabongulu mu Kibibila, mawu masinsundula ko ti tusiedi ko lunungu va mesu ma Nzambi. (Ebe. 12:6) Mambu mbi mankaka mammonisa ti tuidi lunungu va mesu ma Yave?

BIVISA BINKAKA BIMMONISA TI TUIDI LUNUNGU LU YAVE

15. Kuidi nani Yave kamvananga phevi’andi yilongo ayi kibila mbi mawu matuvanina lufiatu?

¹⁵ Yave wumvananga phevi’andi yinlongo kuidi batu badi lunungu va mesu mandi. (Matai 12:18) Befu tulenda kuyikufusa, ‘Yilenda nunga kumonisa mbutu wu phevi yinlongo mu luzingu luama?’ Ngie wummonanga ti weka beni mvibudulu kuidi bankaka kena ava wuzaba Yave? Bukiedika, bo ngie wunluta monisa phevi yilongo, buawu wunluta muena ti ke lunungu va mesu ma Yave!—Tala quadro “Mbutu wu Phevi Widi . . . .”

16. Nani Yave kansadilanga muingi kulonga bankaka zitsangu ziandi ayi buidi ngie wumuenanga? (1 Tesalonika 2:4)

¹⁶ Yave wuvana zitsangu zimboti kuidi batu badi lunungu luandi. (Tanga 1 Tesalonika 2:4.) Tala buidi yaya Joselin kabakila ndandu mu kulonga zitsangu zimboti kuidi bankaka. Kilumbu kimueka yaya Joselin wukotuka mu kiunda. Nandi wutuba: “Yimona buka ti yisa ba ko ni kiuma muingi kukaba, vayi bo yiba ntuami ntuala ayi kiba kilumbu kiama ki kubasika mu kisalu ki kusamuna, diawu yivangila nsambu ayi yiyenda mu lukutukunu lu kisalu ki kusamuna.” Ayi mu meni beni yaya Joselin wuzaba nkietu mueka bantedilanga Malia, wuba ntima wukubama ayi wuvitika ndongukulu yi Kibibila. Buviokila thangu, nkietu beni wuvanga nsambu mu kudinda kuidi Yave muingi kamvana lusadusu. Mu kuyindula mu kifuani akiokio, yaya Joselin wutuba: “Yimuena buka ti Yave waba kukhamba, ngie widi lunungu va mesu mami.” Bukiedika, bakana ko batu boso bala tutambula mu kisalu ki kusamuna. Vayi tulenda ba lufiatu ti, Yave wunkuangalalanga bo tumvanga mamoso tulenda nunga muingi kuzabikisa bankaka zitsangu ziandi.

17. Mbi belonguka mu kifuani ki yaya Vicky matedi khudulu? (Minkunga 5:12)

¹⁷ Yave nsadilanga khudulu yi Yesu kuidi batu badi lunungu luandi. (1 Timo. 2:​5, 6) Buabu boti tummona phasi kukikinina ti tuidi lunungu lu Yave, kheti tuidi babotama ayi tuidi kiminu mu khudulu? Tebuka moyo ti bakana ko khumbu zioso tufueti fiatila mu mayindu mitu, vayi tufueti fiatila mu Yave. Nandi wumvuanga nkinza baboso badi kiminu mu khudulu ayi wunkanikisa ku basakumuna. (Tanga Minkunga 5:12; Loma 3:26) Kuyindula mu khudulu kusadisa yaya Vicky. Kilumbu kimueka bo kayindula mu khudulu nandi wuvisa ti: “Yave wukummonisanga mvibudulu mu thangu yiwombo. . . . Diawu yitubila ti yisafauna ko kutambula luzolo luandi kibila yisi ko wufuana mu kutambu nlemvu wu masumu mami mu khudulu yi Muan’andi.” Mu kuyindula mu khudulu, nandi wumona ti Yave waba kunzolanga. Bobuawu mvandi, Befu kuyindulanga mu khudulu tunkuiza visa ti, Yave wutuzolanga ayi tuidi lunungu va mesu mandi.

18. Lufiatu mbi tulenda ba befu kutatamana kuzola Tat’itu yi diyilu?

¹⁸ Kheti tulenda vanga mangolo muingi kusadila mambu tuma tubila mu dilongi adidi, khumbu zinkaka tulenda ba mu kiunda ayi kuyikuvusa boti tuidi lunungu va mesu ma Yave. Ma kumonika, tebuka moyo ti nandi wumvuanga nkinza “bo bantatamananga kunzola.” (Tia. 1:12) Diawu, tatamana kufikama Yave ayi zaba ti ngie widi lunungu va mesu mandi. Tebukanga moyo ti Yave “kasi ko kinanu kuidi kadika mutu mu befu.”—Mava. 17:27.